MZP HRUAITU LEH CHAKMA COUNCIL THUNEITU TE INKAWM

Aizawl | March 28, 2019: Nimin March 27 2019(nilaini) chawhma dar 11:00 khan MZP hruaitu te leh Chakma Autonomous Council (CADC) thuneitute Chakma Council CEM office Chawngte C ah inkawmna hun an nei a. MZP hruaitu te hi President L. Ramdinliana Renthlei in a ho a, CADC thuneitute hi CEM Pu Rosik Mohan Chakma in a ho bawk a ni.

 

Inkawm khawmna ah hian MZP hruaitu te hian thil chi hra hrang an sawi lang a, chung an sawi hrang hrang te chu:-

1. CADC area a Mizo khua te council atanga development awm thei ang te lo pe a, lo ngaihsak ve tur te.

2. CADC area chhunga Chakma khua dan lo a din te thiahho dan tur te

3. Mizoram chhunga Bangladesh atanga foreigner lo lut tu tam lutuk chungchang te.

4. CADC area chhunga Mizo missionary ten harsatna leh en hran an tawh chungchang te

5. Chakma Autonomous District Council (CADC) hnathawk tur lak chungchang a Zohnahthlak te duhsak ve tur leh an tling a nih chuan lo la ve tur te.

6. Chakma Autonomous District Council (CADC) a Chakma in hung bik na dan chungchang te,  sawipui an ni.

Chakma Autonomous District Council (CADC), Chief Executive Member (CEM) Pu Rosik Mohan Chakma chuan MZP hruaitu te hnenah chuan, "CADC area chhungah Chakma te tana inhungbikna dan Chakma nilo in, in leh lo, ram an neih theih loh na dan siam a awm lo a. Chakma nilo pawhin an duh a, pawisa an neih chuan in leh lo, ram an nei vek thei a, hetiang a inhungbikna dan hi kan nei lo a ni" a ti a. Mizo khua CADC area a awm te tan induhsak loh bikna kan nei lo a, Chakma khua te nen ang khat vekin kan en a ni. Dan loa khawdin hi tlemte kan nei a, an tin rem dan kan ngaituah ho dawn a nia tiin MZP hruaitu te hi a lo hrilh bawk a ni. 

CEM, CADC chuan, CADC hnuaia hnalak a awm chuan a theihna chin chin ah MZP hruaitu te ngen ang hian Zohnahthlak te kan lo duhsak dawn a nia, a ti a. Bangladesh atanga lo lut foreigner te an awm tih kan hria a, an tam leh tam loh chu kan chiang bik lo a, keini council thuneitute pawh hian foreigner hi lo lut lo se kan duh hle a, Mizoram Sorkar te nen tangkawp in foreigner te dapchhuah kawngah hma kan la ho zel dawn a nia, a ti bawk a ni. 

MZP hruaitu te leh CADC thuneitute inkawm khawmna hi MZP lam atangin President L. Ramdinliana Renthlei ho in, Andrew F. Lalramnghaka Finance secretary, Jacob Lalmuanpuia I/c information, Herbert Ramengmawia President Pang Zirlai Pawl General Headquarters leh Lianhmingthanga General Secretary Mizoram Bawm Students Association te an ni a. Chakma Autonomous District Council thuneitute hi CEM Pu Rosik Mohan Chakma hoin, Mohan chakma EM, Buban Chakma EM, Durjya Dhan Chakma EM, Lakhan Chakma EM leh thuneitu dang te an ni. MZP hruaitute leh Chakma Autonomous District Council thuneitute hi inpawh tlang takin thil an sawiho a ni.

MZP hruaitute hian Chakma Autonomous District Council area chhunga Zohnahthlak khaw hrang hrang te fangkualin an dinhmun te an zirchiang nghal dawn bawk a ni.