Isua hmutu mitdel Fanny Crosby

- Lalremruata Khiangte

“If I had a choice, I would still choose to remain blind... For when I die, the first face I will ever see will be the face of my blessed Saviour.”

Kraws kiangah ka nghâk reng ang,

Beisei leh ring chungin;

Hmun mawi tak ka thlen hunin,

Lui râl lehlamah chuan.... 

tih hla han sak châng hi chuan ka meng phal ngai lo. A phuahtu Fanny Crosby hian, thei ta se, a mit a meng phalin i ring em? Teuh lo mai. “Duhthlang thei pawh lo ni tehreng ila, mitdela awm reng hi ka la thlang zel fovang. A chhan chu, ka thih huna ka hmuh hmasak ber tur chu min chhandamtu hmel duhawm a ni dawn si a,” tiin a nu hnenah a sawi a. Khawvel êng a la hmuh chhin ngai eih lohna khawvela Isua hmu chiang bertu a ni lawi si. A lo hetih bik vang hi a ni ange, “Ka tlantu ka hre chiang ang lui râla ka thlen hunin. A hmel duhawm min lo lawmtu a ni ang,” a lo tih thên ni.

Biak Inah nise a hla phuahte kan sa âwl lova. Khawhar inah nise a hla phuahte sa lova ṭîn ngaihna a awm lo tluk hial a ni a. Fakna hla 8000 chuang phuahtu Crosby chanchin hi kan hre hlawm lo a nih pawhin a hlate hre lo anga inngaih erawh thiang lo tluk hial a ni ta ve ang. Ṭhenkhat chu Nursery Rhyme ang hialin school-ahte kan sak fo tawh ṭhinte kha an ni a. Ṭhenkhat chu Mizo kristiante thlarau nun châwm hliah hliah ṭhintu hla lâr ber berte an ni hlawm bawk. Kristian Hlabu kan hman mekah hian a hla phuah 31 zet telh a ni a. Isu, kraws min hnaihtir rawh tih leh Thihna lui piahah khawpui mawi tak chu a awm tih hlate phuahtu kha a ni,” ti ila, i hmelhriat thei nghal maiin ka ring. 

Khatihlaia United State kha chu mihring an la tlemin leilung hausakna hi an hmang sêng lo a ni deuh ber a. Mitin mai hian chenna In an sak pawhin a ni lo berah chhawng hnih talin an sa ngei ngei ṭhin. Chhawng hnuaiah eirawngbawlin rual an pawl a. Chhawng chung chu chhungkaw thil bik leh mut hahdam nan chauh an hmang ṭhin. Ren hauh lova thing leh mau hman tur a la awm lai kha a ni a, In sak-dan-phung-a an neih pawh hi thil inhmeh tak a ni. Mahse, Fanny Crosby chu mi rethei fa a nih avangin chhawng pawh nei lo in te tak tê, New York khawpui hmar lam kilometer 80 vela hla thingtlang khaw pakhat Brewster-ah March 24, 1820 khan a piang a. A lai-ah-hnan hming chu Frances Jane van Alstyne née Crosby a ni a. Frances Jane “Fanny” Crosby tia hriat ṭhin ni mah se, tun thleng hian Fanny Crosby tia hriat hlen a ni.

Nausen thla khat leh a chanve mi chauh a la nih laiin a mit a na chiam mai a. An khaw doctor leh an chhungkua pawhin an lo râwn fo tawh chu khualzin vanga a awm bo lai tak a ni lehnghal. Thingtlang khaw danga an doctor chu kovin an râwn ta a. Ani chuan anṭam rawt dip tihlum pip pep chu puanthema tuamin a mit deh nana hmang turin a hrilh a. Nausen Fanny chuan chutia enkawl chu nâ a ti ngang mai a, a ṭap rawng rawng ṭhin a. A nu Mercy pawh chuan doctor pangngai lo thlen huna enkawl mai a rawt chiam ṭhin na a, an doctor râwn chuan rei tak enkawl lohva awmtir a nih chuan thil ṭha lo zawk a thleng thei niin a sawi bawk si. Natna enkawl nan anṭam hi Greek ho hunlai pawh khan an lo hmang daih tawh ṭhin a. China ho pawhin kum sang tam tak kalta aṭang khan an lo hmang fo tawh ṭhin. Mahse, Fanny Crosby tan erawh mitdel hlenna a ni ta tlat mai. Chutachhapah, kum a tling ve dawn chauh tihin amah hringtu a pa John Crosby chuan a thihsan leh ta nghal a. Chuta chinah chuan a nu Mercy Crosby leh a pi Eunice Paddock Crosby-ten an enkawl ta a. An doctor râwn pawh chu khua aṭangin a relhru a, chin hriat lohin a bo hlen ta a ni.

John leh a nupui Mercy Crosby te hi chi leh kuangah pawh in-lam-hnai tak leh inlaichin hnaivai tak an ni a. Chhungkhat laina hnaivai tak innei an nih hi Fanny hian a ngai haw deuh niin mi ṭhenkhat chuan an sawi a. Mahse, amah Fanny erawh chuan hre lo leh ngai haw lo ang hrimin a sawi chhuak ngai miah lo thung. A pi Eunice Paddock Crosby kaihhruaina avangin Fanny nakin nun tur chu nasa takin hruai danglamin a awm a ni, an ti ṭhin. Thla 3 mi lek a la nihlaiin a pi seilenna New York khawpui chhunga North Salem vengah an pêm a. A pi leh a nu hi protestant ruh tak mai an nih vang a ni maithei, Fanny pawh a lo leikân deuh hnuin John Street Methodist Episcopal Church-ah a lawi ṭhin.

Kum 5 mi lek a la nih laiin an vêng chuan sum thawh khawmin an hunlaia mi zai thiam doctor hmingthang Dr. Valentine Mott hnenah an entir a. Ani chuan eng thiamna hmang pawhin zai ngial mah se, a mit chuan khua a hmu thei tawh lo hlen dawn a ni tiin a lo hrilh a. (A hnu zela doctor an râwnte pawhin Fanny mitdel dan chungchang sawiin hetiang chi hi inthlahchhawn vanga awm a ni hauh lo nachungin piantirh aṭanga awm ṭhin niin pianpui ang hrimin tihdam ngaihna rêng rêng awm lo chi natna a ni e, an ti zel hlawm.) Naupang dangte angin lehkha a zir thei lovang a, mite thiam ang pawh a thiam thei ve dawn ta lo tih a chiang ta. Mahse, kum 3 dang a vei leh hman awrh tihin Fanny chuan mi danglam bik a nihna a tilang ta. Mizo ṭawng tluangtlama dah chuan hetiang deuh hi a ni ang chu:

Ka chhing mit del mah se,

Ka thinlung hi a va lawm êm;

He leiah hian lawm tur ka lo ni,

Mi tam takin an dawn ve loh;

Malsawmna ka dawn zozai vangin,

Ṭapa inhnit tur ka ni lova;

Ka thei hek lo....

tiin kum 8 mi lek Fanny Crosby chuan hla thu mawi tak mai a ziak chhuak ta tlat mai. “Pathian chatuan remruat chuan ka damchhunga khaw hmu ve lo turin a lo rêl a ni ang e. Hetianga dah hran ka nih avang hian lawmthu ka hrilh ṭhin. Fiah taka khaw hmuh theihna hi pek ni dawn pawh ni ila ka dawng duh hauh lovang. A chhan chu, ka mit hmuh leh khawvel mawinate hian tibuaitu awm lova amah ka fak theihna hi a dâl (tibuai) dawn si a,” a ti hmiah mai. Piantirh aṭanga mitdel tluk thawthâng a ni bawk a, “Vanram ka thlen tikah chuan makti lutuka ka mit timeng phar nawn awn awn tu tur chu min chhandamtu hmel duhawm a ni ang,” a ti thlawt rêng a ni.

Kum 1828 a lo inher chhuah chuan Mercy leh Crosby te chhungkua chu Pi Hawley chenna Ridgefield, Connecticut a khawsa turin an pêm leh ta a. Hetihlai hi Fanny tana inzirna hun pawimawh tak a ni ta a. A pi Eunice leh an in luahna nu Pi Hawley te chuan bible chângte an zirtir ṭhin a. Hapta khat chhungin bung 5 zel a vawng (by heart) ṭhin. Kum 15 mi a lo nih chuan Chanchinṭha bu 4, Mosia lehkhabute, thufingte, Solomona hlate bakah Sâm ziak eng emaw zat chu a rilruin a vawng diam tawh a ni. Kum 1832 a lo inher chhuah leh chuan rimawi tum thiam tak pakhat hian Ridgefield rawn tlawhin naupangte chu rimawi rem dan a zirtir ṭhin a. Hetih hunlai hian, a ṭum khatna atan, Fanny chu Methodist Biak Inah a inkhawm a. An zai leh hla rem dante chuan a rilru a khawih hle nghe nghe.

A piancham vawi 15 a thlen dawn ruaiin New York Institution for the Blind (NYIB)-ah inziak lut vein lehkha a zir ve ṭan ta a. He sawrkar school-ah hian kum 8 a zir bakah graduate turin kum 2 dang a awm leh bawk a. He school aṭang hian rimawi chi hrang hrang tum dante a zir a. Zai lamah pawh a tui ngang a ni ang, Saprano sa thiam bikah a chhuak ta thuai mai rêng a ni. Kum 1838 a lo inher chhuak a. A nu Mercy chuan pasal a nei leh ta chauh a. A pasal lakah hian fa 3 a hring leh a. Mahse, vanduaithlak takin kum 1844 khan an inṭhen leh ta mai a. Fanny leh a naute chuan kum 6 chhung chauh pa enkawlna an dawng tihna a nih chu.

NYIB aṭanga a graduate hlim kum 1843 aṭangin Fanny chu sawrkarna chelhtute leh roreltute ngaihdan tihdanglamsak tumtute zingah a tel ve ṭan a. Heng ho zinga a tel chhan chu mitdel hovin zirna changtlung leh ṭha zawk an neih theih a duhsak vang a ni. Tichuan, Fanny Crosby chu mitdel a ni nachungin United States Senate zinga a chham hla (poem) chham tura koh a ni ta a. US Senate a hmeichhe thusawi hmasa ber a ni ta hial rêng a ni.

January 24, 1844 khan NYIB zirlai dangte zingah telin Congress tana concert neihnaah a tel a. Kum 1845 a president James K. Polk-an NYIB a tlawh ṭum khan Republican sawrkar fakna lam hawi chham hla a lo chham chhuahsak nghe nghe. April 1846 khan Crosby chu United States Congress joint session a thusawi tura sâwm a ni a. Hemi ṭum pawh hian Boston, Philadelphia leh New York a mitdelte aiawh leh an tana thusawi a ni. Tichuan, president fachuam ang maiin White House-ahte pawh rimawi rem leh zaiin hun a hmang ta fo mai a nih chu.

Henry Cley fapa chu kum 1847 khan Mexico indonaah a thi a. Cley fapa sûnna hla a phuah a. Cley hi thusawi thiam, dan hremi leh politician a ni a. Kentucky bial tana United States Senate leh House of Representatives aiawhtu (keiniin parliament member kan tih ang deuh hi a ni ang chu) a ni a. NYIB a rawn tlawh ṭumin Crosby chu chham hla chham tura ruat a nih avangin thiam zet maiin ama phuah ngei mai chu a han chham ta a le, a chham zawh rual rualin an khuallian Cley chuan Crosby kutah a rawn chelh a, an pahnihin mittui sur zung zung khawpin an ṭap dun ta a nih chu! “Thla 6 kalta khan ka fapa sûnna hla chham mi phuahin min rawn thawn a,” tiin Cley chuan tlawm leh zah pawh dâwn zo lova US rorel khawla mi pawimawh tak mipui hmaa a ṭah rawih rawih chhan a sawi.

Fanny chuan kum 1846 aṭangin NYIB-ah zirtirtu hna a thawk ṭan a. Kum 1843 khan NYIB a zirlai pakhat Alexander Van Alstyne, Jr. (Van Alstine emaw Van Alsteine tiin emaw an ko ṭhin) nen an inhre (inhmelhriat?) ṭan a. Van leh Fanny te chu an inngaina ta viau mai a. Kum 1855 khan Van pawh NYIB-ah zirtirtu hna a thawk ve leh ta bawk a. Tichuan, kum hnih dang a vei leh hnu chuan Van leh Fanny te chuan inneih thu thlungin an inhual ta rup mai. He hmunah hian a pasal neih hma ni 3 thleng thawkin March 5, 1858 khan Van nen an innei ta a ni.

Heti tak maia thu leh hla lama a tui chhan hi an zirtirtu hmasa ber Dr. Russ vang niin a sawi a. Russ chuan hla phuah thiam hmingthang ber ber Milton, Homer, Assian leh mi dang eng emaw zatte pawh mitdel vek an ni tiin a hrilh a. Chuta chinah chuan hla phuah lamah hian a tui zual ta hle a ni. Tichuan, kum 11 mi lek a la nih laia chham hla hralh tla zet tlangzarh (zawrh chhuah tura siam) thei ngat mitdel pahnih Homer leh Milton te rualin Crosby chuan naupang tê a la nih lai khan khaw êng a hmu ṭan daih tawh a ni. Kum 24 mi lek a nihlai khan a lehkhabu puitling hmasa ber The Blind Girl and Other Poems a tlangzarh bawk.

Nu fimkhur leh duhtui tih takah, chutiang tak chuan fakna hla lamah inhmang zovin a hun leh tha tam tak sêng mah se, Krista ringtu dik tak a nih erawh a puang tlai hle a. Kum 31 mi a nihin kum 1851 khan New York khawpuia John Street Methodist Church kohhrana harhna rûnpui a thlen laiin a inhlân ve ta chauh a. “Ṭawngṭai zawhah hla kan sa rual a. A châng 5-na “Lalpa, i tan ka inpe e....” tih kan sak thlen lai chuan ka thinlung hi vân êngin a rawn chhun êng ta a ni,” a ti.

Crosby hian kum 1902 thleng chauh dampuitu a pasal hming chawiin Mrs. Van Alstyne tih hming put a duh thu a pasal thih hma deuhvin a sawi a. Mahse, a hming lâr tawh sa chu pu turin a pasalin a tih tlat avangin a hming chu a put chhunzawm ta reng a. An nupa hian fa pakhat chauh an hring a. Mahse, nausen mai a nihlaiin a boral ta daih a. A tuar nâ ngang a ni ang, Isua hnenah ka him a (Safe in the arm of Jesus, KHB 494) tih hla phuahin fate lo chân tawh nu leh pa tam takte thlamuantu a nih phah ta a ni. Kum 44 mi a nihin kum 1864 khan Biak Ina sak chi hla puitling hmasa ber a phuah tih pawh hriat tel a ṭha âwm e.

Khawvel hriata hla phuah thiam anga a lâr ṭanna chu Aw Isu, kei min kal pêl suh (KHB 255) tih hla kha a ni. Kum 1868 khan Tan In tlawhin a thawhpuite nen an feh chhuak a. A thusawi laiin tâng pakhat chu, “Aw Lalpa, min kal pêl lul suh ang che!” tiin a ṭap chhuak hawm hawm mai a. Chu thu chuan a ṭhâwng hle mai a. A ṭhian pakhat William H. Doane fuihna zawmin he hla hi a phuah ta a ni. Methodist kohhran hla phuah leh zai thiam hmingthang Ira D. Sankey chuan, “London khawpuia kum 1875 a inkhawmpuiah khan he hla tluka lâr hi a awm lo,” a ti thlawt asin. Hetihlai hian Sap pachal pakhat, zu ngawlvei hian, mipui zinga ding chungin he hla hi a lo sa ve a. A sa ve ka han ti ringawt mai pawh a, sak pawh sa ring ngam lovin ama hriat tawk lekin a lo chham ri ve bal bal zawk a ni tak e. Tu hriat tham loh bawkin, “Aw... Min kal pêl loh hrâm ka ve beisei tak êm,” a ti sup bawk a. A tûk zan inkhawmpuiah chuan he hla hmang bawk hian bul ṭan a ni leh a. Chumi ṭum chuan zu ngawlvei-a chu chhandamin a awm ta hlauh mai. Kum 40 hnua America sumdawng hausa tak a nih thleng pawhin chu hla inziahna hlabu tê chu a kalna apiangah a keng zel ṭhin a. A lawm êm avangin Fanny Crosby chu zawng chhuakin dollar 20 a pe hial a ni.

Ṭhenkhat chuan Isua hnenah ka him (Safe in the arm of Jesus, KHB 494) hi a hla phuahte zinga lâr berah an ngai ve thung.

Kum 1868 kha a ni a. A ṭhianpa Doane chu hmanhmawh zetin Fanny Crosby te inah chuan a tei lut a. “Miss (zirtirtu) Fanny, Cincinnati panin rêl a chhuak mai tawh tur ka ni a. Kan chhuah hma hun reilote awmah hian thil pakhat min tihsak ta che?” tiin a han ngen hmasa zet a. Chutah, “Inkhawmpui kan nei dawn a. Chuta sak tur chuan hla thar ṭha tak ka mamawh a ni. Mi tupawh, naupangte nen lama an thinlung tihmin nghal thei tur hla thar min han phuahsak teh. Thla leh mai khian Cincinnati khuaah Sunday School inkhawmpui a awm dawn a. Chutah chuan puitling mai ni lovin naupang leh ṭhalai eng emaw zat an lo tel ngei dawn si a. Hla thar ka mamawh takzet a ni,” a tih zawm zat a.

A ṭhianpa chuan hla thu awm lo thlûk neih sa a nei a. “Ngun takin lo ngaithla rawh,” tih leh piah lawka piano awmna lam pan chu a rual nghal a. Rimawi chu a han tum ṭan ta a. A tum ṭan chauh tihin Fanny chuan, “I rimawi rem khan Isua hnenah ka him tih hla alawm a rem le,” tih pahin ziakfung leh lehkhapuan a chuh ve nghal a. Rimawi tum leh hla thu phuah zawh chu a inrual vel chiah a ni. Chu hla thu chu ennawn hman ni tawh hek lo, a thlep nawk nawk a, a ṭhianpa chu a pe ta a. Darkar chanve leka rel tlan tur pana chhuak tur a nih bawk si avangin, “Tlai i hlauh chuan tikhan kalpui nghal nal nal mai rawh. I duh leh rêl chhungah chuan i va chhiar dawn nia,” a ti zui hman hrâm a ni.

Sankey-an a hnua hla mawi, nalh leh lâr zeta a siam hnu chuan he hla hian chanchin ngaihnawm tak tak a nei chho malh malh reng a. Ṭum khat pawh, driver pakhat hian a passenger zingah chuan Fanny Crosby a tel ve reng mai tih a hmu hlauh mai a. A lukhum phawk meuhin chibai a buk a, a ṭap zui ta mial mial a. Police pakhat hi kovin chu rêlah chuan Fanny chu him takin a chuang ngei a ni tih a hriat theih nan thu a han pe a. “Kâr kalta a ka fanu kan phûm dawn khan Isua hnenah ka him tih hla kha kan sa rual asin,” a ti chuai raih a.

Africa khawpui Uganda a râwng taka Bishop James Hannington an thah hnu khan vanneihthlak takin a dairy chu hmuhchhuah a ni hlauh mai a. Thah tura an hruai lai pawhin Isua hnenah ka him tih hla sa chungin a zui zel a. A dinhmun hlauhawm leh derthawng takah pawh hlim leh thlamuang takin a nui thei hial niin a inziak.

Kum 1918 indo lai kha a ni a. Finnish (Finland ram mi) engineer Nordenberg leh a hote chuan khaw pakhat hi hualin ram inrelbawlna fel lo avanga helna chawk chhuaktute zinga mi eng emaw zat an man a. An zinga 7 chu kah hlum tur an ni a. A tuk Thawhṭanni khua a lo var chuan kah hlum turte chu an hmai tuam sakin an khalh chhuak ta hlawm a. Chutihlai chuan an zinga pakhat chuan Salvation Army ho sak aṭanga hapta 3 vel lek kaltaa a thiam ve chauh Isua hnenah ka him tih hla hi a sa rât rât a. Nordenberg sipaite chuan ṭhingṭhi chunga ṭawngṭai an phalsak a. An ṭawngṭai zawh chuan an hmai tuamna puante chu hlihsak turin an ngen a. Anmahni kâp hlumtu turte en rân chungin he hla hi an sa rual ṭhâm ṭhâm a. Chutihlai chuan sipaite chuan silaimu hmangin chatuan ramah an thawn liam ta hlawm a. He’ng mite thahna tur thupek petu Finnish engineer Nordenberg chuan chhandamtu Isua hmuh phahin chawp leh chilhin chhamdamna a chang zui nghal niin a sawi.

Zaia rawngbawltu lâr Sankey leh ‘harhna lalpa’ an tih hial Moody te hunlai khan, mimala sawi râlah chuan, Fanny Crosby hla tluka sak lâr leh Pathianin rawngbawlna kawnga a hman nasat hla a awm lo hiala sawi a ni a. Sankey-an mimal hla a sak hnem ber pawh Fanny Crosby hlate bawk an ni.

Aw le, a hla phuahte hian chuai ni hmel hmu lovin kristiante hi min la awi fo dawn a. Mahse, a lei hringnun zin kawng erawh mitin chunga khuarêl angin tawp lo thei a ni bik lo. Kum 90 a nih khan, “Bible leh a chhunga thu nung awmte hi kum 19 ka nih lai ai khan kum 90 mi ka nih hian an hlu zual,” a ti thlawt a ni. A dam rei chhan an zawhin a lei a vêng ṭha a, a tui tihzawng apiang a ei mai mai ngai hek lo niin a sawi. A thih hnu pawha sawi thar leh fo ṭhin chu, “Min lainat duh rêng rêng suh u. Khawvela mi hlim ber ka ni alawm,” tia a sawi kha a ni.

Kum 92 mi a nihin Harvard a tlawh a. A hun hnuhnung lam chu Bridgeport, Connecticut-ah a hmang a. Amah enkawltu Mrs. Booth an tih mai nu pakhat nen an khawsa a. Thla 6 chhung zet chu thisen zâm chhunglam a thau insiam arterios sclerosis natna leh thluak chhung thisen zâm chat avanga thisen pût cerebral hemorrhage natnate avangin a bawksawp reng a. Hetihlai hian a kum 95 piancham a thleng dawn ruai tawh a. Mahse, he lei hringnun kawng chhuk chho a zawh hun chu a lo tawp dawn hnai ta reng mai. A fanu sûntu a ṭhian hnaivai tak pakhat hnemna tur thu chham chi chu thei leh thei lovin a chham hrâm hrâm a. Hla taka khaw dur leh ruahpui sur piah lama chatuan êng ropui tak lo lang chu a thlir a. A va nuam dawn êm aw! Chu hmunah chuan lungngaih, nat leh inṭhen a awm tawh lovang a, chu lui kamah chuan kan intâwk khawm ang, kan chatuan inah khian..... tiin February 11, 1915 zan chu a hmang ṭumtla ṭêp a. Mahse, a tûk khawvar hma dar 3 velah chuan nikhaw hre lovin a lo awm dêr tawh a. Lungngaih leh mittui zawng zawng Isuan a hruk faina tur hmun luipui piah lam ram chu kal hmasate hniakhnung zuiin February 12, 1915 khan a lo kai ve ta a ni.

A nu leh a chhungte an lo phûm tawhna Bridgeport khua a Mountain Grove Cemetery (thlanmual)-ah chuan vuiliam a ni a. A damlaia a lo beisei ṭhin ang ngeiin a thlânah chuan lungphun chhetê siam niin chutah chuan,

A tih theih chin zawng chu a ti ta e.

Fanny Crosby

tih hi a inziak a.

Crosby hi kum 1975 khan Gospel Music Hall of Fame-ah lak luh a ni a. “Queen of Gospel Song Writers” chanchin hi sawi maia sawi zawh rual a ni lo. A bu a ziak tur pawhin lehkhapuan tam tak a ngai lo thei lovang. A hla phuahte leh a hla thute seprawtui dawn phei chuan satel dam chen zet kan dam ve a ngai hial ta ve ang. Chuvangin, he thuziak tawi tê hi amah i lo hmelhriat nan chauhva ziak a ni tih min hriatsak la ka duh a. Thiam ni ila, a hla thu ṭha zual bik tal hi chu han seprawtui ka châk teh asin. Mahse, mithiam zawkte kutthlakna turah dahin ka inkuangkuah thên zawk teh ang. Hei erawh theihngilh ngai suh:

Krista rawn pan la bo rei duh lovin,

Lalpa aw nêm chuan a ko che ngai teh;

Chhandam tur leh tihfaia’n a zawng che,

Rawn pan thuai ang che bo rei tawh lovin..... 

tiin Fanny Crosby hian a thih hnu kum 99 zet a liam tawh hnuah pawh hian i tana a ṭhahnemngaihna aw a la chhuah reng asin.

Ani chuan, “A thisena tlan sa i ni alawm, a khawngaihzia che sawi sên a ni lo,” a ti hial a. Amah dungthûla a zahngaihna mak thuchah ngaihthla a, sual nei lovin kan sual zawng a phurh avanga ngaihdamna famkim leh tlanna zârah chatuan nunna hial hlana kan awm tawh avangin,

Lalpa ka pan ngam che,

Thawkrimte i chawlhtir dawn a;

I lawmna chan fo beiseiin,

I lallukhum chu khum turin;

Ka lo kal hnai zel e.... 

kan tih ve theih ṭheuh a duhawm hle.

Source: Thu Leh Hla Zêmpui (Vol-I)

Written by Lalremruata Khiangte, Publish 2015, Aizawl.

Available in all leading Book Store, Synod Bookroom, Baptist Bookroom etc.