TANPUINA PETUTE PATHIANIN A LET TAM TAKIN MALSAWM SE, PU SIAMA LO DAM ZEL RAWH SE

Vankal khaw pa *Upa Lalsiama* (67) chu chhungkaw enkawltu ber niin a rem rem thawkin a nupui fanaute a chawm ve thin. Fa 3 a nei a, hrisel lohna hrang hrangin a tlakbuak hlawm avangin an khawsak a harsa thin hle.

February ni 22, 2019 (Zirtawpni) khan Pu Siama hian a ha na a tih thu a sawi tan a, reh leh mai tura an ngaih laiin a ha na chuan zual lam a pan ta zel a. February ni 27, Nilaini atang phei chuan a na ti lutuk awmngaihna a hre lova, a hriatna thlengin a vai ruai mai a. In enkawlna tur sum pakhatmah an nei bawk si lo. An mahni lainattu mi tlawmngai ten pawisa thawhkhawmin Khawzawl damdawi in an panpui ta rawih mai a ni. Khawzawl damdawi in an panna kawngah hian Pu Siama hi biak theih loh (unconscious) in a awm tan a, he chanchin buatsaih lai thleng hian a la harhchhuak lo a ni.

Khawzawl damdawi inah chuan rannung seh natna a vei tih hmuh chhuah nghal a ni a, Aizawl lamah refer a ni. Mi thahnemngai ten pawisa thawhkhawmin ambulance an hire-a February ni 28 khan Aizawl Civil Hospital an panpui ta rawih a.

Aizawl Civil Hospital-ah ICU khum ruak a awm lova, vanneih thlak takin Falkawn lamah khum khat a lo ruak hlauh mai. Test hrang hrang tih ngai a ni a, Health care, RSBY etc engmah an lo nei si lo. Aizawl lama an mahni chhung hnaivai anga an belh ber Pi Lalhmunliani Bawngkawn Shalom veng chuan min rawn be pawpin tanpui an ngaih thu a rawn thlen ve tawp mai a ni.

MSR charity fund kan kuta awm mek atangin March ni 3, 2019 khan cheng singkhat kan lo hlan a, a tul anga in be zel turin kan in thlah a. Hetih mek lai hian, nimin piah mai khan Pathian fakna hla sa thin, zaithiam lar tak *Sawmtea Chhangte* chuan 'tanpuingai hriat ka nei em' tih min zawtin min rawn be pawp hlauh mai a. Chapchar Kut chhun leh zan lama a zai hlawh cheng singkhat chu a bo a bang awm lovin Upa Vanlalsiama tan hian a hlan dawn a ni.

Vawiin khan Sawmtea a pawisa hi RC Khuma VIP Tailors dawr atangin ka va lam a, damlo enkawltu ten naktukah an rawn lam dawn a ni.

Sawma pakhat pawh ni lo, Chapchar Kut-a a hlawh chhuah 100% midang tan a hlan hi ropui ka ti a, a hming tihlan a hreh hle na chungin, chhuang takin ka rawn tarlang a ni e.

Tanpuingaite tana Pathian hminga ui lova petute zawng zawng Pathianin a let tam takin malsawm rawh se..🙏

- Vanneihthanga Vanchhawng : Mizo Special Report