HRINGNUN LEH KEI

   

 ✍Ampuii Hmar

Thu thiam tak,pehhel kual mawi vel a,A,Aw,B chhep rem thiam em em mai ni miah lo leh, literature hrezau lo tak chung hian zamna leh tim chhinna eih nei map lovin thu leh hla lamah hian ka arte tuiluh ve hmiah hmiah a,ka arte tuitlak ve bawrh bawrh mai zawng anih hi.Hei pawh hi Ka ngaihdan leh ka rilru ina a phak ang tawkin thaikawi biahthu Di chu ni hauh lo mah se ka rawn thai kawi ve leh niaih mai dawn a ni.

Hringnun thui tak la zawh lo mah ila,

ka daichin ah hian hringnun awmzia hi ka man pha zan lo fo thin a.A changin ka hlim a,a changin ka lungngai a,a changin ka na a,a changin ka nui a,a changin ka tap bawk a.A changin,"LALPA,Ka lawm e",ka ti a.A changin,"LALPA,engvang nge?/engati bik nge?",ka ti thul.Hringnun hi a mawi viau in,a ropui viau ang a ngaih chang ka nei ang bawkin,a chang chuan ka kham viau leh lawi bawk a.Hringnun leh kei hi kan inmil lo nge ni a kan inmil lutuk zawk tih pawh ka hriatthiam vak lem loh chang lah atam.

 

Hringnun hi ka tan a parvul lai chuan ka hlim viau thin,ka nui a,nuam pawh ka ti viau thin.Mahse kumtluang par meuh pawhin kumtluang a daih lo ang bawkin ka hringnun parvul pawhin kumtluang a daih bik thin silo a,ka hringnun parvul chu a lo chuai ve leh mai bawk a.Chutiang hunah chuan ka lungngai a,ka na a,ka tap ve leh bawk bawk thin a,mahse. .

Hringnun hi ka tan a parvul reng lo,tin a chuai reng lo bawk.Hringnun ka tana a parvul lai chuan hringnun hi thilpek a ngaiin,ka chen a,ka lawm a,ka hlim em em mai a.Hringnun ka tana a chuai a,hringnun ina mi vuaktluk chang chuan lungngaiin,na in,tap mah ila,a rang thei ang ber a thawh leh vat tumin ka bei leh mai thin.Hringnun inlumlet karah hian natna tur ka zawng anihchuan natna tur tam tak ka hmu ang tih ka chiang a,chutiang bawkin he hringnun inlumlet karah vek hian zirtur ka zawng anih ngat phei chuan natna aia tam zawk zirtur ka hmu thei ang tih ka chiang bawk.

Hringnun leh kei hi kan inbuan fova,kan la inbuan fo bawk anga, hringnun hian vawitam mi ngam anga keipawhin vawitam ka ngam ang.Hringnun hian min tih beidawn chang nei mah se hringnun bawk hian beiseina min pek leh thin vang hian hringnun hi ka ngaina a ni.

Tichuan,hringnun leh kei,kan inkara inlaichinna ka duh a ka neih pawh ni chiah lem lo hi ka duh lo chu ka ti tawp ngam chiah bik ta lo.Ka hringnun ah hian ka lungawi a,ka lawm bawk.Mite awh hringnun neih ka tum lova,mite hringnun awh pawh ka tum hek lo. Hringnun leh kei hi thiantha ni ila ka duh tawk mai.