MIZORAM JET AIRWAYS SERVICE A CHÂWL TA!

.
Aizawl | February 11, 2019: Hmun dang leh Mizoram thlawhna țumhmun neih chhun Lengpui țumhmuna lo kal țhin, Jet Airways-in nimin Pathianni ațanga an tihtawp tak avângin Air India chauh Mizorama thlawk a awm ta.

`
Jet Airways hian India hmarchhaka an thlawhna zawng zawng chu, Guwahati tih loh an titâwp vek a, Mizoramah pawh Inrinni khan Jet Airways thlawk țhin hnuhnûng ber chu lo țumin a thlawk chhuak leh a. Hetiang a nih tak avang hian kar khata ni 4 Delhi-a direct a thlawk țhin leh Lengpui leh Guwahati inkara ni tin thlawk țhin chu a awm ta lo va, Lengpui leh Imphal inkara thlawk țhin tihtâwp a lo nih tawh bawk avangin Air India-in Lengpui leh Kolkata inkara a thlawhtîr chiah thlawhna hmanga Mizoram leh khawvel hmun dang inpawhna awm chhun a ni dawn ta a. Hemi avang hian damlo leh mitthi ruang phurh chungchangah harsatna a thleng ngei dawn ni a rin a ni.

`Hetih lai hian, Civil Aviation a Principal Consultant Wing Commander, Joe Lalhmingliana chuan company sumdawnna a nih avangin sâwrkarin tih theih a nei tam lo hle niin a sawi a. Tunah hian Indigo leh airlines dang dang nena an indawr mek thu a sawi a. An tum anga hlawhtling thei a nih chuan hei aia thlawhna hmanga intlawh pawhna tam zâwk la neih theih a beisei thu a sawi a. Lengpui ațanga ram dang khawpui pakhat emaw a aia tam emaw Mizote tlawh tam leh hlawkpui tûra thlâwk tûr pawh dap mek a nih thu a sawi a. Lengpui țumhmun tihchangtlun pawh sâwrkar thar hna hmasa tûr a nih thu a sawi bawk a ni.