Cassettes debut music video “ENGTIN NGE NI DAWN ?”

Aizawl | February 11, 2019: "Ni lengin ka ngai che zankhuain ka vei che...engtin nge ni dawn?"Cassettes band chuan an official debut music video'Engtin nge ni dawn?' tih chu an tichhuak a, YouTube-ah en theihin an dah ta.

He hla hi Triau Trackx drummer Ramenga phuah a ni a, Cas-settes erawh kan hmelhriat tanna an ni a, kan hrechiang telh telh dawn e.

Cassettes hi Lunglei band an ni a, an member thenkhat hi chu phaiah lehkhazira awm lai an ni. He music video-a zai hi an band vocalist ni lovin an bassist zawk a ni hlauh thung.Hlimpuii a ni a, a aw adangdai a, chu chu angainatu tan chuan kûrpuihnâwp tham a ni dawn. Hetiang aw danglam leh special hi Mizo zaimi zingah kan la nei mang lo. 

An band vocalist chu Hada-i a ni a,he hlaah hian a part petu-ah a tang ve thung a, an pahnihchiah hian music video-ah pawh an lang a, Hada-i chu guitar keng rawn lang hmasa zawk hi niin, Hlimpuii chu tarmit vuah zawk hi a ni. 

A hla phuahtu Ramenga chuan, "Lengzem hla kan neih tam berah kan kawppuite hi thil tha leh mawi bik nen sawi kawpa, chawimawi an ni tlangpui a,mahse, ka ngaihtuah chian hian keini aia tha zawk leh tling zawk an awm teuh laia kan inthlanga kan inhmangaih bik tlat hi aropui lai niin ka hre ve tlata, chu chu he hlaa tih lan kan tum ber pawh a ni," a ti. 

A hla hi nikum April thla vela a phuah tawh niin a sawia, Cassette bassist hi an zai YouTube video a hmuh atangin thawhpui a chak ta niin a sawi a, "Facebook-ah ka friendlist-ah a lo awm a,ka contact a, 'I sak awm chi deuh ka lo phuah ang,' katia. Kan inthawn a, band nei an lo ni a, ka hla phuah chuan duh duha an tihdanglam ka remtih thu ka hrilh nghala, tichuan a chord leh thluk te pawh an lo tidanglam veka, songwriter credit la thei bik pawh ka ni lo, kan thawh hona a ni," a ti.

He hlaah hian Ramenga hian a rimawi lamah engmah khawih a nei ve lo a, mahse,a produce a ni thung a, Cassettes band chu thawhpui nuam a ti hle a, Hlimpuii aw chu a dangdai a tih thu sawiin, "Studio chhuakah chuan effect hi pek loh theih a ni lo ve a, mahse, Hlimpuiiaw aia raw hi chu a awm bik kher lo ang, chei loh ang deuh thaw a ni a, a aw nihna ang taka phochhuah hi kan tum a ni a," a ti bawk.