KS A NIH SAW 6 - 10

*ZIAKTU-R'z Thangluah*

*6--10

CHAPTER--6

Pi Muanpuii leh Zampuii te 2 chu Pi Muanpuii ţhiannu te inah chuan a lut ta rawih mai a. Pi Muanpuii ţhiannu (Pi Ruati) hnenah chuan thil thlen dan engkim an hrilhvek a. Mahse, Pi Ruati chuan an inah riah tir chu a phal ta hauhlo mai lee!! Pi Muanpuii chuan,"Ţhiannu, zan 1 chiah a ni mai. Khawngaih takin," a tih ngawih ngawih pawn, Pi Ruati chuan a phal tlat silo. Chu mai a nilo, Zampuii chu an dawrah pawh rawn kal tawhlo turin a hrilh nghal a. Beidawng takin Pi Ruati in aţang chuan an chhuak a, Zampuii chuan,"Nu Muanpui, min haw san tawh mai rawh keimah vanga I tawrh ve zel hi ka duhlo a nia,"a ti zawi sap a. Pi Muanpuii chuan Zampuii chu a lainat takzet a ni, a ngawi vang vang a. Eng emaw chu a ngaihtuah a ni, Zampuii hmel chu a enţhin a a Khawngaih bawk si. A kalsan ringawt chuan khawiah nge a kal ang?? A nun hlui ah a let leh ang a, riahna mumal neilovin mi bathlarah a riak ang a mi tamtak in an hmusit ang a. Huiham.. chutiang zawng zawng a ngaihtuah chuan Pi Muanpuii chu arilru a na ve takzet a ni. Zampuii bulah chuan, "Zampui, heti ringawt hi chuan ka kalsan theilo ang che,"a ti a. Zampuii chuan,"Ka in ngaihtuah ve thei mai ang, min ngaihtuah suh min kalsan tawh mai rawh,"a lo ti leh a. Pi Muanpuii chuan,"Hei zing dar 4.00 a ni tawh a, zing khua a lo var ang a. Engtinnge hun I hman ang?,"a ti leh a. Zampuii chuan, "Min ngaihtuah suh engkim a ţha leh vek mai ang. Keimah vang chuan in ham buai duh tawh suh, ka tan hian thil tam tak I ti a. Ka lawm lutuk a nia aww, he khawvelah hian nang hi min ngaihsaktu leh min hmangaih tu awmchhun I ni. Mahse, tunah chuan min kalsan hi I tan a him zawk,"a ti leh a, a hmel chu a ngui nghiai mai a. Pi Muanpuii chuan,"Nihchuan kha Rs.4000 hi la phawt la, chuan ka number I neih kha kha tah khan puih I ngaih chuan minlo call ţhin dawn nia aww. Engtik lai pawn I tan ka awm reng ţhin ang umm,"tih pahin Rs.2000 note pahnih chu a purse aţangin a rawn phawrh a. Zampuii chuan,"Aih a ngailo thil min tihsak hnem tawh lutuk, hei chu ka la thei lovang Khawngaih in la let leh mai rawh,"tiin a lo hnial ve tlat a. Pi Muanpuii chuan,"Aih ka la let dawnlo engmah pawh ka tihsak theih lohche hi,"a lo ti let ve thung a. Zampuii chuan Pi Muanpuii chu a kuah a,"Ka lawm lutuk aww ka tan chuan vantirhkoh I ni. Kal tawh rawh ka lo thlir liam ang che,"a ti mawlh mawlh a. Pi Muanpuii chuan a car chu a ti nung a, lungchhe tak leh inthiam lo tak chungin Zampuii chu a tlan liam san ta a..Zampuii chuan kal na tur a haihchham chiang hle mai. Kâwl chu a eng deuh uar tawh mai a, motor vei vak leh zing lama walk ho pawh hmuh tur an awm pheuh pheuh tawh mai. Zampuii chu kawngsir footpath ah chuan zawi muangin a kal a, a chunga thil thleng chu a thiamloh ni mah sehriatthiam har a ti a, a rilru a na ve a ni. Tunge a pan tak ang lee?? Zing dar 5.45 velah chuan ni pawh a rawn chhuak ve ta suar suar mai. Zampuii chuan hmun remchang a hmuh velah a ţhu chawl a, a mut a chhuak ngang aniang a ţhutna hmunah chuan a lo chhing sek hman a. A harh meuh chuan zing lam dar 8.00 a lo ni tawh a;mahse, a bag reng reng a hmu ta lo. A bul vel chu a en kual ruai a, tumah a hmu silo. A ril a ţam tawh si, ei tur leina tur in pawisa a nei tawh silo. A va vanduai chiang tak emm!! A awmna aţang chuan a kal sawna, in hlawhna tur zawn hmasak ber chu a tum ta. A dawr hmuh hmasak berah lut in inhlawhna tur an neih leh neih loh a zawt ta tawp mai a dawr neitu chuan a lo hnar chiang khawp mai. Tichuan, dawr 5 velah a lut ta tuman an chhawr duh silo, a tawpah chuan a beidawngin thingpui dawr 1 ah a luttawp a anni chuan hnathawk tur an lo zawn lai tak a lo ni a. An lo thawh tir nghal a, Zampuii chu a lawm khawp mai. Mahse, riahna hmun tur a la nei silo chubakah a ril aţam a ni . Dawr neitu pa chuan,"Table no.5 ah khan rice plate 1 hi va dah rawh aw,"a ti a. Zampuii chuan,"Awle,"tih pahin rice chu a la a, table no.5 lam pan chuan a kal phei nghal a table no.5 ah chuan an veng (an veng aţangin hnawtchhuak tawh mah se,an veng tiin la sawi mai ang.)YMA president chu a lo ţhu run mai a. Zampuii chuan a thil ken chu a dah a, a let leh nghal a thleng silna lamah pheiin thleng a sil nghal a. Reilote hnuah an thawhpui nu 1 hian,"Kan pu in a hmu duh che a,"a lo ti a. Zampuii chuan a hlauthawng takzet a ni, an pu bulah chuan aphei a,"Ka pu, engnge ni taa?,"a ti sap a. An pu bulah chuan YMA president pawh chu a lo ding bawk a, an pu chuan,"Thudik min hrilh rawh,"a lo ti ram hmak a. Zampuii chuan, "Ka pu, eng thudik maw? ,"a lo ti deuhga mai a. An pu chuan, "Ks I ni tiraw?,"ati ta tawl mai. Zampuii chu a ngawi reng a, an pu bawk chuan,"Ks I ni em?,"a ti leh a, Zampuii chuan aw khur deuh dar dar chungin,"Aw a dik a lawm,"a lo ti a. An pu chuan,"Tinge tah hian hna thawh I rawn zawn a?,"a ti leh a. Zampuii chuan,"Ka pu nun bul ţan ţhat leh ka duh a ni,"a lo ti sap a.An pu chuan a thlek vang vang a,"Nula pawi ka ti khawp mai, ka chhawr chhunzawm theitawhlo ang che,"a ti hmak mai. Zampuii chuan, "Khawngain ka pu, tikhan ti lo hram rawh,"a ti mawlh mawlh a. Mahse, an pu chuan a ngaithla duh lo,"Kha Rs.150 hi la la, kal rawh,"tih pahin Zampuii chu Rs.150 chu pek a tum a. Zampuii chu rilţam viau ma hse, pawisa chu a dawng duh bik lo dawr aţang chuan kut ruakin a chhuak ta hnu hnua..Zampuii chu a chau tawh tak zet a ni, a neihchhun chu a cell phone choh chu a ni tawh mai si. A pawisa zawng zawng leh a thuamhnaw lah chu miin an ruk sak vek bawk si, a tan chuan kawng a va thim tak emm!! Chawhnu dar 3.00 ri dawn ta, Zampuii chuan zing aţangin engmah a la ei lova. A pum chu a ruak a ni, a chau tawh takzet bawk a ni. Nî lah chu duhthusam in a sa bawk si,MC kawtah chuan a ţhu ve ta ringawt a. A kekawr ipte chu a zen a, Rs.10 note zawr deuh hi a lo awm nawlh mai Zampuii chu a va hlim tak emm, a bul chiah ice cream Rs.10 chuan a lei a. Ice cream chu a ei nghal mawlh mawlh mai, a ei zawh chuan a nui sak a ice cream zuartu putar hnenah chuan,"Ka lawm lutuk aw ka pu,"a vati ringawt a. Putar pawh chuan,"Awle keipawh ka lawm e,"a lo ti ve vat a..Khua a lo tlai a, thlang lenkawlah ni pawh a her liam ta. Mi tamtak chuan mahni in lam panin an haw sup sup; Mahse, Zampuii erawh chuan kalna tur reng a nei silo. Pan lam tur pawh a hre tawh lo, kawng sir footpath ah chuan a ţhu a. A pum chu a rawn ri leh ta rawk rawk mai, ice cream Rs.10 man lek kha chuan a puar reilo em atin ni. Hetianga hrehawm taka hun hman aichuan tiin a nunhlui bawk chu a ngaihtuahlo thei silo. Ţhat tumin bei ve nasa viau mahse, amah chuan harsa a ti ve a ni. Kawngdik kawhhmuh a, hmangaih tak a Pathian thutakhrilh tu tur a mamawh tak zet a ni. Mahse, Chung ho chu a tan chuan van a rah ang an ni si, a vannei nge a vanduai kan ti dawn zawk? Zampuii chu mipa 1 hian a lo call nawlh mai lee;."Aw hello..,"."Zampuii I ni tiraw??,"."Aww ni e tunge I nih zawk a? Engnge I duh a?,"."I customer tur ka nia, tunah hian zodinah ka awm a lo kal ta che,"."Rawn kal turin tha ka nei tawh lo, zanin chu min dawr lo mai rawh,"."Timaw? Tunah khawnge I awm a?,"."Bazar bungkawnah ka awm,"."Khawilai takah nge I awm?,"."Bridge bulah khan,"."Awle keimah ka lo kal mai ang,"."Awle ka lo nghak ang che,"."Aw lo awm reng ang che aww,"."Awle,".Zampuii chuan a nunhlui paih a, nunthara bul ţan chu duh viau ţhin mah se a tan chuan a harsa a ni. Tunah chuan a nunhlui ah bawk a kir leh a ngai ta.."Thil ţha tih ka duh laiin,Sualin min hneh fo ţhinKawng dik zawh ka duh e;Aw min khawngaih rawhAw min khawngaih rawh.".CHAPTER--7.Zampuii chuan nun thara bul ţan chu tum viau ţhin mah se, a rahbi a tleu laklawh tawhmiau bawk si. A tan chuan kawng chu a thim ve viau a ni, a nun ngaiah bawk let lehin awmna mumal pawh nei lovin a awm ta a. Zan lamah chuan dawrtu a nei ţha thei phian a; mahse, Zampuii chuan amah dawrtu te chu nupui nei lai an nihchuan a indawr tir ngai lo. A chhan chu mahni taksa mawina zuar ni mah se, mi pasal duh lai lo uire tu nih chu a duh miahlo..Zan 1 chu YMA duty hian an hmu fuh ta hloh mai lee, an man ta a. Mahse, hemi zan hian Zampuii hian zu a in lo hloh a. A man tu te zing ami pakhat chuan,"Nula, tun ang zan rei tawh ah te khawlaiah engnge I tih a? I hmel han en mai chuan nula fel tak I nih hmel bawk si,"a ti dam thluam a. Zampuii chuan,"Ka pu, ka leng ka haw lam a nia,"a lo ti mai a. A man tu zinga pakhat chuan, "Ka awihlo I inzuar a niang, a chiang reng alawm. Zan 1 engzat nge I inchhiar a?,"a lo ti nghal bawrh bawrh a. A hmaa zawhna zawt hmasa tu (Pu Ruata) chuan,"Khaih... in bengdai teh, amak buan buan ţhin e mai,"a lo ti vat a. Chupa(Pu Hranga) chuan,"I chhanleh tlat dawn em ni? Nangni ho vang hian a lawm heng kan mihur ho te hi an huangtau em em ni,"a ti hlak hlak a. Zampuii chuan,"Ka pu, I sawi dik a lawm ka inzuar ţhin a lawm. Mahse, zanin hi chuan ka inzuar lo ka ţhiannu te inah ka leng a ka hawlam minlo man a nih hi,"a ti ve ta piap piap mai. Pu Ruata chuan,"Nula, khawi vengah nge I awm?,"a ti a. Zampuii chuan,"Khawi vengah mah ka awmlo thlanmualah ka riak ţhin,"a ti mauh mai lee. Pu Hranga chuan,"I va tenawm ve ka beng dawn che mawnle aww,"a rawn ti leh a, Pu Ruata chuan,"Khaih khaih, khatiangin hmeichhe awm nem zawk te an ti ngai lo a nia, "a lo ti leh a. A kil sira ngawi reng a lo ding Pu Kima chuan muang darh hian,"Nula, College vengah khan I awm tawhlo ami?,"a lo ti hlawl mai. Zampuii chuan chupa hmel chu a en a, a hmuh hnu aang riau in a hria a,"Ka pu, min hria mi a?,"a ti hâ mai a. Pu Kima chuan,"I ţhiannu ruang thlak ni pawh khan ka lo kal asin. Mahse, I hmel ka hmu miahlo mai a," a ti leh a. Zampuii chuan,"Ee ka hria che ka pu, kan in thleng min thlah haw tu kha I ni tiraw?,"a ti vat a. Pu Kima chuan,"Aw ni e, mahse tinge thlanmualah te I riah tak a?,"a ti leh a. Zampuii chuan,"Ka pu, hnawhchhuah ka ni a,"a ti hul hak mai. Pu Hranga chuan,"Khawtlang duhlo thil I ti miau sia, an hnawhchhuah mai loh che in,"a lo ti leh hmarh hmarh a. Zampuii chuan,"Ka pu, nun bul ţan ţhat leh ka duh a ni. Khawngaihin min puih theih chuan min pui hram teh u,"a ti mawlh mawlh mai a. Pu Kima chuan,"Nun bul ţan ţhat a, nun thara nun I duh tak tak a nihchuan kan pui thei reng che lawm,"a lo dam thluam a. Pu Hranga chuan,"Dawt bak a sawi lovang, a inti khawngaihthlak vel a nih hi,"a lo ti leh hram a. Pu Ruata chuan,"Nia, kan pui thei reng che a nia aww,"a lo ti ve bawk a. Pu Kima chuan,"Thlanmuala mahni chauhva riah aichuan zan in chu kan inah rawn riak phawt mai rawh,"a ti ta a..Pu Kima chuan Zampuii chu a hruai haw ta a, an nu chu a lungawi vak lova; mahse, a pasal thu chu a hnial ngam bik silo. Zampuiia chanchin tlangpui te an zawt a, mikhual roomah chuan an riah tir ve ta rawih a. Pi Rami chu a lungawi thei ngang silo,"Bawiha pa, I thil tih hi han ngaihtuah chiang teh thil dik a ni meuh maww?," a ti leh ţhin a. Pu Kima chuan,"Ee Bawiha nu, he hmeichhia hian a nun hi sim tak tak a duh a nih chuan kan pui tur a ni dawn zawk lawm ni??,"a lo ti let ve khauh mai. Pi Rami chuan,"Mahse, Bawiha pa a hmingin kohhran leh khawtlangah nihna te kan nei ve a. Hetiang hmeichhe zan vak kawl ringawt hi chu a mawi ka ti lo deuh a ni,"a ti leh hram a. Pu Kima chuan,"Kohhran leh khawtlanga nihna kan neih te hi a ţha zawngin kan hmang tur a ni reng a lawm. Nangpawh kohhran hmeichhia ah hruaitu I ni a, keipawh Pavalai ah hruaitu ka ni ve bawk a. Heng hmeichhe rahbi tleu laklawh tawh te, ruihhlo ngai te tan hian belhtlak kan ni tur a ni dawn lawm ni? Kohhrana kan nihna te hi engatan nge I lo hman ţangkai ţhin a?," a ti mauh mai lee. Pi Rami chuan a pasal chu chhan ngaihna vak a hre tawhlo, thil ho mai mai sawiin an muhil thei ta hram a..Zampuii chu Pu Kima te inah chuan kar 1 vel zen zawn chu a awm ve ta reng mai. Pi Rami pawh a hma aichuan hrawn te pawh a nuam ta deuh e. Inrinni zing a ni a, Pi Rami chuan,"Zampui, vawiin zing chu kan 2 in kanva bazaar dawm mawn le?,"a ti a. Zampuii chuan,"Aww a pawi hleinem,"a lo ti ve mai a.An 2 chuan bazaar tur chuan an inzui chhuak hnak hnak a..Pu Kima leh Pi Rami hian fapa 2 kum 20 mi leh kum 18 mi an nei a ; mahse, tunah chuan hostel a an awm lai tak a ni. Fanu hi an awt ve em em ţhin a, doctor in Pi Rami chu fa 2 aia tam neih an phal silova. Zampuii chu Pu Kima chuan,"Pathian kan fanu atan min pe a nih hi,"a ti hmak mai a. PiRami pawh chuan Zampuii mizia chu a hre chiang chho ve zel a, an in nel ve tawh khawp mai..Sunday zingah chuan Pu Kima chuan chhung inkhawmnaah hun a hmang a,"Hei tunah kan fapa te 2 hi awm rihlo mah se, damtlang takin Pathian in hun ţha tak min pe a, a lawmawm khawp mai. Tin, Zampuii pawh harsatna engemaw I neihin min hrilh hrehlo laa, I tan kan awm reng a ni tih hria la. I nunhlui vang khan inkil tawih deuhin awm lo la, beiseina nen hma lam pan la. Kan in pui tawn zel dawn nia,"a ti thluam mai a. Bible chang a chhiar a, a ţawngţai a, aţawngţai zawh chuan Lal biakna an sawi a chhung inkhawm an ti tawp ta a..Zampuii chu Pi Rami bulah kal in a inkhawmve ta a; mahse, a inthlahrung ve khawp mai. An hnungah chuan Freddy chu amahin a lo kal ve hnak hnak a, a hma chiah a kal nula chu a hmuh hnu ang a ti khawp mai. Reilo tehnuah a han umpha ve mai a chu nula chu ahmel en pahin,"Nu Ram, I damţha tawh maw??,"a ti hluai a. Pi Rami chuan,"Umm heika dam ţha tawh khawp mai,"a lo ti ve vat a. Freddy chuan Zampuii hmel a hmuh chuan mak a ti hle mai, Zampuii pawh chuan Freddy hmel a hmu thut chu mak a ti ve khawp mai. Mahse, Freddy chuan engmah asawi chhunzawm tawh lova. Pi Rami chuan,"Eee Freddy, hei kan nau a nia Zampuii a nia. Vawiin chawhma inkhawm banah lo lut kawi la,KŢP member ah ziah luhve kan duh a,"a ti luam a. Freddy chuan,"Ee tehreng mai, ka rawn kal dawn nia,"a lo ti vata. Zampuii erawh chu a ngawi reng a..Chawhma inkhawm banah chuan Freddy chu Pi Rami te inah chuan a lut kawi nghal a, Pi Rami chuan,"Ee I va rawn che rang leh si ve a,"a lo ti a. Freddy chuan nui chungin,"Member thar kan neih dawn hi chuan ka ţuan hi a rang ve thei a nia,"a lo ti vat a. Pi Rami chuan,"Zampui, hei hi Freddy a nia kan kohhran KŢP Leader a nia. A fel khawp a nia,"a ti nghal siam siam a. Zampuii chu a lo nui sak a, KŢP member ni tur chuan a hming te chu a pe ve ta nghal a. Freddy chuan,"Nu Ram, tumah mihrang kan awmlo bawk a sawi duh ka nei a,"a ti nghal a. Pi Rami chuan,"Aww han sawi la,"a lo ti vat a. Freddy chuan,"Zampuii nen hian a hma in kan lo inhre tawh a, Zampui pawi I tih loh chuan kan inhmel hriat dan kha ka sawi dawn sin,"a ti a. Zampuii chuan,"Umm a pawi hleinem,"a lo ti vat a. Freddy chuan a hmaa Zampuii nen an in hriat dan zawng zawng chu Pi Rami bulah chuan a sawi vek a. Pi Rami chuan,"Ee Freddy in tawng diktak kan lo intawng hlawm a nih hi tiraw?? Tunahchuan keini pawh Zampuii tan nu leh pa ţha tak leh ţhian ţha tak kan nih ngei ka beisei tlat a ni,"a lo ti mawlh mawlh a. Freddy chuan,"Ni e, Zampui nangpawh inthlahrung lo la, kohhran ah leh khawtlangah pawh I theih tawpin I in hmang a. Keini pawn kan theih tawpin kan pui zel che ang a lungngai reng reng suh aw,"a ti ve mawlh mawlh bawk a. Zampuii chuan,"Ka lawm lutuk ringawt, ni e ka theihtawpin keipawn ka nunhlui te kalsan ka tum ang a. Hmeichhe fel tak ni thei lo mah ila, in tan mi ţangkai tak nih ngei ka tum ang,"a ti ve ta a..Zampuii chu Pi Rami te bulah chuan thla 1 aawm tling ve ta. Pi Rami te nupa pawn an fanu tak tak angin an en a, an duat khawp mai. Zampuii pawh a theih tawpin kohhran leh khawtlangah te a inhmang ve a, ţhian ţha tak tak te neiin nuam pawh a ti khawp mai. Mahse, mahse tih hi a ngai leh ţhin mihring nunah hian mahse tih a tel tawh hi chuan engkim hi a buai zo ţhin a ni. Zampuiipawh a nunhlui chuan a kiansan hlei theilo ani ber mai, mi tam takin an thinlung tak takinPathian thu an hrilh a, ţha takin an kawm ţhin. Mahse, chung ho karah chuan misual hi an lo awm leh si ţhin a nih hi. Thawhţan zan ţhalai inkhawm zanah chuan inkhawm turin a insiam malh malh a. A ţhiannu ve berchuan a dam loh vangin a inkhawm theih loh tur thu a rawn hrilh avangin amahin Biakin lam pan chuan a kal hnak hnak a. A hnungah chuan hmeichhe 3 hi an lo kal ve bawk a,"Zampui,"an rawn ti vak a. Zampuii chu ding a, a hawi let vat a,"Aww engnge ni ta?,"a lo ti vat a. An zinga pakhat chuan,"Thla 1 liam taah kha chuan Ks I ni ţhin tiraw?,"a ti deuh kher a. Zampuii chu a ngawi reng a,chu nu bawk chuan,"Ka pa in a sawi vek a lawm. Zanah an man che a; mahse, PuKima leh Pu Ruatan an khawngaih tlat che a,"tih pahin a nui zui har har a. Zampuii erawh chu a ngawi reng a, engmah a sawi lo. Mahse, an ţawngkhum dan tehhrep chu na a ti ve a ni. Chumi te ţhian ho chuan nui uar uar chungin an kal pel a. Zampuii erawh chu a ding reng thung a,"Khang chinghne beram vun sin nen a inkhawm ho aichuan in lama awm pawh ka duh zawk,"ti rilru neuh neuh chungin a let leh a. Freddy inkhawm kal tur nen chuan an intawk a Freddy chuan,"Ehe tinge I rawn let leh a?,"a lo ti vat a. Zampuii chuan,"Ka lu na lutuk a, ka haw leh mai,"a ti ringawt a. Freddy chuan,"Aww a va zialo ve inkhawm banah ka rawn lut kawi dawn nia aww,"a ti vat a. Zampuii chuan,"Awle,"ti ringawtin a chhang a, Freddy chu a kalsan ta a...CHAPTER--8.Aw Lalpa, ka lamah I beng rawn chhi la,Ka ţawngţaina ngaithla laReithei leh saruak mai ka ni si..Zampuii chuan Sunday inkhawm a ţhulh ngai lova; mahse, mi ţhenkhat in a hnung lam aţangin an rel a an sawi sep sep na te chu a hai der ve ţhin mah se, ngeiawm leh hmusit taka ,'Sawnu saw Ks a nih saw, zanah a la inzuar ţhin an ti,'ti a, a hriat tur ngei ngei a an sawi ţhin te chu haider harsa a ti ve ţhin. Ni e Ks chu a ni teh meuh mai; mahse, he hmeichhia hian a nundan kha Pathian duh zawng a ni lo tih te, amah ngei pawhin midang nun a thleng ve tura a duh ngai loh kha ama nunah ngei chuan a thlengtawh si. Tichuan, a nun hahthlak tak leh hrehawm tak ata chu tal chhuah tumin tunah hian a bei ve mek a ni a. A nunhlui avang chuan mi tamtakin an thin hrik a, amah enkawltu te Pu Kima te nupa thleng thleng chuan mi ţhenkhat chuan an hmusit em em bawk a. Chung zawng zawng chu Zampuii chuan a hai bik lo, kohhran ţhalai inkhawm naah leh hnatlanaah te pawh a inkil tawih phah vek ţhin. Mi ţhenkhat fel taktak an awm rualin mi fel tak takah karah hian misual hi an lo inzep leh si ţhin a nih hi..Zampuii chuan,"Nu Ram, hei nula puitling kani ve tawh a. Mahni a inbawl hrang rual chu ka ni ve tawhin ka hria,"a ti ta tawl mai a. Pi Rami chuan a hrethiam lo hle mai a,"Zampuii engnge I sawi awmzia hi?," a lo tihã mai a. Zampuii chuan,"Keimahin ka inbawl hrang ve tawh ang chu ka ti deuh a,"alo ti vat a. Pi Rami chuan, "In bawl hrang maww? Sawi pawh sawi tawh suh, kan fanu I ni tawh a kan in aţang hian pasal I neih hma chuan I chhuah ka phal dawnlo hrim hrim,"a lo ti nghal mawlh mawlh a, Zampuii chuan,"Nilove Nu Ramte, keimah vanga min nuihzat leh hmuhsit in tawrh reng hi ka duh bik hlei nem. Khawiah pawh awm ila, in fanuka ni reng dawn tho alawm,"a lo ti let vat a. Pi Rami chuan,"Heng mi hmuhsit leh nuihzat te hi chu tuar dan kan thiam a lawm.Thlamuang takin awm la, mahni a inbawl hrang phei kha chu a sawi pawh sawi ri tawh suh ang che,"a ti mauh mai si. Zampuiipawh chuan sawi leh chuan tur pawh a hrelo,"Ka lawm lutuk aww ka chunga in ţhat na hi ka dam chhung pawn ka rul seng lo ang che u. Ka lawm lutuk aww,"a ti mawlh mawlh a..Zampuii chuan a Pi Muanpuii chu bia in a chanchin chu hrilh a tum a; mahse, a call tlang thei reng reng silo. An try leh ţhin a, a tlang thei bawk silo a beidawng ta,"Nu Muanpui, ka chanchin hi hrilh ve che ka chak lutuk a sin. Mahse, ka biak tlang theih miahloh che lee?,"tiin amah chuan a phun sep sep a. Pu Kima chuan,"Zampui, vawiin chu I naute hostel aţangin an lo chhuak dawn a, office lamah kan buai dawn sia I nu nen lo va kal mai ta che u,"a lo ti dam thluam a. Zampuii chuan,"Nia, a pawi hleinem, "a lo ti vat a..Zampuii tan chuan Pu Kima te chhungkua chu vantirhkoh ang an ni; mahse, an khawtlang hruaitu te hovin Zampuii chu an veng aţang pawh a an hnawhchhuah a ni tihan hre leh zel bawk si. Pu Kima te chhungkua chu lehkha an pe ta, Zampuii chu kar 1 chhunga an veng aţanga chhuak tura tihna lehkha a ni. Pu Kima chuan,"A va han hahthlak ţhin tak em aww, hetiang te chuan misual in ţhat tumna rilru an pu duh tawh nang. Engatinge maw kan in tih fil em em ţhin le?,"a ti nuah nuah a, a mit meng aţang chuan a lungawi lo tih a hriat theih mai. A fapa upa zawk Mapuia chuan,"Pa, U Zampuii hi a hma in khawi veng nge a nih reng reng a?,"a lo ti vat a. Pu Kima chuan,"A hma chuan college vengah a awm ţhin a,"a lo ti vat a. An chhungkua chuan an ngawi ţhap mai, Zampuii erawh KŢP hnatlan naah Freddy nen an chhuak daih a. A lo haw hunah engtinnge he thu hi an lo hrilh tak ang lee?? A theih tawpin harsa tak chungin hmalam a pan ve bek bek mek a ni si a; mahse, tunah erawh a kawng zawh lai chu tih thimin a awm leh mek a ni si a. Pi Rami chuan,"Bawiha pa, keichu hetiang ngawt chuan Zampuii hi kan in aţangin a chhuah ka remti lo, kha leh chen kha kan khawsa hove tawh a. Misual a nih loh zia pawh ka hria, a nunhlui te chu a nunhlui a ni tawh a tunge mawn le lo haichhuah sak leh ţhin lee?,"a lo ti ve bap bap a. An fate 2 pawh chuan Zampuii chu la hrawn hnem mah se, an nel nghal mai a nihkha. Pu Kima chuan muang ban charh hian,"Khami zan Zampuii kan man zan khan Pu Hranga leh kei leh Pu Ruata chiah kan ni a. Pu Ruata chuan engmah a sawi ka ring lova,"a ti a. Pi Rami chuan, "Pu Hranga ngei chu a nih chu Pu Ruata te chuan I rilru ang hi a pu ve ang tih ka chiang a ni,"a lo ti leh bap bap a. An fapa naupang zawk Tetea chuan,"Nu ihmaww hmanniah USpi chuan 'Ks in khawi a ni maw?,'a tia, ka zak lutuk,"a lo ti ve bawk a. PiRami chuan,"Spi lah saw fel ber awm ang sawn a lang a, a rukin a sual zek a nih saw. A rilru saw nawhchizuar rilru aipawn a tenawm ang,"a ti hlawih hlawih mai a. Pu Kima chuan,"Khaih khaih Bawiha nu, insum teh,"a lo ti vat a. Pi Rami chuan,"Thudik a lawm ka sawi,"a lo ti hmuk a..Zan dar 9.00 velah chuan Zampuii te hnatlang pawh chu an lo haw ve ta. Freddy chuan a rawn thlah a, Pu Kima te chhungkua chu an lo la meng kim ţhap mai a. An lo ţhu ngui nghiai hlawm a Freddy chuan,"Pa Kim, in ţha maw?,"a ti vat a. Pu Kima chuan a lehkha ken chu a rawn pharh a,"Zampui, a pawi kan ti khawp mai,"a ti sup a. Freddy chuan a hrethiam lo hle mai a,"Englehkha nge ni a?,"tih pahin a chhiar nghal a. Tumah chuan engmah an sawi lova, an ngawi ţhap mai a hnu fe ah Zampuii chuan,"Ka nu, Ka pa thla 2 chhung chu in bul ah hlim takin ka khawsa tawh a. Pathianin rem a ti tawhlo a ni ange,"a ti zawisap a. Pi Rami chuan,"Keichuan I chhuah ka remti theilo,"a ti sap a. Pu Kima pawh chuan,"Keiman khawtlang hruaitu te chu ka lo bia ang. Zampui, kan hnen aţang hian I awmbo kan rem ti reng reng hleinem,"a lo ti ve bawk a. Freddy chuan,"Ni e, Zampui lungngai mah ta che I lamah kan ţang tlat dawn a lawm,"a lo ti ve bawk a. Zampuii chuan,"Ka thlavang in hauhna te, in mi enkawl na zawng zawngah te ka lawm lutuk.Engtikahmah ka theihnghilh tawh ngailo angche u; mahse,keimah vang chuan hrehawm in tawrh ka phal tawh lo," a ti mawlh mawlh a, a sawi zawng chuan a mittui a lo far a. Pi Rami chuan, "Zampui, kan hnen aţanga I chhuah in khawiah nge I kal chuang ang a?,"a lo ti vat a. Zampuii chuan,"Keini ang tan chuan thlanmual hi a him ber,"a ti mai si.Freddy chuan," Zampui, chutiang chu a thleng ngai lovang,"a lo ti ve vat a..Pu Kima te chhungkua leh Pu Ruata te chhungkua chuan Zampuii chu a thlavang an hauh tlat avangin, an veng aţang chuan an chhuah tir ta bik lova. Mahse, mi ţhenkhat chuan Zampuii an hmuh dan chu Ks a ni tho. Freddy te ţhian ho chu an ţhu khawm laih a Spi chuan,"LalFreddy hi che uih thei ee,"tih pahin a nui uar uar a. Freddy chuan,"Engvang chuan maw?,"a lo ti vat a. Spi chuan,"Kha Ks nu kha in lo ţan ve em em a, zahthlak thei e,"tih pahin a nui leh uar uar a. Freddy chuan,"Ks a ni lo,"a lo bung nghut a. Spi chuan,"Kha a lamah I ţang leh tawh a nia,"a ti a , a nui leh uar uar a. Mapuii pawh chuan a ning ve ngang tawh aniang,"Sp, a tawk tawh Zampuii chu tu pawh nise, engang mi pawh ni se kan sawi phak a awm lo. Keichu Pu Kima te chhungkua saw ka fak asin, tumahin an enkawl peih loh an enkawl a nia,"a lo ti ve hmak a. Spi chuan sawi tur pawh a hre tawhlo, a ngawi ta reng a..Sunday zing a ni a, Zampuii pawh inkhawm turin a insiam malh malh a. Biak In a thlen hma hret chuan kawng sir aţang hian tlangval 1 hi a rawn tlan a Zampuii purse chu a rawn laksak thut a, a tlan nghal daih a.Zampuii, "Kha khapa kha lo man ru ka pursea ru nia,"a ti chiam chiam mai a. An piah lawkah chuan tlangval 3 an lo awm a an lo man rang kher mai. Tlangval 1 chuan, "I va zak lo ve a,"tih pahin a hnek nghal chawrh mai a. Rukru pa chuan,"Khawngaihin min thlah ula engkim ka sawifiah vek ang,"a ti mawlh mawlh a. Zampuii pawh chu a rawn thleng nghal vat a,"Awii ka lawm lutuk aww ţhiante u,"a ti mawlh mawlh a. Rukru pa chuan,"Hmeli, mi hur nu vawikhatmah ka dawr tawh ngailo ang che,"a ti ta buan buan mai. A hnu rei vak lovah midang pawh an rawn pun belh a, Freddy te leh Pu Kima te pawh chu an rawn thleng ve nghal a. Freddychuan,"Engnge thil awmzia? ,"a lo ti vat a. Rukru pa chuan,"Thil awmzia in hriat duh chuan kha mihur nu kha zawt ta che u,"tih pahin Zampuii chu a rawn fawk fawk mai. Zampuii chuan,"Ka purse a ru a,"a lo ti sap a.Freddy chuan,"Khawnge I purse ruk chu rawn pe rawh,"a ti vin tuarh a. Rukrupa chuan, "Hmeli I purse hi ka ru lo aww; mahse, a chhungah hian ka duh zawng a awm tlat,"tih pahin Zampuii purse aţang chuan heroin hi a rawn phawrh chhuak hlawl mai a. Zampuii chuan,"Kha thil kha engtinnge ka purse ah khan a lo awm theih a?,"tiin mak ti takin rukru pa chu a en tlawk tlawk a..CHAPTER--9.Zampuii chuan a purse a heroin lo awm ringawt chu a hrethiam lo hle mai. Rukru pa lah chuan,"Ks I nihkha mi hur nu, zantin ka dawr ziah ţhin che. I chhungte leh khawtlang ho mit hmuh ah chuan fel ber awm in I awm a. Ka ten che ka pawisa I puk Rs.5000 pawh min la pek loh kha,"a ti buan buan mai si. Zampuii chuan sawi tur pawh ahre tawh lo, inkhawm kal tur ho chuan an hual ţhup mai bawk si. Pu Kima chuan,"Awle, engpawh nise in lamah I sawi fel teh ang u,"a ti ta a. Rukru pa pawh chu Pu Kima te in lamah chuan an hruai ve nghal a, khawtlang hruaitu te leh JAC hruaitu te chuan an zui nghal bawk a. Freddy pawh chuan thil awmzia hriat tumin a zui ve bawk a, Zampuii chu a zah avang leh Rukru pa in a ţawngkhum dan te khan a rilru a tihnat em avangin a mittui a tla pur mai a. Pi Rami chuan, "Zampui, heng thil thleng hi keichuan ka hrethiam thei lo. Zanah I chhuah ngai ka hre bawk silo," a ti a,Pi Rami te chhungkua chuan thil awmzia chu hriatthiam har an ti khawp mai. Zampuiipawh chuan,"Nia, keipawn engmah ka hrethiam biklo vanduai tur renga piang ka nih hi,"a lo ti chuai raih a..Khawtlang hruaitu te chuan thutlukna an siam fel thei ta. An thutlukna siam chu hei hi a ni.; "Zampuii hi kan veng huam chhungah hian kan hmu leh tawh tur a ni lo. Vawiin ni ral hma ngei hian kan veng chhung hi a chhuahsan tur a ni. Chutiang a nih loh chuan amah lo enkawl tu te chhungkua Pu Lalrutkima te hi khawtlangin kum 1 chhung atan kan ensan ang." Hei hi khawtlang hruaitu thutlukna chu a ni rup mai si. Pu Kima te chhungkaw tan chuan duhthlan tur a va vang si emm!! Pu Kima chuan,"Khawngaihin min hrethiam ula, vawiin em em a in chhuah tir kher hi a ngai a mawn lee?,"a ti ve tawl mai. Pu Hranga chuan,"Ekhai, Pu Kim he nula hi I la ţan zel dawn em ni? Chiang takin a thil tihsual kan man tawh a, chuti chung pawh chuan I la ţan tlat dawn em ni?,"a lo ti nghal vat a, a hawiher ah chuan Pu Kima chu a thamlo tih a hriat reng mai. Pu Kima chuan,"Vawiin hi Pathian ni a ni a, Pathian ni em em a hetiangtih hi chu keichuan ţha ka ti lo a ni. Zampuii pawn thilsual chu a lo ti a ni maithei; mahse,a ni thilsual tih ngawr ngawr hi engvanginnge kan hmuh theih bik em em lee? Keini ngei pawh hian sualna chu kan nei ve vek si a,"a ti ve leh ngat a. Pu Hranga chuan,"Chuti zawng chuan maw I tih dawn a? Kohhran a I nihna te, YMA a nihna te hi I ngai pawimawh ve lo em ni?,"a ti ve leh a. Pu Kima chuan,"Eee kohhran leh YMA a ka nihna te hi maw, keichuan hengho humsual dai te leh ruihhlo ngai te an tanna aţanga chhuah ngaihna hre tawhlo ho tan hian asin ka hman. Nang hian engatan nge I hman ve?? An tan hmelma I ni ringawt dawn asin,"a ti ve ta piap piap mai. Pu Hranga chuan,"A tawk tawh viau e, he nula hi in la kawl reng dawn nge? In chhuah tir dawn?,"a ti ram hmak mai. Zampuii chu a rawn ţawngchhuak ve ta,"Awlee kei hi harsatna thlen tu ber chu ka ni. Veng chhung aţang hian ka chhuak ang, chuan ka nu ka pa khang hun zawng zawng a hmangaih na nen a min enkawlnaah khan ka lawm lutuk ania aw," a ti mawlh mawlh a. Pi Rami chu a mittui a farfap fap mai,"Zampui, pawi kan ti lutuk duhthlan dang kan nei silova,"a ti zawi sap a. Zampuii chuan,"Ka hrethiam lutuk che u lawm, hrehawm ti reng reng suh u,"a ti leh sap a. Freddy pawh chuan a lainat ve khawpmai, Pu Kima chuan,"Anihchuan Pu Hrang, in duh ang ngei chuan Zampuii hi a chhuak ang. Chuan, tunah hi chuan min lo va haw san phawt mai teh u,"a ti hmak mai. Pu Hranga leh a ho te pawh chu ngawi reng rengin an chhuak ta hna hna mai..Zampuii tan chuan kawng a va thim leh dawn tak emm!! Amah hmangaih a enkawl tu te chuan an chhanhim zo bik silo, tunah chuan a chantur chu kawtthlera vah vaih chu a ni leh ta mai si. Zampuii chuan,"Ka nu,ka pa min ngaihtuah lo ula ka ţha ve zel mai ang. Ka tan in lo ţawngţai ţhin dawn nia aww,"a ti zawi sap a, Pi Rami chuan,"Zampui, khawiahnge maw I kal chuang ang le?,"a lo ti vat a. Zampuii chuan,"Kan tan chuan hmun a awm leh mai ang. Ka kal a nge min ngaihtuah su aww," a ti mawlh mawlh a. Freddy chuan,"Khapa khatunge?,"a rawn ti ve hlawl mai. Zampuii chuan,"Ka hriat ngai pawh a nilo," a lo ti vat a, Zampuii chuan a suitcase chu a hnuk a a inher a. Pu Kima chuan,"Zampui, kan tihpalhlutuk aww min ngaidam mawlh mawlh dawn nia,"a rawn ti zawi sup a. Zampuii chuan,"Engmah tihsual in nei hleinem ka chunga in ţhatna leh ngilneihna hi Pathian alet tam takin a la rul ngei ang che u. Ka chunga in ţhatna avang hian ka lawm lutuk ania,"a ti a, kawngka ah chuan a chhuak a, a kal liam ta.."Nunkhua a ngui a thim zo ta,Uire nu ianga tar chhuah kan ni.".Spi chuan nui uar uar pahin,"Huh LalFreddy kha ks nu kha I ţan ve em em a. Tunah chuan a thil tih dikloh chu I hre ta alawm tiraw? Khati chung pawh a, I la ţan anihchuan mipa I nilo tihna a ni mai,"a ti mawlh mawlh a. Freddy chu a ngawi reng a engmah a sawi lo, Mapuii chuan,"Keichu a khawngaihthlak reuh ka ti. Sunday em em a in chhuah tir kha chu Pathian mit hmuh ah pawh a mawilo ka ti ve tlat. Mihring te chu fel lohna lai nei vek kan ni a, khatiang em em a in tih kha chu ka hmeichhepui a nihna angin ia lainat ve khawp mai,"a lo ti ve thunga. Spi chuan,"Nang lah hi mi khawngaihna hiI ngah ve sia a hahthlak. Khatiang Ks kha chu veng chhunga awm tlak pawh an nilo,"tih pahin a ner nung nung a. Freddy chuan,"Duh aiin I ţawng I thlahdah mah mahţhin,"a lo ti sup a. Spi pawh chu a ngawi ve mai a; mahse, a ţhiante 2 in Ks 1 lek thlavang an hauh lutuk chu a ei lo ve khawp mai. Mapuii leh Freddy lahin Spi rilru kawi lutuk chu an ei vak bik chuang lova..Zan dar 11.00 a ri tawh kawtthler vel chu a reh ţhuap tawh a. Mi tamtak chuan mut mu an tuah tawh a, Zampuii erawh riah na tur hmun reng a nei ve silo. Thla lah chu a eng em em mai bawk si khawi lam nge a pan ang?? Thlanmualah a riak leh mai dawn em ni lee?? Kal na tur reng a hrelo, kawngpui sirfootpath ah chuan a ţhu tawp a a hun liam tawh te a chhui kir a. Hetiang em em a vanduai tur hian emni a lo pian lee?? Ngatinge hlimna hi a neih ve loh le?? Ngatinge vanduai hian a zui reng bik lee?? Vanduai na hi a ta tur renga khuanu ruat em ni lee?? A biangah chuan mittui a rawn luang ngiai ngiai a,"Aw Lalpa, hetiang reng anun hman aichuan ka nunna hi min laksak mai rawh,"a ti zawi sap a. A beidawng ve tawh takzet a ni, hlimna reilo te a neih te chu lak kian sak a ni a. Hrehawm tak a nun hmang turin khang nun hlimna te khan an kiansan leh tawh si. Pu Kima te chhungkua ang kha mi zawng zawng chhungkua ni ta se, he khawvelah hian ani ang nun beidawng tak tak te hi chhanhim an ni ngei ang. Mahse, Pu Kima te chhungkua ang khachu mifel tam tak zingah hian an awm ve silo anih hi. Zampuii chuan beisei na 1 chiah a la nei, chu thil chu a nu in a thih dawn a a thu chah,"Bawihte, I puitlin hunah chuan thil engkim I hrethiam ve tawh ang a. Chutih hunah chuan ka unaunu neih chhun a tet lai aţanga ka patea bula awm ţhin chu Ilo zawng chhuak dawn nia aww,"a tih kha a ni. A nu khan a nau thlalak a neihchhun kum3 mi anih lai ami chu a pe ve ngei a; mahse, tunah chuan a nu nau chu engtinnge a zawnhmuh theih tawh ang le?? A thlalak a neih lah chu kum 3 a nih lai ami a ni bawk si, a tan chuan kawng a va ping tak em. A nu nauchu lo zawng hmu ta pawh ni se, a ni ang hmeichhe bawlhhlawh chu a lo pawm duh angem?? Mahse, a nu thuchah chu tihhlawhtlin sak ngei a tum thung a ni, a chungah engpawh thleng se a nu nau chu a zawn chhuah ngei a ngai a ni. Zing lam dar 1.00 a ri tawh, Zampuii chuan a awmna aţanga hnai ber Chhinga veng thlanmual chu a pan ta hnak hnak a. Thlanmual chu anni ang tan chuan a him ber a ni miau si, chu zan lungchhiatthlak tak chu thlanmual ah chuan a hmang ral ve ta. Mahse, chhin khat te mah a chhing lo..Zing lam dar 5.45 velah chuan ni pawh a rawn lang ve suar suar tawh a. A mutna thlang lawkah chuan mipa 1 leh hmeichhe 1hi an lo awm ve a, Zampuii chuan amah anga nun beidawng tak an nih ve tho a ring a. Ngawi rengin a awmna ngaiah chuan a awm a, a hnu rei vak lovah hmeichhia zawk chu a lo meng siar siar a Zampuii a rawn hmu thut chu a phu chiang kher mai,"Naa..nangnu kha min enthla nimaw?,"a rawn ti nghal mawlh mawlh a. Zampuii chuan,"Aih en thla love in awm tih pawh ka hrelo hrim hrim. Nizanah tah hian ka riak a,"a lo ti vat a..CHAPTER--10.Chu hmeichhia chu a rawn tho ţial ţial a, a kekawr mawng ben fai thak thak pahin,"Ţhiannu, riahna tur I neilo mi a?,"a lo ti a. Zampuii chuan,"Umm neilo a ni mai,"a lo ti zawi sap a. Chu nu chuan,"Englo.., zan lamah I chhuak ve ţhin tho em?,"a ti leh a. Zampuii chuan,"Aaah aww ţhin deuh tho e,"alo ti vat a. Chu nu chuan, "Anihchuan ka bulah lo awm ve mai ta che, keimahin in ka luah a nuam over chu a nilo. Mahse, hetianga riahna hmun pawh nei lova thlanmuala riah ngawt te chu a him lo emai,"a ti ta reuh a. Zampuii chu a lawm rualrualin amah ang bawk hmeichhe bulah a awm chuan a nunhluiah a let leh dawn tih chu a hre reng mai si. Mahse, riahna tur hmun a mamawh bawk si, a rilru a buai khawp mai, "Khawi vengah nge I awm a? Chuan, I ţhianpa kha?,"a ti ve thung a. Chu nu chuan,"Hei hi maww ka customer anih hi,nizanah a in hnem deuh a a la mu tui khawpmai,"tih pah chuan a nui suk a. Zampuii chuan chu nu bula awm tur chuan thu a ti tlu ve ta, khang mi fel tak tak te ho bulah kha chuan atan hmun a awm ve silo. Tunah chuan mifel nilo misual ho bulah tho a awm leh a ngai ta; mahse, Zampuii chuan pawi a ti tawhlo. Miin hmeichhe tenawm tiin an sawi ta sa sa a nunhlui a let leh chu pawi tihna a nei ta lo. Chunu chuan,"Aaah englo Msi ka nia I hming minlo hrilh ve la,"a ti nghal a. Zampuii chuan,"Zampuii ka nia,"a loti vat a, Msi chuan,"Kan ţhianpa hi harh phawt se ka in lamah kan phei dawn nia aw,"tih pahin a kekawr ipte aţang chuan cigarette hi a phawrh a, a ţan nghal a. Zampuii chuan,"I awmna veng I la sawi miahlo,"a lo ti leh a. Msi chuan,"Zemabawk ah daih nia,"a lo ti heu mai, Zampuii chuan,"A hla hle mai,"a lo ti sap a..Zampuii chu Msi bulah chuan kar 1 a awm tling ve ta. Msi pawh a fel khawp mai, Zampuii lakah pawh a ţha em em a thil zep engmah a nei ngailo. Zampuii chuan, "Ms, chhungte I nei ve reng reng em?,"a ti hlawl mai. Msi chuan, "Nei ve tho e; mahse, ka chhungte hi tumah belh tlak an awm lova. Ka pa lah in nupui dang min neih san a, a nuihpui leh a fa te chuan min chenpui thei silova hei hi ka chan tawk chu a ni mai,"a ti ve malh malh a. Zampuii chuan,"I pa te chu khawi vengah nge an awm a?,"a ti leh a. Msichuan,"Tunah chuan an awmna tak pawh kahre tawhlo, kum 4 vel kan in hmu tawh lova. An chanchin pawh ka hre zui tawhlo,"a ti leha, Zampuii chuan,"A va zia lo ve mahse,nangchu pa I la nei tal alawm. Keichu ka pa pawh ka hre lova, ka nu lah chuan kin boral san tawh bawk si a. Ks ka nih miau avangin veng chhung aţanga hnawhchhuah ka la ni zui. Mahse, kan 2 pawn ka hlim tho lawm tiraw?,"a lo ti vat a. Msi chuan,"Dik chiah ka pa nupui chu hmu ve la chuan I ei lo ve ngawt ang," a ti nuah nuah a, Zampuii chuan,"Ngatinge a?,"a lo ti vat a. Msi chuan, "Chinghne beram vun sin a ni mai, inkhawm te chu maw a ţhulh ngailo. Thawhlawm te chu maw thawh hnem thei tawp, buhfai ţham pawh a ţham hnem thei. A lam lahin ring deuh deuhin a hallelui a; mahse maw, in chhunga a mizia chu maw Hitler-a a ni mai. Kei a fa tak ni lo na na na chu min chhiah hlawh chei nghal ringawt a, ka lehkha zir lai pawh chhunzawm thei lovin min siam a. Ka pa bulah dawtin min hek zuah zuah a, ka pa in zantin min vuak phah ţhin. Khatiang chhungkua a chen reng aichuan tiin keima duhthu ngeiin ka pa in chu ka chhuahsan ta a,"tih pah chuan, a in sut deuh hraih a. Zampuii chuan Msi chu a kuah a,"Keini ve hizawng vanduai tur bik a khuanu ruat kan ni ngei ang, mi zawng zawng hmuhsit leh endawng kan ni a. Kan tan hian hmangaihtu an awm ve lo a ni," a ti mawlh mawlh a. Msi chuan,"Ni e kan nun hi kan duh dan a ni bik lo. Duhthlan tur dang a vang em a tin ni, "a lo ti ve bawk a. Msi chuan,"Keipawh nun bul ţan ţhat tumin vawi tam ka bei a, thingpui dawrah leh office ah te ka thawk lawp lawp a. Mahse, a tawpah ka nunhlui bawk khan min lo umzui leh a, keini ang Ks mai mai chu tuman min chhawr duh silo. Mahse, chhungkaw fel tak ka tawng a, anni chuan hmangaihna nen min enkawl a; mahse, Pathian thu awih leh fel in ti ho kha ka hlim ve hi rem a tilo a ni mah na khang chhungkaw fel tak te lak aţang khan hla takah min dah leh ta si a nih hi.Tunah chuannun siam ţhat a nun bul ţan ţhat leh pawh kachâk tawhlo,"a ti chuai raih a. Msi chuan,"Pulpit tlangah Pathian thu an âu chhuah pui dum dum a, keini te chu min en khum daih zel a lawm. An hmui chiahin Pathian thu an sawi a, an thinlung tak taka sawitu chu tlem te an ni,"a lo ti ve bawk a..Zampuii leh Msi chu zar 9.00 velah chuan an ţhian dangten an lo nghahna lamah chuan an kal dun hnak hnak a. Zampuii chuan,"Zanah hian JAC leh YMA duty ho hian an man ve tawh che em?,"a ti a. Msi chuan, "Min man ngun lutuk a min man peihtawhlo,"a lo ti liam mai a. Zampuii chuan,"Em em a,"tih pahin a nui sak a, Msi chuan,"Tak takin keite chu an boss ka ti lungawi thiam a, min man pawn min zilh a min chhuah tir leh zel a lawm,"a la ti zui. Zampuii chuan mak a ti hle mai,"Engmaw??," a lo ti hu mai. Msi chuan,"An boss hian min dawr ngun ber lawm,"a lo ti leh a. Zampuii chuan,"A van mak em em,"a lo ti he hu mai, Msi lah chu a nui uar uar a,"An boss hian ka lung a tih awi loh chuan ka blackmail hmiah zel,"a ti ham ham mai. Zampuii chuan mak a ti telh telh a,"Engtin?,"a lo ti leh a. Msi chuan,"Ka lung atih awi loh chuan in inah ka rawn luhkhung dawn che ka ti ţhin a, a hlauthawng thei rapss,"tih pahin a nui uar uar a. Zampuii chuan,"Nupui nei lai a ni em?,"a ti vat a, Msi chuan,"Awii ni chiang ee a fate pawh an puitling vek tawh,"a lo ti leh vat a. Zampuii chuan mak a ti hle mai,"Nupui nei lai ngei ngei pawn an nupui te bulah lem changin anlo uire reng ţhin a ni maw?,"a ti rilru neuh neuh a. Ks ah chuan Zampuii hi a danglam ber hial awm e, mipa pawmlai nei chu engang a hausa pawh nise a in dawr tir duh ngailo. Amah dawrtu tur te chu nupui an neih leh neih loh a zawt hmasa ngei ngei ţhin, nupui nei lai an nihchuan a kalsan hmak hmak ţhin. Amah dawr tum tu tam takte pawhin mak an tih em em a ni reng a ni..Zampuii chuan nun bul ţan ţhat te chu tum ve viau ţhin mah se, amah choh chuan harsa a ti a ni. Tunah chuan a nun ngaiah bawk let lehin mi te hmuhsit leh endawng, hmeichhe tenawm leh bawlhhlawh felna reng reng nei lo nun kha a nun a ni leh ta si. Pu Kima te chhungkaw bula a awm lai kha chuan a thla a muang em em a, a nun pawh a hlim a ni. Mahse, tunah erawh chuan zan khaw tai rekah chhuak in a taksa mawina te chu sum hai luh nan a hmang leh mek a ni si a. Hna pangngai tak thawh tum in zawng ve bawk ţhin mah se, miin a engang hmeichhia nge a nih tih an hriat chian meuhchuan an ban leh nge nge ţhin anihkha..Zampuii chu zan dang anglo takin a rui hle mai a, a ţhiannu chuan midang inah a riah san dawn avangin a kal san daih bawk si amahin an in lam chuan a kal pai chawn chawn mai a. Footpath ah chuan din pawh ding ţha hlei thei lovin vawn ban ngeng chuan a ding âwn ţo mai a. Inkhawm kal tur chuan an rawn kal pel sup sup a, ţhenkhat chuan,"Ks a ni ngei ngei ang a ruih hmel tawp,"tih pahin an cell phone an phawrh a, a thla an lak sak zui bawk a. Ţhenkhat chuan,"A khawngaihthlak hle mai,"tih pahin an thlir liam a, àn kal san leh mai. Inkhawm dar nawn dawn tawh ah chuan pa 1 hi tlai tawkah inkhwm kal turin hmanhmawh zet hian a rawn kal hnawk hnawk a, kawng sir footpath a nula zu rui lo ţhu reng a hmuh chuan,"Ehehe nang Ks kha helai hmunah hian engnge I tih a? Helai hi Biak In panna kawng a nih hi, thlawk bo vat rawh,"a rawn tita tuarh tuarh mai. Zampuii chu muang changin a rawn meng a,"Ka pu, Biak In kawngah tal chuan ka awm ve a rem lo em ni?,"a lo ti sap a. Chu pa chuan,"Khanglang che chuan aa police ka man tir hma che hian kal bo nghal rawh. Mi tenawm I nihkha ka beng pawp mai ang che,"a ti leh tuarh tuarh a. Zampuii pawh chu ngawi rengin a tho a, a kal pai leh chawn chawn mai a. Chupa chuan, "Zaktheilo lutuk mai,"tih pahinBiak In lam chu a pan nghal sawk sawk a.."Muantu kan ngai pui tu kan ngai,Chhantu kan ngai an awm siloMifel rual awmkhawmho te zingah hian;Kan tan hmun a awm ve silo."