KS A NIH SAW - 5

CHAPTER-- 5

Ziaktu; Rz Thangluah

Zampuii chu an khawtlang hruaitute chuan thla 1 chhung hun an pe a, chumi hnu pawh a an duhloh zawnga a khawsa anihchuan anveng chhung aţang hnawhchhuah chu an thutlukna a ni ta si. Zampuii tan chuan a hma lam hun tur chu ngaihtuah ngam chi pawh a nilo, a pawisa neih zawng zawng chu Rs.2000 chiah a ni. Rs.2000 chuan thla 1 chhung chu a ei leh in man tur chu a lei pha ţawk ţawk maithei a ni. Mahse, a in luahna nu hi hmeithai niin a fel phian mai Zampuii dinhmun harsat zia chu a hrethiam em em a, chuvang chuan in luah man pawh thla 1 chhung chu a laksak duh rihlo a ni. Chumai a nilo Zampuii chu hnathawh tur a duh phawt chuan a zawn sak thei reng tih a hrilh bawk a Zampuii tan chuan chu hmeithai chu vantirhkoh a va ni chiang tak emm!!.Zampuii pawh chuan a nun chu sim tumin ţan a la ve sauh sauh a, a in luahna neitu nu chuan hnathawh tur a hmuh sak bawk a. A ţhiannu 1 hian thingpui dawr lian vaklo hi a nei ve a, chutah chuan Zampuii chu a thawkve ta rawih mai. Hmeichhia na na na chu engkimah an lo inhrethiam tawn a, Zampuii pawn a thawhna thingpui dawr neitu nu chu fel a ti in a nel khawp mai a.A thawhna nu pawh chuan fel a ti a engpawh ti dawn se Zampuii chu a râwn ve vek ţhin. Mahse, a hmaa a nunhlui te khan an lo umzui leh ţhin a, a thawhna thingpui dawrah chuan mi chitin chitang lo chawl in chung zinga mipa ţhenkhat chuan an lo hre hlawm khawp mai.Ţhenkhat chuan pangngai deuhin an bia a,ţhenkhat erawh chuan an kuah thuak thuak a. An chhaih nghal ringawt bawk a; mahse, Zampuii chuan chung zawng zawngchu chhel takin a tuar a, a paltlang zel a..Zampuii chu thingpui dawrah chuan thla 1 chu a thawk tling ve ta reng mai. Sunday zan a ni a, mi tam zawk chu inkhawm turin Biak In lamah an kal sup sup tawh a. Zampuii chuan inkhawm ve chu a chak ve khawp mai; mahse, Biak In a inkhawm tura kal chu chak viau ţhin mah se a hmaa a nunhlui te avang khan, inthlahrun na leh zahna in a tuam tlat si. Inkhawm a Pathian faka zai te chu chak ve viau ţhin mah se, inkhawm lovin a awm leh nge nge ţhin. Zan dar 7.00 bawr velah chuan inleng a nei ta tlat mai lee, a in leng pa chu a hmelhriat ngai a ni hauhlo mai. Zampuii chuan,"Engnge I duh a? Tunge I nih a?,"a lo ti vat a. Chupa chuan,"Min hre tawhlo a ni maw?," tih pahin a meizial chu a pak khuh hluah hluah a. Zampuii chuan,"Ka hre ngailoche,"a lo ti hmak a. Chupa chuan ngeiawm taka nuih pahin a phone a rawn phawrh a,"He video hi mipui hmuh a ka tlangzarh hma hian min zui vat mai rawh,"a lo ti chhum hmuk a. Zampuii chuan video chu a en a, thla 2 vel liam ta a an veng pa 1 a ngaihsan em em in dawr a tum lai video khaa lo ni a. Zampuii chuan,"Kha video kha engtinnge I neih a?,"a lo ti nghal vat a. Chu pa chuan, "I hriat ve kher pawh a ţullo ee, he video hi ka tlangzarh vaih chuan maww khi putar chan tur khi chu a chhe viau ang. Chuan, nangpawh he video hi ti leakout tu ah a puh nghal che ang a,"tih pahin a nui huah huah a. Zampuii chuan,"I va zak lo ve a, ka in aţang hian chhuak nghal rawh,"a ti ram hmak a. Chupa chu chhuah a tum lo chiang khawp mai,"Duhthlan tur 2 I nei aww,"a ti sup a. Zampuii chu a ngawi reng a,chupa bawk chu a rawn ţawng leh a,"Zanin hian kan pu in a dawr duh che a, min zui dawn nge he video hit deuh hi mi zawng zawng hmuh atan ka pho chhuak ang?,"a ti ta hmak mai si. Zampuii chuan duhthlan tur a nei ta lo, a ngawi reng ringawt a. Chupa bawk chu a rawn ţawng leh a,"Ka sawi chu I hrelo ami?,"a ti vin tuarh a. Zampuii chu a phu deuh zawk a, a in zuar leh a nihchuan an veng aţanga hnawhchhuah tur a ni tih chu a hai bik lo. Mahse, kha pa an vengah pawh pa fel ber ti a an sawi kha Zampuii chuan tihmualpho ve kher a duh lo. A tihsual rah hi midangin an tawrh ve atan a duhlo bawk, chuvang chuan a chunga thil thleng tur hre reng chungin chupa chu a zui chhuak ta a..Zampuii chu an veng YMA leh JAC ten an enthlak reng avangin, Sunday zana a chhuak pawh chu an lo hrechiang khawp mai a. Thawhţanni zanah an veng YMA leh JAC, MHIP Hruaitu te chu an lo leng leh ţhap mai. Zampuii chuan a chunga thil thleng tur chu a hre sa reng mai, a rilru a hah ve khawp mai. Khawiahnge a riah tak ang lee?? An veng YMA president chu a rawn ding leh a,"Awle hei kan thu tiam tawh sa bawhzuiin kan rawn leng leh a ni a. Thla 1 chhung kha chu kan enthla char char che a hna pangngai tak thawkin I khawsa tih te pawh kan lo hria a; mahse, hei thla 1 ral chiah a I nun dan ngaite bawkin I awm leh a.Heti hi chuan kan veng huam chhungah hian I awm ve reng kan ti rem ti tawhlo ang,"a ti charh charh mai. Zampuii chuan engmah a sawi lo,a ngawi reng a a mittui chu a rawn far fep fep a. YMA president bawk chuan,"He thil chungchangah hian sawi duh nei te kan awm em?,"a ti leh a. Chutah Zampuii in luahna nu hmeithai kha arawn ding chhuak ta,"Hei MHIP lamah nihnaka neih ve avangin zanin hian ka rawn kal vea, chuti chu nilo se zaninah hian ka rawn lang miahlo ang. Chuan, ka sawi duh chu Zampuii hi ka hrechiang a, tunah hian a nunhlui te kalsan in nun bul a ţan ve a ni a. Ngatinge a thil ţha tih kan hmuh hmaih vek a, a thil tihsual chiah kan hmuh le?? Ka ngaihdanah chuan Zampuii hi kan vengah hian la awm se, ţha taka nun bul a ţan leh theih nan keini puitling zawk te hian kan pui zawk tur a nilo em ni?,"a rawn ti ta piap piap mai lee. Tumah an ţawng lova, YMA president bawk chu a rawn ding leh a,"I ngaihdan chu a va mak ve, keini chuan kan veng hi kan hmangaih asin. Kan veng huam chhungah hian hetiang hmeichhe tenawm hi an awm ve reng hi kan phal hleinem,"a rawn ti leh a. A mit meng aţang chuan a thinrim tih a hriat reng mai, mahse hmeithai nu te chu a zam bik hauhlo mai lee,"Zampuii hi keichuan ka hrechiang ve tawk a ni, a chungah hian engpawh thleng se a hmaah ka ding zel ang. Chuan, hmeichhe tenawm tih kher kha a ngailo ang, mihring ve tho a nih hi tumah hian hma lam hun kan hrelo,"a rawn ti leh hmak hmak mai. Zampuii tan chuan chu hmeithai chu a lei Pathian a ni ringawt; mahse, a lam ţang reng tumah an awm lo midang ho chu an ngawi kur a. An inmelh hrek hrek a, an ngaihdan sawi chhuak ngam tumah an awmlo nia maw le.!.Zampuii chu hmeithai 1 lek chuan a humhim zo silo. Tichuan an veng khawtlanghruaitu te thu rel angin, thawhlehni zing khawvar hma in an veng chhuahsan tura tih a ni ta a ni. A in luahna neitu nu (hmeithai ) Pi Muanpuii chuan a lainat khawp mai; mahse, tih theih a nei tlem si. Zampuii chuan bungrua han chhuahpui vak tur pawha nei tam lo khawp mai. Pi Muanpuii chuan,"Zampui, zaninah hi chuan khawiahmah riahna tur I hmu dawn silo. Zanin chu ka inah hian riak phawt la, duh lehnaktuk lamah ngaihdan tharin kan ngaihtuah ţha leh dawn ania,"a ti ta ringawt a. Mahse, Zampuii chuan,"Aaaa a chi loh thilmin tihsak hnem tawh lutuk. Keimah vang chuan buai tawh suh khawngaihin,"a lo ti vata . Pi Muanpuii chuan,"Hetia in chhuah tir tawp te chu a dik hleinem, a hrim hrim in tunlaiah inluah tur a vang tawh ropui bawk si. Chubakah hei zan dar 12.00 a pel tawh a,hmeichhia mahnia zana chhuah chu a ţhalo.Tawhsual tawh palh te pawh a hlauhawm a lawm,"a ti siamsiam a. Zampuii chuan, "Nu Muanpui,min puihna zawng zawng ah hian ka lawm lutuk; mahse, keimah vanga I tawrhchu ka phal lo ka kalsan phawt ang cheaww,"a ti chuai raih a. Pi Muanpuii chuan,"Chuti tur zawk maw? Keihian tih theih ka nei tlem ve emm atib ni, min hrethiam hram hram dawn nia aww,"a ti mawlh mawlh a, a mittui chu a parawl ţeuh mai. Zampuii chuan,"Ka tan thil tam tak I ti lawm, nu tam takin an tih ve theih loh chu nang hian ka chungah I ti asin. Huaisen takin ka tan I ding a, ka tan chuan kha tluka ropui kha a awm chuang hleinem. Ka lawm lutuk aww Nu Muanpui, engtikniah emaw chuan ka chunga I thil tih hi ka la rul let ve ngei ang che,"tih pahin Pi Muanpuii chu a kuah vawng vawng a..Zampuii chu a lan theih chhung chu a thlir a,Zampuii chunga thil thleng vang chuan an veng pawl hrang hrang hruaitu te chu a demve khawp mai. Pi Muanpuii chu harhchhuak thut ni awm tak hian a tho hluai a, a car chahbi a la a, a phit chhuak nghal a. Zampuii chu um phak ngei a tum bawk a, a tlan chak khawp mai. Thui fe a tlan hnu chuan Zampuii chu a umpha hram a, Zampuii bul a thlen chuan a car chu a ti ding a,"Zampui, lo lut rawh,"a ti vat a. Zampuii pawh ngawi rengin a lut ve mai a.,"NuMuanpui, khawilamah nge min kalpui dawn a?,"a ti nghal vat a. Pi Muanpuii chuan,"Ka ţhiannu te inah khan,"a ti nghal vat a. Zampuii chuan mak a ti hle mai,"I ţhiannu te inah chuan engnge kan tih dawn?,"a lo ti deuh há mai a. Pi Muanpuii chuan,"A bulah I awm ang, a lo phallo a nihchuan tihdan dang kan zawng dawn nia,"a ti vat a, a ţhiannu te veng lam pan chuan an inkhalh phei ta 

5.