KIDNAPPING OF GIRL - 9

CHAPTER--9

BY:- Rs Thangluah✍🏻

Jane pawh a rilru a buai map map tawh khawp mai,Roy a be tlang thei si lo. Amy te lah a be tlang thei bik bawk si lo,Inspector Zothana lahin engmah a hrilh ṭha duh tawh bawk si lo. An che buai mek a ni tih chu a hai mawlh lo a ni,a tawp nan tiin Roy number chu a hmet chhuak leh a,a dial leh ta ngat ngat a. Mahse,a van beidawn thlak ṭhin ngat ngat ve,switch off tih bak chu engmah thu thar a dawng si lo. A tawpah chuan Damdawiin lamah a kal leh ta nge nge a.

Rsa chuan a lo chhuah chhal nghal mawlh mawlh a,"Ngatinge ka chet chhuah hi i phal ve ngai miah lohva? Biak tlang i har em em mai leh nghal,kha en teh,"tih pahin a Phone chu Jane kutah chuan a rawn hmeh bel ngal chawt chawt a. Jane chuan ngawi rengin Rsa Phone chu a en a,a thil hmuh chuan a ṭhawng takzet a ni. Roy chu thisena bual khah vekin kawngpuiah hmuh a ni a,tunah hian a ruang chu Civil Hospital mitthi dahnaah dah a ni. Rsa chu a thaw hak a,a kawng a dawm a,"Ka chet chhuah te hi phal ve tawh la,dam lo anga awm rengte hi ka tan a ninawm ve tho. Roy chu engtinnge kan tih dawn? Police ho pawh hian engtinmah hma lak an tum miah lo mi a?,"a ti leh mawlh mawlh mai a,a ṭawng chhuah dan aṭang chuan a thinrim takzet tih a hriat reng mai. Jane chuan,"Insiam la Civil-ah chuan kan kal dawn nia. Roy chunga tiang thil ti tu hi ka chhuah hauh lo ang,"tih pahin a in pack nghal mawlh mawlh a. Nurse duty hnenah chuan thil awmdan te hrilhin,a tukah bungrua an lak tur thu a hrilh a,an chhuak ta a.

Roy-a ruang chu a chhe hneh khawp mai,nasa taka sawisak a nih hnuah tih hlum a ni tih a hriat theih mai a. Jane chuan ngawi rengin Roy chu a en tlawk tlawk a,"Bawiha,phuba chu keimah ngei hian ka la dawn a lawm,"tiin a in hum ruh a,a mittui chu a rawn tling deuh pam a.

"Hei hi a kekawr ipte aṭanga kan hmuh a ni a. Tihian kan lo la dah rih tawp mai a nih hi,"tiin Doctor chuan Plastic bag hi Jane chu a rawn pe a. Jane chuan a hawng nghal sawk sawk a,"Ruang hi tu hmuh nge ni reng reng a?,"tih pahin Roy ipte aṭanga an thil hmuh te chu a en a,Pendrive 1 leh Sim Card 1 a lo awm a. Doctor chuan,"A hmu tu ber chu Police kutah a la awm mek a,in lo lan hun kan lo nghak tawp a,"tiin a lo hrilh nghal vat a. Jane chuan,"Awle a lawmawm lutuk e,heng ho hi chu keiman ka lo kawl ṭha rih a nge,"tiin a ak ṭha nghal mawlh mawlh a.

Amy chuan Roy-a ruang chu a kuah a,a pawm vawng vawng mai a,"I mit lo meng leh teh,khawngaihin ei duh nu tiin min ko leh ta che. Mawla,rawn tho leh rawh kan 2 in misual kan man dawn kha,"tiin a ṭap hawm hawm mai a. Jane chuan,"Ṭap bawrh bawrh rawh,a tan i hun hnuhnung a nih hi,"tiin Amy chu a lo kuah a. Roy chu chhun dar 12:00noon ah vui liam a ni a,Amy chuan a tuar thiam lo takzet a ni. A khât tawkin a rawn ṭap leh ṭhin a,kar khat chhung teh meuh chu an hnu chhui pawh an chawlhsan rih a ni.

"Boss,Pu Kima te Ina Sana kha a leitu ka hre chhuak tawh. Mahse,a leitu pa chu a boral tawh a,"tiin Rsa chuan Jane chu a rawn hrilh a. Jane chuan,"Maw? Tunge a?,"a lo ti nghal vat a,Rsa chuan,"Hei hi amah chu a nia,Pu Kima te Driver Dika pa kha a nih hi,"tih pahin Dika pa thlalak chu a rawn entir a. Jane chuan,"Chuan,Pu Rintluanga hi engnge a chanchin le? Kan Inspector lah chu a in hnukdawk daih bawk si,kan hna hi a chiri ṭan tlat mai,"a lo ti nghal vat a. Rsa chuan,"Sum an phût ang kha an pe a,dam takin an lo chhuah tir tawh e,"a lo ti vat a. Jane chuan,"Mahse,bansan mai rih suh aw. Tunlai chu i hah dawn a nihkha,Amy hi a la normal chiah lova i hriatthiam a ngai ni mai aw,"a ti leh mawlh mawlh a. Rsa chuan,"Awle tehreng mai,min ngaihtuah suh,"a lo ti nghal vat a.

"Mi dawihzep tak anga inhnuh dawh hi a Police zia lo khawp mai,"Jane chuan Inspector Zothana chu a din chilh a,a melh kar mai a. Inspector Zothana chuan,"Kei hi dawihzep min ti maw? Khang ho khan ka fanu nunna min lak sak a sin. Ka hmangaihte hi ka chân duh tawh lo a ni,i duh chuan dawihzep tiin min sawi leh rawh. He khawvelah hian ka chhungkua aia ngaih pawimawh ka nei lo,"a ti ve phiar phiar mai a. Jane chuan,"I fanu chunga rawng taka chetu kha i zawng chhuak dawn lo em ni? Ṭha taka kan thawh ho tur thu leh i fanu thattu i zawn hmuh hma chu i tawpsan loh tur thu i sawi te kha i theihnghilh ta em ni?,"a ti leh nghal bawrh bawrh a. Inspector Zothana chu a ngawi vang vang a,a thaw leh deuh hak a,"Ka nupui hi dinhmun derthawnga awm turin ka phal lo a sin,"a ti zuai raih a. Jane chuan,"I nupui chu hmun him takah a awm ang,chu chu ka tiam a che. Tuman an khawih na tawh lovang,kan hnu chhui mekah hian i pawimawh lutuk a nia,"a ti leh mawlh mawlh a. A tawp a tawpah chuan Inspector Zothana pawh chuan an team chu a rawn zawm ve leh ta nge nge a.

S.I Jolie chuan,"Sir,Sir,Dika pa thattu kha an man tawh a nih chu. Tunah Bawngkawnah kan kal nghal a ngai,"a rawn ti nghal chûl a. Inspector Zothana chuan,"Awle motor kha lo va la chhuak rawh le,"tih pahin Driver chu a hrilh nghal a. Inspector Zothana chuan Jane a call nghal vat a;

"Aw Inspector,"

"Tunah Bawngkawn PS ah i rawn kal ve thei a ngem?,"

"Aw thei ang,engnge thleng a?,"

"Dika pa thattu kha an man a ni awm e,hei keini pawh kan phei mek a. A rang lama rawn thlen i tum dawn nia aw,"

"Awle,ka rawn kal nghal ang."

Jane chuan a Bike chahbi leh Helmet chu a la a,Bawngkawn lam pan chuan a ving chhuak ve nghal a. Mahse,engnge thleng ta hi buaina hlir in a hmuak reng mai,Bazar phei a tlan lai chuan Traffic Police hian a lo phar a,"Khawngaihin i Documents kimchang aw,"a lo ti a. Jane chuan a Documents chu phawrh mai tum a,a bike a tih din lai chuan a bula Traffic Police chu a lem a ni tih a hre chiang ta. A pheikhawk chu Vans dum a ni tlat,Jane chuan,"Ka hmanhmawh deuh a,"tih leh a Bike tih nuna tlan chhuah a rual nghal a. Chu veleh a hnungah Bike 2 in an rawn umzui nghal bawk a,ramhuai speed dik takin a tlan phei puat puat mai a. Kawngah chuan engnge awm a,engnge a sut tih lam a ngaihtuah thei tawh lo. A ving in a ving phei fua fua a ni ber mai.

Eng emaw ti ti in Bawngkawn PS chu a thleng phei ve thei ta hram e. Inspector Zothana chuan,"Nang leh nang lo ang a,i rawn tlai ve teh khiah le,"tih pahin a lo nuih vur vur a. Jane chuan,"Bazar phei aṭang sawn umzui tu ka nei a,duh ang pawn ka rawn thleng hma thei lova pawi khawp mai,"tiin thuhpha a chawi nghal mawlh mawlh a. Inspector Zothana chuan,"Awle eng pawh nise,kan misual chu lo hmu ve hrim hrim la,"tiin an mi man awmna lam chu a pan pui a.

"Dika pa kha engvanga that nge i nih le?,"tiin Jane chuan a zawt nghal tawl mai a. An mi man pa chuan,"Thu pek ka hmuh anga ti mai ka ni,"a lo ti vat a. Jane chuan,"Thu petu che chu tunge? Ka hre lo tiin min chhang miah suh ang che,"a ti nghal hrawk mai a. An mi man pa chuan,"Thu min petu hi ka hre lo. Mahse,min rawn biakna number erawh ka la hria,"a lo ti vat a. Jane chuan,"Number chu sawi rawh le,"tih pahin a Phone a phawrh nghal a,an mi man pa number sawi chu Damdawiina Rsa Phone ruk chhuaha Urgent tia in save kha a ni tih a hre nghal mai a,"Awle a ṭha e,a dang chu court in rêl ve tawh rawh se,"a ti a,a kalsan daih a.

Rsa chuan Roy-a Pendrive chu a Laptop-ah chuan a vuah a,"Khai aaa,"tih pahin a in seh ruh nasa mai a. Jane chuan a rawn bih ve nghal vat a,"Hmel ho chu le,an la hre dawn a lawm,"a ti ve hmarh hmarh a. Pendrive-ah chuan Roy an sawisa lai video chiah a awm a,thil dang chu hmuh tur a awm miah lo. Amy chuan,"Lawkin Rs,khapa hmel kha han pause lawk teh,"a rawn ti a,Rsa chuan video chu a pause nghal vat a. Amy chuan,"Ka hria khipa khi Boss,hmana Zodin over Bridge-a kan mi rinhlelh pa in a hmuh te zinga 1 kha a nih khi,"a lo ti nghal vat a. A Phone a rawn phawrh a,"Hei en mah u la,hepa hi a ni chiang lutuk,"tih pahin thlalak chu a rawn entir a. Rsa chuan,"A nih chiah hi,kan man loh an in ring mawn le?,"a lo ti ve nuah nuah a. Jane chuan,"Thil kal dan hi mak in ti ve em? Kan thil tih dan hi tu emaw chuan min lo chhui ru ve reng emaw,kan zingah hian kan thil ruahman dan zawng zawng hi lo sawi chhuaktu an awm in ka hria,"a lo ti thung a. Amy chu a hawi â ho mai a,"Kan 2 hian min ringhlel tihna em ni?,"a lo ti vat a. Jane chu a nui hak a,"Ka team te zingah hian tumah rinhlelh tur ka nei lo che u. Chu aichuan kan thawhpui Police ho saw ka ringhlel daih zawk,Dika te khuaa i kal pawh kha tunge lo hre hman hmawh le?,"a ti leh a. Rsa chuan,"Ni e a mak khawp mai,"a lo ti ve bawk a,engmah dang chu a sawi lem lova.

Pi Maggie Phone chu a rawn nghawr der der a,Pi Maggie chuan a lo chhang vat a;

"Aw Hello,tunge aw?,"

"Pi Maggie ni em aw?,"

"Aw ni e tunge i nih zawk a?,"

"Hei hi last warning a ni tawh ang aw. I fanu chungchanga case i file hi hnung dawk leh ang che,chuti a nih loh chuan i pasal leh i fanu hi i chân ang,"

"Engtin maw? Ni lo ni lo,ka chhungkua ka chân duh lo,"

"I chhungkua chân i duh loh chuan ka sawi ang chuan ti mai rawh. He thil hi Police leh Detective te in rawlhna tur a ni lo a nia,"

"Awle awle ka hria e,khawngaihin ka fanu kha min pe kir leh hram ang che u aw,"

"Case i la let leh tih ka hriat hunah chiah i fanu chu i hmu ang,"

"Awle naktukah case chu ka la let ang,"

"Awle a ṭha e,ka ring che nia.,"

Phone chu a tawp nghal a,Pi Maggie chu a mangang takzet a ni. A room-ah chuan a vei kual sek mai a,a khât tawkin Sana chu a bih leh zauh zauh ṭhin a. Damdawiina thi chhawnga let reng a pasal leh a fanu naupangte misualin an rukbo chu a ngaihtuah lo thei lo a ni. A chhungkua chân aichuan case hnukkir leh tur chuan thu a ti tlu ta a.

"Engvanginnge case chu laklet leh i duh a? I fanu pawh i la hmu si lova?,"tiin Inspector Zothana chuan Pi Maggie chu a zawt a. Pi Maggie chuan,"Engmah chhan a awm hran lo,ka la let duh a ni mai,"a lo ti bul hmuk a. Inspector Zothana chuan,"Awle a ṭha e,nang berin i tih tlat si chuan kan dang thei ringawt bik hleinem che. Mahse,hei hi hre reng ang che,Police te hian misualte man chiah hi kan tum a ni lova. Mipui te venhim pawh hi kan tihtur tho a ni,amaherawh chu mipuiin kan venhim in duh lova in thu in zûk a nih erawh chuan in chungah eng pawh thleng se mawh kan phur dawn bik lo a nia,"tiin File chu a la a,"I duh thlanna ngeiin case hi i la let a,i chungah eng pawh thleng se mawh kan phur lo ang,"a ti nawn leh a. Pi Maggie chuan engmah sawi tur a hre lo,ngawi rengin File chu a la a, tih tur ṭul ang ang te a tih zawh hnu chuan Damdawiin lam panin bak lêngin a kal phei leh nghal a.

"Eng a? Pi Maggie chuan case a hnukdawk a maw? Thil thleng chu a awm chiang a lawm,"tiin Jane chu a phun nawk nawk a. Inspector Zothana chuan,"A hmel ka en khan eng emaw hlauh a nei niin ka hria,ka zawt thui vak duh bik lova. A duh ang chuan kal phawt se ka ti a,a duh ang chuan ka kal tir mai nihkha,"a lo ti nghal vat a. Jane chuan,"Heng ho hian an fanu hi lo pe kir leh pawh nise,i fanu leh Roy-a chunga an thil tih man kha an la têl dawn khawp a lawm,"tiin a in sehruh ve a. Inspector Zothana chuan,"Ni e awlsam takin kan tawpsan mai lovang,"a lo ti ve bawk a.

Zing lam dar 6:00am a ni a,Pi Maggie pawh a fanu tlanchhuak turin a in siam fel at tawh mai. A bag-ah chuan a cheque book leh a phone leh a thil mamawh tur dang chu a khung khawm vek a. A chhungte dang thawh hma in an In aṭang chuan a chhuak fel thei ta,thawm dim tak chungin an Garage chu a hawng a,Scooty chu a ti nung a,a tum lam pan chuan a in khalh chhuak ta a.

Rsa pawh zingah tho in a walk ve a,tuk danga a kal ngai lohna hmun Complex lamah chuan a kal a. Thui fe a tlan hnu chuan tui te in in a ding a,tlan leh mai tuma a in siamrem lai chuan Pi Maggie chu a hmu hlawl mai a. Pi Maggie erawh chuan Rsa chu a la hmuh ngai loh hrim hrim vangin a hre lo hrim hrim a ni. Rsa chuan Pi Maggie tlanna lam chu pan in a umzui ve nghal a;mahse,ke a Scooty ûm chu umphak a har ve duh khawp mai. A hmu tawh dawn lo emaw a tih hnuah kawng sira Pi Maggie Scooty lo ding chu a hmu hlauh mai,a hawi kual ruai a engmah hmuh a nei lem lo.

"Che tawh suh,"tih pahin a hnung lam aṭang chuan tu emaw hian a tukhumah Pistol-in a rawn chuktuah a. Rsa pawh chu a ding ngil auh mai a,"Tunge i nih a?,"a ti nghal ringawt a. Chupa chuan,"Tunge ka nih i hriat kher a ṭul lo. Helai hmunah hiang eng ti tura rawn kal nge i nih?,"a ti thum chher chher mai a,a âw aṭang chuan a palen hmel hle mai. Rsa chuan,"Min hmu reng lo a mi? Ka walk a nih hi,"tiin ngeiawm zet hian a nui a. "Zawnga,min chhang ve mai rawh aw,"tih pahin Rsa bekah chuan a a chhu ri nghal chawrh a. Rsa chu lei charah chuan a thal nghal tawp a,a harh chhuah leh meuh chuan Pi Maggie te nufa nen chuan room 1 thim deuhah an lo awm ho reng tawh a.