KIDNAPPING OF GIRL - 10

CHAPTER--10

BY:- Rs Thangluah✍🏻

"Tuman an hre lo i ti a ni lawm ni? I hnunga rawn zui ru tu che hi tunge a nih a?,"tiin mipa 1 chuan Pi Maggie chu a vin tuarh tuarh mai a. Pi Maggie chu hlau hlawpin a khur a,ṭawng pawh a ṭawng ṭha hleithei lova,"Ka....ka hre lo,"tih bak a sawi thei lo. Chupa lah chuan hmeichhia a nih vangin dim vak a tum bik si lova,"I sawi duh lo maw?,"tih pahin Pi Maggie chu a beng ṭhuai mai a. Rsa chuan,"Khawih tawh suh,ani kha ka rawn zui reng reng lo. I duh chuan keimah hi min khawih zawk rawh,"tiin Pi Maggie thlavang chu a lo hauh a. Nunui lah chu hlauh vangin a ṭap ṭuau tawh mai bawk si,"Zawnga,lo ngawi mai mai rawh. Chuti lo chu maw i ṭhianpa Roy-a ang khan ka dahṭha ve mai ang che aw,"tih pahin Rsa chu bekah chuan a rawn hnek ve leh nghal chawrh a. Rsa chu a ṭhutna chair aṭang chuan a tla hlawm tawl mai a,"Heyyy Pitar,i hnen aṭanga ka thil duh chu maw,"tih pahin Pi Maggie chu a kuai dâk awrh a,Pi Maggie chu a khur der der mai a,"Aw i duh chu sawi rawh,"a lo ti khur der der a. Chupa chuan,"Tun thla chhungin i pasal hminga ro awm zawng zawng saw ka hmingin a awm tur a ni. Chu chu i hria maw?,"a ti vin ṭhak mai a. Pi Maggie chuan,"Chu thil chu ka thuneihna piah lam a nihchu,"a lo ti zawi sap a. "I pasal chungah chuan thuneihna tlemte tal chu i nei ve ang chu. I fanu kha hruai la,kal rawh u chuan,khawnge Cheque chu?,"tih pahin ngeiawm zet hian a nui a. Pi Maggie chuan a bag chu a hai nghal rawk rawk a,"Kha le kha le,"tih pahin Cheque chu a pawtthla nghal sawk sawk a,a hmaa patling duhãm hmel tak leh pawisak nei lo tih hriat taka ding chu a pe nghal a.

"Chuan maw,helai hmun hi tuman an hre tur a ni lo aw. Hepa hi chu i hre ngai chuang lova,tihian kan lo kawl ve rih a nge. Chuan,nangni nufa chu in kal thei ang. Mahse,ka thil phût kha i ti hlawhtling thei lo a nihchuan maw,engmah tih hreh ka nei dawn lo a nia aw,"tih pahin meizial chu a ṭan a,a pak khu tual tual a. Pi Maggie te nufa pawh chu chulai hmun aṭang chuan an In lam panin an chhuak ta a.

"Boss,Rsa hi ka be tlang thei miah lo nia,"tiin Amy chu mangang tih hriat takin Jane bulah chuan a rawn tlan phei a. Jane pawh a ruk tak chuan a rilru a buai a ni;mahse,Amy bulah chuan pachang taka a awm a ngai tih a hria a ni,"Lungngai suh,engkim a ṭha leh vek mai dawn a lawm. Rsa chuan buaina pawh nei se,amahin a in chingfel thei tih ka chiang a ni,"tiin Amy chu a lo hnêm ve bawk a. Mahse,a rilru tak chuan a mangang ru ve tawh takzet a ni. Amy chuan,"Roy kan chân tawh a,Rsa hi chu kan chân thei tawh lo ang,"a lo ti leh a. Jane chuan a kuah a,"Engmah a thleng lo ang,"a ti mawlh mawlh a.

S.I Jolie chuan,"Sir,Pi Maggie fanu chu a lo let leh tawh a ni âwm e,"tiin Inspector Zothana chu a rawn hrilh a. Inspector Zothana chuan,"Awle min rawn zui la Pi Maggie te Inah chuan kal ang,"tih leh chhuah a rual a. S.I Jolie pawh chuan ngawi rengin a zui ve nghal mai a. Pi Maggie te In an thlen chuan an awm deuh luih luih mai a,S.I Jolie chuan,"Sir,Pi Maggie hi a fâla hmuh a ṭha in ka hria. Engnge i ngaihdan?,"tiin a rawn zawt a. Inspector Zothana chuan,"Nia i biak fâl theih chuan lo biak fâl tum chhin la. Jane ka lo be lawk a nge,"a ti a,phone a phawr a a hmet nghal mual mual a.

"I fanu kidnap tu chu tunge a nih i hre miah lo a maw?,"tiin S.I Jolie chuan Pi Maggie chu a zawt a. Pi Maggie chuan,"Aih ka hre miah lo ka fanu ka hmuh theihna hmun tur min hrilh a. Tahchuan ka kal a,ka fanu chu ka hruai a kan lo haw nghal,"tiin a lo chhang a. S.I Jolie chuan chiang kek kawkin Pi Maggie chu a en a,"I hre lo takzet maw?,"a ti leh a. Pi Maggie chuan,"Aih hre miah lo,"a ti zawi sup a. S.I Jolie chuan zawh nawn pawh a tum tawh lova,"Awle a ṭha e,ka lawm e aw,"a ti a,a tho a Pi Maggie chu a kalsan rih a.

"Rsa awmna chin kan hre bawk si lo. Pi Maggie lahin engmah min hrilh ṭha duh bawk si lo,a buaithlak khawp mai,"Inspector Zothana pawh a lu a hai tawh a ni. A fanu thattu leh Roy thattu hi an man chhuah hma chu an hnu chhui lai hi chawlhsan a tum tawh lo a ni. Jane chuan,"Pi Maggie hian thil tamtak zêp ṭhen a nei ngei ang. Ani hi kan enthlak deuh chu a ngai ang,Rsa erawh chu mipa a ni a. A chungah engpawh thleng se a chingfel thei em em ang,"a lo ti nghal vat a. S.I Jolie chuan,"Pu Kima dinhmun hi engnge a an reng reng le?,"a lo ti thung a. Amy chuan,"Nizana ka kal kha chuan hma a sawn deuh an ti a. Mahse,biak engmah a hre lo,"a lo ti ve nghal vat a. Inspector Zothana chuan,"Imm eng pawh chu nise,kan case buaipui lai ber naupang an rukbo ber pawh engmah kan tih hma in an rawn chhuah a. Mahse,heng misual ho hian thil phût nei lovin engmah an tih ka ring lova. Chuvang chuan,tunah hian naupang hi rawn chhuah pawh nise,an thil phût tihhlawhtlin nan chuan engmah pawisak an neih ka ring lo a ni,"tiin a ngaihdan chu a rawn sawi ve leh a.

I.C.U kawtah chuan mipui an zi luih luih mai a. Amy pawh chung ho karah chuan a tei kual ve sek mai a,a khât tawkin Sana chu a bih leh zauh ṭhin a. Tlai lam dar 4:00pm ah chuan a mi nghah pawh chu a rawn lang ve ta. Amy chuan a ruk thei ang berin a zui a,hla lutuk lovah a ṭawng a hriat phakna siah a awm ve zel a. Mahse,a beng verh zar thei tur thu a la hre lo a ni,tlai dar 5:00pm a ri dawn tak ngial. Mi tamzawk chu mahni In lam pan in an haw zo tawh a,Amy erawh amah chauhin a la ṭhu ngawi kar reng a. A piaha mipa chu a nghak a ni,tlai dar 5:30pm ah chuan chupa pawh chu haw turin a in buaitsaih ve ta. Pu Kima chhungte hnenah chuan Pu Kima kanna tiin ₹200 note a pe a,an in mangṭha hnuah a kal liam zui nghal a. Chu veleh Amy chuan a zui nghal a,Bus Stand thlengin a zui ve ta. Mahse,thui deuh zui a ngaih dawn chuan Jane a pun ngei a ngai ang.

Bus-ah chuan a chuang ve ta ngawt pek a,a hma hma leh chiahah a mi zui pa kha a ṭhu a. Conductor chuan fare a rawn khawn nghal a,chupa chuan,"Khatla,"tih pahin pawisa nawi chu a rawn phawrh a. Amy chuan,"Treasury,"tih pahin fare chu a pe ve nghal a. Jane chu a text nghal vat a;

"Boss,ka mi zuipa hi Khatla thleng a kal dawn a. Tunah hian Bus ah kan chuang mek a,Treasury ah lo awm ang che aw. Treasury ṭangin i ûm zui dawn nia,"

"Awle ka lo awm ang,"

Jane chu Treasury Bus Stand-ah chuan a ding vâng tawh a. Miin an hriat mai theih loh na turin,Tarmit a vuah a,a hmaiah chuan khuavang lem lian vak lovin a siam bawk a. A inchei dan pawh nula awmṭha duh lo a ang khawp mai,lipstick lah chu a hnawih sen vam ham mai bawk a. A piaha mipa 3 ding chuan an en deuh hrek hrek reng bawk a. Rei vak lo hnuah Bus chu a rawn ding ta ngei a,Amy pawh ngawi rengin a rawn chhuk a Jane bulah chuan a kal a,"Jacket uk ha khi aw,"a ti sap a,Venghlui lam pen thlaknaah chuan a chhuk thla nghal a. Jane pawh chu ngawi rengin Bus-ah chuan a lut ve nghal a,Jacket uk ha pa bulah chuan a han ṭhu nghal chat a. Conductor chuan fare a rawn khawn leh a,Jane chuan,"Khatla,"tih pahin pawisa chu a rawn phawrh nghal a. Ngawi rengin Jacket uk hapa bulah chuan a ṭhu ngat ngat mai a.

"Leee Khatla chhuk tur kha le,"tiin Conductor chu a rawn âu lauh lauh a. Jacket uk hapa leh Jane chu an chhuk rual a,Jane chuan,"Ka pu,khawi lamah nge i kal dawn a? Khawngaihin i rualin ka lo kal ve thei a ngem?,"tiin Jacket uk hapa chu a bia a. Chupa chuan,"Ngatinge a? Kalna tur hmun dang i nei lo mi a?,"a rawn ti vat a. Jane chuan a lemchan thiam zia a rawn show ṭan dawn ta,"Imm kalna tur dang ka nei tawh lo. Ka chhungten min duh tawh lova,min chhuahtir a,"tih pah chuan a ṭap nghal titih ta mai a. Chupa chuan a rawn din hnaih deuh a,"Khaih khaih tiangin nula an ṭap ngai lo a nia,kalna tur dang i neih loh chuan ka hnenah i rawn kal dawn nia,"tiin Jane kokiah chuan a rawn vuan a. Jane chuan,"Ka pu,ka lawm lutuk aw ka chunga i ṭhatna hi ka rûl seng tawh lo ang che,"tih pah chuan a kuah a,a âwma bei chung chuan a ṭap a,a inhnit leh feih feih ṭhin a. Chupa chuan,"Awle awle a tawk e,ka hnenah i awm dawn nia i duh chen chen i awm dawn nia,"tiin an in zui ta nge nge a.

Ke in thui vak lo an kal a,an hmaah chuan Bolero 1 hi a lo ding reng tawh a,"Lut rawh le,"tih pahin kawngkhar chu a hawn sak a. Jane pawh chu ngawi rengin a ṭhu lut ve mai a,motor chhungah chuan driver leh mipa 1 hi an lo ṭhu a,"Sir,ani hi,"Driver chuan a sawi zawh hma in,"Zawhna hi ngah viau ṭhin suh ka tihkha,ngawi rengin khalh rawh,"a lo ti hmak mai si. Driver chuan,"Awle Sir,tihpalh,"tih pahin motor chu a ti nung nghal a,motor hmaa darthlalangah chuan Jane chu a lang thei chiah chiah a. Driver chuan a khât tawkin darthlalanga Jane hmel lo lang chu a melh leh zauh ṭhin a. Thuifê an tlan hnu chuan Jane chuan an tlanna lam chu World Bank Road a ni tih a hrethiam nghal a. Mahse,Driver in a en dan chu a ngaih a ṭha zan bik lo ani.

Jacket uk hapa chenna In chu an thleng ta. A In chu a ropuiin a nalh khawp mai,Jane chuan hmu ngai lo ni âwm takin a hawikual vual vual a,"Ka pu,i In chu a ropui hle mai a,"a ti zawi sap a. Driver chuan,"Sir,ani hi..,"a rawn ti leh chiah a,Jacket uk hapa chuan,"Ka thusawi kha i hre lo mi? Motor saw lo dahṭha la,min hawsan thei ang,"a lo ti bul hmuk a. Driver chuan,"Tihpalh Sir,"tih leh Motor awmna lam pan chu a rual nghal a. Jane chuan driver kalna lam chu a va hawilet leh kher a,driver chuan a Phone hmangin thla a lo la mawlh mawlh mai a. Mahse,Jane chuan,"Ka pu,i driver sawn thla min laksak in ka hria,a nuam lo khawp mai,"tih pahin Jacket uk hapa banah chuan a va kaikuah a. Chupa chuan,"Hmmh...Dinga i tih tur chu i hriat kha,"tih pahin a bula palian deuh ding chu a melh a. Chupa pawh chuan a pu thu chu awih takin,"Awle Sir,"tih pahin Driver awmna lam chu a pan nghal hlawk hlawk a.

"Thluakthawlpa,eng thil nge i tih hi?,"tih pahin Driver chu a hnek let tawp mai a. Driver chuan,"Engmaw? Khanu kha i hre lo mi?,"a lo ti thung a. Dinga chuan,"Tu chanchin nge i sawi a? Khanu thla i lak ho kha delete nghal vek rawh,"a ti vin tuarh a. Driver chuan,"Khawngaihin min ngaithla ve la maw le,khanu kha Detective a nihkha kan pu hian engmah a hre lo a nih hi,"a rawn ti bawrh bawrh a. Dina chuan,"Thu lawilo mai a nihchu,i Phone kha min rawn pe rawh,"tih pahin Driver chu a rek bet a,Driver chuan,"Ka thusawi hi engmah in ring ve ngai hleinem. A hma pawn ka thusawi in awih loh vangin kan chetsual ṭep kha,"a ti vin hlak hlak a. Dina chuan,"Thu awihawm sawi ngai hek lo che,i Phone chu ṭha deuhin min pe dawn nge? Ka laksak dawn che,"a ti leh khur khur a. Driver chuan phûr lo zetin a Phone chu a rawn lek kang a,"Kha delete vek rawh,"a ti bung hmuk a.

Jane chu In chhung dungah chuan a teikual sek mai a,"Ka pu,i hming ka la hre miah lova. Keichu Tetei ka ni a,"tih pahin a nui seih a. Chupa chuan,"Pu Thanpui tiin min ko mai dawn nia,ka Inah hian i duh chen chen i awm thei ang,"a ti a,a nui vur vur a. Jane chuan,"Nihchuan i In hi ka fangkual chhin thei a ngem? Hetianga In ropui hi ka vawikhat hmuhna a ni,a ropui tawp,"tih pah chuan a hawi kual leh vual vual a. Pu Thanpuia chuan,"Tehreng mai,han fangkual ta che,"a lo ti nghal vat a.

Jane chuan Pu Thanpuia In chu a fangkual nasa khawp mai. Chhawng chung ber a kal lai chuan mihring na tuar rum ri a hre ta tlat mai,thawm a hriatna lam chu zawite in a pan phei a. A hnaih telh telh a,thawm pawh a ring ve tial tial a,a tawpah chuan an ṭawng ri pawh a hre thei ta.