KIDNAPPING OF GIRL - 11

CHAPTER--11

BY:- Rs Thangluah✍🏻

Thawm dim tak chungin a thâwm hriat chu a ngaithla a. Ri deuh chawrh chawrh ri leh mipa na tuar rum ri chu a in rik chhawk a ni ber mai,"Nula,tahkhan engnge i tih a? Eitur ka peih fel tawh a nia,rawn ei la,"tiin Pu Thanpuia chuan a rawn ko a. Tetei chuan(A hming lem hi hmang lawk ang aw,in lo hrethiam mai dawn nia aw),"Iiiihh tah hian mi an awm a mi?,"tiin hlauhthawn hmel tak hian Pu Thanpuia chu a zawt a. Pu Thanpuia chu a nui hak hak a,"Aww awm e,tinge a?,"a lo ti vat a. Tetei chuan,"Aaaa iiihhh an insual a mi?,"a ti leh a. Pu Thanpuia chuan,"Ka naute ho an practice ṭhin a. Lo chhuk la thil ei ang hmiang,"tiin a rawn nuih ver ver a. Tetei pawh chuan engmah a zawt zui tawh bik lova,ngawi rengin Pu Thanpuia chu In hnuai lamah a zui thla ta a.

"Khilai hmun kha chu hmeichhe tan kalna chi a ni lova. Kal tawh suh aw,a nih loh chuan ka naute hian an zilh nek mai ang che,"thil ei tuam tuam pah chuan Pu Thanpuia chu a ṭawng suam suam a. Tetei chuan,"Awle ka hria e,ka kal tawh miah lovang,"a lo ti zawi sap a,ngawi rengin dawhkana eitur in chhawp chu a ei ve malh malh mai a.

Zan dar 11:00pm a hnai thuak ta,Pu Thanpuia chuan,"Lo kal la,i room tur ka lo kawhhmuh ang che,"tiin chhawng chung lamah chuan an in zui chho leh a. Tetei chuan,"I In hi a ropui e,ka awm reng i phal ang tiraw?,"tih pahin Pu Thanpuia chu ngaihno bei zet hian a han melh a. Pu Thanpuia chuan,"Awle tehreng mai,i duh chen chen i awm thei ang,"a ti a,an ti ti malh malh lai chuan Room 1 hi an thleng a. Pu Thanpuia chuan,"Hei hi i room tur a nia,hei chahbi aw. Naktuk zingkarah ka chhuak dawn a,i duh hun hunah thil i lo ei mai dawn nia aw. Chokaah khan eirawng bawltu a awm a,i duh zawng chu i siam tir mai dawn nia,"tiin In hnuai lamah a chhuk thlak san leh nghal a.

Tetei chu Room-ah chuan a teikual sek mai a. A hawi kual ruai bawk a,a châng leh mi â ang maiin a nui leh hawk hawk ṭhin a. Mut tum a a intintuah mek lai chuan,Beam-a CCTV Camera in phum ru chu a hmu hlauh mai. A awmdan zawng zawng chu an hmu vek thei dawn tih a chiang hle mai,chuvang chuan an rinhlelh theih lohna tur in a chet char char a ngai tih a hria.

Zing dar 2:00am velah chuan mihring ke pen ri a hria a. Muhil ang chiahin a awm a,a mit a meng lova;mahse,a beng erawh a chhi reng thung a. Pawn lamah chuan chu mihring chu a vei kual sek mai a. Zing dar 3:30am ah pawh pawn lam thawm chu a la reh chuang lo,Tetei chu a ngaih a ṭha zan tawh lo a ni. Mahse,chet lakna chi a la ni lo tih erawh a hre chiang em em bawk si.

Zingah chuan Pu Thanpuia thawh hma ngei a thawh chu a tum a. A tum ang ngei chuan a thawh khal reng bawk a,room kawngkhar a hawng chu a phu deuh zuk a. Room piah deuhah chuan mipa 1 hi a lo muthlu lawp lawp a,"Tunge i nih a?,"tih pahin Tetei chuan a sawi harh a. Chupa lah chu a lo phu deuh zuk leh nghal a,"Aaa iiiih tihpalh,nangmah veng tur che a tih ka ni a. Ka lo muthlu palh a,tihpalh lutuk,"a lo ti mawlh mawlh a. Tetei chuan,"A pawi lo a ho lutuk muthlu leh tawh rawh,"tih pahin In hnuai lamah chuan a chhuk thla a. Chokaah chuan eirawng bawltu chuan eirawng a lo bawl malh malh tawh a,"Kha i va tho hma ve,nizan i mu thei meuh lo em ni a?,"a lo ti nghal vat a. Tetei chuan,"Mu thei e,ka thawh hun ve hrim hrim a ni a. Pu hi a la tho lo mi a?,"tih pahin a hawi kual ruai a,kil tinah chuan CCTV Camera an lo vuah fur mai a. Eirawng bawltu chuan,"Aw ani chu dar 7:00am velah a rawn tho ang,"tiin a lo chhang leh vat a,a hnathawh lai chu a chhunzawm leh nghal char char a.

Zing dar 7:00am velah chuan Pu Thanpuia pawh chu a rawn tho ve ta ngei a. Tetei chuan,"Ka thawh khalh che ni maw?,"tih pahin a lo nui var var a. Pu Thanpuia chuan,"Nia i tho hma khawp mai,i mu ṭha maw?,"a lo ti nghal vat a. Tetei chuan,"Aw mu ṭha lutuk e,nang zawk?,"a lo ti leh nghal zat a. Pu Thanpuia chuan,"Imm ka muṭha mah mah a ni,"tih pahin tuisik chu a thli a,a lem khalh khalh a.

"Sir,in lêng i nei a,"tiin mipa 1 hian Pu Thanpuia chu a rawn hrilh a. Pu Thanpuia chuan,"Aw Common room-ah khan min lo nghak lawk rawh se aw,"tiin a lo chhang a. Chupa chuan,"Awle,"tih pahin a kal leh nghal a. Tetei chuan ngawi rengin thil chu a ei malh malh a.

Common room-ah chuan S.I Jolie leh Constable 2 hi an lo ṭhu a. Pu Thanpuia chuan,"E khai Police lam in ni maw? Eng lam nge ni ta a?,"tih pahin an Security pakhat chu a hui zauh a. Security chu a rawn kal nghal vat a,"Kan eisiamtu bulah khan thingpui no 3 siam turin han ti ta che aw. Hei kan in leng te hi an zahawm khep khup si a,"tih pahin a Jacket chu a hlip a,"Hei hi kha laiah khan lo khai nghal mai ta che aw,"a tih zawm leh zat a. Ngawi rengin a Phone chu a hmet mual mual a,an Security pakhat hnenah chuan message a thawn nghal a;

"Kan mikhual nula kha In chung room ruakah khan lo han hruai chho ta che aw."

"Awle Sir,"

S.I Jolie chuan,"Engmah hrilh lawk lo che in kan rawn kal tawp mai a,min lo hrethiam mai a niang chu,"tiin thupha a rawn chawi hmasa te te phawt a. Pu Thanpuia chuan,"E a pawi reng reng lo a nia,in rawn kal chhan ber erawh ka hre miah lo thung a,"tih pahin za vak lo hian a nui a. S.I Jolie chuan,"Nia kan rawn kal chhan ber chu ani hi a nia. Nizan aṭang khan a chhungten a awmna chin an hre tawh lova,"tih pahin a Phone-a hmeichhe thlalak chu a rawn hmuh a. Pu Thanpuia chuan chunu chu tuna an Ina nula awm mek hi a ni tih a hre thei nghal a,"Chuan,engnge i sawi tum ber chu?,"a ti zawi sup a. S.I Jolie chuan,"Nizan zankhua khan a chhungten an call a;mahse,a reject char char a. A phone number hi kan chhui char char a,hetah hian kan rawn chhui lut a nih hi,"tiin thil awmdan chu a sawi nghal mawlh mawlh a. Pu Thanpuia chuan,"A va mak awm ve a,hetah chuan kan eisiamtu bak hi hmeichhe dang an awm miah lo a sin,"a lo ti nghal vat a. S.I Jolie chuan,"A chhungte pawh an mangang tawh khawp mai,"a ti leh a.

"Tunah hian Police in an rawn zawng mek che a. Ka rawn koh leh hma che chu tah hian lo awm char char ang che,"tiin Dina chuan Tetei chu a kalsan a. Rei lo te hnuah Dina chu a rawn let leh a,"I Phone kha off rawh le,"a rawn ti leh a. Tetei chuan,"Awle,"tih pahin a Phone chu a off nghal a. Dina pawh chu ngawi rengin a kal leh nghal mai a.

Tetei chuan a Nokia Black and White chu a rawn phawrh zal zal a. Switch a on a,S.I Jolie chu SMS a thawn nghal a;

"In hnuai lamah khan lo ti khawmuang char char rawh u aw. Hetah hian Rsa chu a awm tih ka chiang a ni,"

S.I Jolie chuan,"I In chhung kan dap min phal sak em?,"tiin Pu Thanpuia chu a zawt a. Pu Thanpuia chuan,"Dap pawh ni u la,engmah hmuh in nei chuang lovang,"a lo ti bul hmuk a. S.I Jolie chuan,"Nihchuan i hnathawk ho hi i ko chhuak vek thei a ngem? A mal te te a thu zawhfiah ka duh a,chu tal chu i phal ang tiraw?,"a ti leh a. Pu Thanpuia chuan,"Awle phal tehreng e le,Dina lo kal teh,"tih pahin Dina chu a hui zauh a. Dina chu a rawn kal nghal a,"Aw Sir,"a ti a,Pu Thanpuia hmaah chuan a rawn ding a. Pu Thanpuia chuan,"I team te ho kha rawn chhuah tir vek rawh aw. Thil tih laklawh lai an nei a nihpawn rawn kal nghal turin hrilh ang che,"tih pahin a mit ko chu a san zauh a. Dina chuan,"Awle ka hrethiam e,"tih pahin In chung lamah chuan a tlanchho nghal ṭuk ṭuk a.

"Ṭhiannu,i lo muhil hman e law? Harh teh hei helai hi emergency exit a ni a,Police in an rawn hmuh hma che in chhuak ang che,"a ti nghal zung zung a. Tetei chuan,"Maw? Keimahin ka kal dawn maw? Ka hlau ve tho a lawm,"a lo ti nghal vat a. Dina chuan,"Engmah hlauh tur a awm lo,nakinah ka rawn zui ve nghal ang che. Chuan,i Phone kha la off char char rawh aw,"a ti leh a. Tetei chuan,"Imm nih min lo zui loh vaih aw,"tih pahin muang changin emergency exit ah chuan a kal ta a. Kawngkhar chu a hawng a,a lut a thawm dim takin a khar leh a. Dina thawm chu a ngaithla a,In hnuai lamah a chhuk tih hriat takin a pen ri ṭuk ṭuk ri chu a hre thei a. Chu veleh Tetei chuan kawngkhar chu a hawng leh nghal a,a hmaa thawm a hriatna room-ah khan a kal phei nghal a. Mahse,chumi room-ah chuan tumah an lo awm tawh lova. Ngawi rengin a hawi a hawi ta ringawt a,"Ni lo,hetiang chuan kan tal buai ngei ang. Rsa hi ka zawn hmuh vat a ngai,"tiin Room hrang hrangah chuan a lut kual a.

A tawpah a beidawn tawpah room lian vak lo hi a hmu fuh hlauh mai. Zawi muangin a pan phei a,kawngkhar chu va hawn mai a tum a;mahse,chhung lamah a lo in kalh tlat a. Room kawngkhar hawnna kua aṭang chuan a bih ta a,a thil hmuh chuan a ti phu chiang kher mai. Rsa chu hmai duk vekin chair-ah an lo phuar bet a,a hmai leh a nghawng vel chu thisen hlir a ni tawh. A bulah chuan mipa 1 hi a vei kual sek bawk a. Jane(a hming tak hmang leh tawh ang aw)chuan kawngkhar chu a kik dawt dawt a,"Lo hawng vat vat teh,Police an lo kal a nia,"tiin mangan hmel deuhin a âu a. In chhung lam aṭang chuan a rawn ri rawk a,kawngkhar chu a rawn in hawng nghal a,"Nang hi heta awm tur i ni lo a sin,"a lo ti nghal vat a. Jane chuan,"Police ka awmna an hre tawh lawm,ka haw duh tawh lo a nia,"tih pahin Room-ah chuan a lut nghal a,a khar leh nghal vat a. "Awi hepa hi tinge a?,"tih pahin pan mai a tum a. Mahse,chupa chuan,"Va hnaih suh,nakinah ka la hrilhfiah dawn che nia,"a lo ti vat a. Dawhkana tui um chu a la a,a in khawlh khawlh a. Chumi lai chu Jane chuan remchangah hmangin a hnung lam aṭangin a rawn zuan thut a,a hrawkah a rek nghal bawk a. Chupa chuan a tui in lai chu a hak nghal bawrh bawrh a,Jane chuan a rek fuh bawk a rei lo te hnuah a zawi nghal vek a. Jane chuan Rsa an phuarna chu a phelh nghal sawk sawk a,Rsa vengtu chhuatlaia tlu reng chu a hnungkhirh a an chhuahsan ta a.

Jane chuan Rsa chu a kuah a,emergency exit lam chu a pan pui nghal hlawk hlawk a. Building lian vak lo hi an thleng hlawl mai a,chutah chuan mihring tumah hmuh tur an awm lova. Building chhungah chuan an lut rawih mai a,hmanhmawh in S.I Jolie chu a call nghal a;

"Aw S.I Jolie ka ni e,"

"Hei kan chhuak fel tawh a. Mahse,kan awmna hmun hi ka hre lo tuna in awmna Building thlang vel kha chu a niin ka hria,"

"Awle ka hrethiam e,nakinah kan inbe leh dawn nia. Tunah chuan hna laklawh ka nei a,"

"Ka ring che aw,"

"Awle,"

S.I Jolie chuan,"Plan ka nei a nia,"a rawn ti a. Pu Thanpuia chuan,"Maw?,"a rawn ti vat a. S.I Jolie chuan,"Tuna nula kan zawn mek te hi mi hausa tak chhungkua an ni a. An chhungte hi bia ila,an fanu chu kidnap a nih thu leh a tlan nan sum an phût thu hrilh ta ila. Tichuan,a tlanna sum chu kan insem mai dawn lawm,"tiin Pu Thanpuia sum duh zia hretu S.I Jolie chuan Pu Thanpuia chu a vehthlem ṭan ta a.