KIDNAPPING OF GIRL - 12

CHAPTER--12

BY:- Rs Thangluah✍🏻

Dika chu Nunui School bang hruai turin a chhuak a. Siami leh Pi Maggie erawh In lamah an buai em em thung a,Pi Maggie chuan,"Siami,zaninah i Pu ka riahpui dawn a. Nunui hi lo enkawl ṭha ang che aw,"tiin a chah a. Siami chuan,"Awle K

ka pi,"tih pahin a lo bu nghut nghut a.

"Ding rawh,"tih pahin a hnung lama Bike rawn tlan chuan horn a rawn pe tuarh a. Dika chu ding mai duh lovin a tlan lui zel a;mahse,thui pawh a tlan hma in a hnung lam aṭangin LPK Truck hian a rawn su chawrh chawrh mai a. Dika chu tlan thei zia zang a ni ta lo,Nunui lah chu hlau em emin a lo ṭap hlawp hlawp bawk a. Dika chuan Nunui chu a pawm a,"Engtinmah i awm dawn lo a nia aw,hlau miah suh,"a ti mawlh mawlh a. A sawi zawh rual rual chuan motor glass chu a rawn ri nghal chhuai a,tlanchhiatna tur a awm tawh lo. Nunui chu a kuah bet a,a theih tawpin venhim a tum a ni. Mahse,patling 5 in patling 1 an han khawih rawn tak tak chuan tlawm loh a har a ni. A ban veilam chu a che thei der tawh lo,a ban dinglam chuan Nunui chu a la kuahbet ṭang ṭang a. Mahse,a venghim zo ngang lo a ni,"Apa Dik,min chhan rawh min hruai bo an tum a ni a. Apa Dik,min chhan rawh..,"tia Nunui âu lawm lawm ri chu hre reng mah se,chhan turin a che thei tawh si lo. A lu chu thisenin a bual khat vek a,a ke pawh a na a ti khawp mai. Lungchhe takin Nunui âu lawm lawm lai chu a thlir liam ta a.

Police ho chuan Rsa pawh chu an chhanchhuak thei ta a. Mahse,a hliamte dam tur chuan hun a duh rei fu ang. Pu Thanpuia leh a naute pawh rinhlelh thil thuah man an ni bawk a,an lungawi lo hlawm khawp mai. "Nangni Police ve mai mai hian kei leh ka naute hi min man ve ngam a maw? Zak teh u aw,in thil tih man hi chu in la tel ve khawp ang,"tiin Police Station-ah chuan a rak chiam chiam a. Inspector Zothana chuan,"Helai hi Police Station a nih hi,i duh duh i sawina hmun tur a ni lo. Lock up-ah khan hruai nghal rawh u,"a rawn ti hmarh hmarh mai a. Pu Thanpuia chuan a rawn melh rum ngang mai,"I la hre dawn khawp a lawm. Mr. Inspector,"a ti zui nuah nuah a.

"Aw Hello tunge aw?,"

"Keimah bawk aw,kan plan kha i hre tawh lo em ni a? Vawiin hi Zirtawpni a ni a,i thutiamah i ding lo a. Police in engkim an hre tawh bawk a,i fanu hi chu hmuh let leh in beisei suh ang che,"

"Eng a? E...engmaw? Khawnge ka fanu chu? Ni lo,ka fanu kha min pe let leh rawh,"

"Tikhan i peih chhung chu lo ṭap mai rawh aw,"

Phone chu a tawp leh nghal a,Pi Maggie chuan a Phone chu a thlauh nghal bawl mai a. Siamtei chuan,"Ka pi,engthil nge thleng a? Engkim a ṭha vek em?,"tiin Pi Maggie tlu tur chu a lo dawm a. Pi Maggie chuan thaw hlawp hlawp pahin,"Dika kha call nghal rawh,keiin Police ka lo bia ang,"a ti nghal mawlh mawlh a. Siami chuan,"Imm awle awle,"tih pahin Dika chu a call nghal a. Mahse,a call tlang thei lo,"Ka pi,ka call tlang thei lo nia,"a rawn ti leh a. Pi Maggie chuan,"Aww eng pawh nise,Police Station lamah ka va kal a nga. Nangin Damdawiin lamah ka pa te lo va awmpui ang che aw,ka kal a nia,"tih leh chhuah a rual nghal a.

"A hma khan i fanu case kha i rawn hnukdawk leh si a. Tunah engvanga case file leh duh nge i nih a?,"tiin Inspector Zothana chuan a zawt kher a. Pi Maggie chuan,"Ni e khami hun lai khan duhthlan tur ka nei lo êm a tin ni. Heng misual ho hian ka fanu leh ka pasal hi an that duh ngei ang,"tiin ṭap ṭuau chungin,a fanu kidnaptu nen an inbiak remna vel chu a sawi mawlh mawlh a. Inspector Zothana chuan,"Awle a ṭha e;mahse,he case hi i hnukdawk leh duh dawn a nihchuan engmah kan ziak lut lo ang,"a ti ve fak fak mai a. Pi Maggie chuan,"Awle ka hria e,a tawp thlengin in lamah ka ṭang tawh ang,"a lo ti nghal mawlh mawlh a.

"Maw? Inspector Zothana an transfer dawn maw?,"Jane chu a meng phawk hra mai a. Rsa chuan,"Aw Lungleiah an transfer dawn. S.I Jolie pawh Champhai lamah an transfer dawn a nih hmel,"a rawn ti nghal a. Jane chuan,"Kan mi man pa khan thil chu a lo ti thei takzet a nih hi. Ani kha an bail chhuak leh ta em ni?,"a rawn ti ve leh a. Rsa chuan,"Aw bail chhuak leh e maw le,chuan maw,Police Department lam aṭang chuan kha case kha tuman an khawih dawn lo bawk. Case chu a thi ang a ni tawh mai,"a ti leh a. Amy chuan noodles ei tuam tuam pahin,"Police ho tel lo chuan a van hahthlak dawn ve aw,"a lo ti ve thung a. Rsa chuan,"Lungngai mah ta che,Police tel lo pawn kan boss hi a ṭha em mai,"tih pahin a nui vur vur a. Jane chuan,"Tunah chuan a hma aia fimkhur zawka kan chet a ngai dawn nia. Police ho hian min support vek lo mah se,a tam zawk hi chuan min support tih ka hria nia. Chuan,Inspector Zothana leh S.I Jolie pawh hmun dangah awm mah se,min puih dan kawng an a awm em em ang,"a rawn ti ve bawk a.

Pi Maggie chu a mangang tawh takzet a ni. A fanu rubo tu chuan a thil phût a tih hlawhtlin sak hma chu a fanu chu a hmuh tir hmel si loh. Chumai a ni lo,a pasal nunna chu engtik hunah pawh a laksak thei reng si. A in nghahna ve ber Police ho lah chuan a case file chu an hmeh mih sak leh bawk si. Inspector Zothana leh S.I Jolie lah hmun hranah an transfer daih bawk si,tunah chuan Detective Jane chiah pun tur a nei tawh a ni.

"Khawngaihin ka fanu hi min zawn hmuh sak hram ang che aw,"tiin a ngen tak te in Pi Maggie chuan Jane chu a rawn ngen a. Jane chuan,"Awle kan theihtawp chu kan chhuah mek zel a lawm. Rawn be ṭhin tu che number kha min pe thei a ngem?,"tiin Pi Maggie chu a dil a. Pi Maggie chuan,"Aw pe thei e,"tih pahin a Phone chu a rawn phawrh a,number chu a sawi nghal a. Jane chuan,"Tunge a hming le?,"a ti leh a,Pi Maggie chuan,"A hming chu ka hre bik lo,kan pa ro zawng zawng hi a hminga awm turin a duh thu te min hrilh a. Chumi chu kan tih fel vek hunah a hming chu min hrilh tur thu a sawi a,"tiin a lo chhang leh a. Jane chuan,"Awle a ṭha e,in Driver kha engnge a an tawh a?,"a rawn ti daih a. Pi Maggie chuan,"Aw a zia tawh lutuk e,"tiin a lo chhang nghal a.

"He phone number hi lo chhui zui nghal char char ang che. Pi Maggie te Inah ka kal dawn a,zan dar 10:00pm hma chuan ka rawn haw lo ang aw,"Jane chuan Rsa chu phone number chu a pe a. Rsa chuan,"Awle mahse,khawnge Amy hi?,"a rawn ti a. Jane chuan,"Choka lamah noodles a ei leh tuam tuam tawh saw. Vawiin chu hahchawl ve rih rawh se,ka kal e aw,"a ti a,a Bike chahbi leh helmet a la a,a chhuak nghal a.

Pi Maggie te Inah chuan veng chhung hruaitu lawk ho leh a nu leh pa te an lo awm nual a. Mahse,an awmpui nula kha a awm ve miah lo mai. Jane chuan mak a ti deuh a,"Khawnge Siami hi?,"tiin Pi Maggie chu a zawt ta tawp a. Pi Maggie chuan,"Zanin chu Damdawiin lamah min chhawk turin ka ti a,riak turin a kal ta nihkha,"a lo ti mai a. Jane pawh chuan engmah a sawi zui lem lova,in lêng dang karah chuan a tlazep ve a. An zinga 1 chuan a hnu chhui vel chungchang a zawt chîk khawp mai a,Jane chuan a chhang ṭha duh vak lem lova. Mahse,chupa chu a ruk tak chuan a en chîk em em thung a. A mit meng,a chezia leh a taksa pianhmang te. A áw phawi dan leh a nuihdan thlengin engkim chu a chîk a ni.

Zan dar 9:45pm ah chuan Jane chuan haw zai a rel ta a. Midang erawh haw tum âwm pawh an la awm lova,Pi Maggie chuan,"Aw a la hma lawm hei la ṭhu ve rih la,"tiin ui beh viau tum mah se,Jane chuan,"Ka naute ka ngaihtuah deuh tawh,ka hawsan phawt ang che u,"tiin a kal chhuak lui a. Pi Maggie chuan,"I tih tlat chuan a nih muttui mangṭha aw,"tiin gate thlengin a va thlah a. Pi Maggie In chhungah a lut chiah tih chuan Jane chuan a Bike chu thim thamah a dah a. A hmai a tuam sauh sauh a,a bike bulah chuan Pi Maggie te inlêng haw hun nghakin, ngawi rengin a ṭhu ta a.

Zan dar 10:30pm velah chuan in leng ṭhenkhat chu an ṭîn ṭan a. Pi Maggie nu leh pa erawh chu Pi Maggie riahpui tura lo kal an nih avangin an rawn chhuak ve lem lova. Dar 11:00pm rik dawn chuan a mi nghah chu a rawn chhuak ve ta. Pi Maggie chuan Gate thlengin a rawn thlah a,Pi Maggie a luh hnu chuan chupa chu a hawi kual hrek hrek a. A phone a rawn phawrh a,tu emaw a call a ni. Mahse,an chhang thei lo nge ni rei lo te hnuah a hmet leh sawk ṭhin a. Chutianga vawi 3 vel a tih hnu chuan,lungawi loh hmel zetin a motor lam chu a pan a. Jane chuan ngawi rengin a en reng a,kawngkawia a tlan liam hnu chuan rang lutukin a ûmzui nghal a.

Thui vak lo a ûm hnu chuan a hmaa motor tlan chu a ding thut mai a. Jane tan chuan han ding ve mai chi zia ziang a ni si lo,zawi muangin a tlan pel a. Kawngkawi a thlen chuan kawngsirah a ding a,Rsa a call a;

"Aw Boss,"

"Amy a muhil tawh em?,"

"Aih la muhil lo,Turkies Serial a en a. Engkim a ṭha maw?,"

"Hei rinhlelhawm deuh ka ûm mek a,City Park piahah ka awm mek a. Nakinah eng emaw a awm chuan ka rawn hrilh leh ang che,ka rawn haw har deuh ang aw,"

"Awle awle,fimkhur la aw,"

"Awle,"

Jane chu Tennis Court lamah a tlan thla a,Tennis Court Bus stand-ah chuan rei vak lo a din hnuin a kalna ngaiah bawk chuan a kual chho leh a. Amah tawk zawngin a ûm pa kha a rawn kual thla ve thung a. Jane chuan chupa motor chu a tâi lui kher a,a ding chiang teh e."Min hmu ve reng lo a mi? En ta che,i tai rân vek hi,"a rawn ti chhuak nghal pung pung a. Jane chuan a Bike chu a hung rem sauh sauh a,"Khawilam nge i pan dawn a?,"tih pahin a din chilh ran mai a. Chupa chuan Jane hmel a hmu chiang chiah chu,"Ee...engmah ka ti lo a nia aw,"a ti a,a lo in tlawh khalh nghal zung zung a. Jane chu a nui var var a,"Engmah i ti lo maw? Motor chhungah khan lut rawh,"tih pahin a nam lut nghal rawk rawk a,"Ngawi reng khan lo ṭhu ang che,"tih pahin a Phone a phawrh a,Rsa a call nghal a;

,"Aw Boss,engkim a ṭha vek maw?,"

"Lo la mu suh aw,hei ka rawn haw dawn chiah aw,"

"Awle ka lo nghak ang che,"

"I haw dawn khan tunge call i tum kha?,"tiin Jane chuan a dawp ṭan ta a. An mi man pa lah chuan a hlau ngang a niang,zun te a lo cheh vel a. Jane chuan,"Nang ang mihring dawihzep lutuk hi engtinnge maw an rin theih che le? Ka hnuaia thawk atan chuan ka duh hauh lo che,"tih pahin a nui hak a. Chupa chuan âw khur dar dar chungin,"Engmah ka ti lo a nia,khawngaihin min kal tir rawh u,"a ti mawlh mawlh mai a,a ṭap lo choh a ni. Jane chuan,"Engmah ti si lo tinge min hlauh em em a?,"a ti leh a. Chupa chuan,"Ka hlau ve tawp che,"a ti khur der der a. Jane chuan,"Tiang chuan engmah kan insawi kaw dawn lo. Naktuk zingah kan in dawp dawn nia,mutsan rih ang u,"tiin an chhuahsan ta rih a.

Zingah chuan Jane chuan a dawp leh ṭan ta. Mahse,a dawih ang aiin dawp chhuah a har ve zek mai. A Phone chu a lak sak a,call list a check nghal a. A hma zana a call chu tunge a nih tih a hre châk khawp mai,a call leh nghal ngat a. A in ring ve ngei e;mahse,chhanna awm thei lo,"Tinge a hmingin i save lohva? Tunge a nih a?,"tih pahin hnai tawkah a en a. Chupa lah chuan,"Khawngaihin min kal tir rawh,"tih bak sawi theih a nei lo. Jane chu a thinrim tawh khawp mai,"Engmah i sawi duh loh chuan,i kawhte ka tan sak ang che,"tiin a vo ṭan ta a. Chupa lah chuan,"Engmah ka ti ve lo nia,khawngaihin min chhuah rawh u,"a rawn ti leh ṭhin a. A tawpah chuan Jane pawh a thinrim takzet tawh,engmah sawi set set lovin a bekah a hnek chawrh mai a,a thal chiang teh e.