VARSHA, KA HMANGAIH CHE

Ziaktu: - Fel Felzz

“A mitmeng paw riai mai chuan min thlahlel tih hriat tak in min melh tawk tawk a, a pa in a kut a chelh a a kaih dawr dawr pawh chuan ka lam ala rawn hawi hram hram a, in mangtha na thu pawh sawi hmanlo a chuti teh thut a min kalsan mai chu tawrh thiam a har ka ti, mahse vai system khirh khan tak mai daidan kan ni tlat sia lawm le tiraw Varsha………..”

Madhya Pradesh Khawlum chu

Kum 2008 chawhnu lam ani a, zirna avang in Madhya Pradesh ah ka awm ve a, (kan awmna hmun tak hi Birkhadi niin Raun kawng ah a awm a, Gwalior bul mai Bhind District ami ani) mizo kan tam vak lo nang in kan inngeih phian a, kawng engkim ah kan in tan in kan tang hra reng thin, khua alum em em a, engtik lai pawh hian thlan a tla char char ti ila kan sawisual meuh lo ang, vairam khawlum tuar thang lo tihtakah darkar tin mai hian kan inbual sek zel mai, sahbawn pawh a hek narawh e, nikhat ah mipakhat in inbual sahbawn pumkhat pawh kan tla meuh lo, chutiang khawp a khawlum ah chuan awm mah ila, football khelh te, basketball khelh te, kabbaddi leh handball chen in kan sim thei der chuang lo a, thenkhat in chhun lamah sava veh in ni anlo tumtawi a, zan lamah keinin kan rawh hmin a, kan ei tlang ta thin a, a hang tui thin hle….

Thla li lai kan awm ve takah chuan khawlum tawrh dan pawh kan lo thiam ve ta, enghelh run lovin nunphung pawh pangai takin kan hmang chho ve tan a, mahse chhun lam class bunk a thingkung a lawn a thawnthu insawi siak chu kan sim thei der chuang lo. Tum khat chu ka thawnthu sawi hun ani a, a ngaithla tu te lah chu thingkung ah chuan an fu far bawk a, thingkunghnuai leilet ah chuan Vainu pakhat hi belte keng hian a rawn kal hlawk hlawk a, kan hnuai chiah ah chuan engkhaw sawi set set lo hian a saree hlim a rual nghal, a thu a, kan en thap a, tumkhat danah a awmhmun a sawn zel a, hmun thum vela a sawh kual hnu chuan a kal ve leh ta mai a, nuih aza bang thei lo….

Love at First sight

Kan pianhma atang tawh a kan school in kalphung hlun alo neih tawh thin ang in Sports meet hun pawh karlohah alo her chhuak ve ta reng mai, keipawh ka tuina ber Basketball a tel ve tur chuan ka inpuah chah ve sauh sauh a, Score Board pawh awmlohna hmun a inpuahchah chu hmasawn a har duh hle, mahse rilru ngaihtuahna nen a khelh chuan a inkhelh tui ve theih tho mai…hehe..

Bus horn ri tuarh chuan min ti harh zawk a, ka room mate (Vai + mizo) ho chu an lo insiam sang sang tawh a,ka zan lam mang a that em avang in thawh ka lo hai alo ni a, vai Pathian ka thawhkhalh hmanlo chu pawi ti teh mah ila chutiang ngaihtuahna hun pawh ka neihloh zia inhria in hmanhmawh bakleng in ka insiam ve ta zung zung a, a tawt a tawt mangkheng hian Bus tawng tawh lam ah chuan sawi bawi in kan inhnawh ve ta naw naw a, khawpui hmasa ber Gwalior ah chuan tukthuan kan ei a, kan tlan zel a Jhansi chu chawhnu herah kan thleng a, kawnglakah kan din ngun em avang in hla ka ti tawh khawp mai, Sir te chuan Jhansi Fort (Rani Kila) tlawh min phalsak tak hlauh avang chuan Bus tawt atang a chhukna hun min siamsak a, ka lawm ru angreng hle, darkar khat dawn thlala kual a hun kan hman hnu chuan Vai puithiam te chu ngai teh mah ila kan liam san leh ta tuah tuah a.

Sagar lam kawngah kal in Lalitpur thlenhma kawngah kan peng a, kan tum ram Tikamgarh chu kan thim lut ta hram a, school dang atang a lokal pawh an tam tawh khawp mai, field ah te chuan an lo thu hnuk a, vai ho tih ngailoh dan takin mipa leh hmeichhia te pawh chu an lo thu bial ve laih a, makti a thlir dauh dauh chung in kan room lam pan chuan kan phei ta hlawm a.

Website a fakna awm hi khawngaihin lo click ve ta che. 

First day zingah chuan School hrang hrang te chu field ah bawk chuan kan P.T luih luih a, mahni School style ang zel in, kan circle siam piah chiah ah chuan Morena ho in bial ansiam ve a, a hmei a pa in exer chu anla ho a, a nawmhmel bik hle keini vai ngalsang pui pui bula lak ai chuan, exer lak pawh chu ngaihsak vak lo chuan ka hawikual vual vual a chutah chuan ani ka nun sawinghing lawih thei khawp a ka hmeichhe duh leh ka tahna titamtu ka tawnna chu ni.

Kan piah atang a bial thumna ah chuan Datia ho in exer an la ve a, ka zawn chiah a ding ani nghe nghe, a nuihmel mawi tak chu thup hauh lo in a khi sang reng a, a kareh te chu vaipa siam tihtakah a mawi chungchuang em em a, a hnarngul sang vah mai leh a mitmeng paw riai mai te, a sam dum tle hlarh mai a phiar kak te chuan ka lairil a fan nghal em em mai, a taksa mawina hmu tur chuan second 10 pawh ka la kher awmlo e…mahse mahse…a pawi ta,…min rawn melh ve tlat mai, ka mit ka la sawn rang hle…ka rilru in heihi ani mai lo maw thlang sappui ten vawikhat in tawnna a hmangaihna lo piang an tih chu.

Dining hall ah pawh chuan ka zawngkual nasa thei hle, zanlamah pawh field ah chuan amah zawng in dinner ei hma chu ka kalkual reng zel. Tikamgarh hi chu Birkhadi ai chuan tlemin a vawt deuh zawk a, bakah kan thlenna piah lawkah Lui (Lui chu ani nang in Dil angin an ping a) a awm a, chutah chuan chhun khawlum ah kan va cheng thin a, chung hmunah te pawh chuan ka zawng thin, ka hmuh in ka be ngam chuang lo a, mahse hmuh ve hrim hrim ka chak avang in a mah zawng reng reng in hun ka hmang ani ber mai.

Idea ka nei ta, amah ka hnaih theihna tur a kawng awlsam ber chu an school mipa te kawmnel hmasak (Vai ho chu an mipa te hian an hmeichhia te hi an hauh na thei hle mai a, heihi mizo ten vai kan tluklohna pakhat niin ka hria) ani. An school Basketballer ho chu ka titi pui ta zeuh zeuh a, Mizo ka nih avang in ka dress adang a, ka awphawi pawh adang a, hindi ka hmang ngai lo (ka thiamloh vang pawh ani em em chuang lo nia.. :D ), english chuan thiam leh thiamlo in zaizir nen a tangkawp in kan in be ta thin a,Basketball chu kan practice ho a,  vaiho aia tlem a a rules vel ka lo hriat ve deuh avang chuan min kawmnel rang ta khawp mai, ka awmna chu vaiho bawr luih luihna lai alo ni chho ve tan ta, nuam pawh ka ti ve narawh, mahse tum nei ran a thilti ka nihna chu lantir tut tut ka tum bik hauh lo.

Tlailam dar 4:30 alo rik chuan ka inbual fai sar sar a, vaiho chu inbual lemlo in pheikhawk an thlak a, sahbawn tello in hmai an phih thuak a field ah leng tur in an kal mai a, min nghak rengtu ka thianpa Satendra Sharma (Satend-a) pawh ahnampui te tihdan ang bawk in a lo awm a, ka hman veleh field lamah chuan kan phei ve ta nghal a, mi pawh anlo tam tawh khawp mai, mipa leh hmeichhe inbiak theih hun anih avang in kan school lampang ho bula kal ta lo chuan Satend te school ho thutbialna lamah chuan min phei pui a, an tawng (Hindi slang) chuan introduction te min pek sak a,  thenkhat chuan kan culture min zawt a, then in kan awmna (mizoram) location te min zawt a, Nepal ah ami/Burma ah ami/Bangladesh inni em?, etc. a mawl hi chu an mawl ve thlawt e, ka Rani-i chuan eng zawhna mah min la zawt ve miah lo, mahse Satend a hnen a ka lo insawi bawnna chu satend a vek chuan a han sawi lang ta zeuh aniang chu, kan thil ei thin ah bawk chuan kan lut leh ta nge nge, Ui atang a tan in Vawk,Bawng, etc.ka insawi bawn tial tial a, Khau, Rul, Mihring sa chen in….an awih ve em em tho a, chutah chiah chuan zawhna ka dawng ta, ka Rani-I chuan Mihring sa in ei tak tak maw a ti a, ei tak tak lo e, ka tifiam mai mai nih kha ka ti leh daih a, a hamhaih angreng hmel pawh chu a tha tho mai.

Chumi ni atang chuan hunawl ka neih phawt chuan an zingah chuan ka tel ngei ngei a, zawhna leh chhanna hlir in kan in kawm ani ber mai, mahse anuam angreng phian, khua alum avang in Boxer nen ka kal mai zel a, chung ringawt te pawh chu mak an ti thei em em a, ka penkhat leh pawh chuan zawhna liantak asiam ani ber mai, mahse nuam ka ti laklawh tlat.

Game pawh chu kan tan chho ve ta mawp mawp a, kan school pawh kan chetha tluang chho ve zel, kan inkhelh apiang in ka Rani-i te thian ho chuan min lo en ngei ngei thin a, min lo au nasa thei hle, an sap film hriat ve chhun aniang chu  ka ti mai a Harry potter tih hlir in min ko thin a, a sakhming pawh chu Satend atang chuang ka hre ve ta a, Varsha Dharya niin Varsha tiin ka ko ve mai bawk a. Go-on Harry Potter an lo tih te chuan chakna thar min siamsak a, kan inhlang kai ve hram hram thin, semi final ah an school nen kan intum ta tlat mai, tunah zet zawng min au tu an awm tawh dawnlo anih hi ka ti hman a, mahse ka rin a ang ta hauh lo, an thianho chuan an auhla ngai bawk hmang in kan inkhelh chhung zawng chuan min awi leh a, mahse kan chak zo ta chuang lo.

Final ah chuan an school tan in kan au ve ta thung a, kan awm ho a, kan rak chel chul mai, kan inbe ve tan ta zeuh zeuh a, a mizia a zawiin an school mipa ho bulah phei chuan a tawng tha ngam lo thin hle, mahse ka be lui tlat a, in chhan loh thu awm hek suh, ka ti nui ve leh nge nge thin, inkhel a zo a, ka rin ang ngei in an school mipa ho chu pakhatna anni a, kan school pakhatna kan nih na aiin ka lawm mah zawk a.

Darkar khat hnu ah chuan information mike atang chuan Cluster meet chu kan zawh tawh thu leh Regional meet atana players thlanna neihtur anih thu an rawn puang dum dum a, hmanhmawh zet in Satend a nen chuan field lam pan chuan hostel atang chuan kan tlan phei ve ta nghal a, trial ah chuan kan che tha dun ve angreng khawp mai, kan pahnih chuan regional meet player ni tur chuan min select ve leh ta hlauh mai, kan lawm lutuk chu kan ri chel chul a, Varsha-i te thian ho pawh chu an select vek a, ka lawm a zual hle (Varsha-I pawh hi Basketballer ani).

Atuk zingah chuan a haw tur leh Regional meet lam pana kal tur te chu bus ah kan lawn sang sang a, tap hawm hawm chung a in kuah ngawih ngawih lah hmuh tur an tam, ka mizo pui te  ah pawh pahnih an tling zo lo a, pahnih kan tling a, kei Basketball ah niin ka thianpa (Tluanga) chu Hand ball ah a in vawm tling ve hlauh a, mizo kan tlem tawh mahnak laia kan la tlem belh tur chu ka ngai ngam lo hle a, chutah kan regional khelhna hmun tur ala in ang lo zui, keimah chiah mizo ka awm tur chu ka huphurh ve ang reng hle, ka thianpa satend leh Varsha-I chu awmlo se haw ve leh daih mai tak ka nap a.

Kan regional meet khelhna tur Jabalpur (Sipai motor siamchhuahna khua)chu zan dar 11 velah kan thleng a, kan chuanna bus a tawt thin em avang in bus chung ah chuang in kan thleng ve thak a, chauh ana duh hle.

Varsha-I nen pawh chuan inbiak falna hun kan nei ve ta zeuh zeuh a, chance vawihnih kan neihna (chance han tih hian helai a chance kan neih ang hi ani ve lo a, hlam thum vela hla ah ding chung ve ve in kan in be thin) ah chuan ka duh thu chu ka hrilh ta tawp a, kan la naupan vang ani pahfawm ang, azak chu a tlan chhe ta daih a,hrilh a hai duh khawp mai.

Zankhua in ka muhil theilo, ka hrilh ta chu ka inchhir em em a, lo hrilh lo ila a tha tur te ka han ti leh thin, ka huih pap pap a, mahse mi dawihzep ,dawih luat avang a mahni chanvo pawh hauh ngam lo nih ka duhloh avang in tlem in ka inti paukhauh a, ka hrilhta pawh chu ngaiawhna kawng ani tih zawng in ka herpui a zing lam ah chuan ka chhing ve ta sek a..

Breakfast ei tur chuan hmaipawh phih lo in kun ngal in dining hall ka pan a, Varsha-I thiannu Angela Dubey chuan min lo ko a, hmai ka phihlo chu pawi ka ti leh hnuhnawh khawp mai, mahse inbiakna hmun anih loh avang in lehkha them te hi min pe a, breakfast dawh tur chuan a in line ve leh ta nghal a, engtak chu niang maw..

Ka hlim lutuk chu awm ngaihna hrelo in ka phi cheng a, ka thuruk engkim ka hrilh ve ngam awmchhun Satend a bulah chuan ka tlan phei nghal a, min duh thu letter hmang a min hrilh thu chu sawi pawh sawi chhuak tha hleithei lo khawp in ka hlimna chuan min tlakbuak ani ber mai, ani pawh chuan min lawmpui em em a, ka hlim avang chuan ahlim ve tho ani tih a mitmeng ah chuan ka hre thiam ve mai, engpawh nise ka hlim ani.

Kan inhmuh hnuhnun berna hmun ah ngei chuan lai tak chung in ka hma ah chuan Varsha-I chu a ding a, min duh ve vanga ka lawmzia thu te chu ka sawi melh melh a, mahse engvang a nimin a min tlansan daih khange anih tih ka zawh chuan, Tikamgarh a zing kan PT laia ka en char char laia min rawn hmuh ve atang daih tawh khan min lo duh ve thu leh ngaihzawng ala neih ngailoh avang a azah thu min hrilh chuan ka awm ati nuam veng veng thei nia. A vawikhatna atan a kut chu ka vuan ve a, in haw lo tak in field lam pawn chuan kan kawng zawh ngai ve ve atang in kan phei ve leh ta a, kan inhmuhna hmun  hming hi Jadu sthan tiin kan vuah nghe nghe, thingkung pali in a hual a, lungpui  pakht lian vak lo hi a awm a, chumi ngheng chuan kan inbe thin, tunah la awm tak ang maw…………….

Kan sport pawh chu a tiak ve leh dawn ta reng mai, Mandir a kal an rawt a, an school ho rual chuan tlang a mandir ah chuan ka kal ve a, kawng tluan in kan in chhawm chho a, joker tak tak in ka che a, a nui nasa thei hle, an culture a inlet tur ten min sawm der a, satend a pawh hian min sawm fo thin, mahse ka chhanna chu angai reng, “Mizo ka ni a, engpawh thleng se mizo ka ni reng ang” tiin.

Mandir kan thleng chho chu a hmun a nuam hle mai, Tikamgarh Dam(Tuikhuah) lian mangkheng tak mai pawh chu chiang takin kan hmu thei a, a hla deuh bawk a motor pawh fanghmir tiat vel lek in a dum nal nal thei, a chhung ah chuan tawngtai tur in min luh san a, an luh dawn chuan lut ve tur in min sawm nasa hle,  a chhung atang in in Pathian hnenah lawmthu i sawi ve thei tho lawm an tih pawh chu dik ti viau mah ila tawngtai lam hi ka chemkalna lam anih lutuk loh avang in ka zui lut duh lem lo a, a hmunhma ka lo fan tur thu ka hrilh a, min luhsan ta a.

A hmun hi a thengthaw nuam khawp mai a, tlangchhip a awm tihtakah thlifim a thaw heuh heuh reng a, tlangram anih ve tho avang in mizoram lam ka ngai thar ta em em a, a hnunglam te fangkual a rei ngial khua ka chuan hnu chuan anni pawh anlo chhuak a, an puithiam chuan min en ang he haw a, narial (Coconut) chu a chhu keh a, min pe ve a, ka ei ve mai bawk a. (hei hi ka tisual em aw ka ti).

Haw kawng tluan in kan pahnih in kan inkawm thla char char a, pani puri te kan ei dun a, thla te kan la dun bawk a, (heta kan thlalakna hi tunlai ang in digital la hi hek lo, a rollfilm ka lo dahthat loh luatah ka ti chhe vek a ka ui hle) hmun fianrial ve deuh pakhat kan thleng a, kan thian dang te chu a thlang deuh kawngpui bul a khawmhma rah tuarh mai lo chuan an ri chel chul a, thuthmun kan remsan a, ding chung char char a inbe thin kan nih avang in thu chung a kan han awmfal ta mai chu rin aiin a zamawm duh phian, eng eng emaw kan sawi kual hnu chuan hmangaihna thu lamah bawk chuan kan lut kual leh a, a tawp khar nan ka hmeichhe fawh hmasak ber tur atan a hmui no chek mai, fawh chakawm hliah hliah mai chu ka fawp ta a,a maimitchhing tlat a, min fawp let ve lem lo, ani tan pawh a vawikhatna ve tho anih avang in kan zeilo dun hle… (tun hnu hi chu ni se awwwww…. :D ).

National khel tur a min select tak loh avang chuan keini chu haw tur in bus ah kan thu thap tawh a, ka piah chiah ah Varsha-I pawh chu athiannu nen an thu a, Satend-a chu national meet khel tur a thlan anih avang in ka bul tukverh atang chuan thu min hrilh mawlh mawlh a, min ngaihtur zia te, fel min tih thu te,nakum lama Mizoram atang a national meet lokal ngei ngei tura min tih thu te chu uar fahran in a sawi mawlh mawlh a, letter in thawnna tur te chu address min pe bawk a, kan in bye bye liam ta a.

Bus chu tlem a a thawl deuh a vang in a a hmalamah daih kan Sir te an chuang bawk a, rei vakloh hnu ah chuan Varsha-I nen chuan a hnung ber seat ruak lamah chuan kan insawn dun ta daih a, an thiante chuan min hrethiam tak in ngawi reng in an lo awm ve mai a, an fel angreng ka ti phian.

Zanah te chuan kut in suih rial in kan muhil a, mumang ka lo nei a, ka mumang ah chuan Vai dum urh em em mai hi Moneitu thuam famkim a inthuam in Mo alo nghak a, keichu Cameraman ka lo ni a, mo thlir a kan ring kan fan ngial hnu chuan Car pawl nalh zer zawr tak mai atang hian mo chu hmaikhuh in a rawn chhuak a, thla ka lo la mawlh mawlh a, an meichhem an kalhual hnu chuan mo chuan a hmaikhuh chu a hlim a,..ka reiii…..Varsha-i ngei mai chu lo niin….ka thlalak pawh chu ka ngaihtuah tawh lo, ka mitsulh a, ka chal a rawn na zawk a, ka thangharh hlawl mai, bus chu driver in kawngpui a bawng rawn tlan lut thut avang in a lo break zawk hi alo ni a, ka hma seat chu ka chal chuan ka lo tauh chawrh a, varsha-I pawh chu a rawn harh ve nghal a, duat taka min chhem sak hnu ah bawng pawh a kalsawn tawh avang in tui tak in kan muhil leh a, mumang erawh ka nei tawh lem lo.

Kan school theuh kan pan hma in Tikamgarh ah bawk chuan kan let khawm leh a, game hrang hrang a national khel tura tling ve lo ho chu kan in hmu khawm leh ani ber mai, a then an rak chel chul a, mizo tawng a ka tawnglohna pawh karkhat chuang anih tawh avang in ka mizo thian neih ve chhun Tluanga zawng chuan ka tlan kual ta zak zak a, a kalpui te ka zawh lahin  a awmna an hriat mai bikloh thu leh haw chu an rawn haw rual ngei thu min hrilh a, school compound chhung vawithum ka hel chhuah hnu pawh chuan ka la hmu ta chuang lo, mizo tawnga tawng ka chak tawh em vang pawh ani pakhat a, ka hmu chak em em a, khatiang reng reng a thiante ka ngaih kha ka la hre ngai lo tun thleng pawh hian, mahse ka ngaihtuahna ah thil alo lut thut, a awmna tur nia ka rin gate pawn lam pan chuan ka tlan leh vang vang a, ka rin ang ngei in Pani puri hi alo ei tuam tuam a, then thaw chung hian, “I tla ve tho law, hei lo ei ve rawh hmanni a siamtu pa aikhan a siam tui daih zawk” alo ti chu khawvel a mizo tawng mawi ber ani hial ta ve ang, a chhan chu pawisa pakhatmah ka neih tawhloh avang in ka kal pelh theih ngaihloh pani puri pawh vawitam ka lo kalpel tawh si a.

In then darhna ni

A tuk ah chuan mahni school bus theuh ah chuang in kan in bye bye lawm lawm a, Varsha-I pawh chu thei leh thei lo in ka melh tawk tawk a, ani pawh chuan min rawn melh ve tawk tawk a, Sir leh Ma’m te an awm ve thup avang in inbiak chu thil theih tawh loh ani tih hrechiang ve ve tu kan nih avang in ralkhat atang a in melh tlawk tlawk mailoh chu tih theih kan nei tlem hle, an bus chu a chhuak hmasa a, keini pawh an zawh loh lamtluang lam chu chhui in kan school lam pan chuan kan khu phei ve ta vung vung a.

Kan intiam ang ngei in school leh school atang pawh chuan letter kan in thawn tawn zak zak a, inhmuh leh kan chakzia chu kan thupui ani deuh ber mai, tumkhat ka ngai lutuk chu inkhua ah ka rawn zin dawn tiin letter ka thawn fiam chhin a, a chhanletna chu ka rinloh lam daih ani, a theihloh, helaia i rawn kal chuan an that mai ang che min ti anih chu, min thah ka hlauh vang ni miahlo in khami ni atang khan kan inkar chhe tur hlau reng reng chuan ka hun ka hmang ani ta ber mai.

Kum  5 hnuah chuan

Letter inthawn chu kan bansan hlei thei lo, karkhatah vawikhat tal letter kan in thawn ngei ngei ani ber mai, a thlentlai trum phei chuan min theihnghilh tawh aniang tiin thiante min rawn ang in theihnghilh ve te ka han tum ve thin a, mahse a theih ngang loh, a letter alo thlen hi chuan a tana ka la rinawm reng thu bawk hi ka thawnlet ve leh thin, kum 2 chhung letter kan inthawn hnu chuan Mizoram lamah pawh phone alo lar ve tan a, phone no.te inhrilh in kan in text nasa thei hle, zankhaw tairek thleng thleng in kan intext a, a chang in kan inti thinrim a, achang leh kan in ngeih leh em em a, mahse vawikhat mah ka hmangaih che ka la tilo a, ani pawh in min la hrilh hek lo, ka hmangaih tih chu ka hria, mahse kan inhmuh huna hrilh ah ka khek tlat a, ka khek kumkhua dawn ta anih hi….

Ani pawh 12 a pass hnu ah Agra ah Engineer a zir a, kei pawh ka tuina lam, Hindi BA ka zir ve mek a, mini-migration nei tur in Agra a kalna chance kan nei ta hlauh mai, chutah chuan inhmuh kan tum ruh khawp mai, zan tin ka zin hun tur sawiin kan phul hluah thin, mahse kan phurna zawng zawng te kha a thamral dawn ani tih reng kan hre silo…..

Agra ah chuan karkhat kan awmna chiah ani a, chawhnu lam dar 4 ah Taj Mahal kawtah inhmu tur in kan in tiama, chawhma lam class kal in chawhnu lam pawh angai te bawk in hmeichhe bajar pui tur in hun ka hmang ral a, dar 3 a rik chuan kan College, Kendrya Hindi Sansthan atang chuan Auto la in ka Rani hmu tur chuan mahniin ka kal ta a, ka thiante chuan chutia mahni chauh a ka chhuakta chu mak miin tiin ka lo kalpui ang che an ti hlawm a, mahse ka duhlo, a chhan chu Varsha-i an hmuh hunah an vei ve lutuk tur kha ka duhpui lo tlat ani.

Kan in text reng a, kan intiam na hmun a a awmtawh thu leh mipui an tam lutuk loh thu min hrilh a, kei pawh ka thlengphei ve chawpchilh deuh nghal mai a, ticket te ka lakzawh chuan hmanhmawh tak in Taj Mahal kawt lam chu ka pan a, mi chihrang hrang, hnam chi hrang hrang kal khawm kan nih avang in inzahpah vak angai lem lo bawk a ka rin avang in kan inhmu chu ka kuah nghal thawr a, mahse ka tisual ta tlat mai………A hnung lawk ah chuan Varsha-I nu leh pa chuan min lo en reng a, ka kuahna pawh chu ala thla rang kher mai, a zak lutuk chu a sen awp awp a a pa chuan an tawng chuan a hau nghal mawlh mawlh a, kei pawh chuan ngati nge min hrilh lawk loh ka ti ve bawk a, surprise che ka duh a, ka thian pa Mizoram ami tiin ka sawi che a, rei lote ka titi pui lawk duh che a ti a, a pa hnenah chuan a dil a, ani pawh chuan lungsi zanlo in a lo phal ve mai bawk a, a piah lawka thutna awmah chuan kan thu a. Fel, ka thil hrilh tur che hi pawi ka ti lutuk, midang ka hrilh tur ni zawk se ka ti mange a tih pah chuan a mittui alo luang nghal nguai nguai a, sawi tur a ka tih hnu chuan in sut feih feih in ka thu hriat chakloh ber mai chu min hrilh ta a, anu leh pa chuan tuna a zirlai hi a zir zawh veleh a a Pasal tur Hindu sakhaw bemi , mi kulmuk lutuk  an lo zawnhmuh sak tawh chu niin, hrilh miahlo in an lo zawn sak a, tukin khan Datia atang in Agra an rawn thlen thut thu leh chu thu pawhchu an hrilh nghal thu a sawi a, mahse tih theih ka va nei tlem si em, a nu leh pa chuan kan piah lawk atang in min en reng a, an veng ani ber ang chu, anu leh pa hnenah chuan a last request na ni tur in min hmuh a duh thu leh min hmuh loh chuan a pasal tur chu neilo a mahni intih hlum a avau avang chuan a nu leh pa chuan veng reng chung in an lo kalpui hi alo nia, kan inhmuhleh na chu kan inhmuh tawpna ani dawn tihreng reng ka hre lo, thu sawi tum in ka ang zuau hman, apa chuan a rawn kuai her lawp a, a mitmeng paw riai mai chuan min thlahlel tih hriat tak in min melh tawk tawk a, a pa in a kut a chelh a a kaih dawr dawr pawh chuan ka lam ala rawn hawi hram hram a, in mangtha na thu pawh sawi hmanlo a chuti teh thut a min kalsan mai hi tawrh thiam a har ka ti, mahse vai system khirh khan tak mai daidan kan ni tlat sia lawm le tiraw Varsha……….

Vawitam biak tum a ka call pawh in a in switchoff char char a, facebook ah lah a account a in deactivate a, twitter ah chuti bawk, skype a ka try pawn a khawih ngailoh avang in update engmah a awm bawk silo, Agra ah kan awm chhung chuan nitin ka zawng a, bazar ah te, Akbar Kabar ah te, Red ford ah te, leh hmun hrang hrang ah te ka zawn pawh chuan ka hmu ta ngai lo.

Tunah hei kum 3 lai alo liam ve leh dawn ta reng mai, pasal chu anei ta ah ka ngai a, biak ka tum tawhlo a, ka zawng tawh hek lo, mahse January thla chawhma lampang khan Satend-a’n min lo call hlawl mai a “Bro, thu lungchhiat thlak tak hrilh che hi ka hreh lutuk, Varsha-i kha a pasal in a sawisa hlum” kan inbiak lai pawh chu ka ngaihtuah tawh lo, ka bing muai muai a, ka tlu tawp a, ka harh chhuah leh meuh chuan ka chhungten  min lo bial laih a, ka hriat tham lek in ka sawi chak em em, “VARSHA, ME TUMSE MOHOBBAT KARTA HU” ka ti thawp sat a.