KIDNAPPING OF GIRL - 8

CHAPTER--8

BY:- Rs Thangluah✍🏻

"Hetah hian kan kal tih hi engtinnge i hriat hrim hrim a?,"tiin S.I Jolie chuan chupa chu a melh kar mai a. Chupa chuan,"Chuzawng ka hre hauh lo mai,thu min pek anga ti mai ka ni,"tiin a lo chhang a. S.I Jolie chuan,"Awle a ṭha e Amy,tikhan lo awm lawk ru aw,"tih pahin pawnah chuan a chhuak nghal a.

S.I Jolie chuan Inspector Zothana chu a call nghal vat a;

"Aw Jolie,"

"Sir,i buai em? Ka lo be buai lawk che aw,"

"Buai love,chanchinthar(Chanchinthar tih hi ziah zawm tur nge zawm loh tur tih hi ka hre hrang lova. Dik nia ka ngaih angin ka ziah zawm a,ziah zawm loh tur a nihchuan khawngaihin a dik zawk min hrilh dawn nia aw) a awm mi?,"

"Aw awm e,hei zui tu kan nei tlat mai,"

"Engtin a? Zui tu i tih awmzia chu,zui ru tu maw?,"

"Aw chutiang deuh chu,helamah hian engtinnge kan awm tih hi an hriat le aw? Sir,zanin la la hian midang 5 vel i rawn tir thla thei a ngem?,"

"Awle thei e,ka rawn tir thla nghal dawn nia,"

"Awle sir a lawmawm lutuk e,nakinah ka rawn be leh ang che aw,"

"Aw awle awle,"

Inspector Zothana chuan midang 5 chu S.I Jolie te join turin a tir liam leh ta a. Jane leh Roy pawh anmahni hna thawkin an buai ve khawp mai a.

"Naupang,nangmah vang hian ka sum hmuh tur ang pawh ka la hmuh theih loh phah. Ka thu chu nise,khawvelah hian i awm tawh lo ang,"tiin Nunui chu a melh khui khui a. Nunui lah chu a ṭap pur mai a,"Anu bulah ka kal duh,min chhuah tir rawh,"tiin an phuarna hruihrual hrawl zet mai chu tal pît tumin a tal ve ngat ngat mai a. A bula palian zet mai ding chu a nui huah huah a,"I nu bulah i kal duh maw? Mawh,i kal duh maw?,"a ti vin tuarh tuarh a. Nunui chuan,"Imm anu bulah ka kal duh,"tih pah chuan a ṭap pur mai a. Chupa lah chu a nui huah huah a,a nui ri te lah chu hmeichhe naupang tan chuan rapawm tak a ni,"Ka hlawh tur ka hmuh hunah i nu bulah chuan i kal dawn nia aw,"tih pahin Nunui chu ngeiawm zet hian a nuih a.

Pu Kima chuan ṭhat lam aiin zual lam a pan zel mai bawk si. Cabin-ah chuan rei fe an awm hnuah Doctor te thurâwn angin I.C.U ah dah luh a ni ta a. Pi Maggie lah chuan a fanu chin chang engmah hriat a nei tawh si lo,chu a chhapah a pasal lah thichhawngin natna khumah a mu reng bawk si. A rilru ngaihtuahna chu a chawmawlh vek tawh ni mai hian a hria a ni,Pathian hnenah pawh a dil nasa;mahse,chhanna lawmawm engmah a hmu thei si lo. A chang chuan Pathian te hi a dem leh lek lek ṭhin.

Zan dar 10:30pm velah Police dang 5 te chuan S.I Jolie te chu an rawn fin ve ta a. An hnena rawn in pe a,an thil ruahman dan rawn sawitu pa chu rin ngam chi a ni a ngem? Lo ring lo dawn ringawt se,a thusawi chu a tak ni ta se buaina hi engtinnge an chinfel tak ang? S.I Jolie pawh a ngaihtuahna a buai khawp mai,Inspector Zothana a call a,thil awmdan zawng zawng chu a hrilh vek a. Aizawl lam chu Inspector Zothana kutah a dah ta rih a.

Inspector Zothana chuan hmanhmawh takin Jane chu a call nghal a. Mahse,Jane chuan a lo chhang thei miah lo mai,Inspector Zothana chu a ngaih a ṭha tawh lo takzet a ni. Jane chu a call nawn leh a,a beidawn tawpah chuan a lo chhang ve ta hram a;

"Aw Inspector,"

"I phone te hi ngaihsak ve ṭhin teh. Ka thusawi hi ngun deuhin lo ngaithla la,damdawiin lam kha lo thlithlai ang che,"

"Awle eng thil nge ni ta?,"

"Information kan dawn dan chuan,naktuk khawvar hma ngei hian Pu Kima kha tihhlum tum a ni. Chu thil chu kan thlen tir tur a ni lo,"

"Engtin maw? Pu Kima chu I.C.U ah a awm daih lawm. Keini pawh naktuk zing chaw eikhamah chhuah kan tum a sin,"

"Engmaw? Chutiang te chu min rawn hrilh ve vat ta che,"

"Ka rawn call che a,ka call tlang thei lo che a. Whatsapp-ah message ka rawn hnutchhiah che kha i hmu lo mi?,"

"Huiham a va hahthlak ṭhin e aw. Khawi damdawiinah nge an awm? Chuan,Roy hian thu thar hriat a nei em?,"

"Civil-ah an awm,Roy chu ka la be tlang thei rih lo. Engkim a ṭhat vek beisei phawt ang,Amy te hi i be tlang thei em? Ka be tlang thei miah lova,"

"Nichin khan S.I Jolie nen kan inbia a,Pu Kima tihhlum an tum chungchang pawh min lo hrilh a lawm. Rsa kha kalsan ngam a ni em?,"

"Aw ngam e,khawnge kan inhmuh ang?,"

"Kan Inah rawn kal mai rawh,tichuan thil awmdan a zirin kan che chhuak dawn nia,"

"Awle ka rawn kal nghal ang,"

Inspector Zothana chuan Pistol chu a hrufai hliau hliau a,"Ka fanu chunga rawng taka chetu chu keimah ngei hian ka la that ve khawp ang. Ka fanu khan tu pawi mah a sawi lo a sin,"tiin a inseh ruh a,tui taka muhil a nupui chu a en tlawk tlawk a. Ngawi rengin thawm dim takin an room aṭang chuan a chhuak ta a. Sitting room-ah chuan a vei kual sek mai a,a khât tawkin sana chu a bih leh zauh ṭhin a. Jane chu rawn thleng har a ti tawh khawp mai,20mins vel a nghah hnu pawh chuan a la rawn thleng thei si lo. A beidawng chuan a call leh ta ringawt a;mahse,chhanna a dawng thei lo,"A tlan laklawh a nih dawn hi,"tiin a Phone chu a ak ṭha leh mai a. Chumi hnu rei vak lovah chuan a nupui mangang âu thawm chu a hre ta,rang lutukin an room lamah chuan a tlanchho nghal a.

"Ding rawh,pen khat pawh i rawn pen leh a nihchuan i nupui duhtak luah hian Silai mu hi ka thun a ni mai,"tih pahin hmaituam 1 hian a nupui chu a lo rek bet a,Pistol-in a lo tin rân tawh mai a. Inspector Zothana chuan,"Ka nupui kha thlah rawh,ka kap hreh bik lo che a nia aw,"tiin a Silai chu a hmet kâu ve nghal a. Mahse,misualpa chuan a hlau lo khawp mai,"I silai kha dah la,ka thu zawm mai rawh. Chuti lo chu,i nupui duhtak hi a thi a ni mai,"tih pahin a aia na in a rek bet a. Inspector Zothana pawh chuan chan chhe zawk a ni tih a in hria a,zawi muangin a silai chu a dah thla ve ta a.

"Pu Inspector,ka thusawi tur hi ngun deuhin lo ngaithla ang che,"tih pahin chhuata Inspector Zothana Silai dah chu a pet sawn a. Inspector Zothana'n a chhan let hma chuan,door bell a rawn ri nghal ral ral a. Inspector Zothana chuan Jane a rawn thleng tawh tih a hre nghal mai a.

"Tunge?,"tih pahin hmaituam chuan Inspector Zothana chu a rawn mit mei a. Inspector Zothana chuan,"Ka hre bik lo,i hriat duh chuan zu hawnsak mai rawh,"a lo ti bul hmuk a. Chu veleh Inspector Zothana bek chu a ri nghal chawrh a,"Ṭha deuhin min chhang ni la,kut ka thlak che hi a ngai lo ang,"tih pahin Inspector Zothana nupui chu a kuah bet a,a kâ chu puanin a hnawh sak a. A hnungkhirh nghal a,Inspector Zothana chu a rawn che leh ṭual ṭual a,"Tun ang hunah tunge rawn kal?,"a ti leh khur khur a. Inspector Zothana chuan,"Ka hre lo,"tih bakin a chhang duh si lo. Door bell chu vawi 5 vel a rik hnuah Inspector Zothana Phone chu a rawn ri ta mai si,"Tunge?,"tih pahin misualpa chuan Inspector Zothana Phone chu a laksak nghal a,"Chhang rawh le,"tih pahin Speaker a on nghal a;

"Aw Jane,"

"Ngatinge kawngkhar i rawn hawn theih lohva? Thil dik lo a awm em ni?,"

"Aih awm love,ka lo chhing sek a lawm le. Ka rawn hawng dawn e aw,"

"Awle,ka nghak che nia,"

"Awle ka rawn kal ang."

"Thil thleng hi i sawi chuan,i nupui hi ngaihtuah ang che,"tih pahin Phone chu Inspector ipteah chuan a thun lut nghal a. Inspector Zothana chu ngawi rengin In hnuai lamah a chhuk thla buk buk a.

"Thil thleng a awm a mi?,"tiin Jane chuan chîk zetin Inspector Zothana chu a melh a. Inspector Zothana chuan,"Aih engmah chutiang a awm lo. Damdawiinah va let tawh zawk rawh,"a lo ti thung a. Jane erawh a ngaih a ṭha lo takzet a ni,a hawi kual ruai a,"I nupui a mu tawh mi?,"a ti leh a. Inspector Zothana chuan,"A nu te In lamah a riak rih a,"a lo ti thawp sut a. Jane chuan engmah zawh zui a tum tawh lo,"Awle i duh ang chuan ka let leh a nge. Mahse,thil thleng eng emaw a awm chuan min rawn hrilh nghal vat ang che aw. Zanin chu Roy leh Amy te hi ka be thei tawh miah lova,ka ngaih a ṭha zan tawh lo a nia,"a ti nuah nuah a. Inspector Zothana chuan,"Engmah a thleng lovang,ngaihtuah lutuk duh suh. Nang pawh Damdawiin lamah chuan lova phei leh rih phawt mai rawh. Thu thar a awm tak leh ka rawn hrilh leh zawk dawn che nia,"a lo ti vat a. Jane chuan ngaih ṭha lo tih hriat takin hawi kual ruai pahin,"Awle i thu ang chuan ni rawh se,"a ti a,Inspector Zothana te In chu a chhuahsan ta rih a.

Roy-a bek chu a ri nghal chawrh a,"Nang hian min lo chhui zui ngam a maw? Zanin hian i thi dawn tih hre rawh,"tih pahin palian deuh 1 chuan a rawn hnek chawrh chawrh mai a. Roy chuan engmah a sawi lova,sawi pawh a tum hek lo. "Tunah hian khawi khawiah nge i partner te hi an awm?,"a ti vin ṭhak a. Roy chuan engmah sawi a tum hauh lo,a ngawi ngul mai a,"Hmela,min chhang dawn lo maw?,"tih pahin Roy-a hmaiah chuan dim baksak lo hian chemte hmawr zum chuan a rawn zai kak a,"I sawi dawn nge dawn lo?,"a ti leh a. Roy chu ṭawng thei lo ang maiin a ngawi reng a,a kâ chu a âng eih lo a ni. "Huh...tunah hian sawi duh lo mah la,i la sawi dawn khawp a lawm,"tih pahin a bianga a zaina laiah tak chuan a rawn hnek leh a. Roy chu a ṭhen ve tlawk tlawk mai,a hmai chu thisen hlirin a khat tawh a ni.