KIDNAPPING OF GIRL - 7

CHAPTER--7

BY:- Rs Thangluah✍🏻

"Ehee...ṭhianpa,khi enteh khi khi thisen a ni tiraw?,"tih pahin Ruata chuan a ṭhianpa chu a kawhhmuh a. Zuala chuan Ruata kawhna lam chu a hawi chho vat a,"Eheee a nih khi,han enfiah chhin ang,"tih pahin thisen rawn luan chhuahna hmun lam pan chuan a tlan chho nghal hlawk hlawk a. Ruata pawh chuan a rawn zui ve nghal a,"Ṭhianpa,khawih rih suh aw. Police kan hrilh vat a ngai nihkha,"tih pahin Ruata chuan a Phone chu a phawrh a,Police Station a be pawp nghal a.

Kar lovah Police ho pawh chuan mitthi ruang an hmuhna chu an rawn thleng ve nghal bawk a. An mitthi ruang hmuh chu tunge a nih tih an la hre thei mai bik lova,an hmuhna hmun chu kawngkual zau laiah a ni a. Kawng chhak hnim pik karah a lo awm a ni,a taksaah chuan hliam a tuar nasa khawp mai. A bul velah pawh thisen a baw hnem khawp mai,Police Inspector chuan,"Hemi khaw mi hi in ni em?,"tiin Ruata chu a melh a. Ruata chuan,"Sir,aih ni love Aizawl lama awm kan ni a. Ka pu te khuaah kan zin thla dawn a,"tiin a lo chhang vat a. Inspector chuan a lu a bu nghut nghut a,"Eng pawh nise,amah hi hemi khaw chhung mi pawh hi a lo ni ve thei tho bawk a. Chuvang chuan hma han lak vak ngaihna pawh a la awm rih lova,nangni 2 kha khuaah han kal u la. Y.M.A hruaitu te hnenah han sawi tawp u la,an khaw mi a lo ni hlauh chuan an duh danin hma kan la zawk dawn a nia,"tiin Constable 2 te chu khuaah a tir chho ta a.

Amy leh S.I Jolie pawh khualzin naran angin Dika te khuaah chuan an awm ve chawt a. S.I Jolie hi chu Dika khan a lo hmelhriat tawh avangin,Dika mit hmuhah chuan a in lan vak a rem lo a ni. Amy erawh Dika te Inah pawh a tlangnel tawh khawp mai. Dika te Inah chuan mo lawm tur ho chu an zi nuai nuai mai a,Dika nu chuan,"Mama,khawnge maw i pa hi le? Nichin lawk khan Phone a hmang mawlh mawlh a,ka hmu leh tawh lo reng reng. Tun ang hunah te chuan len bo pawh a hun lo a sin maw le aw,"a lo ti bawrh bawrh a. Dika chuan,"Ka hre bik miah lo mai a,ka pu te In lamah hian a kal a ni lo maw?,"tiin a lo chhang vat a. Mahse,Dika pawh chu a ngaih a ṭha zan tawh lo a ni. A pa hian ngawi rengin In a chhuahsan ngai lo a sin maw le? Room-ah chuan a lut a,a pa phone number chu a dial a;mahse,switch off a in ti tlat bawk si. Vawi 5 vel a dial hnuah pawh switch off a in tih char char avang chuan a ngaih a ṭha tawh lo takzet a ni.

Room aṭanga a chhuak chu Police leh an khaw Y.M.A hruaitu te an lo kim ṭhap mai. Dika chuan a va pan vat a,an khaw Y.M.A President chuan,"Khawngaihin min lo hrethiam u la,.."a ngawi leh vang vang a,a âw a han thian leh kharh kharh a,"Eng lo a nia,in hlimlai tak a ni tih chu kan hai lova. Mahse,...,"a sawi zawh hma in Dika chuan a lo pawt chat a,"Engnge thleng a? Eng chungchang nge sawi i tum ber hi? Pehhel lovin sawi rawh,"a lo ti nghal bawrh bawrh a. Midang ho erawh chu an ngawi ṭhap hlawm a,Y.M.A President chu a rawn ṭawng chhuak leh a,"A pawi khawp mai,nichin khan Police ho hian i pa ruang an chhar thu min lo hrilh a,"a ti a,Dika kokiah chuan a vuan a. Dika chuan han sawi mai tur pawh a hre lo,a nu leh a farnute erawh lungchhe takin an ṭap nghal hawm hawm mai a.

Dika pa boral thu chuan an khua chu a deng chhuak rang hle mai. An khua mai ni lo,Mizoram pum chu a deng chhuak nghal a ni. A farnute inneih hun tur pawh ṭhulh leh rih a ni a,a mipa lam erawh chuan an lo nghah tur thu an sawi thung a. Dika chuan a pa thihna chu a tuar khawp mai,thih ah pawh thih dan pangngai lo mi kut tuara thi a nih mai bakah,daifêmah tumah ngaihsak lovin a awm a ni si a,"He thil ti tu hi chu ka man chhuak a nga,a phû tawk hremna chu keimah ngei hian ka pe dawn a lawm. Ka pa chunga a thil tih man hi chu a la hmu ve khawp ang,"tiin a in seh ruh a,phuba lak ngei chu a tum ruh tlat a ni.

Police ho chuan an theih anga rangin hma an la ve na chu,engmah hmuh chhuah leh hnuhma han chhui zui tur an hmu lo a ni. Mahse,Dika chhungte ngenna angin hnuchhui erawh an tawpsan chuang lova. Amy leh S.I Jolie pawn a ruk thei ang berin an chhui zui char char a,tualthattu hian hnuhma han chhuizui tur engmah a hnutchhiah si lova an tan pawh hmabak a ko khawp mai. Mahse,beidawn mai erawh an tum bik lo a ni.

Amy chuan Dika chu a titi pui ṭan ta a,"E i Pa Phone kha hmanni khan i hmuh loh thu i sawi kha,kan zawng nawn leh miah lova,"tiin bul a rawn ṭan phawt a. Dika chuan,"E ni e,kan la zawng leh chhin miah lova. Lo kal la,room velah sawn min lo zawnpui chhin teh,"tih pahin room lamah chuan an inzui phei ta a. Amy chuan,"I call khan a tlang thei miah lo maw?,"a ti leh a. Dika chuan,"Aw switch off a in ti char char a,"a lo ti vat a. Amy chuan,"Khawimaw kan call ve chhin nge aw,a number min lo pe la,"a ti a,a Phone chu a phawrh a. Dika pawh chuan a Pa Phone number chu a rawn hmet chhuak ve bawk a,"Kha call ve chhin reng reng,"tih pahin Amy chu Phone a rawn pe a,an lehkhabu dahna vel chu a hai leh nghal a. Amy chuan ngawi rengin Dika pa number chu a la a,chumi zawhah Dika call log chu hmanhmawh deuhin a en leh nghal a. Number hlang ringawt hi call received ah chuan a lo awm a,chu number chu Amy chuan a la leh nghal a. Chumi zawh chuan Dika Pa number ah chuan a dial ve nghal a;mahse,awmzia awm lo switch off a la in ti char char tho. Amy chuan,"Huizzz Dika,ka call tlang thei bik lo. A mak e tiraw? A thuamhnaw hak laiah khan Police ho khan engmah an hmu bawk si lova,Phone keng chhuak lo chu nise Inah hian awm ve awm tak chu a nia,"tih pahin a Phone chu a hmet leh mual mual a. Dika chuan,"Nia,a mak khawp mai ka hrethiam lo. Chubakah hetianga ka pa chunga ti duh tur mi hi tunge ni ang le? Ka pa hi a haw viau em ni zawk le?,"a ti a,chairah chuan a ṭhu a a in dawm kun tlawk tlawk mai a. Amy chuan,"Lungngai reng reng suh,Police ho hian an man chhuak leh vat mai dawn lawm,"tiin a lo hnêm ve bawk a.

Amy chuan Dika Phone aṭanga number hlang a lak chhuah leh,Dika Pa number chu Jane hnenah a thawn nghal a;

"Boss,phone number 2 ka rawn thawn dawn che a. A hmasa zawk hi chu Dika Pa number a ni a,a hnung zawk chu Dika Phone call log aṭanga ka lak chhuah a ni a. Tunge a nih pawh ka hre hran lo;mahse,rinhlelh thil thuah ka rawn pe ve tawp che a. I lo en chhin dawn nia aw,"

"Awle rawn thawn la,"

"9615495522 Dika Pa number"

"8247980741 hemi hi ka hre lo aw,"

"Awle kan lo chhui zui dawn nia. Chuan maw,tunkar chhungin thu thar engmah in hriat loh chuan in rawn haw chho mai dawn nia aw,"

"Awle Boss,"

"Boss,Pu Rintluanga chu tukin dar 9:30am vela Bazar kal kha tun thlengin a lo la haw lo a nih chu,"tiin Roy chuan Jane chu a rawn hrilh nghal vat a. Jane chuan Sana a bih vat a,"Ehee Damdawiinah ka kal vat a ngai,Pu Rintluanga chu Police ho nen lo buaipui mai ru aw. Damdawiin lamah thil hmanhmawh thlak lutuk a awm,"tih pahin a Car chahbi a la,a phit chhuak nghal a. Roy chu a thaw deuh halh a,"A va mak ching cheng ṭhin tak e aw,"tih pahin phûr lo zetin a Bike chahbi leh Helmet chu a la a,Police Station lama kal turin a chhuak ve nghal a.

Damdawiinah chuan mi an lo zi nuai nuai mai a. Jane chuan a ngaihna a hre lo hle mai,a bula putar ding pakhat hnenah chuan,"Ka pu,hei eng thil nge thleng ta hi?,"tiin a zawt tawp mai a. Putar chuan,"Kan dam lo pakhat hi a zual deuh a ni awm e a,"tiin a lo chhang vat a. Jane chuan,"A zia lo hle mai a,"tih pahin 2nd Floor ah chuan a chho tlang nghal a. Dam lo zual an tih chu Pu Kima a lo ni reng a,Siami a hmu hlauh a,"Siami,lo kal lawk teh,"tih pahin a lo pawt peng zauh a. Siami chuan,"Aw engnge ni ta a?,"a lo ti zawi sap a. Jane chuan,"I pu hi engtik aṭanginnge a zual a? Nizan lam kha chuan a ṭha hle si a,"tiin a zawt chawt mai a. Siami chuan,"Tukin dar 9:00am vel aṭang khan a thawk a buai ṭan a,tunah phei chuan a thaw chiah kan en tawh,"tih pahin a mittui rawn hnâm ṭiam ṭiam chu a hru zauh a. Jane chuan,"Awle ka lawm e,"tih pahin an mahni awmna Cabin-ah chuan a lut nghal a. "Dam lo anga awm chu ka ning tawh hle mai,"tiin Rsa chu a lo nui vur vur a. Jane chuan,"Pu Kima chu a zual deuh a ni awm e,"a ti nghal zat a. Rsa chuan nui chungin,"Rawn hrilh che ka tum a,'Ka rawn biak hmasak loh che chuan min rawn be hmasa lo ang che,'i tih kha ka hre chhuak leh thut a,ka rawn call ta lo mai. Mahse,hei erawh ka nei a nia,"tih pahin Phone 1hi a rawn lek chhuak a. Jane chuan,"Khawi a mi nge? Tu Phone nge a?,"a ti nghal vat a. Rsa chuan,"Kan mi rinhlelh pa Phone kha maw le,ka ruk chhuah hnuah ka la on leh miah lova,"tih pahin a khum bula Apple chu a la a,a keih nghal mawlh mawlh a. Jane chuan,"A ṭha lutuk e,Phone chu rawn la la. Keiman ka lo buaipui ang,ka rawn let leh hma chu khawiah mah lo chhuak suh ang che. Dar 4:00pm hma in rawn let leh ka tum dawn nia,"tiin eitur a lei chu Rsa mutna bul dawhkanah chuan a dah a,Rsa Phone ken lai chu a laksak a ngawi rengin kawngkhar lam chu a pan nghal a. Rsa chuan,"Pitar tak hi chu aw,i thu awih a ngai bawk sia hahthlak ṭhin teh e. Mahse,ka duh zawng eitur i rawn lei ṭeuh tho a,ka lawm tho e,"tih pahin a nui suk a. Jane chu a rawn hawi let leh rang khawp mai,"Lulian,ngawi mai teh. I mawngtamah nurse ka jection tir leh palh ang che aw,"tih pahin kawngka chu a khar a,a kal nghal nul nul a.

Jane chu Zodin Over Bridge lam panin ke in a kal phei nghal nul nul a. Bazar Bungkawn phei vel a kal lai chuan,a rin loh leh beisei loh deuh maiin a hmaa mipa a ûmzui vak pa kha a hmu leh hlawl mai a. Rang lutukin Mask a vuah a,chupa awmna lam pan chuan a pen phei nghal hlawk hlawk mai a. Kawng kân turin chupa chu a lo insiam rem mek a,Jane chu chupa piah deuhah chuan a ding ve vâng mai a. Mahse,thil thleng chuan a ti hrilhhai takzet a ni,a mi umzui pa chuan eng khaw sawi set set lovin mipui tamna karah chuan amah leh amah chu a inkap ta mai. Kâ pawh chhawn lovin a hmunah chuan a boral nghal a,mipui chiai chu an tlan darh sung sung a. Jane erawh kalsawn mai lovin mitthi pa awmna lam chu a pan phei nghal a.

"Ka pi,tunge i nih?,"tiin Traffic Police 1 chuan Jane chu a lo ko ding a. Jane chuan a I.D Card chu hmuh pahin,"Detective Jane,"tih pahin a nui suk a. Traffic Police pawh chuan,"Sorry Miss,"tih pahin in thiam loh hmel zetin a kun deuh chal a. Jane chuan,"A pawi lo a ho lutuk,Police lam pawh an lo thleng ṭep ang,"tih pahin kawngpuia patling ruang let reng chu a pan hnai a. A khabea in kâp a ni bawk a,a khabe ruh chu a chhe hneh khawp mai. Jane chuan Police ho rawn kal hma chu engmah a khawih duh bik lova.

Rei lo te hnuah Inspector Zothana leh a Team te pawh an lo thleng ve nghal vat a. Jane chuan thil thlen dan tlangpui chu a lo hrilh nghal zung zung a,chumi hnuah mitthi chu Hospital lamah phurh chhoh a ni ta a. Darkar 1 chuang fê a chhungte zawngin an phe buai tawh,Social Media-ah a hmel ti langin a chhungte an zawng châm chí bawk a. Mahse,tumahin 'Ka ui,ka Ar'an rawn ti si lo,tlai lamah chuan an chhungte nia insawi chu an rawn thleng ve ta. Mahse,a chhungte tak tak an ni a ngem? Eng pawh nise,Jane chuan a theih ang angin thu a lo zawt nghal mawlh mawlh a;

"In nau hian ruihhlo leh a kaihhnawih lam hi a khawih ve ṭhin em?,"tiin a zawt nghal tawp a. A bula ṭhu patling kum 50 vel mi chuan,"Ka hriat chinah chuan mezial a zuk zeuh zeuh bak hi chu ruihhlo dang a khawih âwm hi chu ka hre lo,"tiin a lo chhang vat a. Jane chu a lu a bu nghat nghat a,"A nihchuan,in chêng ho lo tihna em ni?,"tiin a zawt leh a. Chupa chuan,"Aw cheng ho love,nikum kum tir lam khan amah in a In dang ve a. Kan veng a in hlat bawk sia,kan in tlawh pawh meuh lo a ni ber mai. Amah zawk hi a rawn leng zeuh ṭhin tih loh chu kan inhmu khât thei khawp mai,"tiin fiah fel fai tak chuan a chhang zel a. Jane chuan,"A nihchuan engtiknge in inhmuh tawp ber? I la hre thei a ngem?,"tiin a zawt leh a. Chupa chu a ngawi vang vang a,"Aaammmhhh...aw ka hre leh si. Nikum Krismas hma khan a lo leng a;mahse,a awm rei vak lo. Pawisa tam vak lo min rawn pe a,min chhuahsan leh nghal daih a,"tiin a lo chhang leh vat a. Jane chu a ngawi vang vang a,a khuh khak khak a;

"In inhmuh tawp ber ni chuan,a hmelah eng emaw danglamna riau a awm em? Aaaah...entirnan,lungngai hmel deuh ang chi te kha,"

"Imm i sawi takah chuan khami ni khan a hmel chu nidang a ang lo. Nidang aiin a nui tlem a,bakah kan Inah khan a awm rei lo bawk. Tu emaw in Phone ah a lo bia a,chumi hnu chuan a chhuak leh nghal daih a,"

"Awle,a lawmawm lutuk e. Ka zawhnate ṭha takin min chhang a,ka lawm lutuk a nia aw,"tiin a ding a,a kalsawn nghal a.

Jane chuan Rsa Phone ruk chhuah chu a on ta nge nge a. Vanneih thlak takin Lock Pattern a lo awm lo hlauh mai,Jane chuan engkim chu a check nghal char char a. Amy hnen aṭanga Phone number 2 a dawn pawh chu chu Phone ah chuan a lo awm ve thlap mai. Dika pa kha chu Phone aṭang chuan vawi 20 call na a awm a,chu pawh chu a ruang an hmuh hma zan khan a ni. Number 1 thung erawh hi chu URGENT tiin a in save tlat mai. Jane chuan Phone chu a off leh nghal a,Inspector Zothana te awmna lam chu a pan phei nghal a.

"Inspector,chanchin thar ka nei a nia aw. Chawhnu lam tlai dar 3:30pm ah Office ah ka rawn hmu ang che,tunah chuan Damdawiin lamah ka kal a ngai a,"tiin Inspector Zothana chu a hrilh a. Inspector Zothana chuan,"Awle tehreng mai,i chanchinthar neih chu a lawmawm lam a nih ngei ka beisei,"tih pahin a lo nui suk a. Jane chuan,"Thu lawmawm a ni tih kha ring nghal tawp mai rawh,"tih pahin nui var var chungin Damdawiin aṭang chuan a chhuak nghal a.

Rsa chu Cabin chhungah chuan a lo vei kual sek a. Jane rawn lut a hmuh chuan,"Engtia rei nge hetianga ka awm hi la ngai dawn a?,"a lo ti nghal vat a. Jane chuan,"A rei tawh lovang,Phone neitu hian Phone hi a zawng nasa viau ang a?,"tih pahin Phone chu a rawn phawrh a,a nui var var a. Rsa chuan,"Zawng e nichin pawn kawngka bul ṭangin an ṭawng ka ngaithla a. An buai khawp mai,"a lo ti ve nghal vat a. Jane chuan,"Zaninah kan pe dawn nia,"a lo ti zawi sup a. Rsa chuan,"I â mi?,"a lo ti hâ mai a. Jane chu a nui hawk hawk a,"Â love keimahnin kan pe dawn hleinem,i hlauthawng a nihkha. Chuan,naktuk aṭang chuan i bialnu duh em em khan a lo kan ve che ka phalsak tawh ang che,"tih pahin tui chu a in khawlh khawlh a. Rsa chuan a kawng a dawm a,a nui hak a,"Thil i tih flop vaih aw,"a ti leh hram a. Jane chuan engmah sawi lovin khum sira Megazine chu a chhiar malh malh thung a.

Zan dar 11:30pm a ni a,Amy chu thil ri rek avang chuan a harh zawk mai a. A lukham hnuaia a Phone chu a dap nghal vat a,a hmet êng nghal a. Tukverh aṭang chuan tu emaw hi a zuangthla lai hi a hmu hman zuai a,"Rukru,"tih leh in perh thawh a rual a. Pawn lamah lah na tuar ṭê thawm an hre zui nghal a,midang pawh chu an rawn tho nghal sup sup a. Pawnah an tlan chhuak nghal a,rukru pa chu an man rang khawp mai. Khawchhung mi a nih loh vang chuan an dim lo hlawm khawp mai;mahse,khawtlang hruaitu ten duhtawk tura an tih vangin an in bengdai thei ta hram a. Rukru chu Y.M.A Office lamah an hruai chho ta nghal a.

S.I Jolie chuan Amy chu a rawn call a;

"Aw Jolie,"

"Amy,tunah rawn kal nghal rawh. Dika te Inah kan awm aw,hmanhmawh in,"

"Engnge thleng a?,"

"Tuna sawi mai chi pawh a ni lo,lo kal tawp mai rawh. Tunah,"

"Awle awle ka lo kal nghal e."

S.I Jolie chuan,"Ani hian hrilh duh che a nei a ni awm e,i hriat zawng a ni em?,"tih pahin an hmaa palian vak lo ding chu a melh a. Amy chuan a en vang vang a,"Khawiah emaw chuan ka hmu tawh che in ka hria,"a lo ti zawi sup a. Chupa chuan muang ban cherh churh hian,"Ka thusawi tur hi ngun deuhin lo ngaithla ang che u. Tunah hian kha naupang kha midang kutah hlan an tum mek a,chumai ni lovin naktuk khawvar hma ngeiin Pu Kima hi thah an tum bawk a ni. Chu chu thleng turin ka duh lova,nangni hian in titawp thei tih ka hria. Chuvang chuan in kutah keichu ka rawn surrender tawp mai a nih hi,"tiin a in puang ta a. Amy chuan,"Damdawiinah khan ka hmu tawh che in ka hria,"a lo ti leh a. Chupa chuan,"Aw hmu ang,thil pawi a thlen hma in engkim hi titawp u la ka duh a ni,"a ti leh a. S.I Jolie chuan,"I thusawi hi rin ngam a ni ang maw?,"a lo ti khauh mai a. Chupa chuan,"Aw rin ngam ni lo se,thih pawh huamin ka rawn inpe lovang,"a ti ve thung a. Amy chuan,"Anih engvanginnge hetah kher? Aizawlah pawh i chingfel vek thei tho si a,"a lo ti ve bawk a. Chupa chuan,"Helamah hian nangni 2 hi umzui tur che u a tirh ka ni miau sia lawm. Ka thusawi chu ring u la,naktuk khawvar hma ngeiin engkim hi titawp ang che u. Mahse,engkim in chinfel hma chu kei hi in kutah ka awm tih an hre tur a ni lo,"a ti ve leh mauh mai si. Amy chuan,"Awle a ṭha e,zaninah kan tifel nghal ang,"a lo ti chang fak a,a mit meng aṭang chuan chupa chu a ring lo tih a hriat theih mai a.