KIDNAPPING OF GIRL - 5

CHAPTER--5

BY:- Rs Thangluah{Remz}✍🏻

Mahse,buaina pakhat awm ta chu. Bridge-ah chuan inhmu dawn pawh ni se,khawilai Bridge berah nge an inhmuh ang? Amy chu a thluak a buai leh map mai,pawn lamah a chhuak a. Jane chu a call nghal a;

"Aw Amy,"

"Boss,hma chu kan sawn deuhin ka hria. Rinhlelh pakhat chu ka nei a,chumi chuan naktuk zing dar 9:00am ah Bridge-ah tu emaw hmuh a tum a. Mahse,khawilai Bridge-ah ber nge tih ka hre lo a ni,"

"Immm i thawk ṭha lutuk e,Bridge kha chu a buaithlak loh. Amah kha a hmel kha chiang deuhin chhinchhiah la,naktukah zing dar 9:00am rik hma in Aizawl khawpui chhunga Bridge awm zawng zawngah i kal vek dawn nia,"

"Mahse,"

"Engnge mahse?,"

"Lo awm lo zel ta se,"

"A awm ang,"

"Imm awle,ka hrethiam e. Nihchuan,ka haw thei tawh a ngem?,"

"Thei lo deuh ang?,"

"Engnge ka la tih dawn?,"

"Staff room-ah khan va kal la,Cabin ruak a awm leh awm loh va zawt la. Cabin ruak a awm chuan,naktukah dam lo dah luh tur an awm thu i hrilh nghal dawn nia aw,"

"Maw? Tunge dam lova?,"

"Huihamm ka tih ang chuan ti mai teh. Chumi zawhah chuan i tih tur chu ka hrilh leh dawn che nia,"

"Awle,nih ka kal e,"

"Awle,ka dah nia bye aw,"

"Imm bye le,"

Roy chuan Sana leitu te chu a chhui nghal char char a. Awlsam taka hmuh mai theih lah ni hek suh,mihring in ang a tam si. Veng pakhatah pawh mihring hming inang chiah chiah 5 te an lo awm a,a buaithlak khawp mai. Mahse,a beidawn tawp lamah 1 chu a hmu fuh ta hlauh mai;mahse,an mi duh chu a ni a ngem? Roy chuan thu khuh deuh tak chungin chu pa chu a kawm ṭan ta a;

"Ka pu,ka lo tibuai lawk thei che a ngem?,"tiin Roy chuan inthlahrung ang reng takin,a bula putar kum 70 vel bawr tawh chu a zawt a. Chu putar chuan,"Aw engnge ni ta a Tlangval? I duh duh min zawt ta che,"tiin a lo chhang ve nghal vat a. Roy chuan a ṭhuthmun te a han rem fel te te hnu chuan,a thupuiah chuan a lut ṭan ta,"July ni 7,2018 khan hetiang Sana hi i lei tiraw?,"a ti nghal tawl mai a. Chu putar chuan,"Aw lei e,khi kan TV chung zawna khi kan tar a lawm,"tiin an TV chung zawn chu a kawk va va a. Roy chuan,"Ka pu,zawhna dang dang ka zawt leh thei che a ngem?,"a ti leh a. Putar chuan,"Ee thei tehreng mai,eng pawh min zawt rawh. Ka lo chhang char char ang che,"a ti a,a nui huah huah a. Roy chuan,"P.H.E Department-ah i thawk mial em?,"a ti leh a. Putar chu a rawn nui chhuak hawk hawk a,"Tlangval,i hmel en aiin thil i chîk hle mai a. P.H.E Department-ah chuan ka thawk miah lova. Ka hnathawh chu saw en la,"tih pahin a veilama Paper Bag lo intiang ûr chu a kawk a. Roy chu a nui suk a,"A nih hi,tichuan heng ho hi i hralh chhuak leh ṭhin tihna mi?,"tiin a zawt leh a. Putar chuan,"A hralh chhuak leh ṭhin e,Damdawi dawrah hian ka hralh hnem ber ṭhin,"tih pahin Paper Bag siam sa,lian vak lo chu a va la,"Kha i fel reuh e mai,hei hi ka lo present ve ang che. Plastic Bag aichuan a ṭha zawk a nia,"a ti a,Roy chu a rawn pe a. Roy chuan,"Khaia ka pu,i van ti lawmawm ve aw. A thlawna in pek ngawt te chu a chi dawn mawn le? Kha hei tlem tal hi la ve la,"tih pahin a Wallet ṭangin ₹200 note hi a rawn phawrh a. Putar chuan,"Khaih khaih a ngai hleinem,tikhan min hriat rengna a ni ve mai a lawm,"a ti a,a lo la duh bik ṭhak si lova. Roy pawh chuan a pe lui duh ta bik lova,rei ngial an inkawm hnu chuan chu putar chu an mi duh chu a niin a hre lova,a kalsan leh ta rih a.

Inspector Zothana leh a nau te ho pawh chu an buai map map hlawm khawp mai. S.I Jolie chuan dawhkana file vel chu a rem fel malh malh a,"Tun ṭum chu Detective Jane hian min pui nasa bawk a,kan thil chhuiah pawh hma kan sawn ve khawpin ka hria,"a lo ti a. Inspector Zothana pawh chuan,"Ni e,he hmeichhia te hi a hmel en aiin a fing reuh zêk leh nghal a. Hman kuma Inspector Biaka te nen an inbeih vak ṭum pawh khan a bon ka ti teh a sin,"a lo ti ve bawk a.

Jane leh Roy chu dawhkanah chuan an in chhawp hnawk nuai mai a. Amy erawh choka lamah zai rât rât pahin Noodles a lo ei mawlh mawlh thung a. Jane chuan,"Sana leitu chu i la hmu kim thei lo maw?,"tih pah chuan a Phone chu a hmet mual mual a. Roy chuan,"Aw rin aiin a buaithlak,hming inang a tam si. 1 chu ka hmu tawh a,a dang hi chu naktuk lamah ka chhunzawm mai ang ka ti deuh a,"tih pahin chhun lama putar a kawm hrep hming zawnah chuan a tick zauh a. Jane chuan,"Ni e kan thil chhui lai hi case awlsam chu a ni hauh lo mai. Zanin lamah Pi Maggie te In lamah ka va kal dawn a,kidnapper khan a lo be leh tawh em tih pawh hriat a châkawm a lawm le,"tih pahin a ding hluai a. Roy chuan,"Nia engmah lah chu an rawn sawi ngai mang si lova. Kan Police ho hian thuthar an nei bik si lova,kan chet leh a ngai dawn nih hi,"a lo ti ve bawk a. Jane chuan,"Nia a dik a lawm,kan ei duh nu saw lo veng fimkhur la aw. Naktukah hna thawh tur a neih kha,ka kal phawt a nge. Ka rawn haw hma chu lo muhil suh aw,"tiin Roy chu a chah a,Pi Maggie te In a kal tur chuan a chhuak ta a.

Jane chu Pi Maggie hmachhawn zawng chuan a ṭhu ngil auh mai a. A hawi kual leh rek rek ṭhin a,"In pa chu engnge a an zel a?,"tiin bul a han ṭan hmasa phawt a. Pi Maggie chuan,"Rin aiin hma a sawn lo,a tir kha chuan khawsik satliah kha nia. Mahse,hei rin aiin a lo chau zek a,a hrilhhai thlak khawp mai,"tiin a lo chhang a. Jane chuan,"Chuan,in fanu rubotu khan a la rawn be leh lo che u em ni?,"tiin a zawt leh a. Pi Maggie chuan,"Hmannia min rawn biak bak kha chu min be tawh lo. Ka fanute kha ka ngaihtuah tawh e mai,a damṭha a ngem le? Chaw te a ei ṭha a ngem le?,"tih pahin a inhnît faih faih a,chaw mumal ei lo leh mut mu hmu ṭha lo tih hriat takin a hmel chu a pawr fep mai a. Jane chuan,"Eng pawh nise,in fanu hi chu kan hmu let leh em em ang. Lungngai reng reng suh,"tiin Pi Maggie chu a thiam ang tawk chuan a hnêm ve bawk a. Pi Maggie chuan,"Ni e,in zawng hmu ngei ang tih ka ring tlat a ni. I chungah ka rinna ka nghat a nia aw,"a ti leh mawlh mawlh a. Jane chu a hawi kual a,"Khawnge in Driver hi?,"tiin thupui a rawn thlak ta daih a. Pi Maggie chuan,"Naktuk hi a farnu te inneih ni a nia,nimin khan an khaw lamah a haw ta nihkha. Kartawp lamah hi chuan a rawn chho leh ang,"a lo ti leh nghal vat a. Jane chuan Dika te khua leh an khaw awmna lam te chu a zawt ta zel a. Pi Maggie pawh chuan Dika te khaw awmna leh an khua chu a hrilh ve nghal bawk a.

Amy pawh zing dar 8:00am ah chuan a hna thawk turin a in peih at tawh mai. Jane pawh Damdawiin lama kal turin a insiam malh malh bawk a,"Kan hna kan thawh zawh vek hunah Inah hian kan inhmu leh a nga. Chumi hnuah chuan a ṭul dan a zirin kan che chhuak ṭan dawn nia,tunah chuan kan hna kan ṭan thei tawh e,"a ti a,a bag chu a ak a Car chahbi a la a,a chhuak nghal nal nal a.

Amy chu Bungkawn phei Bridge-ah chuan 5mins vel a ding vang vang a. Earphone a vuah a,hnuai lam chu a bih thla zuai a khapa kha a zu hmu hlawl mai. Zodin lam panin a phei tlat mai,Amy chuan rang lutukin a zui phei nghal a. Zodin Bridge-ah chuan an inzui thleng ta a,Amy chuan mask a vuah a. A phone a phawrh a,earphone a vuah a camera a on nghal bawk a. A mizui pa chu a piah lawkah chuan a ding vang tawh mai a,a khât tawkin sana chu a bih leh zauh ṭhin a.

Dar 9:00am rik hma hret chuan mipa 2 hleitling zet zet hi chupa lam pan chuan an lo kal a. Amy chuan a Phone chu a phawrh leh nghal vat a,a hmaa mi 3 te lam chu a hawi a. Selfie ni âwm taka langin a in pose kual vel a,chung mi 3 te thlalak chu a duhtawk a ngah hnuah Camera chu a off a. A kekawr ipte aṭang chuan Farstar loose hi a rawn phawrh zâl zâl a,zam map lo chuan a ṭan kai a,a pak khu deuh talh talh a. A kekawr ipte chu a zen leh a,Dildar a rawn phawrh a. Muang changin a hawng a,a kut veilamah chuan a bun a a bar nghal a. Ciggarate nen chuan a zuk pawlh a,a hmel aṭang chuan a lungawi tih chu a hriat ngawih ngawih mai a.

Jane pawh Damdawiin lamah chuan dam lo dah lutin a buai ve khawp mai. An Cabin turah chuan an in thiar lut nghal mawlh mawlh a,zing lama lut an ni bawk a chawhma dar 11:00am velah chuan an in chingfel ve thei ta hram a. Staff Room-ah chuan a va kal a,"Zaninah tunge Duty dawn le aw?,"tiin a va zawt a. Nurse chuan,"Hmingi a duty ang,"tiin a lo chhang vat a. Jane chuan,"Duty hi engtik hun velah nge in inthlak ṭhin le?,"tiin a zawt leh a. Nurse chuan,"Tlai lam dar 4:00pm velah a ni tlangpui ṭhin a,"tiin a lo chhang leh mai a. Jane chuan,"In inthlak huna ka lo awm loh takin,kan dam lo hi maw a khirh ang reng a. Kantu pawh hi rawn kal tam vak lo se kan duh a,zana duty tur chu lo hrilh la maw,keimah tih loh chu tumah kan room-ah sawn lo luh tir rih su aw,"tiin a chah a. Nurse chuan,"Awle tehreng mai,ka lo hrilh dawn nia,"a lo ti ve nghal vat bawk a. Jane chuan,"A lawmawm lutuk e,"tiin Cabin lam pan chuan a phei leh nghal a.

Roy pawh a kal kual nasa tawh khawp mai. Mi 4 chu a zawng hmu tawh a,1 a la hmabak a. Chung zinga mi 4 a hmuh tawh ho chu an mi duh an ni lo vek tih a finfiah tawh a. A tawp bera a zawn mek hi an mi duh leh an zawn lai mek chu a ni thei mai a ngem? Roy chu a thluak a buai ve map map khawp mai. Chawhnu lam dar 1:30pm a ni tawh a,a ril a rawn ṭam ṭan a a pum chu a rawn ri ta ruk ruk mai a. Thingpui dawr a hmuh hmasak ber naah chuan a lut a,ei tur vel a order pah chuan a phone chu a hmet leh nghal nuap nuap a.