KIDNAPPING OF GIRL - 4

CHAPTER--4

BY:- Rs Thangluah{Remz}✍🏻

Inspector Zothana chu a dinna aṭang chuan a tawlhsawn hrut a,a hma zawna a fanu chu ngawi rengin a en tlawk tlawk ringawt a. A fanu naupangtê chuan,"Apa,min chhan rawh khawngaihin,"ṭap ṭuau chung chuan a pa chu a lo ban a. Inspector Zothana chuan a Revolver chu a hmetkâu nghal a,"Ka fanu kha thlah rawh,a nih loh chuan ka kap hreh miah lo che a nia aw,"tih pahin a fanu naupangtê man bettu chu a tin rân mai a. Kâr lovah midang ho pawh chuan an rawn nang ching nghal a,S.I Jolie chuan,"I silai kha paihthla rawh le,"tih pahin hmeichhe naupang mantu bekah chuan a Silai hmawr chuan a rawn ti nghal rap a. Hmeichhe naupang lah chu a ṭap pur tawh mai bawk si,S.I Jolie chuan,"Ka sawi nawn leh ang,i Silai kha dah rawh,"a ti ram hmak a. Mahse,hmeichhe naupang mantu chuan S.I Jolie thusawi chu a bengkhawn lem lo khawp mai. Hmeichhe naupang chu a hma aia nghetin a nghawngah a kuah bet a,a bekah chuan Silaiin a tin rân mai a,"Min kah rualin i fanu hi ka kâp ve nghal ang. I fanu hi nungdama i hmu let leh duh a nihchuan in Silai kha dah rawh u,"tiin chapo tak chuan a rawn hawi vual vual a. S.I Jolie chuan a hma aia ring leh fiakin,"I silai kha i dah loh chuan ka kap ang che,"a rawn ti nawn leh a. Mahse,an hmaa kidnapper ding mek chuan hlauh a neih loh hmel khawp mai. Rei ngial ṭawngkâa an in dawr hnuah chuan Silai a puak ta ngei e.

Inspector Zothana chuan kut khûr der der chungin a fanu ruang leia let reng chu a pawm a,"Uicho ho ka chhuah hauh lo ang che u,"tiin a âu tuarh tuarh a. An piah lawkah chuan a fanu kidnap tu pawh chu thichhawngin a let reng bawk a. Constable pakhat chuan Ambulance a call nghal a,S.I Jolie chuan Silai an rawn hmeh puahna lam nia a hriat chu a pan nghal a. Hmeichhe naupang rawn kâptu chu hmuh a,man ngei a tum a ni.

Inspector Zothana fanu vui ni chuan mipui pawh an ṭhahnem khawp mai. Tualthattu leh Pu Kima te fanu rubo tu chu mi thuhmun a nih an ring vek a. Sorkar pawn chak taka hma lak a tum ve mek a,hmeichhe naupang thattu leh rubotu te chhui tur chuan Detective Jane chu an ruai ta nge nge a.

Detective Jane chuan a lehkha dawn chu uluk em em in a chhiar a,a nui suk a,"Kan Sorkar hi ka pui duh dawn em mawn le? Hman kuma Inspector Biaka nen kan thawh ho ṭuma min tih dan kha ka la theihnghilh phal lo a ni,"a ti a,lehkha chu dawhkhanah chuan a theh phei a. Roy chuan a lo la vat a,"Kan Sorkar hian a Police te hi a ring zo lo a nih hmel khawp mai. Inspector Zothana tan chuan a tlawm thlak viau in ka ring a ni,"a lo ti ve bawk a. Amy chuan,"Hun kal tawh chu hun kal tawh a ni a,liam tir tawh ang u. Tunah chuan Mizoram Sorkar mai ni lo,Mizoram mipuite hian min mamawh takzet a nia,"a lo ti thung a. Detective Jane chuan,"Ni e i sawi dik khep khep e,engpawh nise naktuk chaw eikham aṭanga thawk ṭan nghal thei turin in lo inbuatsaih dawn nia aw. Chuan,Roy,PUBG leh MOBILE LEGEND kha bansan rih ang che,hlawkna a awm lo,"tih pahin In chung lamah chuan a chho nghal nul nul a.

Amy leh Roy chu an in en a,an nui suk a,"Boss hi chu ham strick ve ngawt mai. Hman zanah pawh min man chiang rapss mai,"tih pahin Amy chu a lo nui har har a. Roy chuan,"Eng thilah maw?,"tih pahin a lo nui hak a. Amy chuan,"A chhuak emaw ka tia,thlang lam pang Balcony ah khan zial ka lo va zu hlawt hlawt a. Ka hnung aṭangin fiah tawkin,'I zial zuk lai kha tinmit nghal rawh,'a rawn ti a. Ka hawi let ngam tawh lo chiang rapss,ngawi rengin ka liak hlum a,a kalsawn hma chu ka che ngam lo hrim hrim,"tih pahin a nui zui har har a.

Detective Jane leh a naute 2 Roy leh Amy chuan,Inspector Zothana te team chu an zawm ve ta a. Inspector Zothana chuan a naute ho hmelhriattir nghal zung zung pahin,"Ṭha taka kan thawh ho ngei ka beisei. Kan misual hi kan man ngei tur a ni,kan man hma chu kan beidawng lovang. He mihring hi tu pawh nise,kan man chhuah hunah chuan a phû tawk hremna chu a hmu khawp ang,"tiin a sawi chhunzawm nghal mawlh mawlh a.

Detective Jane chuan,Siami chu uluk leh chiang kek kawkin a melh a,"I pu damdawiina a luh ni khan mihrang bulah engmah i sawi lo maw?,"tiin fel fai tak chuan a zawt a. Siami chuan,"Aih hrilh miah lo,"a lo ti nghal vat a. Detective Jane chuan,"E chuan,in T.V chunga Sana ah khian Camera an lo vuah tiraw?,"tih pahin Pi Maggie chu a melh a. Pi Maggie chuan,"Aw hmannia Inspector lo kal khan chu pawh chu kan hre ve chiah lawm,"tiin a lo chhang nghal vat bawk a. Detective Jane chuan Sana awmna lam chu a pan phei nghal a,"He Sana tu hnen aṭanga in dawn nge tih in hre lo maw?,"tih pahin a nui suk a. Pi Maggie chuan,"Aw hre miah lo,"a lo ti leh nghal vat a. Detective Jane chuan,"Eng pawh nise,Sana hi ka lo kawl ve lawk dawn em ni ang? Zanin chiah ka lo kawl a nga,engmah hmelhem awm lovin ka rawn dah let leh ang,"tih pahin Pi Maggie chu a melh leh a. Pi Maggie chuan,"Ni e a pawi hleinem,ka fanu ka hmuh let leh theihna tur a nih dawn phawt chuan,eng pawh tih ka huam ve a nia,"a lo ti ve nghal mawlh mawlh bawk a.

Detective Jane chuan Sana chu a hawng darh a,a en kual nasa khawp mai. A thil chhuina a pui thei tu tur eng emaw a hmuh a beisei tlat a ni. Ngawi rengin Sana chu a ṭhiat darh malh malh a,a piahah chuan Roy leh Amy te pawh an buai khawp mai. "Roy,i game khelh lai kha dah la min rawn zui rawh,"tih pahin a Car chahbi a la a,a kal nghal a. Roy chuan ner nung nung pahin,"Nhaaaa ka khel lak lawh sin le,"tih pahin a tho ṭuah ṭuah a. Amy chuan,"AFK leh mai teh a,nge hun lo lo ah i khelh vei ni,"tih pahin a lo nuih zui hawk hawk a. Roy chuan,"Kan Boss hian thil a hmu tlang thei a niang,"tih pahin a Pheikhawk chu a bun nghal malh malh a. Pawn lam aṭangin Detective Jane chuan horn a rawn pe tuarh tuarh tawh a. Amy chuan nui har har chungin,"Chu horn a rawn pe leh tawh nia,kal vat rawh,"tiin Roy chu a lo tur ve sek bawk a.

"Sana dawr zawng zawngah lut la,hetiang Sana hi an zawrh leh zawrh loh zawt la. An lo zuar ṭhin a nihchuan a leitu hriat dan lo ngaihtuah ang che,"tih mawlh mawlh pahin Sana chu Roy-a mal chungah a rawn dah a. Motor a dah rem a,engmah sawi lovin a chhuak nghal a,"Taxi in ka lo haw mai ang,"tih pahin Car Chahbi chu Roy a pe a,a kalna tur pawh sawi lovin Roy chu a kalsan nghal daih a. Roy chuan phun bul bul a,Car chu a lock a Bazar lam panin a kal ve nghak a.

Jane chuan a hmaa mipa kal chu man ngei tumin a ruk thei ang berin a zui zel a. A tawpah chuan khawchhak thil vel zawrh na Wholesale dawr pakhatah an in zui lut hlawl mai a. Nghapih rim a lo nam rum rum mai a,Jane chuan a mask a phawrh a a hmai a tuam nghal hmak a. Kil khatah ngawi rengin a ding a,a mipa zui chu a thlithlai reng bawk a. Chutia a din ngawih reng lai chuan mipa pakhat hi chak mangkheng hian a rawn phit phei fua mai a. Jane chu a rawn su thawi fua mai a,a hnung aṭangin patling 4 velin,"Kha rukru lo man rawh u,"tih tuarh tuarh pahin an lo ûm phei nghal buan buan bawk a. Chung rawn tlan phei ho chuan Jane chu an rawn su phei fua fua a,a tawpah chuan a tum miah lovin mawng sawh dawtin a tluk phah ta nge nge a. Rang lutukin a in beng kang tho leh a,a hawi kual nghal vat vat a;mahse,a mi zui lai kha a hmu tawh miah lo mai. Dawr chhungah chuan a vei kual fua fua a;mahse,khapa kha a hmu miah lo mai. Dawr aṭang chuan a chhuak a,dawr bul hnai vela dawr dangah te chuan a zawng kual deuh thuak thuak a. Mahse,mipui zi nuai nuai karah chuan a vâng khawp mai.

Tlai dar 5:00pm ah pawh Jane chu a la rawn thleng thei si lo. An call lahin call a chhang thei bawk si lo,Amy chu a mangang ru tawh khawp mai In chhung dungah chuan a teikual sek mai a,"Ngati em em nge le? Nidangah chuan a lo haw tlai dawn a nihchuan min rawn hrilh ziah ṭhin sia,tawhsual a tawk te hi a ni lo maw le?,"tih pahin Jane number chu a dial leh ṭhin a. Mahse,chhanna a dawng thei si lo; Roy chuan,"Lungngai mah ta che,Boss hi eng ang mi chiah nge a nih tih hi i hre lo em ni? Eng buaina pawh tawk se,amahin a chingfel mai ṭhin. Hmeichhe naran a ni lo a nia,lo ngâi reng mah rawh chanchin chhia aiin chanchin ṭha lam a lo hawn ngei ka ring tlat a ni,"tiin Amy chu a hnem malh malh a. Amy chuan,"Police lam lah hi an ngawi leh diak zel bawk si. Keichu ka rilru a hah e mai,"a ti a,a ṭap deuh ṭuau tawh mai a. Roy chuan,"Hmeichhe chak lo tak angin awm ṭhin suh,thil ṭha lo engmah a thleng lo ang,"tih mawlh mawlh pahin Amy chu a kuah a.

Zan dar 8:00pm velah Jane chu a rawn haw ve hlawl mai. Amy chuan a lo chhuah chhal nghal bawrh bawrh a,"Khatizat a tam kha kan rawn call che a,vawikhat tal chu min chhang thei lo a mi?,"a lo ti nghal hlak hlak a. Jane chuan,"Naupang chhia ang mai hian awm ṭhin lo teh,hei dam takin ka rawn haw hi,"tih pahin a nui sun sun a. Amy lah chu a tum deuh buau a,"I rawn haw tlai dawn chuan rawn sawi ve mai la. Ka ngaihtuah che tih hi tinge i haider tlat ṭhin le? Sual lutuk mai,"tih pahin a ṭhu tau nghawng nghawng a. Jane erawh chu a nui sâng reng thung a,"Tihtauh loh tur aw,hma kan sawn hret a nia,"tih pahin a Lapton chu a rawn on nghal a. Roy chu a lo phûr khawp mai a,Amy erawh a la tûm deuh bâr bâr thung a.

Jane chuan,"Sana ah khan Alphabet a awm kha in hmu em?,"tih pahin Sana chu a lek kang a. Roy chuan,"Aw hmu e an zawrhna hmun pawh ka hre tawh e,"tiin a lo chhang vat a. Jane chuan,"BPAHU he Aphabet hian awmzia a nei. Chumi chu Phuba tihna a ni,a awmzia chu Pu Kima fanu kidnap tu hian Pu Kima te chhungkaw chungah phuba a la mek a ni,"tiin a sawifiah nghal zung zung a. Amy chuan nui har har chungin,"En thuak chian PUBG te pawh a an kha,"a lo ti zauh a. Jane chuan,"Nang lah hi ni lo ni lo hi i lo sawi a,naktukah Pu Kima awmna Damdawiinah i va kal a ngai dawn nia aw,"tiin Amy chu Chocolate a pe zauh a. Amy chuan Chocolate chu a lo ban nghal vat a,"Damdawiinah chuan engnge ka tih dawn?,"a lo ti nghal vat a. Roy chuan nui var var chungin,"Ei tur i hmuh chuan i phûr thei maw le,"a lo ti ve zauh a. Jane chuan,"Pu Kima dam lo kan tu apiang kha i lo thlithlai zel ang. An chhungte an ni emaw ni lo emaw,tu pawh nise an address kim chang takin hriat i lo tum vek dawn nia,"tiin Amy tih tur chu a hrilh nghal mawlh mawlh a. Roy chuan,"Tuna naupang kidnap tu hian phuba a la duh a nihchuan,chhan ṭha tak a awm ngei ang,"a lo ti ve bawk a. Jane chuan,"Ni e chu chu kan hriat a ngai. Chuan,Sana zawrhna chu le?,"a lo ti nghal vat a. Roy chuan,"Bazar chhungah a ni a,dawr hming em em pawh an nei hran lo. An dawr pawh kha dawr lian a ni lo,an thil zawrh erawh a ṭha hlawm reuh khawp mai,"tiin a lo chhang nghal a. Jane chuan,"A leitu chu an hre chhuak thei em?,"a lo ti nghal vat a. Roy chuan,"Memo hlui hâi phawt a ngaih thu min hrilh a. Naktukah lo kal leh turin min ti a,an dawr thil an hralh chhuah reng reng chu a leitu te hming leh an address leh an leini an chhinchhiah thlap zel bakah. Cash memo pawh an pe thlap zel a ni awm e,"a ti a,Sana chu a thlek kual thuak thuak a. Jane chuan,"A ṭhat hlauh chu chutia an lo chhinchhiah thlap chuan zawn hmuh a harsa lo ang,"a ti a,Inspector Zothana number chu a hmet chhuak a a call nghal a;

"Aw Inspector Zothana,"

"Keimah Jane aw,i mutui lai ka rawn ti harh che em aw?,"

"Aih ka la mu lo hrim hrim a,thu thar a awm em ni?,"

"Aw hma kan sawn hret e. Mahse,fimkhur taka kan chet a ngai ve thung dawn a nia aw,"

"Aw ka hria e,hmasawnna thar kan neih chuan a lawmawm nasa a nihchu. Naktukah Office lamah i rawn kal hman ang tiraw?,"

"Aw ka rawn kal dawn nia,chumi hma in i chhungkua kha veng uluk ang che. Thil pawi engmah a thleng tawh tur a ni lo,"

"Ni e ka hria e,naktukah chuan ka lo ngaichang ang che aw,"

"Awle anih ka dah aw muttui phawt mai le,"

"Awle nang pawh muttui le."

Amy chuan Chocolate ei nuap nuap pahin,"Keichu Inspector hi a lainatawm ka ti. Midang tan a thawhnaah a fanu a chân chu a ni sia,a rilru chu a na ve ngawt ang,"a lo ti ve nuah nuah a. Jane chuan,"Ni e a lainatawm khawp mai. Misual hi man ngei pawh a tum ruh khawp mai,a man hma chu a chawlhsan mai maiin ka ring lo,"a lo ti ve bawk a. Roy pawh chuan,"Ni e a chawlhsan lo tawp ang,hotu lawk hovin chawlhsan tura an ti te a nih ngawt loh chuan,"a lo ti ve bawk a.

Sana zuartu pa chuan,"Ka pu,hetiang sana hi hemi ni hian mi 5 in an lo lei a. Tu ber hi nge ka hre tawh lo a ni,hei a leitu te hming list leh kan cash memo xerox copy a nia,"tiin Roy chu lehkhabu tereuhte 1 leh Cash Memo hlui ve tawh tak mai chu a rawn pe a. Roy chuan a Phone chu a phawrh a,an hming list in ziahna leh cash memo hlui ho chu thla a la nghal mawlh mawlh a. A lak zawh chuan,"Ka pu,ka lawm e aw. Mahse,midang bulah tuna kan inbiakna hi i sawi chhuak tur a ni lo aw,"tiin a hrilh leh thlap a. Dawr neitu pa chuan,"Awle tumah ka hrilh lo ang. Mahse,sum tlem a zawng chu ka mamawh ve a,"tih pahin Roy chu a rawn melh zauh a. Roy chuan ngawi rengin a Wallet chu a phawrh a,"Kha hei la la,midang hnenah sawi hlek suh ang che,"tih pahin ₹500 note 2 hi a pe a,Putar chuan thudang a sawi leh hma in dawr chu a chhuahsan nghal a.

Amy pawh Pu Kima awmna damdawiin kawtah chuan a tei kual ve sek tawh a. A khât tawkin Pu Kima awmna Cabin bula ṭhutna ah chuan a han ṭhu leh rih ṭhin a. Pu Kima kan tu hmel erawh a la hmu lo,Cabin chhungah chuan an la awm vek a nih a ring a. Cabin bul ṭhutnaah chuan ngawi rengin a lo nghak ta ringawt a.

Chawhnu lam dar 2:00pm velah chuan Pu Kima awmna Cabin aṭang chuan patling 1 hleitling zet mai hi a rawn chhuak a. Amy chuan a Phone bih ngur ngur pah chuan a mit sirin a melh pah reng bawk a. Chupa chuan Phone a lek chhuak a,mi tu emaw a bia a Amy chuan a hna a ṭan ta. A in dap ruk ruk a,"Eheee a mak e,ka ak tawh miah lo,"tih nuah nuah pahin a ṭhutna bul vel chu a dap kual vel a. Chupa awmna lamah chuan a va kal phei ta ngei a,"Ka pu,i dinna lai velah khan Sim Card i lo hmu mial em?,"tih pahin bang kil vel chu a bih kual vel a. Bang kil a bih pah chuan a Phone-a Voice Recorder chu a on nghal bawk a,chupa chuan,"Aih ka hmu miah lo mai a,Mami,"tiin a lo chhang ve mai a. Amy chuan,"Aww a pawi lo mai,ka hmuh loh chuan a thar ka lei leh mai ang,"tih pahin chupa bul velah chuan a phe kual sek mai a. Darkar chanve dawn thaw Phone a hman hnuah chupa pawh chu Cabin chhungah chuan a lut nghal a. Chu veleh Amy chuan a thil record chu a save a,earphone a phawrh a a ngaithla nghal a. A thusawi tamzawk chu hre thei lo mah se,a hriat chhun chu a fiah hlawm khawp mai;

"Aw hei Damdawiinah chuan ka awm mek a,aw engmah a la ang rih lo a nih hmel. Naktuk lamah hian a thisen exam result chu a hriat theih ang ka ring."

"Aw nia ka rawn kal dawn nia,dar 9:00am ah maw? Khawilai nge kha,aw awle,"

"Eee kan inhmuhna tur kha khawi lai nge kha? Sawlai bawr vel saw ka bel lo lutuk a,"

"Aw awle ka hria e,nia Bridge-a inhmuh kha pawi lo ka rawn tlai lo ang,"

Lehlama a biak chu hre thei lo mah se,an inhmuhna hmun tur leh hun tur chu a hre thei tho a,pen khatin hma an sawn leh ta e.