KIDNAPPING OF GIRL - 3

CHAPTER--3

BY:- Rs Thangluah{Remz}✍🏻

(Harsatna a awm loh chuan;Thawhṭan zan,Nilai zan leh Zirtawp zan dar 8:00pm leh dar 9:00pm inkarah regular taka tihchhuah ṭhin ka lo tum ang.)

Pi Maggie chuan a thil tawn chu tumah a hrilh ngam si lo. Amah chauh chuan hlauthawng takin a awm reng a,a pasal natna khuma mu mêk chu a en vang vang a,"Bawihi Pa,kan chunga thil thleng hi hriatthiam har ka van ti tak êm! Nang lah engmah ti thei lovin natna khumah i awm a,kan fanu lah misual kutah a awm bawk si,"tih sep sep pahin a pasal kut chu a vuan a. Pu Kima chuan,"Bawihi Nu,Pathian kan lamah a ṭang a nga engkim a ṭha leh vek mai ang. Ṭawngṭai char char lo chu tih theih dang kan nei si lo a nih hi,"tiin a nupui chu a lo hnêm ve bawk a. Rei vak lo hnuah Pu Kima unaute leh an laina hnaite ho chu Pu Kima kan turin an lo lut ṭuk ṭuk a. An ti ti luam hnuah Pi Maggie pawh chu Police lamin thu zawhfiah duh an neih avangin Police Station lam panin a chhuak rih a.

S.I Jolie chuan Pi Maggie chu a en vang vang a,"Ka pi,tun hnaiah in fanu kidnaptu te hian an rawn be mial tawh che em?,"tiin a zawt leh a. Pi Maggie chuan,"Aa...aaih aaih be miah lo,"a lo ti bah deuh niai a. S.I Jolie chuan Pi Maggie darah chuan a vuan a,"I chiang maw? Tunah chuan kan tan chuan kawng a tawp a ni rih tawh a,kha misual khan a rawn biak hun che kan nghak tawp rih a nih hi. Tuman an lo be lo tak tak che maw?,"tiin zaidam âw zangkhai tak chuan a zawt nawn leh a. Pi Maggie chuan hnuai lam melh ran chungin,"Aw be lo tuman min la rawn be lo,"a ti tlat bawk si. S.I Jolie pawh a lu a hai khawp mai,"Engmah zep nei lovin khawngaihin min hrilh rawh. I fanu hi i hmangaih a,nungdama hmuh leh i duh chuan engkim min hrilh rawh,"tiin damthlap chuan a ti leh a. Pi Maggie chu a ngawi reng a,engmah sawi a tum tawh lo. S.I Jolie pawh chuan han tih vak ngaihna a hre bik lo a ni,"Awle in hnen aṭang hian thu thar hriat kan inbeisei reng dawn a nia aw. Nangni hian min puih loh chuan,keini tan chet lâk ngaihna a awm tawh lo tih chu i hriatthiam ka ring,"tiin Pi Maggie chu a thlah ta ringawt a.

Inspector Zothana chuan,"Engpawh nise,Siami leh Dika kha lo la enthla zui zel u la. Kar khat hnuah pawh thu thar engmah min hrilh duh lo a nihchuan,kan case buaipui lai hi kan ti tawp ang. An fanu kan hmuh theih nan tiin theih tawp kan chhuah a;mahse,anni lamah zêp an neih ve zel chuan kan tan awmzia a awm lo,"a ti hmak hmak mai a. S.I Jolie chuan,"Nimina Pi Maggie ka biak pawh khan a hlauhthawn hmel khawp mai. Nidanga kan inbiak dan nen a inang miah lo,eng emaw dik lo chu a awm a ni,"a lo ti ve bawk a. Inspector Zothana chuan,"Damdawiin lam hi engnge chanchin?,"a rawn ti leh a. S.I Jolie chuan,"Damdawiin lam chu an ṭha e,zanin hian Pu Kima unuaupa leh a nupuiin an riahpui dawn a ni awm e,"tiin a lo chhang vat a. Inspector Zothana chuan,"E chuan,Pi Maggie chhungte mipa puitling ho chhui tura ka tih ho kha engnge chanchin le?,"a lo ti leh nghal vat a. Constable pakhat chuan,"Sir,hei hi report kan hmuh theih ang ang chu a ni e. Pi Maggie nuṭa te hi 3 an ni a,an zinga 2 hian 2 Wheeler an khalh thiam lo hrim hrim a. 1 erawh hi chuan duhthusâmin a khalh thiam a ni,"tiin a lo sawi nghal zung zung a. Inspector Zothana chuan File chu a bih vang vang a,"Awle an unau zinga 2 Wheeler khalh thiam ber hi lo chhui zui u la,S.I Jolie hian Pu Kima unaupa kha lo chhuizui bawk rawh se aw. Chuan,Pu Kima te In lamah ka kal dawn a,nangni 2 khan min rawn zui dawn nia aw,"tiin a chhuak nghal a.

Constable 1 chuan,"Madam,tinge Inspector hian an chhungte hi a rinhlelh daih le?,"a lo ti ve a. S.I Jolie chuan nui var var chungin,"Kan khawvel hi a hmawr tawh lutuk a tin ni. Kan In chhungkhur a kan rohlu a bo chuan,a tlangpuiin kan hnaih deuhte hi an ni tlangpui ṭhin a nia,"tiin a lo chhang vat a. Constable pawh chu a nui ve hak hak a,"Nia tiraw? A dik ve reng mai,"tih pahin Center Fresh hi a kekawr ipte aṭangin a rawn phawrh a,a ṭhiante ho chu a sem kual den den a.

"Enteh Pi Maggie,keini hi mipui venghim tura hnathawk kan ni a. Kan theihtawp chhuahin kan veng him char char dawn che u a ni. Chuvangin i thil hriatte hi engmah min hrilh hreh lo turin ka duh che a ni,"tiin Inspector Zothana chuan Pi Maggie chu a melh kar mai a. Pi Maggie chuan a Phone chu a hum ṭung mai a,a khur deuh der der bawk a,"Aa..aaih...aaih engmah ka hre lo,"a rawn ti bah leh niai mai a. Inspector Zothana erawh chuan engemaw tal sawi tir a tum tlat thung si,"Engmah hlauh tur a awm lo a nia aw. I fanu rubo tu khan a rawn be tawh che a ni tiraw?,"tiin damthlap hian a zawt leh a. Pi Maggie chuan âw khur deuh dar dar chungin,"A..aw..aww be tawh e,"a rawn ti zawi sap a. Inspector Zothana chuan,"Engtikah nge? Mipa nge hmeichhia a nih? A rawn call che mi?,"a ti nghal mawlh mawlh a. Pi Maggie erawh hlauhlawpin a khur zawih zawih thung a,Siami chuan a darah a rawn chelh a,"Sir,ka pi hian eng emaw hlauh deuh a nei niin ka hria,"a rawn ti ve bawk a. Pi Maggie chuan,"Kha en rawh,call list ah khan a tawp berah khan,"tiin Phone chu Inspector chu a pe nghal a. Inspector Zothana chuan Phone number chu a la chhuak nghal a,"Awle kan hriat duh ber kan hre tawh bawk a,thlamuang takin awm tawh ru aw. In fanu chu dam takin kan lo hruai let leh em em ang,"a ti leh nghal mawlh mawlh a. Mahse,Pi Maggie erawh lawm hmel a pu thei hlawl lo a ni,"Ka fanu rubo tu khan Police hnenah ka hrilh a nihchuan,ka fanu chu a thah tur thu min hrilh a sin. Ka fanu hi ka chân phal lo a sin,"tiin a ṭap zawih zawih mai a. Inspector Zothana chuan,"Engmah hlauh tur a awm lo a nia aw,i fanu chu engtinmah a awm lovang,"tiin a hnem nghal mawlh mawlh a. Mahse,Pi Maggie erawh lungchhe takin a ṭap zawih zawih thung a. Inspector Zothana chuan han tih vak ngaihna a hre lo hle mai,"Engmah hlauhthawn tur...,"a sawi zawh hma in Pi Maggie Phone chu a rawn ri nghal ral ral mai le. Pi Maggie chuan,"Amah a nih hi..,"tih pahin kut khur dar dar chungin Phone chu a chhang a;

"Aw Hello..,"

"Inspector kha ka lo bia ang chu,"

Pi Maggie chuan,"A be duh che nihchu,"tih pahin Phone chu Inspector a pe nghal a.

"Tunge i nih le?,"

"Ka thiltih lai mekah hian rawn in rawlh lo la,i him a ni mai,"

"Hetah hian engtinnge ka awm tih i hriat theih a?,"

"Constable 3 hruaiin Pi Maggie chu i va dawp vel a maw? Haha...i sana chu a mawi hle mai,"

"Tunge maw i nih chiah le?,"

"I thinrim hmel kha i hmuhnawm hle mai.Hei hi last warning aw,he thilah hian lo inrawlh ve tawh suh ang che aw. Chuti lo chu i fanu kum 9 mi lek saw....,"

"Heyyy,"

Phone chu a tawp nghal hmak a,tumah chuan ṭawng an tum lo. An vai mai chuan an ngawi ṭhuap hlawm a.

Inspector Zothana chu a hawi kual nghal ruai a,"Khawnge in Driver kha?,"a ti nghal tawl a. Siami chuan,"A inbual a,"tiin a lo chhang nghal vat a. Inspector Zothana chuan,"A phone a keng em?,"a ti leh nghal vat a. Siami chuan,"I hnungah khan a charge,"a lo ti leh vat a. Inspector Zothana chuan,"Tun hnaiah in Inah hian in chhung hnai vai lo deuh,tu emaw rawn kal an awm em?,"tiin a zawt leh a. Pi Maggie chuan,"Aih kal miah lo,"tiin a lo chhang a. Inspector Zothana chu In chhung dungah chuan a vei kual thuak thuak a. Pi Maggie te TV dahna chung zawna Sana chuan a mit a la ta tlat mai. Eng khaw sawi set set lovin Chair a la a,Sana chu a han la thla nghal rawk rawk a. Midang ho chuan ngawi rengin Inspector Zothana che vel chu an lo thlir ṭhap thung a,"He Sana hi engtika in lei nge? Khawi dawr aṭanga in lei nge?,"tiin Pi Maggie lam pan chuan a rawn kal phei a. Pi Maggie chuan,"He Sana hi chu thla hmasaa kan pa a kaisan lawmpui nana a ṭhiante thilpek a nia,"tiin a lo chhang leh nghal vat a.

Inspector Zothana chuan Sana chu a en vang vang a,"Screw Driver in nei em?,"a ti nghal a. Siami chuan,"Aw nei e Sir,"a lo ti nghal vat a,Screw Driver la tur chuan choka lamah chuan a phei nghal a,"Hei aw Sir,"tih pahin Inspector Zothana chu a rawn pe nghal a. Inspector Zothana chuan Sana chu a hawng nghal mawlh mawlh a,chutia an buai mek lai chuan Dika pawh chu a inbual zo tawh a. Inspector Zothana'n Sana a hawn mawlh mawlh lai chuan Pi Maggie Phone chu a rawn ri leh a,Pi Maggie'n a lak hma chuan Inspector Zothana chuan a lo lak khalh a;

"Hello..,"

"I va huangtau sâwt ve a,ka thil tihah hian rawn inrawlh lo turin ka ti che a ni lawm ni?,"

"I hlau ta em ni? I âw te chu a khur a va ang ve,"

"Hlau loveeee mahse,i thil tih pawi zia hi i hre dawn a lawm,"

Naupang ṭap ri an hre nghal a,"Anu,Anu....min lo hruai tawh rawh. Hetah hian ka awm duh tawh lo Anuu,...,"

"Uicho pa,kha naupang kha han khawihna vaih teh aw,i châk lo ang,"

"Hahaha....engtikah mah min man thei ngai lo ang. I case buaipui lai hi tawpsan mai rawh,chuti lo chu i fanu emaw i nupui duhtak emaw saw i chân mai ang,"

Phone chu a tawp leh hmak a,Pi Maggie erawh lungchhe vankaiin a lo ṭap a. Inspector Zothana chuan,"Hemi number hi lo chhui nghal ang che u. Kan man chhuak khawp ang,"tih pahin Sana chu a ṭhiat a,"Kan uichopa mai mai chu aww,i pasal hian a hna thawhpui te zingah hmelma a nei miah lo maw? Chuan,he Sana hi tu pek nge?,"a ti leh nghal a. Pi Maggie chuan,"A petu hming hi a inziak lova,an thawhpui tu emaw ber hnen aṭangin a nih ka ring ve ringawt a,"a lo ti ve mai a. Inspector Zothana chuan,"In hmu em? He Sana pe tu hian engkim hi a lo ruahman lâwk vek tawh a nih hmel khawp mai,"tih pahin Sana ban invuahna aṭang chuan Camera tereuhte hi a rawn phawrh chhuak a. Pi Maggie chuan mak a tiin a hrilh a hai khawp mai,"Hei hi engtinnge nih theih a?,"a ti mawlh mawlh mai a. Inspector Zothana chuan,"Eng pawh chu nise,kan kalsan phawt ang che u. I fanu chu kan chhanchhuak em em ang,lungngai reng reng suh Police te hian engnge kan tih theih hi a hre lo a ni,"a ti zui mawlh mawlh a. Pi Maggie chuan ṭap zawih zawih chungin a fanu rubo tu nena an inbiak dan leh,sum a phût zat te chu a rawn sawi ta nge nge a. Inspector Zothana chuan,"Engmah hlauh tur a awm lo a nia. A phone number kan hre tawh a,kan man chhuak em em ang. Chuan,zanin aṭangin ka naute 2 in an veng tawh ang che u,"tiin Pi Maggie te In chu an chhuahsan leh ta rih a.

Phone number chu a rang thei ang berin an chhui zui nghal char char a. Ni 2 hnuah chuan an chhui chhuak ve thei ta,naupang rubo tu chu man ngei tumin Inspector Zothana leh a naute chu an in khalh chhhuak leh ta hlawm a. S.I Jolie chuan,"Kan misualpa hi a fing reuh hle mai. Sana a Camera a dah te kha,a tir aṭanga a dah anihchuan Pu Kima te chhungkaw chezia chu a lo hre chiang tawh viau ngei ang,"tih pahin a Cell Phone chu a kheuh nuap nuap a. Inspector Zothana chuan,"Ni e heng zawng zawng hi mi 1 choh thil tih chu a ni thei hauh loh ang. Engkim hi fel taka ruahman lawk vek a ni,"a lo ti ve bawk a.

Phone number an chhui tawpna hmun chu an thleng ta ngei a. Mahse,Inspector Zothana chuan Phone call a dawng tlat mai;

"Hello...,"

"Inspector Zothansanga maw? Ka warning na che kha i hre lo hrim hrim nge i hre lo der zawk le aw? Ka duh ka hmuh hma chuan he naupang hi in hmu lo ang,"

"Hmela,mipa i nihchuan min rawn hmachhawn ta che. Pa takin aw ni ang,lang lo lam aṭanga min rawn bei lo khan min rawn hmachhawn ta che,"

"Khai khai....in bengdai teh,kha i thlanfîm te kha a luang a nihkha. Khalai hmun aṭang khan haw tawh rawh u,"

Phone chu a tawp leh nghal hmak a. Inspector Zothana chuan,"Uichopa mai mai chu lee,"a ti vin ṭhak a. S.I Jolie chuan,"Sir,eng thil nge ni ta?,"a lo ti vat a. Inspector Zothana chuan,"Hetah a awm tawh lo,number dang aṭangin min lo bia a ni. He number hi kan chhui leh nghal char char a ngai,nangni 3 khan min rawn zui u la;nangni 2 khan S.I Jolie kha zui u la he number hi Office lam aṭangin lova chhui nghal ang che u. Keinin helai hmun hi ngun leh zualin kan lo thli thlai a nge,"tiin ruahmanna a siam nghal zung zung a.

"Sir,helamah lo kal teh. Hei eng emaw hmuh ka nei a nia,"tiin Constable 1 chuan Inspector Zothana chu a rawn âu a. "Hmeichhe naupang School form pheikhawk a nih hi,an la kal hla lo tawp ang ka ring. Pheikhawk kha pack ṭha nghal la,kan insem darh dawn nia,"tiin an insem darh nghal a.

Inspector Zothana chuan thawm ri a hre ta tlat mai. Zawite in thawm ri a hriatna lamah chuan a phei ṭhem ṭhem a,a hnai tial a thawm chu a ring tial tial a. A thawm hriatna hmun chu a thleng ta,a thil hmuh chuan a tiphu chiang kher mai. A thil hmuh chu mit khap lêk lovin a en tlawk tlawk ringawt mai a.