KIDNAPPING OF GIRL - 2

CHAPTER--2

BY:- Rs Thangluah{Remz}✍🏻

Police ho chuan an theih anga rangin hma an la nghal zung zung a. Nunui School luhna Principal leh Staff te ho pawh thu an zawtfiah vek tawh a. School aṭanga Nunui rawn hruaitupa hmel chu tuman an sawi thei si lo. A chhanchu,khapa khan Helmet Full face in a khum daih si a ni. Mahse,hmasawnna 1 an hmu hlauh mai. Nunui te School bula Ice Cream zuara ṭhu ṭhin Pitar pakhat chuan Bike number a lo chhinchhiah hlauh mai. Police ho chuan chu Bike number chu a rang thei ang berin an chhui nghal char char a,a tawpah chuan an chhuichhuak thei ta.

"Vanlalruata i ni em?,"tiin Inspector Zothana chuan a hmaa ṭhu tlangval chu a zawt a. Chu tlangval chuan,"Aw ni e,eng thil nge ni a?,"a lo ti nghal vat a,mak a tih hmel hle nghe nghe leh nghal a. Inspector Zothana chuan,"MZ O1 N 3241 hi i Bike number a ni em?,"tiin a zawt leh a,Vanlalruata mitah chuan chiang kek kawkin a melh kal mai a. Vanlalruata chuan,"Aw ni e,in hmu tawh mi?,"tiin lawm hmel takin a lo ti nghal var a. Mahse,Inspector Zothana chu a nui ve hauh lo mai,"Hmeichhe naupang kha khawnge i dah?,"chiang fek fawk chuan a rawn ti a. Vanlalruata chuan a hriatthiam loh hmel hle mai,"Maw? Sir,i thusawi hi a awmzia engmah ka hre lo. Ka Bike bo chungchangah thu lawmawm min hrilh dawn zawk emaw ka ti a. Mahse,ka thu hriat hi engnge a awmzia?,"a ti nghal mawlh mawlh mai a. Inspector Zothana chuan,"December ni 3,2018 khan engnge i tih?,"tiin a zawt leh a. Vanlalruata chuan,"Ka ṭhiannu birthday a nia,ka ṭhiannu te Inah nilengin kan awm,"tiin a lo chhang nghal vat a. Inspector Biaka chuan,"I chiang maw? I ṭhiante ho zawt ta ila,i ngam ang maw?,"tiin a zawt leh a. Vanlalruata chuan,"Aw Sir,ngam e khami nia birthday lawmnaa kal zawng zawng pawh kha zawt mah la. Tlai dar 2:00pm hmain khawiahmah ka chhuak lo,"a ti leh nghal vat a. Inspector Zothana chuan,"Tlai dar 2:00pm chuan pawnah i chhuak maw? Khawnge i kal?,"tiin a zawt leh a. Vanlalruata chuan,"Birthday cake kan order kha a lam theih tawh thu min lo hrilh a,chumi lam tur chuan chhuah ka tum a. Mahse,ka Bike an lo ru daih a ka ṭhianpa in cake chu a lam,"tiin a chhang leh a. Inspector Zothana chuan,"Awle i ṭhiante birthday lawmnia kal zawng zawng chu an address sawi la,thu kan zawtfiah ve ang,"a ti leh hmak hmak mai si.

Vanlalruata te ṭhian ho chu Aizawl Police Station-ah chuan thu zawhfiah turin an awm ve ta ṭhap mai. Hmeichhia 2 leh mipa 3 an ni a,an hmel en reng reng chuan an la upa lo tih a hriat reng mai. Inspector Zothana chu an hmaah chuan a ding a,nula leh tlangval la naupan hmel deuh deuh ṭhu ṭhap mai chu a en vang vang a. A mal te te a thu zawtfiah turin a ti ta a. Hmeichhe 2 te chu S.I Jolie chuan thu a zawtfiah a,mipa dang 3 Vanlalruata tih loh chu Inspector Zothana chuan thu a zawtfiah ve thung a. A tawpa an thu hriat chu Vanlalruata thusawi ang tho kha a ni,a hrang ṭheuh a zawhna an zawh hnuah chhanna inang vek an nei ta si. Vanlalruata te ṭhian ho chu Police ho chuan an haw tir leh ta rih a. Vanlalruata Bike number chu Police Station hrang hrangah an thawnkual a,hmuh ngei tumin an bei nghal ta char char a.

Pu Kima pawn taksa natna leh rilru hahna nen damdawiin hun a hmang ve mek a ni a. A fanu chu engtinnge a awm ang? Engvanga hetia kidnap nge a nih le? An chhungkaw chungah hian hetiang thil a thleng ta mai hi hriatthiam har a ti khawp mai. A bulah chuan a nupui chu ngui nghiai hian a lo ṭhu bawk a,han inhnêm chuang tur pawh an awm lo a ni.

S.I Jolie chuan Pi Maggie chu eng eng emaw a rawn zawt leh nual a;

"Pi Maggie,i hriat theih chinah in chhungkua hian hmelma emaw,nangmahni haw deuhtu che u emaw in nei mial em?,"

"Aih chutiangin hmelma kan neih âwm ka hre miah lo."

"Nihchuan,hetiang thil ti duh niâwma rinhlelh deuh te. In pa dam loh thu hre chiangtu deuhte an awm mial em? In chhungkaw hnaivaiah te pawh?,"

"Aaaa chutia han sawi fak tur chuan,kan Driver leh kan nula hian engkim chu an hre hmasa ber a. Chumi hnuah kan pa chhungte ka be leh a,ka chhungte erawh chu ka biak tlang theih mai loh avangin chawhnu lam daihah an hre ve chiah a."

"Awle,engpawh nise chak taka hma lak tum mek zel a ni a. In fanu kidnap tu hian chhan nei lo chuan a kidnap lo tih chu a chiang reng mai a,engtikah emaw chuan a la rawn be ngei dawn che u a. In fanu kidnap tu hnen aṭanga thu in dawn veleh min rawn hrilh nghal dawn nia aw,"

"Awle,tehreng mai kan lawm lutuk a nia aw."

Siami leh Dika te pawn hrehawm an ti a,an tuar ve khawp mai. Siami lah chu nitin zantin a ṭap reng a,damdawiin lamah nise an pu ber chu na tuarin a awm mêk bawk si. An chunga thil thleng chu hriatthiam harsa an ti takzet a ni.

Inspector Zothana chuan a dawhkana File ho chu a en nghal malh malh a,"Kan misual mai mai chu aww,kan man chhuah hun chu a van châk dawn lo tak,"tiin a phun nuah nuah a. Constable 1 chu a rawn lut a,"Sir,Bike kha Vaivakawnah an hmu a nih chu,"a rawn ti nghal a. Inspector Zothana chuan,"S.I Jolie kha hrilh la,Vaivakawnah chuan kan chhuk thla nghal dawn nia,"tiin a in tho nghal vat a. Constable 3 leh S.I Jolie leh Inspector Zothana te chu Vaivakawn lam pan chuan an in khalh chhuak nghal a.

Bike chu Vaivakawn Police ho chuan tuma khawih theih loh turin an lo veng ve bawk a. Case khawihtu ber Inspector Zothana chu Salute an lo pe nghal vat bawk a,"Sir,20mins liam ta khan Bike hi hmuh a ni a. A rang thei ang berin kan lo hrilh nghal che u nih kha,"tiin Constable pakhat chuan an thil hmuh leh hriat ang ang chu a lo hrilh nghal vat bawk a. Inspector Zothana chuan Bike chu a enkual thuak thuak a,"Bike neitupa kha lo bia u la,a rang thei ang bera rawn kal turin hrilh nghal rawh u,"tih pahin a zial chu a ṭan a,a pak khu nghal tulh tulh a. Constable pakhat chuan Vanlalruata chuan a be pawp nghal vat a.

Rei lo te hnuah Vanlalruata pawh chu a rawn thleng ve nghal bawk a. Inspector Zothana chuan,"Tlangval,hei hi i Bike bo kha a ni ngei em?,"tiin a lo zawt nghal a. Vanlalruata chuan,"Aw ni e Sir,ka Bike ngei chu a ni lawm. Mahse,Indicator light hi a tichhia nih hi,"tiin a Bike chu a en vang vang a. Inspector Zothana chuan,"Chahbi i rawn keng nghal em?,"tiin a zawt leh a. Vanlalruata chuan,"Aw keng e hei Sir,"tih pahin a Bike chahbi chu a rawn phawrh vat a. Inspector Zothana chuan,"Forensic Expert ho kha bia u la,Bike ah hian Finger Print hmuh tur a awm ngei ka ring a ni,"a ti a,Bike bulah chuan an ding khawm laih hlawm a. S.I Jolie chuan Forensic lam thiamte chu a be pawp nghal vat a,rei lo te hnuah anni pawh chu an rawn thleng ve nghal mai bawk a.

Bike chu uluk taka an en hnu chuan finger print engmah hmuh an nei miah lo mai. Inspector Zothana chu a thaw hak a,"Kan misual hi a che fimkhur thiam khawp mai. Mahse,kan beidawng mai tur a ni lo theihtawp kan chhuah a nga kan man khawp ang,"tiin a nau te ho chu a fuih mawlh mawlh mai a.

Zan dar 9:30pm velah chuan Pi Maggie phone chu a ri nghawr der der mai a. Pi Maggie chuan a en nghal vat a,lo call tu number chu a hriat ngai loh number a ni tlat mai. Hlauthawng angreng tak chuan a chhang ta a;

"Aw Hello..Tunge aw?,"

"Pi Maggie maw?,"

"Aw ni e,khawi aṭangin nge?,"

"I fanu hi i la hmu duh em?,"

"Maw? I bulah khan ka fanu chu a awm a mi a?,"

"I fanu hi him dam taka i hmu let leh duh anihchuan,tun kar Zirtawpni zan dar 11:00pm ah Cheng Nuaizahnih kengin i rawn kal dawn nia,"

"Ee..eng eng maw?,"

"Ka sawi hi ngun deuhin ngaithla ang che,"

"Aw..awle,"

"Kan inbiakna hi Police in an hriat vaih chuan i fanu hi a ruang pawh i hmu lo ang. Chu chu hria ang che."

"Mah..mah..mahse,"

"Pawisa chu i nei thei dawn nge dawn lo?,"

"Khawngaih hun min pe leh hret la,ka nei thei mai ang,"

"Chuti maw? A ṭha e,thla thar thleng ka nghak ang che. Mahse,kan inbiak hi Police i hriattir vaih chuan i fanu hi a thi ang,"

"Aw...awle..awle Police chu ka hriattir lo ang. Mahse,khawngaihin ka fanu chu min biak tir thei a ngem? Khawngaih takin,"

"Khaa.."

"Anuu,engtikahnge min lo hruai dawn? Hetah hian ka awm duh tawh lo a nia,Anu,min lo hruai vat vat rawh."

"Bawihte,Bawihte,ka lo hruai vat dawn che lawm. Lo hlauthawng miah suh aw,ka lo hruai vat dawn che lawm,"

"A tawk...pawisa chu thla thar ni 5 thleng ka nghak ang che. Chuan,ka sawi kha hre reng ang che Police in kan inbiakna hi an hriat vaih chuan i fanu hi a thi ang,"

"Aw...aw..awle ka hria e."

Phone chu a tawp nghal hmak a. Pi Maggie chu a khur der der a,a bulah chuan Siami chu ngawi rengin a lo ding reng tawh a,"Ka pi,engnge thleng a?,"a lo ti nghal vat a. Pi Maggie chuan,"Aaa e engmah engmah a thleng lo. I hna va thawk leh tawh rawh,"a ti bah deuh nuai mai a. Siami chuan,"Mahse,Ka pi,damdawiinah i kal a ngai sia,"a ti leh a. Pi Maggie chuan,"Zanin chu ka nau in min chhawk mai teh se. Ka nau kha va bia la,ka nuamsam vak lova mut rih ka duh,"tih pahin room lamah chuan a lut nghal daih a. Siami chuan mak tih hmel zetin Pi Maggie chu a en zui nghal vawng vawng a.