KIDNAPPING OF GIRL - 1

BY:- Rs Thangluah{Remz}✍🏻

CHAPTER--1

Siami chuan Nunui tiffin tur chu a siam malh malh a,"Nunu,ka siam zo e,"tih pahin Nunui School bag-ah chuan tiffin chu a khung nghal a. Pi Maggie chuan,"Siami,in hman tawh mi?,"a lo ti a,Siami chuan,"Aw hman tawh e,"tih pahin Nunui School bag chu a ak nghal a. Pi Maggie chuan,"Awle khawi gate thleng ka rawn thlah ang che u. Bawihtei pa lah chu a khuasik hluah mai bawk sia,vawiin chu dawr lamah pawh ka kal theih loh hmel khawp mai,"tih mawlh mawlh pahin a fanu kum 8 mi chu a kai a,gate lam pan chuan an in kai chhuak ta a.

Kawtah chuan an Driver chuan a lo nghak reng tawh a,ngawi rengin motor chu a lo hrufai mawlh mawlh a. Pi Maggie chuan,"Dika,hei parking fee tur leh i thil ei na man tur aw,"tiin ₹200 note leh ₹50 note chu a rawn phawrh a,Dika chu a pe nghal a. Dika chuan,"Aaaa ka Pi,a ngai hleinem nimina min pek pawh kha ka la hmang zo lo a sin,"a lo ti vat a. Pi Maggie chuan,"Eng emaw palh thut te pawh a awm thei a,in ven nan a ni mai. Chuan,Siami i rawn haw pahin Anțam leh Tomato i rawn lei haw nghal dawn nia aw,"tiin Siami chu ₹200 note a pe ve nghal a. "Bawihte,School-ah fel deuhin awm tur a nia. Sir leh Miss te thuawih tur aw,"tiin a fanu sam chu a chûl sak a,a chalah a fawh sak zauh a,"Kal tawh ru le,in tlai palh ang,"tiin an in thlah liam ta a.

Siami leh Dika chuan Nunui chu School thleng an thlah hnu chuan,an let leh nghal a. Siami chuan,"Dika,bazarah chuan min kualpui lawk mai la. A rei dawn chuang lova,tih tur dang i nei chuang a mi?,"tiin a phone chu a hmet malh malh a. Dika chuan,"Ka pu a office thei dawn chuang lova,tih tur em em pawh awm hran chuang love. Duh leh kual zuai ila ni mai lawm,"tiin Bazar lamah chuan an kual phei leh a.

Dika'n motor chu a park fel hnu chuan,Siami chu Bazar lamah chawhmeh lei tur chuan a kal nghal a. Dika chuan motor park naah chuan a lo nghak rih a.

Siami pawh chu a rei vak lo khawp mai,20mins vel a thang hnu chuan a rawn let ve leh nghal mai a. Dika chuan parking fee chu a pe a,In lam panin an inkhalh haw leh nghal a. Siami chu motor chhungah chuan a selfie nasa mai a,"Ka pi leh ka pu hian sum an ngah ngawt ang tiraw? Ka pu lah PHE Department-ah E.E a nia. Ka pi lah sumdawng hausa lutuk mai a ni bawk si,an khawsak lah hi a hautak vak bawk si lova,"tih mawlh mawlh pah chuan a selfie leh mawlh mawlh a. Dika chuan,"Ah i ho e mai a,chutin mi chhungkaw chungchang an sawi ngai lo,"tih pahin a lo nuih san mai a. Siami pawh chuan a sawi zui duh tawh bik lova.

"Bawihtei nu,dawr lamah chuan va kal la. Keichu ka ṭha lawm,min ngaihtuah suh,"tih pahin damdawi chu a hmawm nghal a. Pi Maggie chuan,"Ni 1 lek te chu kalsan mah ila a pawi hleinem. Ka dawr aichuan i pawimawh zawk a lawm,"a lo ti nghal vat a. Pu Kima chu a nui suk a,"Nang ang hmeichhe fel leh ṭha nupuia ka nei che hi chu ka vannei ngawt mai,"tih pahin a nupui kut chu a rawn vuan a.

Dika leh Siami pawh chu an rawn thleng phei ve tawh bawk a. Siami chuan,"Ka pi,chaw in lo ei tawh em?,"tih pahin a chawhmeh lei chu dawhkanah chuan a dah a. Pi Maggie chuan,"Aw ka lo eisan mai che u,pawi em?,"tih pahin choka lamah chuan a rawn phei nghal a. Siami chuan,"Pawi lo e pawi lo e,kan ei ve nghal mai ang,"tiin Dika nen an chaw ei tur chu a siam nghal malh malh a. Pi Maggie chuan,"Dika,chaw eikhamah i pu hi damdawiin lamah kan kalpui dawn mawn le aw? Rin aiin a khawsik hi a sâng riau mai a,ka ngaih a ṭha lo tlat,"a lo ti leh a. Dika chuan,"Awle kan kal dawn nia,"a lo ti ve nghal vat a.

Dika chaw eikham chuan Pu Kima chu damdawiin lam chu an pan pui nghal a. Pi Maggie chuan,"Dika,Siami chiah Inah a awm sia. Bawihtei hruai a ngai bawk sia,lo va phei phawt la eng emaw a awm tak leh ka rawn hrilh leh mai dawn che nia aw,"tiin Dika chu a haw phei tir ta rih a. Pu Kima pawh chu a khawsik chu a reh mai si lova,Doctor chuan admit mai chu ṭha a tih vangin an admit ta nghal a.

Chawhnu lam dar 12:30pm velah chuan Dika chu Nunui School bang hruai tur chuan a in khalh chhuak leh ta a. Nunui ṭhiante ho chu an lo chhuak sap sap hlawm a;mahse,Nunui hmel a hmu ve ta miah lo mai. "An stay emawni le?,"ti rilru nuah nuah chungin Car bulah chuan a ding a,"Mahse,stay back pawh ni se an sir ten min hrilh awm sia,"tiin a hawi kual ruai a. School naupang tam zawk chu an haw tawh a,a tih ngaihna hre lo chuan an Principal chu a va zawt ta ringawt a. An Principal lah chuan,"I rawn thlen hma lawk khan phone call ka dawng a,Nunui pa a dam lova a serious viau thu leh Nunui chu hruai haw mai a rem leh rem loh min rawn zawt a. Chutianga dam lohna thil te a nihchuan tiin kan in hruai haw tir ta a nihkha,"tiin a lo chhang si. Dika chuan thil awmzia a hrethiam lo kher mai,"Ni e Nunui pa chu a dam lo ngei a. Mahse,Nunui nu ngeiin Nunui hruai turin min tir sia lawm,"a ti ve thung a. Principal pawh chuan mak a ti hle mai a,"Nunui nu chu han be chhin teh,"a lo ti vat a. Dika chuan Pi Maggie chu a call nghal a;

"Aw Dika,"

"Ka pi,Nunui lo haw tawh em?,"

"Eng a!!? Hruai turin i kal a ni lawm ni?,"

"Aw kal e mahse..,tu emaw in a lo hruai haw a,"

"Maw? Engnge awmzia? I hresual a ni lo maw?,"

"Aih ka pi,ka hresual lo. Hei an Principal nen hian inbe chhin ru aw,"

"Aw awle...,aw sir,thil thleng hi engnge awmzia le?,"

"Ni e,hei in driver hi a rawn kal leh sia mak ka ti ve khawp mai. I fanu pawh kha kan zawt tho a,'I pa a dam lo mi?'tiin kan zawt a. A khua a sik thu leh office pawh a kal theih loh thu te min hrilh bawk sia,khavang khan min lo be tu pawh kha kan lo hruai tir ve mai a lawm maw le,"

"A rawn be tu che number chu i la nei ang tiraw?,"

"Aw nei e,"

"Kan driver bulah khan lo be tu che number chu lo pe mai ta che aw. Thil thlen dan hi ka ngaih a ṭha miah lo mai,"

"Ni e F.I.R te pawh theh lut mah u la,a pawi ka ring lo,"

"Ni e aw ka lo buaipui dawn nia. Anih ka dah phawt a nge aw,ka lawm lutuk e,"

Dika pawh chu beidawng takin a inkhalh haw a. Inah chuan Siami chiah a lo la awm a,"Khawnge Nunui?,"tiin Siami chu a lo ṭap ṭuau mai a. Dika chuan a chal dawm pahin,"Kha ai khan kal hma deuh ila chuan hetiang thil hi a thleng lo ang maw le,"tih pahin a thaw hak a. Siami lah chu lungchhe takin a inhnît feih feih reng a,"Ka piin min hrilh a,Police pawh an lot thleng ṭep ang. Ka naute chu ka van khawngaih tak,"tiin Dika bulah chuan a rawn ṭhu a. Dika chuan,"Lungngai suh Police in an chhui a nga,an hmu leh vat mai dawn lawm,"tih pahin Siami darah chuan a rawn kuah a.

Pi Maggie pawh a awm hle hle thei bik lo,a fanu naupang te chu khawiahnge a awm ang? School ban hmaa lo hruai chhuak tu chu tunge ni ang? A pasal dam loh na chhuan lamin an la hruai chhuak zui a,chutah Dika'n School a thlen phei hma chiah chiahin an lo hruai chhuak hman bawk si. Thil thlen dan hi ruahman lawk a ang khawp mai,a pasal dam lo pawh a buaipui hman meuh lo a ni e.

Police chuan Siami leh Dika chu thu zawh fiah turin an hruai phawt a. A hrang ve ve in thu an zawt fiah nghal a,"I pu dam loh thu hi midang bulah i sawi em?,"tiin Police Inspector chuan Dika chu a zawt a. Dika chuan,"Aih Ka pu,tumah ka hrilh miah lo,"tiin a lo chhang nghal vat a. Inspector chuan,"Dawt min hrilh suh aw,"a ti ram hmak a. Dika chuan,"Ka pu,dawt ka hrilh lo che. Ka pu dam loh thu hi tumah ka hrilh lo tak tak a nia,"a ti leh a. Inspector chuan,"Awle anihchuan zawhna dang aw,thudik chauh min hrilh ang che,"tiin Dika chu a melh rûn mai a.

Room leh lamah chuan Siami pawh Sub-Inspector Jolie chuan thu a zawt fiah ve mek bawk a,"I pu dam loh thu midang hnen i sawi em?,"

"Aih ka pi,ka sawi miah lo,"Siami chu a in hnît faih faih a. Sub-Inspector Jolie chuan,"I chiang maw?,"a ti leh a. Siami chuan,"Aw tumah ka hrilh lo,"tih pahin in hnît leh faih faih a.