KIDNAPPING OF GIRL - 14

CHAPTER--14(LAST CHAPTER)

BY:- Rs Thangluah✍🏻

Inspector Zothana leh S.I Jolie pawh sorkar hnena an dil angin,Detective Jane chu join an phalsak ve ta. Tunah chuan a hmawr an bawk thei ṭep tawh e.

Rsa chuan Siami chu a ṭhutpui ran mai a,20mins vel hnuah Pi Maggie pawh chu a rawn thleng ve nghal a. Pi Maggie chuan,"Canteen thlangah khuan Jane leh Amy an awm a,an nghak che nia,"tiin Rsa chu a hrilh nghal a. Rsa pawh chu Amy leh Jane hmu turin a chhuak nghal a,Amy leh Jane chu dawr 1 bulah chuan an lo ding a. Amy chuan,"I star chu engnge a lo an a?,"tih pahin a lo nui var var a. Rsa chuan,"Ngeiawm suh aw,engkim a ṭha maw?,"a lo ti nghal vat a. Jane chuan,"Pi Maggie leh Vanlalruata kha an inbe zo chiah a. Pi Maggie khan a vo ve deuh a,a fanu chu zanin dar 6:00pm hmaa dam taka a hmu lo a nihchuan kan che chhuak ang,"tiin an thil ruahman dan chu a sawi nghal zung zung a. Rsa chuan,"Chuan an pa hi engnge a chanchin ni reng reng a?,"a lo ti leh nghal vat a. Jane chuan,"A him zawk nan I.C.U ah a la awm rih,boruak a ṭhat hma chu Cabin-ah dah luh ngam a ni rih lo,"tih pahin a Phone a phawrh a. "Khai aw engkim a buai vek,"a rawn ti chhuak hlawl a. Rsa leh Amy chu an lo meng phawk hra mai a,"Engnge thleng a?,"an lo ti rual ṭhat a. Jane chuan a message dawn chu a entir nghal a,Pi Maggie leh Vanlalruata inbiakna screen shot a ni. Vanlalruata chuan a duh chu a hmuh hma loh chuan a fanu chu pek a tum lo khawp mai. Amy chuan,"Siami hi vo beh nan hmang ve ila ni mai lawm,"a lo ti vat a. Rsa chuan,"Nang lah hi i kaw lo thei bik lutuk mai,screen shot te hi en chiang ta che. Vanlalruata hian Siami nunna chu engatanmah a tih loh hi,hrilhfiah chawpin i kawm tlak choh,"tih pahin a lo nui hak hak a. Amy chuan ner nung nung chungin,"I chhe e mai a,lubuk,"tih pah chuan Rsa ngalah chuan a pet chawrh a. Rsa chuan a ngal chu a tuai nghal vat vat a,"Ei duh nu,"a ti leh hram a. Jane chuan,"A tawk tawh e,kan chet chhuah mai a ngai dawn a nih hmel,"muang ban cherh chawrh chuan a rawn ti a.

Tlai dar 3:00pm rik hma hret chuan Jane chuan Inspector Zothana hnen aṭangin call a dawng a;

"Aw Inspector,"

"Engmah lo ti rih su aw,hei S.I Jolie leh ka team te nen kan rawn kal mek e,"

"Nizan thleng kha chuan chanchin thar lam ka hre si lova,"

"Nia zingah khan phalna kan hmu chiah a. Tumah ka be tlang thei lo che u a,ka rawn hrilh thei lo che u lawm,"

"Awle,nihchuan kan lo nghak ang che u aw. Civil Hospital-ah kan awm aw,"

"Awle kan lo tlan mek e,"

Pi Maggie chu a awm hle hle thei tawh lo,lehlamah a fanu rukbo a ni a. A pasal lah thichhawngin natna khumah a mu reng bawk a. A tan chuan rilru hahdam taka awm chu a har a ni,"Police ho chu an rawn thleng ṭep tawh ang em?,"a ti sek tawh mai a. Jane chuan,"Aw lungngai suh,i fanu chu kan chhanchhuak em em ang,"tiin a lo hnem ve bawk a. Pi Maggie chuan,"Vanlalruata hi ka hrechiang a,a duh a neih theihna tur anihchuan ka fanu nunna hi a la hreh hauh lo ang,"a ti mawlh mawlh mai a. Jane chuan,"I fanu chuan him dam takin i hnen a rawn thleng ang tih ka tiam a che,"tiin Pi Maggie kut chu a vuan a.

Tlai dar 4:30pm ah chuan Vanlalruata chuan Pi Maggie chu a rawn call leh ta ngei e;

"Aw sawi rawh,"

"Ka sawi kha i la hria a nihchuan,tunah hian i pa Picnic Spot-ah tlai dar 5:00pm rik hma in rawn kal ang che. Ka duh chu i hriat kha,"

"Ka fanu kha engtinmah khawih suh ang che,"

"Chu chu ka thu a ni e,Police emaw,kha Detective emaw kha i rawn hruai a nih vaih chuan maw i fanu hi a ruang pawh i hmu lo ang ka tihkha aw,"

"Awle ka hria e,dar 5:00pm ah chuan ka rawn kal ang. Mahse,ka fanu khan hliam pakhat pawh a nei tur a ni lo,"

"Haha awle ka hria e,"

Phone chu a tawp hmak a,"In chet hun chiah ka nghak tawh e,"tiin Jane chu a rawn melh a. Jane chuan,"Awle i hnungah kan rawn zui zel dawn che a,kan hmuh phak lohah awm suh ang che,"a ti a,Pi Maggie chuan a lehkha pawimawh chu akin,a scooty chu a khalh chhuak ta a. A hnungah chuan Inspector Zothana leh a team te chuan Maruti Van in an zui a. Chumi hnung leh ah chuan Jane chuan Bike in a rawn zui a,Amy leh Rsa erawh kawng leh lam aṭangin an tlan thung a.

Picnic Spot thlen dawnah chuan an in hmu khawm leh vek a. Jane chuan,"Pi Maggie kal rawh le. Mahse,keini chuan Gate thlen hma kawng kual thleng bak kha chu kan zui thei lo che. Chuvang chuan hei hi i hmang dawn nia,"tiin Smart Watch chu a rawn la a. Pi Maggie kutah chuan a bun tir a,a sana bun lai chu a phelh sak thung a. ,"Tikhan i awmna chin i rawn sawi zel dawn nia,a sawidan tur erawh i thiam a ngai thung dawn a ni mai aw,"a ti a. Pi Maggie chuan,"Awle ka hrethiam e,"tih pahin a Helmet chu a khum a,Picnic Spot lam pan chuan a tlan thla nghal a. Midang chuan zawi muangin an zui thla ve nghal a,Gate thlen hma kawng kualah chuan an ding a. Pi Maggie erawh a tlan tlang nghal a,an in thuamdan leh an hmel lan dan tidanglamin 2 te te in an in sem darh a,Picnic spot lamah chuan ke in an chhuk thla ve hlawm a.

Picnic Spot-ah chuan picnic an lo awm nual mai a,an lo ri teng tung hlawm a. Jane leh Rsa pawh chu inngaizawng angin Pool bul velah chuan an tei kual vel a. Rsa chuan an hma mai a Vanlalruata rawn phei chu a hmu ta thut mai,rang lutukin Jane chu a kuai her a Jane hmuiah chuan a fawp nghal chawt mai a. Jane lah chu a lo meng phawk nghal kawk kawk a,tal chhuah tumin a lo bei fat fat bawk a. Mahse,Rsa chuan a man bet hneh êm a,a tan tal chhuah ngaihna a awm lo a ni.

"Engthil nge i tih hi? Lalrinsang,"tih pahin Jane chuan Rsa hmaiah chuan a beng ṭhuai mai a. Rsa chuan,"Tihpalh mahse,..,"tih pahin Vanlalruata leh Nunui inkai phei lai chu a kawk a. An hnungah chuan mi 5 hian a khát mawi tawkin an zui bawk a,"Hetiang lo pawh hian a in hrilh theih reng,"Jane chuan a hmui chu a tuai a,a tûm buau mai a. Rsa chuan,"Ṭawngkaa in hrilhna hman a nih tawh loh kha,ka duh vang a ni bik lo,"tih pahin za vak lo hian a nui suk a.

Pi Maggie leh Vanlalruata chu an in hmachhawn ta ran mai. Pi Maggie chuan,"Ka fanu kha rawn kal tir rawh,"a ti bul hmuk a. Vanlalruata chuan,"Ka thil duh kha ka hmuh hma chuan i fanu hi ka rawn chhuah lo ang,"tih pahin Nunui nakah chuan Pistol in a tin nghal ran mai a. Pi Maggie chuan,"Kha i duh chuan i rawn la thei ang,"tih pahin a hmaa dawhkanah chuan a bag khai chu a dah a. Vanlalruata chuan a bula ding chu a melh zauh a,"Va la la,a dik leh dik loh check la. A dik vek chuan a fanu hi ka chhuah ang,"a ti a.

Pi Maggie te awmna chu an hre chiang thei ta. Tlem tlemin an in sawr zim a,an hnaih hret hret a. A tawpah chuan an hnaih chilh tawh khawp mai;mahse,an rin ang ngawt chuan thil a awlsam hauh lo mai. Vanlalruata chuan nui var var chungin files vel chu a en a,pawisa fai a dawn ho pawh chu a nau te ho chuan an chhiar mual mual a. Engkim a ṭha vek tih hriat theih nan an lu an bu nghut nghut hlawm a. "I fanu chu i hruai haw thei ang,"tih pahin Nunui chu a thlah a. Pi Maggie chuan a fanu chu a lo kuah nghal vat a;mahse,room chhungah chuan tu emaw a rawn lut a,"Boss,Police an lo kal,"a rawn ti mai. Chu veleh Vanlalruata chu Pi Maggie awmna lamah a phei nghal a,Nunui chu a va phih leng dawr a,"Dawhehnu,Police an in rawlh loh thu min hrilh a ni lawm ni?,"a Pistol chuan Pi Maggie chu a tin ran mai a. Pi Maggie chu hlauhlawpin a khur zawih zawih a,"Khawngaihin ka fanu kha chu tina suh aw,"a ti mawlh mawlh a. Vanlalruata chuan Nunui chu pawn lamah a kai phei a,a bekah chuan Pistol-in a tin ran mai a. A hnungah Pu Thanpuia chuan Pi Maggie chu a rawn kai phei bawk a,Pistol-in a tin ve ran mai.

"In hnung tawlh loh chuan an nufa hian an thi ve ve ang,"tiin Vanlalruata chu a âu ṭhat ṭhat a. Inspector Zothana chuan,"Hualchep in ni tawh,rawn inpe mai rawh u. Kan hual bet vek tawh che u,"tiin a au ve thung a. Mahse,Vanlalruata chuan awlsam deuha tlawm a tum lo chiang khawp mai,"In tawlh lo a nihchuan ka silai hi ka hmet puak ang,"a ti ve thung a. An awmna room lehlam aṭang chuan Rsa leh Jane chuan an rawn luh chilh ve mek bawk a.

Rei fe pawn lama an in âuh hnu chuan Silai a puak ta. An hawi phawk hra hlawm mai a,"An nufa khan i chhuah loh chuan i fapa hian a tuar ang. Tunah chhuah rawh le,"Jane chuan Vanlalruata fapa Msa chu a rawn kuahbet a,a bekah chuan Pistol-in a tin ve ran mai a. Vanlalruata chuan,"Ka fapa kha chhuah rawh,i chhuah loh chuan ka kap ang,"tih pahin a Silai chu a hmet kau ran mai a. Jane chuan nuih suk pahin,"I silai kha dah rawh le,a nih loh chuan i fapa hi ka ui vak lo a nia aw,"tih pahin Msa chu a Silai kawm chuan a chhu chawrh mai a. Chutah zet zawng Vanlalruata pawh chu a ṭang rei thei ta bik lo,"A tawk e a tawk e,ka Silai ka dah e,"tih pahin muang changin a Silai chu chhuatah chuan a dah thla nghal a. An boss ber a tlawm tak siah chuan a nau te ho pawh chuan Silai chu an dah ve sap sap hlawm a.

"Detective ropui tak i ni,ka chhuang khawp mai che,"tih pahin Inspector Zothana chuan Detective Jane chu a rawn kuah a. Jane chuan nui chungin,"Min puihna vang vek a nih hi,nangni awm lo u la hetiang hi kan thleng kher lo ang,"a lo ti ve mawlh mawlh a. S.I Jolie chuan,"Kan hna kan zo tawh bawk a,Weekend-ah ka pa farm-ah chawlh kan hmang ho dawn nia aw,"a lo ti ve bawk a. Amy chuan,"Yes a van nuam dawn tak,eitur tam tawk a awm em?,"a lo ti nghal vat a. Rsa chuan,"Hei lah hi a,i rilruah khan eitur chiah mi awm a?,"tih pahin a lo nuih var var a. Amy chuan,"Hmm ni kher love aw,Lubukpa,"tih pahin Rsa lu-ah chuan a rawn beng lawlh a. Inspector Zothan leh S.I Jolie chuan an lo nuih var var a,"Kan kalsan phawt ang che u aw,Weekend chu lo in ring u la aw,"tiin an in thlah liam ta a. Amy chuan,"Men rei a ngai tawh lo bawk a,online char char ila ni mai lawm,"tih pahin room lamah chuan a lut nghal daih a. Rsa leh Jane chuan an nui zui vur vur a,"He nu tak hi chu aw,"tih pahin Rsa chuan TV Remote chu a ban a,Jane chuan a rawn ban ve chiah bawk a. Rsa chuan nui suk pahin,"Kha,"a ti zawi sup a,"I duh duh hmet chhuak rawh,"tih pahin Jane chu a nui suk a. Rsa chuan,"Iiih eng lo kha i hmai kha,"tih pahin Jane chu a pan hnai a,Jane chuan,"Engnge?,"tih pahin a lo tawlh hnung hrut a. Rsa chuan,"Thil a kai a,khawi ka lo tifai ang,"tih pahin a pan hnai leh a. Jane chu a tawlh hnung leh hrut a,Sofa-ah chuan a va tlu ta hnawk mai a. Chu veleh Rsa chuan Jane ke chu a rawn palh deuh ti tih a,a rawn tlu ve nghal ringawt a. Jane chu a bawh ta ûr mai,thawh mai nachang a hre si lo,"Iiihhh aaah eng lo,"a ti bah nuai a. Thawh mai tuma a in ben kan lai tak chuan,Jane chuan a kawr nghawngah a lo ṭham a,"He i mit meng mawi tak avang hian hlat che hi harsa ka ti ṭhin,"tih pahin  Rsa hmuiah chuan a rawn fawp zauh a,a hmui chu a la sawn leh nghal mai. Rsa chuan en liam mai a tum lo chiang khawp mai,Jane hmuiah chuan duhthawh takin a fawp nghal bawrh bawrh mai a. Jane pawh chuan a lo chhang let rang khawp mai,chutia rem leh rem lo pawh thlu lova an in bawh deuh ûr ûr lai chuan,Amy chu room aṭangin a rawn chhuak thut mai a,"Awiiii Lalpa,Lal Rs,kha Lasi pitar kha engtia tih nge i tum?,"tiin a rawn âu tuarh mai a.

---A TAWP TA---

LAWMTHU SAWI NA:-

Ka story ziah te min hlut sak a,min lo chhiar chhuah sak ṭhin tu leh thurâwn ṭha tak tak min pe tu te chungah khan,a mal malin lawmthu ka sawi seng lova,hei hi ka lawmthu sawinaah min pawm sak dawn hram dawn nia. In zavaia chungah khan ka lawm takzet zet a ni. Remchang hmasa berah story thar nen ka lo let leh dawn nia,chumi hma zawng chu in za vaiin hun hman nuam vek u le,ka lawm e.