KAN RIN PATHIAN HI KAN AUH A HUN TAWH

( CAB16 Protest Day, 12 February, 2019 a vanapa Hall kawt Aizawl a neih a MZP president L Ramdinliana Renthlei Thusawi )

- L Ramdinliana Renthlei

MZP President

Pu Chairman leh kan ramin chhan a ngai tih hria a, kan hnamin chhan a ngai tih hria a lo pen chhuak zawng zawngte thinlung takin chibai ka buk a che u.

Vawiina hian ka rin aiin Mizo mipui pungkhawm kan tlem daih mai, kan tam ka ring a, Zodin atanga Treasury inkar hi kan khah vek ka ring a nia. Mizote hi kan hnam vei dan chin hi a lova in ang ta lo em! Kan ram kan vei dan chin hi a va in ang lo ta e!. Mizote hian kan peih chinah chiah hian em ni kan ram leh hnam hi kan lo vei? tih hi vawiina hian ka sawi duh a ni.

The Citizenship (Amendment) Bill, 2016 hi introduce tirh a nih 2016 atang khan NESO chuan a dodal ngar ngar tawh a.   Nawrhna hrang hrang a huaihawt thin a, Delhi ah te kalin Prime Minister te, Home Minister te hmuin, sitting demonstraion, Total Bandh te leh Kawngzawh te pawh neih tawh a ni a. JPC pawh hmaichhan ngeiah NESO chuan a lo kawm tawh a ni. Tun hnaiah India Political Party hrang hrang pawh kawmin tunah pawh hian Delhi ah kan vil reng a ni.

  

Mizoramah pawh NGO Coordination Committee bultumin nasa taka hmalak mek a niin, hma pawh a la chhunzawm zel a ni.

Heti khawp a, nawrhna hrang hrang huaihawta hma kan lak lai hian India sorkar BJP sorkar chuan pass tumin hma a la mek a. Tunah Rajya Sabha MP te pawh sum hmangin a thlem mek a, a then te chu an lei nghe nghe a ni. NE state tam taka chuan lungrual takin hma an la a, Mizoramah ve chuan kan duh loh tlan vek a nia, heti chung pawh hian kan lungrual thei lo lehnghal a ni. Politics a in beih nan kan la hmang a nia, kan ram hi chu kan harh a ngai zual hle mai, i tangrual sauh sauh ang u.

Kan theihna zawng zawngin hma kan la tawh a, hei bak hi chu a awm vak tawh lo a ni. Mi tamtak chuan buaina te siam a, State dang te tih anga police te nena in vaw tur te in min beisei tih kan hria e. Mahse kan beih te hi Mizo an ni lo a, India Sorkar, BJP Sorkar a ni a. Mizo leh Mizo kara buaina leh harsatna siam hi NGO Coordination chuan kan hreh a ni.

Mizo mipuite pawhin kan theihna te kan seng zo ta viau mai.... Kan Pathian thu chuan ''Chakna ni loin, thil tih theihna ni loin, ka thlarau zawkin le" a tih kha....tunah chuan kan chakna ni lo a, kan rin Pathian hi kan auh a hun tawh a ni. Engkim chunga roreltu Pathian kan nei a. Narendra Modi-a te, Rajnath Signth-a te, Central Sorkar India sorkar chunga thuneitu kan rin Pathian a awm a, Pathian i au ang u. Kan Pathian hian Mizote duh dan lo chuan ro a rel lo ang tih ka ring a ni. Heti khawp a Pathian kan au chunga he bill hi pass luih a nih chuan Pathian pawh hian Mizo thalaite hi kan duh zawng tih a remti ah ka ngai a, Mizo thalaite hian kan tih tur kan ti ve tawh dawn a ni.