JUMBLE SALE

JUMBLE SALE

                                 - ✍🏻 Vidpuia Hrahsel

He thu hi i hmuh aṭangin, i rilru ah emaw i suangtuahna ah, thawmhnaw hlui sale ani tih i hriat nghal ka ring. Mizoram ah chuan Inrinni hi sawrkar pisa chawlh ni a nih avangin leh a tuk Pathianni a nih avangin mi nawlpui Bazar ni a ni a, bazar tur a, i kal chuan kawtthler lûn lai ah, Jumble Sale an awm ngei ang. Kan intihmuh nasa in, he thawmhnaw hlui hralh hi a hlawk aniang chu sumtuak nan kan sale ta mawlh mawlh mai le. Mizoram ah hian Jumble Sale kan intihhmuh nasa hle a, kohhran emaw thianho emaw college a zirlai te in sumtuakna atan hman kan intih hmuh tlat. Jumble Sale hi inhlawhna atan Mizoram a pawl hrang hrang a inhmang te, hian kan hmang deuh ta fur hlawm a, chhungkaw tam deuh thawmhnaw lei zung zung emaw thawmhnawm uar deuh tan chuan, he Jumble Sale hi pawl hrang hrang ṭanpuina atan emaw thawmhnaw hluihlawn nan a hmanraw ṭha tak chu a ni e.

Pawl hrang hrang a, Jumble Sale hmang a, inhlawh te hian thawmhnaw an zawrh hi thawmhnaw ṭhat dan a zir in pakhat Rs.100, Rs.50 leh Rs.20 thlengin an zuar ṭhin a, inhlawhna ṭha tak chu a ni ve reng e. Zing a sale hman turin, ṭhenkhat chuan a zawrh na hmun tur ah an riah chilh hial a, zing aṭangin an sale a, a buaipui te tan chuan thawmhnaw ven ngai bawk, thawmhnaw sale tur a au ngai bawk chu a hahthlak rual in ṭhianho emaw pawl a inhman ho chuan thil hlimawm ni si, pawl sumtuak na ṭha tak ni bawk si, hlawk bawk si Jumble Sale hi kum khat ah vawi thum vel nei thei ila tiin an suangtuah rauh rauh ve ṭhin hian ka ring! A hlawk pawl chuan nikhat ah cheng sing chuang daih ania an hmuh theih, heipawh thawmhnaw neih tam leh tam loh a zir a ni mah na.

Jumble tih thumal hi a tir ah chuan Verb (thiltih sawina) ang a hman a ni a. Chu chu kum 1520 chho vel khan 'awmze neilo a,phusa' tih na a ni a. Kum 1540 a lo herchhuah leh chuan a lo danglam leh hret a, 'phusa nuaih nuaih emaw awm nuaih nuaih' tih nan an hmang leh a ni. Kum Zabi 17 na ah phei chuan 'mipat hmeichhiatna hmanpui' thup deuh hlek a, sawi nan an hmang nawk nawk bawk.He thu hi awmze  dang dang sawi nan a, hman ṭhin a ni.

Pu J.F. Laldailova fam Dictionary a, a inziah dan chuan Jumble Sale: n. mi rethei ṭanpui nân a, nepnawi khawn khâwm zawrhna, tih a ni a, Mizoram ah erawh mi tam zawk in a, Jumble Sale kan kalpui dan hi a dik tawk lo deuh a hriatna ka neih avangin leh Jumble Sale awmzia leh a hman na tur dik hi kan kal pel deuh hlek niin ka hria. Jumble tih thumal hi chawchawrawi tih na mai a ni a, Jumble Sale tih awmzia chu thil chi hrang hrang zawrhchhuah tiin kan hrilhfiah a nge. Sapṭawng Dictionary mi tam zawk in a kan pawm Oxford Dictionary chuan  Jumble Sale hi ti hian a sawifiah :

A sale of miscellaneous secondhand articles, typically held in order to raise money for a charity or a special event; a rummage sale.

Jumble Sale tih awmzia tak chu mi rethei te tan a sumtuakna tihna a  ni ber mai, ram changkang te thil chin ṭha, kan intihhmuh a, a lawmawm viau rual in, kan ram ah erawh pawl tam zawk in inhlawh nan, sumtuak na ṭha tak alawm tiin thawmhnaw hlui kan zawng khawm a, kan sale ta chur chur mai ṭhin a nih hi. He Jumble Sale kawh tum, mi rethei ṭanpui nan a, Jumble Sale huaihawt kan nih chuan a kawh tum kan ti hlawhtling mai dawn a lo ni,a thu awmzia kan hriat loh vang te pawh a ni awm e; pawl ang a, sumtuak nan a kan hman ringawt chhan hi inzawt ta ila, inhlawhna tur a vang em a, kan tih ka ring. Mahni hamṭhatna tur ringawt ngaihtuah, pawl tan a sumtuak na ṭha tak a, kan ngaih 'Jumble Sale' aṭanga an sum hmuh zawng zawng mi rethei te tan ram changkang te chuan  an hlan ṭhin asin. 'Jumble Sale' hi Mizoram a, mi ṭanpuitu pawl (charity club) te  huaihawt tur ni awm zawk tak hi a kalphung leh a kawh tum kan hriat loh avangin inhlawh nan leh pawl sumtuak nan kan hmang ta mai hi in dem tur kan awm bik chuang lo.

Jumble Sale nei ṭhin, mi rethei ṭanpui nan a, hmang hi a tlem zawk kan ni mai awm e. Jumble Sale sumtuakna aṭangin kan ṭanpui alawm, ti pawh kan awm ang. Amaherawhchu mi tam zawk hian sumtuak nan kan hmang a, inhlawhna a ni lo a, mi rethei te ṭanpui nan a, thil lakkhawm zawrhchhuah ani. Chhiar tu duhtak, Jumble Sale hi neih tawh lo tawp tur tih avang a, rawn ziak ka ni lo a, 'Jumble Sale' awmze dik tak leh a hman na tur ah hian hmang ila, a va duhawm em. Ram Changkang zawk te, thil  ṭha tih kan entawn ta rau rau, a  nih chuan Jumble Sale an kal pui dan mi rethei te ṭanpui nan a, kan Sale atanga sum kan hlawhchhuah te kan pek chuan,  a va ṭha lehzual dawn em.