ZU ZUAR FANU 32

CHAPTER--32

*R'z Thangluah✍🏻*

"Min va rêl nasa ve a?,"Sangtea chuan Msi chu a melh rum khawp mai. Msi lah chu a nui kur kur a,"Duh leh kan rêl che nga,duh leh kan rêl lo che nga,"a ti vel ham ham a. Sangtea chuan,"Hmm in sual e mai a,thingpui min lum la,"a ti leh a. Msi chuan,"A ṭullo i ruih em kha,"a lo ti vat a. Sangtea chuan,"I thingpui lum ka in ve chak a ni mai a,"a ti a,a thle duar duar a. Msi chuan,"I van chhe tak e aw,Amul Kool i in duh zawk em?,"a lo ti thung a. Sangtea chuan,"Umm i phal te chuan duh mai zel e,"a lo ti vat a. Msi chuan,"A vawt aw,"tih pahin Fridge chu a va hawng nghal a.

Kimkimi ṭhiannu birthday a ni a,Max pawh chu kal ve tura an sawm ve ṭalh vangin Kimkimi chu a zui ve ta nge nge a. Max-a car chuan an in phur chhuak a,"Duat,hlim deuhin zanin chu hun hmang ang aw,"Kimkimi chuan Max chu a rawn melh ralh a. Max chuan nui suk chungin,"Tehreng mai,i bulah chuan ka hlim  reng ṭhin a lawm,"a lo ti vat a. Kimkimi chuan,"Ka pasal ni tawh la ka van ti tak,"a rawn ti leh a. Max chuan,"Tikhan i pasal angah min ngai tawp rawh,"tih pahin a lo nui hak hak a. Kimkimi chuan,"Aww nangman i nupui angin min en ve loh chuan awmzia awm lo e,"a lo ti thung a. Max chuan,"Ka nupui angin ka en reng che lawm,"a ti a,Kimkimi kut chu a rawn vuan a.

"Max nen chuan in la ine ṭha maw?,"Sangtea chuan Msi chu a melh leh kar tawh a. Msi chuan,"Umm ṭha e,kan ṭha lutuk,"a lo ti vat a. Sangtea chuan,"Hmeichhe ho chu ṭha lutuk tih lai hian in lo ṭhalo leh ṭhin a,"tih pahin a meizial chu a pak khu tual a. Msi chuan,"Kan ṭha tak tak a lawm,tun ṭuma a zin chu a buai deuh hlek dawn a. Chuvang chuan kan inbe tam thei lo hrim hrim a lawm,"a lo ti leh a. Sangtea chuan,"Ka call ve chhin hrim hrim ang,"tih pahin a phone chu a phawrh a,"Zanah chuan engmah an thawk awmlo e mai,"a tih zawm zat a,Max chu a call nghal a. Mahse,chhanna a awm lo,"Hmm la duhlo ve khanglang a,ka number 1 hian kan call chhin a nge,"a ti leh a,a call leh a. Msi chuan,"Call buai duh suh,a chhang chuanglo ang che,"a lo ti lai tak chuan,Max chuan a lo chhang hlauh mai.

"Aww tunge aw?,"

"Max,"

"Aww tunge i nih a?,"

"Engnge i tih a? I buai em?,"

"Buai lutuk lov,tunge aw?,"

"I bialnu ṭhianpa,"

"Rawn daw lo mai teh aw,"

"Engnge i tih reng reng a? Min hrelo tak tak mi a?,"

"Hria che ila tunge i nih ka ti dawn mi?,"

"Sangtea,"

"Aww tinge?,"

"Engnge i tih a?,"

"Hei kan hnathawhna vel chung chang kan sawi hova,"

"Anihchu Msi i be duh em?,"

"Aaa lawk aw,min ko in ka hria. Nakinah Msi chu keiman ka lo be mai dawn nia,"

"Awle nih aw,"

"Awle,"


Sangtea chuan phone chu a off nghal a,"I chicks chu buai hle mai. Mr Busy tiin a hming thlak ila a ṭha ang,"a ti zui nghal zat a. Msi chuan,"I van sual thiam tak,nangpawh haw tawh rawh a tlai tawh,"a lo ti vat a. Sangtea chuan,"Mi hi chu i ngaitheilo ve ngawt mai,ka haw dawn ka dawn reng. Misualnu rawn len pawh ka rawn leng tawh lovang,"a ti nghal bawrh bawrh a. Msi lah chu a nuih a za,"Awiii i van chhe zeh zuah tak,haw vat la ni mai. A nih loh chuan...,"a tawp daih a. Sangtea chuan,"A nih loh chuan engnge? Mawh..,"a lo ti nghal mawlh mawlh a. Msi chuan,"Ka kek hrep che ni mai,tak takin va haw tawh la. I chhungte pawn an ngaihtuah tawh ang che,"a ti leh a. Sangtea chuan,"Ka chhungte sawn min ngaihtuah lo hrim hrim. Kar 1 chhung pawh awm bo ila,min zawng lovang. Min ngaihtuah bertu U Partei a awm tawh lova,tuman min ngaihtuah lo. An duh hunah an thinrim hriktlak nan min hmang a,min vin leh hrep a,"tiin a phun mawlh mawlh a. Msi chuan,"Chutin an ti ngailo,i chhungte chuan an hmangaih vang che in an hau che lawm. Chubakah an ngaituah lutuk bawk che,"a ti leh a.  Sangtea chuan,"Tuman min ngaihtuah lo,ka pa lah saw a hming chiahin Kohhran Upa a ni a. Mahse,a nunah engmah hmuh tur a awm silo,ka nu lah nise kohhranah mi hlim thei ber ni âwm takin a in hmang a. In chhung lamah chuan engmah ni leh silo,"a ti leh buan buan a. Msi chuan,"A tawk khatin nu leh pa te an sawichhe ngai lo. Midang bulah te reu reu i sawi a nge,a tih chi miahlo a nia,"a lo ti vat a. Sangtea chuan,"Bible pawn,'Fate hi Lalpa laka kan rochan,'a tih kha. Ka nu leh pa te hian an rohlu hi min hrelo a ni,"a ti leh a,a zu rui lungpuam deuh tawh bawk nen a hnuk a ull ṭeuh tawh mai a. Msi chuan,"Ni e i sawi dik a lawm. Chuan Bible chuan,'Nu leh Pa thu awih hi dam rei na,'a ti bawk a sin. Chuan,'Nu leh Pa te hi kan lei Pathian,'a ti leh bawk a sin,"tiin a thiam ang tawkin Sangtea chu a hrilhfiah a. Sangtea lah chu a ṭap deuh pur tawh mai si,"Ka nu leh pa te hian engatanmah min ti lo. Hauh vak vak atan bak min ti lo,"a ti leh a,a kun a a ṭap pur mai a. Msi chuan,"Huiham i van ṭahbelh tak. Mipa ve si,pa deuhin awm ta che. Mipa i nilo mi?,"tiin Sangtea darah chuan a beng thak thak a. Sangtea chuan,"A pa theih loh anih hi,"a rawn ti ṭial ruai a. Msi lah chu a nui bawk bawk a,"Awii i ṭap lai hi video in ka cover a nga,nakinah Emily ka en tir ve dawn,"tih pahin a phone chu a la a. Sangtea chuan,"A ṭullo aw,ka ṭap lo mipa kan ṭap ngai lo,"a rawn ti ṭial leh ruai a. Msi chuan,"Imm nihchuan bathroomah va in phih harh la,i haw dawn nia,"a ti a. Sangtea pawh chu thuawih takin bathroom lamah chuan a kal ve mai a.

"Duat,tunge nichina lo be tu che kha?,"Kimkimi chuan Max chu a kuah a. Max chuan,"Ka ṭhianpa nia,ka zin tih a hre lova,"a lo ti mai a. Kimkimi chuan,"I bialnu a nilo maw?,"a lo ti vat a. Max chuan,"Ka bialnu chu nangmah i ni a,min lo call tu chu ka ṭhianpa,"a ti chang fak a. Kimkimi chuan,"Awle ka zawt tawh lo ang che,"a lo ti vat a. Max chuan,"Min va rin loh hmel ve a?,"a lo ti leh a. Kimkimi chuan,"Ring e ka ring lutuk che lawm,ringlo che ni ila i tan engkim ka hlan phal i ring a mi?,"a ti ve khauh mai a. Max chuan,"Ka hre chuang lo,"a lo ti mai a. Kimkimi chuan,"Min nei duh leh lovang tih ka hlau takzet,"a ti leh a. Max chuan,"Nupui ka neih ni ah chuan nang hian mo kawrfual i ha a nga,ka bulah i ding ang,"tih pahin Kimkimi chu a rawn kuah a,a hmui sen tai tek sexy em em maiah chuan a fawp nghal vawng vawng a. Kimkimi pawh chuan a lo chhang let rang khawp mai,"Duat,i ta ka nih hi aw. Ka hmangaih che,"Kimkimi chuan Max-a bengbulah chuan a rawn ti zawi sap a. Max chuan,"Keipawn ka hmangaih che lawm,ka ta ni reng ang che aw,"tih pahin Kimkimi chu a phelh ruak leh ṭan ta a. Kimkimi chuan,"I ta chauh nih ka duh,"a ti thâm ṭiak a,a sawi zawng chuan a hmui chu a khur der der a. Max nen chuan damlai hringnun parmawi tak chu an chên dun leh ta a.

Msi chuan Max-a message emaw phone emaw a rawn thlen beiseiin,a phone chu a khât tawkin a phone chu a bih leh zauh ṭhin a. Mahse,zing dar 3.00am thleng pawn a beisei ang chu a rawn thleng thei silo. Mut chhuak lo tak chungin mut luih tumin,rilru pangkhing takin a khumah chuan a mu ve ta a.

Sangtea chuan a certificate pawimawh vel chu a file ah chuan a thil khawm malh malh a,"Bei nge sei run dung kan ti mai a niang chu. Hna pangngai ve deuh hlek ka hmuh hma chu muṭia ah pawh ka ṭang mai ang,"tiin a in ak a,Msi'n a lo sawi hmuh tawh na,Company 1 a hna ruak chu chan ve ngei tumin interview nei turin a chhuak ve ta a.

Interview an neihna hmun tur ah chuan mi an lo tam ve khawp mai a. Mi 3 lak turah mi 150 vel interview tur an awm a ni. Sangtea chuan a huphurh ru ve khawp mai a;mahse,zinga Msi'n duhsakna a hlanna message kha a chhiar nawn leh a;

"I interview na turah chuan i ṭha taka interview i hmachhawn ngei theih nan ka duhsakna sang ber ka hlan a che. Hlauthawng lo la,mahni in ring tawk takin i ti dawn nia aw. Ṭha taka i tih theih nan ka lo ṭawngṭai pui mawlh mawlh dawn che nia aw."

Sangtea chuan Msi message chu vawi 10 vel a chhiar nawn hman ngei ang. Mi 30 vel an koh hnuah chuan a hming an rawn lam ve ta,huphurh tak chungin a va lut ve a. A hmaa ṭhu te ho chu an zahawm khep khup hlawm khawp mai,hmeichhia 1 leh mipa 2 an lo ṭhu a. Zawhna 3 ṭheuh an zawh hnu chuan,Kar tawpah result ngaihven turin an hril a,an chhuah tir ta a.

Sangtea chuan Msi chu a call nghal a;mahse,Msi chuan a chhang thei lova,"A buai a niang a,pawilo Emily dawrah phei phawt mai ang,"tiin a bike chu a ti nung a,Emily dawr lam panin a tlan phei nghal puat puat a.

Max te pawh an hnaah an buai ve map map khawp mai. Chhunah chuan hnathawk ho vil in hnathawk ho awmnaah hun a hmang nileng ve ṭhin a. Zan lamah erawh midang mut reh vek hnuah Kimkimi nen zan duhawm leh nuam tak hmangin zan an hmang ral ṭhin thung a. A rilruah chuan Msi reng reng a lang tawh lo,Kimkimi hian a rilru chu a luah khat hneh êm a tin ni.

Msi pawh chuan Max chu a ngaihven reng duh ta bik lova. Midang ho bulah erawh chuan an inkar zau tawh zia chu a sawi chhuak ngai lem lo. Mahse,Sangtea erawh chuan zan tin an ṭhat leh ṭhat loh a rawn zawt ziah thung a. Msi erawh chuan Sangtea chu an ṭha tiin dawt a lo hrilh zan tin ve thung a.


"Mama nen in inbia em? Naktukah a lo haw dawn a?,"Notei chu Msi te dawrah chuan a rawn ṭhu lut a. Msi chuan nui sâng chungin,"Umm bia e,engnge i chah a?,"a lo ti vat a. Notei chuan,"Awi chah tur em em pawh ka hre lo. Theihai ka chah ṭeuh ringawt a,nang engnge i chah a?,"a ti a,a nui zui har har a. Msi chuan,"Keipawh eng vakmah chah tur ka hre lem lo. Dam taka a rawn haw theih chuan a ṭha a ni mai,"a lo ti thung a. Notei chuan,"Zanin chu inkhawm zan a ni chuang lova,i rawn leng phei ve a nga tiraw?,"a ti leh a. Msi chuan,"Zanah maw a rawn thlen daih dawn a?,"a lo ti hâ a. Notei chuan,"Aww a rawn chhuah hun tur a hrilh ve lo che ni maw?,"a ti a,a nui sun sun a. Msi chuan,"Aww ka lo theihnghilh a lawm,nia ka rawn phei ve dawn nia,"a lo ti leh mai a. Notei chuan,"Nih ka phei phawt nge aw,insuk tur te ka la nei a,"tih pahin a phei nghal a.

Msi chuan,"Max hian ka lakah lungawi lohna a nei mawn le? Tinge a lo haw hun tur takngial pawh min hrilh loh le?,"tiin ama hriat tawk leh chuan a phun sep sep a. A phone chu a la a,Max chu a text leh ta nge nge a;

"I awmdan hi ka hrethiam lo,i lo haw tur thu pawh min hrilh lo maw? Ka lakah lungawi lohna i nei a mi? I kal hnu khan i nau in be hmasa lo tur che in min ti a,a chhan pawh in buai dawn vang a ni. Mahse,zan tin i last seen ka check ziah ṭhin a sin. Chuan,i online lai pawn min be ngai lova. Ka message lah seen i tum hek lo,i lo haw tur thu tal hi chu min hrilh ve thei lo em ni? I tan hian ka pawimawh tawk tawh lo em ni?,"

Mittui tla ṭeuhin Msi chuan Message chu a type a,Max chu a send nghal a,"Max,khang hun chhung khan hlimna tamtak min siam a. Ka tan hian i hlu tak zet a sin,hmangaih lo che mah ila ka ngaina ve viau hman tawh che a sin,"a mittui chu a hru hul a,"Vanlalmalsawm,hmeichhe chaklo tak angin awm suh. Hmeichhe chak tak i nih ṭhin kha,"tiin amah leh amah chu a in hnem mawlh mawlh a.

Zanah chuan Msi pawh Notei'n sawm tak tea a rawn sawm avangin Max te Inah chuan a leng phei ve ta a. Notei chuan,"Tunlai chu i ngui riau in ka hria,Mama nen in ṭha vak lo mi?,"tiin a zawt ta nge nge a. Msi chuan nui sâng chungin,"Ṭha e tunlai chu ka hna lamah ka insawr bing ve deuh a,chuvang chu niang,"a lo ti mai a. Notei chuan,"Lawk aw Mama'n min lo phone kan chhang lawk a nge,"


"Aw Mam,khawng lai nge i rawn thlen tawh a?,"

"Kan veng kan rawn thleng ṭep tawh,inbualna tur tui lo lum rawh aw. Ka hritlang deuh a,tui vawt chuan ka inbual ngam lovang,"

"Awle tehreng mai,hei a changtunu pawh a ṭhu ran tawh nia aw,"

"Awle,nih ka dah aw,"

"I be dawnlo mi?,"

"Ka rawn thleng ṭep tho a lawm,"

"Hmm vel a che aw,"

"A ni lawm le thingpui tui tawk lo lum la aw,"

"Awle tehreng nih ka dah aw,"

"Awle,"


Zan dar 7.30pm velah chuan Max chu a rawn thleng ta a. Motor aṭang chuan a rawn chhuak a,Notei chuan,"Khaipui i ngai em?,"a rawn ti nghal vat a. Max chuan,"Aih ngai love a rit hleinem,"a ti a,In chhungah chuan an inzui lut nghal a. Msi chuan Max-a perfume rim chu a lo hre thei nghal a;mahse,hmana a perfume hman ang kha a ni tawh lo. Tuna a perfume hman hi chu a dang daih tawh a ni,mak a ti leh zual hle mai. Max chuan Msi chu a rawn en zawk a,"I chau awm sia,i rawn phei ve duh kher a nihkha,"a ti a. Notei chuan,"Nia rawn kal loh a tum a,ka va pawt phei lui a nih hi,"a lo ti nghal vat a. Max chuan,"Inbual nghal ka duh a,tui chu a lum tawh em?,"a ti a,ṭhutthlengah chuan a ṭhu a. Max-a nu chuan,"A lum ṭep ang,i chau em?,"a lo ti a. Max chuan,"Chau love mahse,ka hritlang deuh a,"a ti a. Msi chuan,"In hnathawh chu in zo ṭha thei maw? I thawk nasa aniang kha i tla ve dawk mai,"tiin a lo nuih suk a. Max chuan,"Umm zo ṭha thei e,ka rin aiin a lo hahthlak a,"a lo ti ve mai a. Max-a pa chuan,"I motor saw i la dah lut dawn lo mi?,"a lo ti thung a. Max chuan,"Nakinah ka dah lut mai ang,"a lo ti vat a. Msi chuan sana a bih zauh a,"Ka haw phei phawt a nge,ka nu chiah a awm bawk sia. Kuhva kheh tur a tam bawk sia,"a ti a,a tho nghal vut a. Notei chuan,"Awii a la hma e,la awm ve rih la,"a lo ti vat a. Msi chuan,"Kuhva thel tur ka la ngah lutuk a lawm. Kan nghah ber kan nghak chhuak tawh tho a,ka va phei phawt a nge,"tiin haw zai a rel ta a. Max-a nu chuan,"In buai ve thei bawk sia aw,anih muttui phawt aw,"tiin a rawn thlah a. Msi chuan,"Awle muttui u le,"tih pahin Max chu a va melh zauh a,Max erawh chuan phone a lo hmang mek thung a. Msi chu an In lam pan in a kal hnak hnak a,Max-a car dinna bul a thlen chuan hmeichhe ṭawng ri a hre tlat mai;

"I van rei tawh em em,pawnah hian min riah tir i tum a mi?,"

"Umm,ka nghak che min lo hruai vat rawh,"


Msi chuan ngaih ṭhat lohna em em pawh nei lovin,a kalsan leh nghal mai a.