ZU ZUAR FANU 31

CHAPTER--31

Ziaktu: R'z Thangluah

Kimkimi chuan Max rawn thlen hun tur a nghakglel tawh khawp mai. Sitting roomah chuan a ṭhu a,Max-a'n pawn lam aṭanga horn a rawn pe ri a hriat veleh chuan rang lutukin a tlanchhuak nghal a. Max chu car aṭang chuan a lo chhuak chiah a,"Ka rawn thleng har em?,"a ti nghal a. Kimkimi chu a lo nui sen sen a,"Thleng har lutuk,ka lo ngai tawh che lawm,"tih pahin Max chu a rawn kai nghal a. Max chuan,"Tunah chuan ka rawn thleng tawh lawm,lut ila,"tih pahin a a bungrua chu a khai a,In chhungah chuan an in zui lut nghal a.

Kimkimi chuan,"I chau em? I inbual nghal duh em?,"a ti nghal zung zung a. Max chuan,"Aih chau lo e,ka ngai che ni mai,"tih pahin Kimkimi chu a kuah leh rih a. Kimkimi chuan,"Kei hian a nia aw ngai che chu,i hrethiam phalo zawk ang,"tih pahin Max chu a rawn fawp nghal a. Max pawh chuan a lo hnial lem lo khawp mai,"Ka han haw chhung khan min lo lerh san em?,"a ti kher a. Kimkimi chuan,"Teuhlo lutuk ka thinlungah hian nangmah bak i awm lo,"tih pahin beisei nei tih hriat tak hian Max chu a rawn melh a. Max chuan a lo hrethiam nghal vek a,"Kan inbual phawt nge aw,"tih pahin Kimkimi biangah chuan a fawp zauh a. Kimkimi chuan,"Reilo la aw,"a lo ti vat a. Max chu nui chungin,"Umm rei lovang,"a ti a,towel a la a bathroom lamah chuan a phei nghal a.

Msi pawh damdawiin lamah a buai khawp mai. A damlo en tur putar chuan engmah a sawi hma chuan Msi hmel chu a en vang vang a,"Chemte,ka hmuh tawh hnu i ang hle mai a. Khawi vengah nge in khawsak a?,"tiin a zawt tawp mai a. Msi chuan,"Chanmari-ah kan awm a,ka pu keichuan ka la hria che sin,"a lo ti thung a. Chu putar chuan,"Eee ka hre chhuak e,i nu chu Vanlalruati tiraw?,"a rawn ti chhuak ta a. Msi chuan,"Aw ni e ka pu,engnge i insawiselna ber ni a?,"tiin a zawt nghal a. Putar chuan a natna vel chu a sawi nghal zung zung a.

Sangtea chuan zu no a dawm leh ran tawh mai a. A mit a chhing diar diar a,"Ms,nang pawn min hmangaih tiraw? Mahse,i ṭhiannu i tihnat duh loh vangin engmah i sawi chhuak ngailo a ni tiraw? Tinge hetiang dinhmunah hian kan din a ngaih bik a?,"tiin a phun nuah nuah a,zu chu a tlak leh pawp pawp a. No 5 vel a in zawh hnuah chuan a chatthla leh ngat tawh a.

Emily pawh a buai ve khawp mai,dawr nghak turin hmeichhe 1 a chhawr a;mahse,chuti chung pawh chuan an buai map map khawp mai,"Vawiin chu Sangtea hi a va rawn lang har ve maw le. Zing aṭangin min la rawn be miah lo leh nghal a,"tiin a phone chu a la a,a kheuh nghal nuap nuap a,"Huiham phone call chhang theilo leh tawh,a rui leh tawh mawn le?,"tih pahin a phone chu a dah tau deuh hmuk a. A dawr nghak tu nu chuan mak ti takin a lo thlir dauh dauh thung a.

Max chuan,"E lawk aw ka chhungte kan be lawk nge aw,a rei lovang,"tih pahin a nau chu a call nghal a;

"Aw i thleng tawh mi?,"

"Umm thleng vel deuh chiah e,"

"Msi i be tawh em?,"

"Aih lo hrilh mai rawh aw,a buai awm sia ka be lo mai ang,"

"I mak thei e mai,"

"Engnge ka mak na? Lo hrilh ve mai la,"

"I biak hun a nghak reng maithei a sin,"

"Chu pawh nise a buai ve maithei bawk a,lo hrilh la nau fel leh hmelṭha i ni tihna a ni mai,"

"Hmm,"

"Ka dah aw,"

"Umm,"

Max chuan phone chu a off nghal a,"Ka fai tawh tehmai a nia aw,"tih pahin Kimkimi chu a rawn kuah a. Kimkimi chuan,"I rimtui vawng vawng mai a lawm,"tih pahin Max-a inbual zo rim chu a hip vang vang a. Max chuan,"Kawngka i kalh em?,"a ti zauh a. Kimkimi chuan,"Imm aw kalh tawh e,"tih pahin a lo nui sâng a. Max chuan Kimkimi chu a pawm nawlh a,room ah chuan a luhpui leh nghal a.

Notei chuan Msi chu a call nghal a. Mahse,Msi chuan a chhang thei lo,vawi 3 vel a call hnu pawn a chhang thei silo. A tawpah chuan message a hnutchhiah ta ringawt a;

"Phone call i chhang thei silova,i buai a nih ka ring a. Mama chu a thleng thla tawh a,i buai a ring sia a rawn call lo che a. Ka rawn hrilh mai che aw."

Msi chuan a kut âwl veleh a phone chu a bih ve nghal vat a. Notei missed call lo awm ṭeuh chuan a ngaih a ti ṭha lo let ling a,whatsapp message pawh check lem lovin Notei chu a call back nghal a;

"Aw U Ms,"

"I missed call ka hmu a,eng thil nge ni ta?,"

"Mama chungchang a nia,"

"Engtinnge a awm a? A thleng tluang maw?,"

"Umm a ṭha e min lo call a,a thlen tawh hrilh tur che in min ti a. Whatsapp message i la en lo ni maw?,"

"Umm en lo e,i missed call ka hmu a. Ka rawn call back nghal che a nih hi,"

"Umm Mama chu a thleng tluang aw,i buai a rin vangin a rawn call duhlo che a."

"Umm ka hrethiam a lawm. Ka buai leh dawn a,nih phawt aw,"

"Awle nih le,"

Damlo en ngai ho chu a en leh nghal zung zung a,chumi hnuah ward fang turin a inbuatsaih leh nghal a.

Damlo 1 a en mek lai chuan a piah deuh a mipa 1 chuan,"Tuna ward fangtu doctor hi kan venga an awm lai chuan zu an zuar ṭhin,"a lo ti a. Msi chuan chupa thusawi chu hriat loh tum sateh mah se,a beng a verh zar mai. A en mek damlo pawh chuan mak ti deuhin Msi chu a rawn en ho mai a;mahse,tihian a rawn ti thung a,"Hai der hmiah hmiah rawh. I nunhlui an phawrh chhuah sak vang che khan hlawkna engmah an neilo,"a lo ti a. Msi chu a nui suk a,"Ka lawm e ka pu,i sawi dik chiah lawm,"a lo ti ve bawk a.

Pi Zuali chuan Sangtea zu rui chu a hau leh chiam chiam mai a,"Thawh chhuah nei silo,rui reng ringawt mai. Hetiang chuan thingtlangah i pi te bulah awm la a ṭha ang,"a ti buan buan a. Sangtea chuan,"Nitin dawrah ka pui che a,tichung chuan thawhchhuah neilo min ti leh si a. Engnge ka thawh ang? Hna dil ka tum pawn min min dang zel a nihkha. Tun aṭang chuan engpawh ti ila min hnial tawh suh ang che u,ka ei khawp chu ka thawk chhuak ve thei em em ang,"a ti ve buan buan mai a. Pu Thanga chuan,"Khatin i nu chhang zuah zuah suh,"a lo ti ve leh a. Sangtea chuan,"Awle in duh duh chu sawi ru. He In chhung hi nuam pawh ka ti hrep love,"a ti leh bawrh bawrh a. Pi Zuali chuan,"Engnge a nawm lohna? In lianpui kan nei a,nuam i ti lo maw? I pa hi ti mualpho tawh suh ang che,kohhranah nihna pawimawh tak a chelh a ni tih hi hre reng ang che,"a ti leh hluk hluk a. Sangtea chuan,"Ka pa hi ka ti mualpho maw? Kohhrana a nihna chu engnge? Kohhran Upa maw? Mahse,ama In chhungah ngei pawh ro a rel ngam loh hi,"a ti ve ta phiar phiar mai a. Pu Thanga chu a rawn ding at a,"Zothansang,i rui a nihkha han mu rawh,"a lo ti vin ṭhak mai a. Sangtea chuan,"Nia ka rui ka hria lawm. Ka ruih loh chuan ka thusawi te kha ka sawi chhuak ngam dawn silova. Chuvang chuan ka ruih laiin engkim ka sawi a nihkha,insiam ṭha turin min duh a mi? Nangni pawh hi insiam ṭhat in mamawh ve tho,"a ti ve leh ṭhak ṭhak a. Pi Zuali chuan,"Han mu teh nanga zu rui hi kan hnial reng peihlo che,"a lo ti leh hluk a. Sangtea chuan,"Ka mu lovang,ka leng dawn,"tih pahin a chhuak nghal a.

Pi Zuali chuan,"I fapa hi chu i duat leh lutuk a,i duat sual zo tawh a nih hi,"a rawn ti leh hluk a. Pu Thanga chuan,"A chhia zawng zawng hi min puh vek kher zel suh,"a lo ti ve thung a. Pi Zuali chuan,"A dik miau sia lawm,"a lo ti hmuk a. Pu Thanga chuan,"Ka ning ka sawi peih tawh lo,a awm awmin awm rawh se. Kohhran committee naah kal a ngai,ka kal dawn nia,"a ti a,a chhuak nghal a.

Msi chuan Notei message chu a chhang ve chiah a,

"Awle ka hrethiam e,"

Notei chuan a rawn reply nghal a;

"I haw chiah mi?,"

"Umm haw deuh chiah ni mai,vawiin chu kan buai nileng a,"

"Mama chuan a rawn be tawh che em?,"

"Aw be tawh e," Msi chuan dawt a sawi ta ringawt a.

"A rawn biak tawh che chuan a ṭhat hlauh chu,"

"Nia mahse,an buai ve hmel map map khawp mai,"

"Nia e chuan Mama chuan maw'Msi kha ka rawn biak hmasak loh chuan min lo be hmasa duh suh se,kan buai dawn lutuk a,'a ti a,lo hrilh mai rawh a tia,"

"Umm ka hrethiam a lawm,"

"I chau em? Vawiin lam te,"

"Aih chau lo e,lehkha zir i duh awm sia duhtawk phawt ang aw,"

"Aaah...ummm awle,"

"Ṭha deuhin zir la,i u angin mi puitling tak i ni ve dawn nia aw,bye phawt le,"

"Awle ka lawm lutuk e,bye2,"

Msi chuan,"I awmdan hi ka hrethiam tawh hlawl lo . Hetiang hian i awm ngai silova,"tiin Max chu message a hnutchhiah hram a.

Sangtea phone call a rawn kal leh nghal a;

"Aw Sangte?,"

"I night lo tiraw?,"

"Umm night love,engnge ni ta a?,"

"Ka rawn leng dawn,"

"Emily te Inah i leng dawn lo mi?,"

"Ka rui e mai ka leng ngam lo,"

"A va mak e aw,tinge i lo ruih leh ṭhin a?,"

"Mawhh ka rawn leng dawn nia,"

"Ṭha deuha i awm dawn chuan i rawn len ka phal. Mahse,i awmṭhat dawn loh chuan ka phallo,"

"Umm ka fel dawn lawm,"

"Umm rawn kal mai rawh,"

"Awle ka dah aw,"

"Awle,"

"Max chu a kal ta maw?,"Sangtea chuan kuhva chu a kheh ve nghal malh malh a. Msi chuan,"Umm kal ta e,engvanginnge i ruih leh ṭhin a?,"a lo ti nghal vat a. Sangtea chuan,"Kan In chhung saw ka ning,"a lo ti hmuk a. Msi chuan,"A ti leh ta,mahni In an ning ngai lo,"a lo ti thung a. Sangtea chuan,"Sawtiang In chhungah sawn seilian ve la,i ning ve tho ang,"a ti leh a,a mit chu a sen rum mai a. Msi chuan,"Nihchuan i rawn chhuah hma in Emily i be hrim hrim em?,"a ti leh a. Sangtea chuan,"Aw bia e,ka ruih thu leh in Ina ka len tur thu ka hrilh,"a lo ti leh a. Msi chuan,"Engtinnge a tih?,"a lo ti vat a. Sangtea chuan,"Min hau hrep,i ruih apiangin Msi tibuai ziah suh min ti,"a ti a,a nui hak a. Msi chuan,"Aww hei min lo call chiah e,kan chhang lawk nge aw,"a ti a,Emily phone call chu a chhang nghal a;

"Aw Bawih,"

"A rawn thleng tawh em?,"

"Umm hei kuhva a kheh a,"

"A nuamlo thei e a ruih apiangin i bulahba rawn kal ziah a,"

"A pawi hleinem,in thlahrung reng reng suh. Ka lo councelling leh hrep mai dawn lawm,"

"Nia lo councelling hrep teh,a hahthlak thei e mai,"

"Vawiin lam te i inharlh ṭha em?,"

"Umm pangngai ni mai,a rawn leh dawn loh ro ro chuan mut daih ka duh,"

"Nia mu hahdam rawh,chhunah i hah thei si,"

"Nih ka dah phawt aw,lubuka chu ka be tawhlo mai ang,"

"Nia a ruih hi chuan biak ṭhat vak pawh a phû lo,chhe chhep chhup si,"

"Haha nih ka dah aw muttui,"

"Awle muttui le,"