ZU ZUAR FANU 33

CHAPTER--33

- R'z Thangluah

Notei chuan,"Mam,inbual phawt la,hei tui pawh a sa tawh a nia ka siam sak dawn che mi?,"a lo ti a. Max chuan,"Aih lo la siam rih suh,car ka va dah fel phawt a nge aw,"tiin a chhuak nghal a.

"Awiii i van rei tak,ka nghah rei tawh zia che hi aw,"Kimkimi chu a lo phun hlak hlak a. Max chuan,"Nia in leng kan nei laklawh lutuk a,ka rawn chhuak mai thei lova tihpalh. Tunah chuan kan lut thei tawh e,lo kal rawh le,"tiin Kimkimi chu a kai a,an in lam pan chuan an in kai hnak hnak a.

"Mam,tunge a?,"Notei chu a hawi phawk hra mai a,a nuṭapa bula hmeichhia la naupang tak ding chu mak tih hmel deuhin a melh tlawk tlawk ringawt a. A nu leh pa pawh chuan ngawi rengin mak ti takin an lo thlir ve bawk a. Max chuan,"Ka nupui tur a nih hi,"a lo ti zawi sup a. Notei chu a meng rang nasa mai,"Maw? Eng thu nge i sawi kha?,"a ti nghal mawlh mawlh a. Max-a pa pawh chuan,"Bawiha,i harhfim meuh maw?,"a lo ti zawi sup a. Max chuan,"Ka pa ka harhfim khawp mai. A ni hi ka nupui tur a nih hi,"a ti leh a. Max-a nu erawh chuan engmah a sawi lo;mahse,a fapa chet dan chuan a lung a ti awi tih a hriat khawp mai. Ngawi rengin Max te chu a melh tlawk tlawk a,room lamah a luhsan ta daih a. Notei chuan,"Engtinnge i tih theih zawk a? U Msi i ngaihtuah ve miahlo a mi?,"a ti ta nge nge a. Max chuan,"Msi kha rawn sawi chhuak tawh suh,ka sawi chu ka sawi a ni mai,"a ti hmuk a. Kimkimi chu a kai a,room lam panin a kalpui dawr dawr mai a.

Notei chu a thinrim takzet a ni,"Pa,ka unaupa hian engtinnge hetiang thil hi a tih theih a? Hetiang chuan U Msi hmel pawh kan hmu ngam tawh dawn a mi? A zahthlak khawp mai,naktukah dah thla leh se a ṭha ang,"a ti nghal mawlh mawlh mai a. A pa chuan,"Bawihte,in bengdai hram hram phawt teh aw. Naktukah rilru tharin kan ngaihtuah dawn nia,tunah chuan mu phawt ang aw,"tiin a fanu chu a kuah a.

Notei chu khumah chuan a ṭhu tûm bur mai a. A phone chu a en a,Msi message a lo awm a rang lutukin a en nghal a;

"Note,i u kha a chau awm sia. Lo duat viau ang che aw,hna an thawk thei bawk sia ."

Notei chuan,"U Ms,engtinnge ka hrilh tak ang che? I rilru a na dawn lutuk,"ama hriat tawk lek chuan a phun sep sep a. Msi message ho chu a en nawn leh ṭhin a,a ṭap pur tawh mai si,Msi chu engtinnge a chhan ang tih ngawt chu a ngaihtuah a,a tawpah chuan;

"Awle tehreng mai,ṭha deuhin ka lo enkawl dawn nia,"

Msi chu a online tawh loh vangin,Notei message pawh chu a read tawh lo. Mahse,a mut hmaa a status ho chu Notei chuan a en chhuak nghal vek a.

"Engmah hi ka hrethiam lo a ni."


"Ngatinge ka mawl em em le?,"


"Hmeichhe mawl tak ka ni,"


"Ka message te kha engtikah tak seen ve ang maw?,"

"Huiham muttui vek u le,"


Notei chuan,"U Msi hian engkim a hre lawk vek zawk a mawn le? Mahse,hre lawk nise zanin khan a rawn kal awm silo. Nge an pahnih inkar hi a tawp vek tawh zawk le? Mahse,U Msi kha chuan an ṭha tiin min hrilh ṭhin bawk si,ka van hrethiam lo tak em!,"tih mawlh mawlh pahin,a khumah chuan tûm bürin a mu tau nghawng nghawng a.

"I chhungte chuan min duh loh hmel hle mai. Chuan,Msi chu tunge a?,"Kimkimi chuan Max-a chu a melh kar mai a. Max chuan,"Chutiang sawi a hun lo,mu ang ka chau tehmai a nia aw,"a lo ti thung a. Kimkimi chuan,"I chhungte vanga min thlauh thlak leh vaih aw,"a ti leh hmuk a. Max chuan,"Ka chhungte vanga thlauh thla leh mai mai tur che in he Inah hian ka hruai lut lo che. Ka chhungte hian nang hi neih che phallo mah se,ka nei tho ang che,"tih pahin Kimkimi chu a rawn kuah a. Kimkimi chuan,"I nu khan biak pawh min be lo,"a ti leh a. Max chuan,"Fapa te nupui ruk zanah tu nu leh pa mah an lungawi ngai lo. Naktuk khua a var a nga,engkim a ṭha leh vek mai ang. Tunah chuan mu phawt ang aw,"tiin Kimkimi chu a rawn kuah a. Kimkimi chuan engmah a sawi tawhlo,ngawi rengin Max-a bulah chuan a mu nghal a.

Max-a nu leh pa pawh an muhil thei lo,an fapa an lo chhuan ruk ve em em chuan nupui a rawn hawn ta si. Max-a nu chuan,"Hetiang te chuan Msi te nufa pawh kan hmu ngam tawh dawn a mi? Mi zawng zawngin min kawk a nga,min nuihzat dawn ta a nih hi,"a ti vawng vawng mai a. Max-a pa chuan,"Kan fapa hian a thil tih hi a hre lo a ni. A tan chuan Msi tluk hi an awmlo a sin,"a lo ti ve thung a. Max-a nu chuan,"He nu hi kan In chhungah a rawn mo ka rem ti lo,a nei duh anihchuan an In dang nghal ang,"a ti hlak hlak a. Max-a pa chuan,"Khaih khaih insum rih teh,a nih tur ang chu a ni zo vek tawh a. Naktukah rilru tharin kan ngaihtuah zawk dawn nia aw,tunah chuan muhil phawt teh ang,"tiin puan chu a inthawlh sawt sawt a.


Pi Ruati chu zing dar 5.30am velah chuan tho in,zing ṭawngṭai inkhawmnaa kal turin a in siam a,a chhuak nghal a.

Msi pawh dar 6.00am velah chuan a rawn tho ve a,a in phih fai vek hnu chuan chaw a chhuang a. A chaw chhuan chhungin dawr a hawng a,kuhva pum 100 vel thel tur awm chu a la a,a thel nghal malh malh a.

Dar 6.30am velah chuan Pi Ruati zing ṭawngṭai pawh chu a rawn haw ve ta a. Mahse,a hmel chu tuk dang ang a ni tlat lo,a hmel a ngui em em a. In chhung a rawn luh pawh chuan Msi chu be lovin room lamah a lut tlang nghal a. Msi chuan a nu awmdan danglam chu a hre rang khawp mai,rang deuhin roomah chuan a um zui nghal a,"Nu,i chungah engnge thleng a? I danglam vek a nia aw,"tiin a nu kut chu a rawn vuan a. Pi Ruati chuan,"Bawihte,engmah a nilo ka lu a na deuh a lawm maw le. Ka ṭha a nia,min ngaihtuah suh,"a lo ti nghal vat a. Msi chuan,"Nu,i lu na ringawt a ni tak tak maw?,"a ti leh a. Pi Ruati chuan,"Aw ni e Bawihte,rei lo te ka mu lawk a nga. Ka rawn tho dawn nia,min ngaihtuah suh,"a ti leh a. Msi chuan,"Awle nih room kawngka hi chu khar lovang aw,"tiin a nu chu a chhuahsan ta a.

Max chuan,Kimkimi chanchin chu a chhungte bulah chuan a hrilh mawlh mawlh mai a. Notei erawh chuan Kimkimi chu a melh rum em em zel mai a,"He nu hi ka unaunu atan ka pawm thei lo,"a rawn ti mauh mai a. Max chuan,"Lo ngawi rawh nangin i pawm leh pawm loh ah ka buai lo,ka nupui tur a nia i lo sawi ve a ṭullo,"a ti ta zek a. Notei chuan,"A ṭha nihchu vawiin aṭangin unau kan ni tawhlo,"a ti a,a room lamah chuan a kal nghal hlawk hlawk a.

Max-a pa chuan,"I nau hi chu a naupang deuh a,i hriatthiam a ngai ni mai aw. Engpawh nise,a nih tur ang chu a ni zo vek tawh a. Kimkimi pawh i chhungten rawn hruai che an tum ngei ka ring a,an lo hruai che anihchuan ṭha takin i haw leh a nga. Tichuan,inneih te in duh ve tak tak anihchuan tha tharin kan la ngaihtuah dawn nia,"tiin dam thlapin a sawi a. Max chuan,"Ka pa,Kimkimi pa chuan min lo be tawh a. Naktukah lo kal an tum a,nakinah nangmah nen in lo inbe dawn nia. Chuan,inneih chu kan duh ngei mai,rem in ti emaw ti lo emaw keichuan Kimkimi hi ka nupui atan ka nei ngei ang,"a ti hmak hmak mai a. Max-a nu chuan,"Bawiha,Msi bulah engtinnge kan sawi tak ang? Hetiang thil hi engtinnge i tih theih zawk a?,"a lo ti ve thung a. Max chuan,"Ka nu,Msi kha chu rawn sawi chhuak tawh lo hram teh,"a lo ti vat a. Max-a nu chuan,"Ni e Bawiha Nu,in bengdai hram hram la aw. Kan fapa hian a duh chuan kan hnial ringawt thei hleinem,hei a tlai dawn takngial chaw ei siam ula chaw ei ang u,office ka tlai mai ang,"tiin a tho nghal nulh a.

Max-a nupui ruk thu chu an hre darh chak khawp mai. Tu pawh chuan mak an ti a,Msi an khawngaih bawk a ni. Kum 3 teh meuh an lo in zui ve tawh a,veng chhung mi te pawn innei tawh mai ru tia an fiam an fiam ṭhin kha an ni ve a. Tu pawh mai chuan Max leh Msi hi chu an inhmeh ve ngawt mai tiin an sawi ṭhin kha a ni a. Mahse,tunah erawh chuan an rin loh lam daihin Max chuan hmeichhe dang nupuiah a rawn hawn ta si.

Amuani te ṭhian ho pawh chu an thinrim ve takzet a ni;

"Awii Max-a nupui ruk kha in hre ve em? Mak ka ti a sin aw,Msi ka khawngaih tawp,"

"Nia Msi ka khawngaih tawp,a nupui rawn hawn lah kha a hnathawhna a mi an ti leh nghal. Awii Msi a tluk dawn silova,Max-a chhungte pawh an rilru a na ve ngawt ang,"

"Dik chiah a mak e Max te chu a lerh ngai loh teh reng nen. A hmeichhia hian a kherh a ni hrim hrim ang,"

"Awii keipawh chu chu ka rindan a ni,saw en ru Max-a nupui thar chu ka van kek chak tak,"

"Awi a la naupan hmel si,a zah theih loh hmel si. Ka kek chak tawp,"

"Kan lo kek hrep mai dawn mi?,"


Sangtea chu Msi te Inah chuan a rawn lut nghal a,"Ms,...Ms..,"thinrim tih hriat takin a meng sen rum mai a. Pi Ruati chuan,"Aw Sangte,nangmah e law? Lo ṭhu teh,Msi chu a lo haw mek a,"a lo ti nghal a. Sangtea chuan,"Tinge a tirah khan engmah min hrilh ve lohva? Vawiinah Rki hnen aṭangin ka hre ve chauh a,ka thinrim khawp mai,"a ti nghal tun tun a. Pi Ruati chuan,"Khawngaihin in bengdai hram hram teh aw. Engkim chu a nih tur ang a ni zo vek tawh,"a lo ti a. Sangtea chuan,"Zawnga pawh chu a va nep ve,hetianga a kalsan leh mai mai tur anihchuan ngatinge Msi hi beiseina a siam sak kher?,"a ti vin ṭhak ṭhak mai a. Pi Ruati chuan,"Khawngaihin in bengdai hram hram teh aw. Msi chu a rawn thleng ṭep ang,ṭha deuhin lo biak i tum dawn nia aw,"a ti leh a. Sangtea chuan,"Awle mahse,a harsa hret ang,"a ti a,In chhung dungah chuan a tei kual sek mai a.

Pi Ruati chu inkhawmnaa ṭantu tur anih vangin inkhawm turin a insiam malh malh a,"Sangte,tikhan lo leng reng rawh aw. Ka ṭan a ni sia,ka inkhawm ngei ngei a ngai a. Ka inkhawm a nge,tikhan lo inkawm ru aw,"tiin a chhuahsan ta a.

Notei chu a la lungawi thei nganglo a ni,"Nu,keichuan ka pawm lo,"a ti leh ringawt ṭhin a. Max-nu chuan,"Mamte,i pawm loh theih a ni ringawt hleinem. Naktukah a zu dah a nga,hmeichhe lamin rawn leng ru an tih hun hunah palai kan tir a nga. An lo rem chuan inneih te pawh kan sawi a ngai dawn a sin,"a lo ti a. Notei chuan,"An inneih niah pawh ka kal dawn lo keichu,"a ti a,a chhuak tau nghawng nghawng mai a. Max-nu chuan,"Aww a va hahthlak ṭhin e aw,"tiin a fanu chu a en zui vawng vawng ringawt a.

Notei chuan Msi te In lam chu a pan ding nghal a,an kawngka chu tlemin a lo kau sa deuh a. Notei chuan hawn a tum mek lai chuan ṭawng ri a hria a,hawng ta lo chuan ṭawng ri a hriat chu a ngaithla ta rih a;

"A hma aṭang daih tawh khan in inkar hi a lo chhe daih tawh a ni tiraw?,"

"Aih chutiang a ni lo,Max-a nupui ruk pawh hi ka thiam loh vek a lawm,"

"Tun thleng pawn Max hi i la ṭan ang maw? In ngaihtuah chiang rawh,tlawm reng suh,"

"Ka tlawm hleinem,keichuan Max hi hlim takin awm se tih hi ka duhthusam a ni,"

"Nia hei a hlim mah mah chu a nih tawh hi;mahse,nang ve hi i hmel hmuh hrehawm khawpin i tuar a nih hi,"

"Nia dik tak chuan maw Max hi ka pasal tur angin ka lo ngai nghet hmiah tawh a sin. A chungah hian ka rinna zawng zawng pawh ka nghat bawk;mahse,a hna vanga a zin a lo haw aṭang khan a zia hi a dang vek tawh. Vawi tam kan inkara khi chu tih ṭhat tumin ka bei a,Max bulah pawh ka tihsual awm miah silovah ngaihdam ka dil ngun a sin. Mahse,hetianga min phatsan hi chu na ka ti ve a lawm,"

"In inkar chungchang chu kei emaw,Emily emaw Notei bulah pawh i sawi theilo em ni?,"

"Ni e a tirah kha chuan a hnathawh chauh vang a nih ka ring nghet mai a. Mahse,ka call chang pawn hmeichhia in an lo chhang leh ṭhin a,hrehawm ka ti ṭhin a sin. Notei ber hi ka ngaihtuah a ni,a unaupa nen kan inkar a chhiat thu ka hrilh chuan keimah aiin a na dawn si a. Chuvang chuan hrehawm ti chung chungin Notei pawh dawt ka hrilh ṭhin a sin. Tun ṭuma a rawn haw tur thu pawh kha Max chuan min hrilh lo hrim hrim,"

"Zawnga chu(h)...ka hnenah khan nang hi ṭha deuha enkawl tur che in a intiam ve si a. Mipa pawh a nilo,ka van hnek chak tak,"

"A tawk inbengdai rawh khawngaihin,tunah chuan anih tur ang a ni zo vek tawh. Max chuan a duh ber a nei tawh a,a hlim chuan keipawn hlim ka tum ve mai ang,"

"An Inah sawn ka va luhkhung a nga,ka va khawih hrep mai dawn a sin,"

"A tawk ka tih chu,an inkar tichhe tu nih ka duhlo. Hlim takin awm se ka duh a ni,"

"I â tawh a nih hi,"

"Ṭhu teh in bengdai rawh,kha tui hi in rawh,"

Notei chu a mittui a tla zawih zawih a,"Hetiang em em hian a ni maw U Msi hian min lo ngaihtuah,ka rilru a van na tak,"ngawi rengin a in her a,an in lam pan chuan muang changin a kal hnak hnak a.

"Keichuan ka thutiam ka la hlen zel a nia aw,"Sangtea chuan tui chu a in khalh khalh a. Msi chuan,"Max-a awmdan ang hian awm ve suh ang che aw. Ka ṭhiannu hi tina suh ang che aw,"a ti leh a. Sangtea chuan,"Ka hria lawm,ka tina dawn hleinem,"a ti leh a. Msi chuan,"Ee i hna chu engtik ṭangin nge i zawm dawn a? Hna thar hmuh te pawh kan lawm ang chu,"a rawn ti ta daih a. Sangtea chuan,"Karleh Monday ṭangin ka zawm ang,hna thar lawm i duh chuan Inrinniah i hman a ngem?,"a lo ti vat a. Msi chuan,"Ka hrelo le hman turah in ngai phawt ang,"a lo ti vat a. Sangtea chuan,"Umm i hman dawn chuan Inrinni ah hian kan ti dawn nia. Emily pawh ka lo hrilh ang,"a ti leh a.