ZU ZUAR FANU 14

CHAPTER- 14

R'z Thangluah✍🏻

"Sangtea pawh chu a lo va let leh har ve maw le,"Msi chuan a ngaihtuah ve takzet a ni. Emily chuan,"Kan call chhin a nge aw,"tih pahin a phone a phawrh a,Sangtea chu a call nghal a. Mahse,chhanna a dawng thei lo. Vawi 5 vel a call hnu pawh chuan a in ring ral ṭhak ṭhak mai a,"Bawih,a chhang thei lo nia keichu ka rilru hah e,engtinnge kan tih ang?,"a rawn ti a,a ṭap deuh pur tawh mai a. Msi chuan Emily chu a kuah a,"Engmah a thleng lovang,a ṭha leh vek mai ang,"tiin a ṭhiannu chu a hnem a. Pi Ruati chuan,"Nakin deuhah kan call leh chhin dawn nia,Emi,chaw pawh i la ei silo. Ei phawt ila ei khamah kan call leh dawn nia aw,"tiin chaw ei siam tur chuan choka lamah a phei nghal a.

Chaw chu an ei ngei ve ngei a;mahse,tumah chuan an ei tui lo a ni. Ngawi rengin chaw ei hmunah chuan an ṭhu a,tumah chu an inbe lova an ngaihtuah erawh a in ang vek thung a ni.

Chaw eikham hnu rei vak lovah chuan Sangtea chu Msi chuan a call ve leh a;Mahse,chhanna a dawng thei bik lo. Vawi 10 vel lai a call hnuah pawh chhan a awm thei silo,"Nu,tih ngaihna ka hre tawh lo. Lawma hi ka call a nga,engkim ka hrilh tawp mai dawn,"tiin a nu chu a rawn melh a. Pi Ruati pawh chuan,"Ni e a pawilo hrilh tawp mai rawh,"a lo ti ve bawk a. Pi Ruati chuan Emily chu a kuah a a lo hnem ve malh malh bawk a. Msi pawh chuan Lawma chu a call nghal bawk a;

"Aw Ms,'

"I buai em?,"

"Buai love,engnge ni ta? I va mangan hmel ve a?,"

"Kan inah lo kal lawk teh aw,i ṭhianpa chungchang a nia,"

"Eng thil nge thleng a?,"

"Phone a sawi mai chi pawh a nilo,lo kal la ka lo hrilh ang che,"

"Awle ka rawn kal nghal a ni mai,"

"Awle nih ka dah aw,"

"Awle,"

Msi chuan Lawma a biak zawh chuan Sangtea chu a call leh a. Mahse,chhanna a dawng thei chuang lo.

"Hmela,nangmah hi i ni tiraw min chhui tir tu kha?,"tih pahin Kimkima chuan Sangtea chu a pet ṭawk ṭawk mai a. Sangtea erawh chu lei charah chuan a let reng mai bawk si,a bul velah chuan mi 5 vel hian an din bial laih bawk a. A hnar leh a ka chhung vel chu thisen hlirin a khat vek tawh a,a theih tawpin chet tum ve bawk mah se,a ban vei lam ruh chu a tliah avangin a che thei tawhlo a ni.

Kimkima chuan Sangtea kawr awmah chuan a rawn ṭham a,"Hmela,ka zawhna chu min chhang ta che,"a ti leh tuarh a. Sangtea chuan,"Mipa i nihchuan a fair in kan la in tawng leh dawn nia aw,"a ti duh chauh mai si. Kimkima chuan Sangtea bekah chuan a hnek ri no chawk mai a,"Kan la hria ang chu,"a ti bul hmuk a.

Lawma chuan Kimkima te awmna aṭanga hla vak lovah a bik chu a hung a. Kimkima te awmna lam chu ke in a pan phei ta chhat chhat a,a bi tum tur te chu mi 5 an ni tih chu a hre chiang khawp mai. Mahse,a hlau bik lo a ṭhianpa chhan nan chuan a nun pawh a hlan mai ang.

"Zawng ho mipa in inti ve a nihchuan a mal te te khan min lo bitum ula,"tiin an hmaah chuan a va ting teu mai a. Kimkima chuan a rawn pan vat a,"Huh nangchu ka u ṭhian i nihkha,"tih pahin ngeiawm zet hian a rawn nui a. Lawma chuan,"I u nen khan ṭhian kan ni ngai love,tunge rawn chhuak hmasa ber tur? Mi 5 in ka ṭhianpa in lo beihrawn vel a maw? A ngam chu rawn kal ula,"tiin a ṭanhmun chu an siam rem sauh sauh a.

Pakhat chuan a rawn pan phei nghal vat a,Lawma chuan awlsam deuhin a lo tukdawl nghal a. Midang an rawn kal zel a,a rin aiin an lo nep daih mai. A tawp berah chuan Kimkima chiah chu a bang ta,"Mim bei dawn nge meikhupin i haw dawn zawk?,"Lawma chuan Kimkima chu a melh ngar mai a. Kimkima chuan engmah a sawi ngam tawh lo,ngawi rengin a bike chu a ti nung a chak mangkhengin a phit chhuak nghal a.

Lawma chuan a ṭhianpa chu a bawihsawm nghal mawlh mawlh a,"Bawiha,i ṭha em? Ka tihpalh aw,ka rawn tlai deuh hlek a ni,"a ti nghal mawlh mawlh a.

Msi te pawh chu rilru nuamin an awm thei bik lo. An 3 chuan ngawi rengin ṭhutthlengah chuan an ṭhu a,Emily lah chu a ṭap reng bawk si. Msi chuan Lawma phone call a dawng nawlh mai le;

"Aw Lawma,engnge chanchin?,"

"Ka pa te kha ka be theilo,lo han chho la thlanmualah motor nen rawn chhuk thla rawh se aw,"

"Maw? Engnge thleng a?,"

"Kimkima te ṭhian hovin an lo khawih a,lo chhuk vat ru aw. A ban veilam hi a ruh a tliak lehnghal,"

"Awle awle,kan lo kal nghal ang,"

Casualtyah chuan an tlan phei pui nghal a. Sangtea nu leh pa te pawn an rawn zui ve nghal bawk a.

Pu Thanga chuan,"Tu ten maw lo khawih a ka fapa chu?,"tiin Lawma chu a rawn zawt vat a. Lawma chuan,"Kimkima te ṭhian ho in an lo khawih rawn a,"a lo ti vat a. Pi Zuali chuan,"FIR thehluh mai ka duh keichu,"a lo ti ve bawk a. Pu Thanga chuan,"Amah hi rawn harh phawt se FIR lam chu kan sawi dawn nia,"a lo ti thung a.

Emily nu te pawh an rawn thleng ve rang khawp mai. Thil thlen dan kimchang tak chu hrelo mah se,Pu Thanga te nupa ṭawngkam aṭang chuan buaina thlen chhan chu an fanu leh Msi chu ni berin an hria a,mak an ti hle mai a.

Pi Zuali chuan,"Nangmah hi mi Emily nu chu?,"tih pahin Emily nu hmaah tak chuan a rawn ding teu mai a. Emily nu chuan,"Aw ni e Emily nu chu ka ni e,"a lo ti nghal vat a. Pi Zuali chuan,"Enteh i fanu te ṭhiandun vanga kan fapa chunga thil thleng hi i hmu em?,"a ti nghal hlawih hlawih a. Lawma chuan a lo khap vat a,"Nu Zual,a awm ang lo thei e mai. He thilah hian Emily leh Msi hian thiam lohna an neilo a nia,"a lo ti nghal vat a. Pi Zuali chuan,"Engmah i hrelo kan fapa hi a bialnu hian kan in aṭangin a chhuahpui a,chuan thil thleng chu hei hi a nih hi,"a ti leh nghal hlawih hlawih a.

Msi pawh a ngawi reng thei tawh bik lo,"Nu Zual,khawngaihin ka ṭhiannu hi chu buainaah hnuk lut lo hram ang che aw. Buaina bul ber chu keini nufa hi kan ni,"a rawn ti chang fak a. Emily chuan,"Duhtawk rih teh khawngaihin,"tiin Msi kutah chuan a lo vuan a. Msi chuan,"Ka ngawi tawh dawn lo,mualpho a ngaih leh ka mualpho mai ang,"a ti ve mauh bawk si.

"Kei leh Emily hi ṭhian kan ni tih in hriat aṭang chiah khan Emily chu in hnar nghal a nihkha tiraw? Chuan,chuvang chuan in Ina chaw ei pawh in phallo anihkha,"a ti ve phiar phiar mai a. Pi Ruati chuan an mualpho dawn takngialin a hria a,"Bawihte,a tawk e inbengdai rih phawt teh,"tiin a fanu chu a lo khap nghal vat a.

Emily nu pawh chuan Pi Zuali ṭawngkam chhuak aṭang chuan an chhungkaw mizia tur awm ang chu a hrethiam nghal vek a. A fanu chu a kai hrang a,"Bawihte,helai hmun hi kan awm rengna tur niin ka hre lo haw mai ang aw,"tiin a fanu zaidam tak hian a bia a. Emily chuan,"Nu,Sangtea harh hma chu ka hawsan theilo a ni,"a lo ti bawk si. An fanu ngenna avang chauhin Sangtea harh hun nghakin damdawiinah chuan an nupa chuan nghet lo zetin an awm ve ta rih a.

Emily nu chuan a fanu chu a kuah a,"Bawihte,khatiang chhungkua aṭanga seilian kha i mi hmangaih chu a ni si a maw? I ṭhian kawmte thleng thlengin an sawisel sak che a,Msi tan pawh a rilru nat thlak dawn anihkha,"tiin a sawi ve siam siam a. Emily chuan,"Nu,Msi hi ka tan chuan ṭhian ṭha ber a ni. Kawng engkimah min puiin min thlamuan ṭhin a,Sangtea nen kan inhauh apiangin ka thlavang min hauhsak ziah bawk a. Sangtea nu te chuan engtinpawn sawichhe mah se,ka ṭhian ṭha ber hi ka thlah lovang,"a ti malh malh mai a. Emily nu chuan,"Ni e i sawi dikchiah lawm. Pawna kan ṭhut lai khan Sangtea ṭhianpa khan min hrilh a,Msi hi chu awmlo se Sangtea pawh hi a nun a chhe tawh ngawt ang a ti lawm,"a lo ti ve leh a.

Emily pa chuan,"Msi te nufa hi chu an fel ve ngawtin ka hria. Kan office ah sawn an veng nu 1 a thawk ve a,vawi 1 chu an chanchin ka zawt vel mai mai chhin a. A tir te aṭanga an chhungkaw chanchin thlengin min hrilh a,Msi pa chhungte ho sual zia leh duhâm zia te a sawi a. Msi nu in zu a zuar pawh kha a demawm loh thu te thlengin min hrilh a,tak tak a lo nih chuan an lainatawm khawp mai,"a lo ti ve bawk a. Emily chuan,"Pa,i thu hriat zawng zawng kha a tak vek a ni lawm. Sangtea te pawh hian Emily nu zu zawrh ngawt hi an in ṭhin a,Sangtea sawi dan phei chuan maw,Nu Ruati hian Msi hmuh laiin zu in a phal ngai lova. Zu kan in dawn chuan Msi chu roomah a awm tir ṭhin a ti,Msi pawh hian a nu hi a zah lutuk. Zu zuar ni mah se,a nu hian atan engkim a thawk tih hi a hai lo a ni,"tiin a lo sawi ve bawk a.

Sangtea pawh damdawiin aṭangin a lo chhuak ve tawh bawk a. A nu khan FIR thehluh kha duh viau mah se,Sangtea berin a phal tak silovah chuan an thehlut ta lo kha a ni a. Mahse,Sangtea rilruah erawh chuan phuba lak chak chuan bu a la khuar reng tho a.

In thlan pawh a hnai ta khawp mai,Pu Chhuana pawh candidate tur a ni tih a chiang fel ta. In thlan dawn chuan a fel khawp mai,ṭawngkam ṭha a ui lova sum lah a ui hek lo. A chhan chu an veng Local Council Chairman nih chu a tum ber a ni tlat si a.

In thlan result a lo chhuak ta,Pu Chhuana chuan vote a hmu sang filawr khawp mai. Tichuan,a lo tum ber an veng Local Council Chairman chu a ni thei ta. Veng chhung tan thutiam lah a ngah,ṭhalai leh Zirlai ho tan thutiam a ngah zual lehnghal. Engtinnge hma a lak zel ang lo ngaichang zel phawt ang aw..

Zomuanpuia te unau pawh an veng chhungah na na na chuan an vawk lal len a ni ber mai. An ruih duh leh an rui a,an ruih lah hian a sual chiin an che ziah lehnghal a. Veng pawn aṭanga rawn kal mipa kum 18 chin chung lam chu tupawh nise insualpuiah an lo cho nghal ringawt zel nia. Buaina an siamin a pa in a man ngai tawh lova,tu emawin lo khap an awm chuan a khaptu zawk chu a man daih zel nia.

Sangtea leh Emily pawh inbe reng ṭhin mah se,a hmaa thil thleng tam tak avang khan Sangtea chu Emily te inah a leng ta meuh lo. Mahse,Emily nen chuan an la in thlah bik chuang lova. Zan lamah chuan an in aiin Msi te in chu nuam a ti zawk ṭhin,zantin Msi te inah a leng ziah a chhun lamah erawh chuan dawr lamah a nu a pui thung a.

Msi chuan kuhva kheh malh malh pahin,"Tunlai hi Emily te in lamah i leng ngai miahlo nimaw?,"a lo ti a. Sangtea chuan,"Nia ka inthlahrung deuh a,"a lo ti mai a. Msi chuan,"Naktuk zanah kan 2 in va kal ila,thupha i chawi dawn nia,"a lo ti leh a. Sangtea chuan,"Ka duh teuhlo mai a,a chhungte khan makpa atan min duhlo nghal,"a lo ti vat a. Msi chuan,"I hre ringawt lo,Emily pawn a ngai ve tho che lawm,"a lo ti leh a. Sangtea chuan,"Emily nen hi chuan inkawp tura khuanu ruat kan ni lo aniang,"a lo ti zawi sup a. Msi chuan,"Het khatiamg thu kha sawi tawh suh ang che,"a lo ti vat a. Sangtea chuan,"Umm awle,"a lo ti ve vat a.

Zan dar 8.00pm velah chuan Max chu Msi te inbulah chuan a rawn ding leh vang tawh a. A car chu hnawk lo thei tur ang berin a hung fel a,Msi te in a lut tura a in her lai tak chuan a car hnung lam glass chu a rawn keh ri chhuai mai a. Rang lutukin a hawi let nghal a,a car bulah chuan R15 bike dum hi a lo ding vang mai a. A khalhtupa chuan,helmet fullface a khum tlat vangin a hmel a hmu thei silo,"Tunge i nih a? Engvanginnge ka motor glass kha i rawn chhutkeh a?,"tih pahin bike dinna lam chu a han pan a. Bike dinna bul a thlen hma chuan bike chu chak tawk hian a phit chhuak leh nghal a. Max chuan,"Hmela lo ding teh,"tiin a au nghal tuarh tuarh a. Mahse,chu bike chu a tlan liam rang khawp mai. Mahse,Max hi mi mawl a ni hauhlo,bike number plate chu a phone camera in a lo click fel vek hman tawh tho.

"Ms,he bike number hi i hre ngai em?,"tih pahin kawngkhar pawh kik lo chuan a lut nghal a. Msi leh Sangtea chu an lo hawi phawk hra mai a. Msi chuan,"Aih ka hre miahlo tinge a?,"a lo ti vat a. Sangtea chuan,"Khawimaw ka lo en ve chhin,"tih pahin Max-a phone chu a va bih hnai a,"Zomuanpuia bike a nih hi,an tibuai leh tawh che mi a?,"a lo ti vat a. Max chuan,"Ka car hnung glass a rawn chhu keh a,"a lo ti vat a. Sangtea chuan,"Enga? A keh nasa em? Kan zawnga chu khawi lamah nge a tlan a?,"a ti nghal bawrh bawrh a. Max chuan,"A keh vek lo en ula,"tih pah chuan an inzui chhuak hlawm a.

Msi chuan,"Awii a zialo thei e mai. Max,i lo len hian tinge buaina i tawh ziah bik le?,"a ti nghal mawlh mawlh a. Max chuan,"Zanin chu ka ngawi rih a nga;mahse,a ti nawn leh anihchuan dan angin hma ka la tawh ang,"a ti ve ngat mai a. Sangtea chuan,"Khawi lamahnge a tlan i hria em?,"a ti leh a. Max chuan,"Umm khi lamah khian vung deuhin a tlan chho lawm,"a lo ti leh mai a. Sangtea chuan,"Ṭhianpa,a zialo ṭhin khawp mai a. FIR theh luh mai chi loh maw?,"a ti ve a. Max chuan,"Tunah rih chuan engmah ka la ti lovang,naktuk zanah ka rawn kal leh a nga. Chutah chuan a rawn che leh anihchuan keimah ngeiin ka chingfel a nga. Chumi hnu pawha a la rawn ti nawn leh zel anihchuan FIR chu kan theh lut dawn nia,"a ti ve ta a.