ZU ZUAR FANU 12

CHAPTER- 12

R'z Thangluah✍🏻

"Hman zana i lenna kha kan hre tawh a nia aw,"Max-a nu chuan Max chu a melh rawm rawm a. Max chuan,"Chuan,engtinnge min tih dawn?,"a lo ti vat a. A nu chu,"Khatiang hmeichhia kha hnaihlo la kan duh a ni. Kan chhungkaw mil tawk te hi zawng ve teh,"a lo ti leh a. Max chuan,"Nu,i mak thei e mai. Mi ṭhenkhat sawi i hre thawi deuh a ni maw?,"tih pahin a lo nui suk a. Pi Zari chuan,"I u in min hrilh vek tawh,"a lo ti hluk a. Max chuan,"Nia,ka u chuan engpawh lo sawi se kan in ngaizawng hleinem. Ṭhian chauh a lawm kan nih,chubakah mi nunhlui in phawrh chhuah sak reng hi engnge maw a ṭulna le?,"a ti leh a. Pi Zari chuan,"A nun hlui kan phawrh a no hleinem,a nihna kan sawi mai chauh zawk a ni,"a ti leh a. Max chuan,"Nu,zawhna ka zawt ang che aw,"a ti thung a. Pi Zari chuan,"Aw min zawt la,"a lo ti vat a. Max chuan,"Kum 16 ka nih lai khan ka pa leh kan unau lak aṭang khan i uire a tiraw? Mahse,tuman kan unau hi Uire fanu,Uire fapa tiin min ko ngai lo. A chhanchu i nunhlui kha an sawi chhuak ngai tawhlova,an theihnghilh tawh a ni,"a ti phawng phawng mai a. Pi Zari chu a ngawi vang vang a,"Bawiha,ka tihpalh aw min ngaidam ang che aw,"a ti ta zawk a. Max chuan,"Nu in fate lakah ngaihdam an dil ngailo,ka tan chuan nu ṭha ber i ni tho a lawm,"tih pahin a nu kutah chuan a vuan a. Pi Zari chuan,"Nihchuan i ṭhiannu chanchin chu min hrilh zau la,"a ti leh a. Max chuan Msi chanchin chu a thiam ang tawkin a nu bulah chuan a sawi ve malh malh a.

"Bawih,kan ṭha tawh aw ka lawm lutuk. Awm lo la chuan ka â vek thei hial ang ka ring,"tih pahin Emily chuan Msi chu a rawn kuah a. Msi chuan,"Vawikhatmah inhauh tawh awih loh aw,in inhauh leh chuan ka ka en liam tawp tawh ang che u,"a lo ti zui a. Emily chuan,"Teuhlo kan inhau tawh lo,"a lo ti vat a...Emily bawk chuan,"Ee Max kha?,"a rawn ti zawm leh nghal zat a. Msi chuan,"Ka ṭhian thar kha maw?,"a lo ti vat a. Emily chuan,"Awiii ṭhian thar a la ti,chass i tih ve tawh ka lo ring a,"tih pah chuan a nui har har a. Msi chuan,"Nhaaa bialpa ka la neih duh teuh lo mai a. Max te chu ka ṭhianpa lawm,"a lo ti sam et a. Emily chuan,"Nei ve vat la nih chu a,"a ti leh a. Msi chuan,"Nia la nei ve ang chu;Mahse,hna neih hunah le,"a lo ti leh a. Emily chuan,"Awii nangtak hi chu aww,engkim hi hna neih hunah i ti vek mai,"tih pah chuan a nui leh hawk hawk a.

Max chuan library ah chuan Msi chu a lo nghak vang tawh a. Dar 2.00pm velah chuan Msi pawh a rawn thleng ve a,"Awii min lo nghak rei tawh em?,"a rawn ti nghal mawlh mawlh a. Max chuan nui var var chungin,"Nghak rei love ka thleng ve deuh chiah lawm,"a lo ti vat a. Msi chuan,"Chuan,min hrilh tur chu?,"a lo ti leh vat a. Max chuan nui sâng chungin,"Naktukah min chhuahpui hman a ngem?,"zam hmel deuh hlek chuan a ti zawi sup a. Msi chuan,"Aaa ka hrelo le,ka nu ka lo rawn ve phawt ang a,"a lo ti thung a. Max chuan,"Umm ni e chuan zanin velah chuan i chiang thei ang tiraw?,"a ti leh a. Msi chuan,"Umm chiang thei turah ngai ang,"a lo ti leh vat a.

"Nu,thil dil tur che ka nei a,"Msi chu a nu bulah chuan a rawn ṭhu a. Pi Ruati chuan,"Eng thil nge ni ta?,"a lo ti vat a. Msi chuan,"Ka ṭhianpa Max khan naktukah chhuahpuiah min sawm a,"inthlahrun hmel tak chuan a rawn ti a. Pi Ruati chuan,"Naktuk chu min pui ang ka lo ti deuh a sin,"a lo ti thung a. Msi chuan,"I remtih loh chuan ka nawrlui lo che nia aw,"a ti leh a. Pi Ruati chuan,"Ka nu puih a ngai a,tiin chhuanlam siam phawt mai teh. Naktuk chu min puih ka ngai dawn hrim hrim a,"a ti leh a. Msi chuan,"Awle nakinah aman chanchin min rawn zawt leh dawn a,chumi hunah chuan ka hrilh mai ang,"a ti nghal a.

"Aw Max,"

"Engnge chanchin?,"

"Max,naktuk chu ka hman loh hmel. Min lo hrethiam mai ta che aw,"

"Ngatinge?,"

"Naktukah dawr bungrua vel a rawn thleng dawn a. Dawr bungrua vel a rawn thlen ni hi chuan ka nu hi amah chauh chuan a buai ve ṭhin a. Hun remchang dangah kan ti mai dawn mi?,"

"Nia i hman loh chuan tih ngaihna dang a awm miau silova. Nia hun remchang dangah ni mai;mahse,chumi hunah chuan min hnial thei tawhlovang aw,"

"Umm awle ka hria lawm,"

"Nihchuan ka dah phawt aw,insuk tur ka nei a,"

"Awle,"

Dar 8.00pm velah chuan Zomuanpuia chu a rawn lang leh a. Msi chuan ning viau ṭhin mah se,a be chhe ngai lem lova,"E lo leng rawh,kha a rem lai laiah khan lo ṭhu mai rawh aw,"a lo ti nghal mawlh mawlh a. Zomuanpuia chuan,"Tunge hman zan ami kha?,"a rawn ti nghal ringawt a. Msi chuan,"Kan class ami ka ṭhianpa anihkha ngatinge a?,"a lo ti vat a. Zomuanpuia chuan,"Khatiang kha chu kawp tam lo teh,"a ti ringawt a. Msi chuan,"Ka ṭhianpa lawm,"a ti leh a. Zomuanpuia chuan,"Hnaih suh ka ti lawm,"a ti bul hmuk a. Msi chuan,"Ngatimaw? Amah i hrechiang a mi?,"a lo ti let vat a. Zomuanpuia chuan,"Hnaih suh ka tih chuan hnaihlo la a ni mai. Min hnial dawn mi?,"a ti leh a. Msi chuan,"Ka nuna rawn inrawlh turin thu neihna i nei lo,"a ti ve sak sak mai a. Zomuanpuia chuan,"Ka nei ka ti lo. Mahse,khapa hlat ang che,"a ti leh a. Msi chuan,"Hmmm i thulo e mai a,"a lo ti bul hmuk a. Zomuanpuia chuan,"Hmm a tawk anihchu ka haw san dawn che,"tih pahin a tho nulh a,a kal nul nul a.

Zomuanpuia haw tur leh Sangtea rawn lut tur chu kawngka bulah an in tawk a,an in melh shalaa nasa khawp mai.

"Khapa kha hnaih tawh suh ang che,"Sangtea chu a hmel en chuan a thinrim a ni tih a hriat nghal mai a. Msi chuan,"Tumaw?,"a lo ti hâ mai a,Sangtea chuan,"Aww Zomuanpuia lo tunge ni se i tih a?,"a lo ti bak hlak a. Msi chuan,"Aaa ka hre chuang nang,Emi nen in ṭha maw?,"a ti nghal zat a. Sangtea chuan,"Aw Zomuanpuia hi hnaih suh ang che. Rul tur nei aipawn hlau ang che,"a tu leh hmak hmak a. Msi chuan,"Awlee ka hria e,i thusawi te chu ka zawm lo ngai a mi? Chuan,Emi nen in ṭha em ka tih chu?,"a ti leh a. Sangtea chuan,"Umm ṭha e zanin chu an kohhran ṭhalai hovin an hun an hmang dawn a. Chuvang chuan ka leng phei ta lo mai,"a lo ti vat a. Msi chuan,"I lung a leng awm,"tih pahin a lo nui var var a. Sangtea chuan,"Heh i ho e mai a,Ee hman zana rawn leng kha khawi lam chhingkhual nge a?,"a ti leh a. Msi chuan,"Kan class a mi nihkha,U Jenny khi i hria em? U Mapuia nupui khi,khimi nau khi nia,"a lo ti vat a. Sangtea chuan,"U Jenny tak hi ka la hrechiang lova. Mahse,U Jenny nau anihchuan a sual dawn loh chu,"a lo ti leh vat a. Msi chuan,"Nia a fel lutuk,"a lo ti leh vat a.

Zan dar 9.00pm velah chuan khawtlang hruaitu leh YMA hruaitu te chu, Msi te inah chuan an lo lang leh ṭhap mai a. Pi Ruati chuan,"Nangni chu in va zahawm ṭhep ṭhup ve a,engnge in duh a? Lo leng lut rawh u,"tiin ṭha deuhin a lo bia a. Pu Chhuana chu a rawn ṭawng hmasa leh ber a,"Kan enthla reng che u kan tih tawh kha aw. In in hi kan dap leh dawn,"a ti nghal hmak hmak a. Pi Ruat chuan a hrethiam lo hle mai a,"Engnge maw a awnzia le? Eng thilah nge kan in chu in dap dawn a?,"a lo ti vat a.

An ṭawng thawm hriain Sangtea leh Msi pawh chu dawr lamah chuan an lo phei ve nghal a. Msi chuan,"Engnge thil awmzia hi?,"a lo ti ve nghal vat a. Pu Chhuana chuan,"In in hi kan dap dawn,dan phalloh thil in zuar tih kan hria a lawm,"a ti leh a. Pu Siama chuan,"Pi Ruat,khawngaihin min lo hrethiam ula in in hi kan dap leh a ngai tlat mai a,"tiin inthlahrung tih hriat tak hian a rawn sawi a. Sangtea chuan,"Hetiang ringawtin mi in in dap thei ringawt lo. Dap phalna in neih loh chuan in dap ringawt thei lo,"a lo ti ve nghal hmak hmak a. Pu Chhuana chuan,"Nang bawk maw? Haw rawh i pa i ti mualpho,"a lo ti zek a. Sangtea chuan,"In ngam chuan in dap dawn nia,dan angin kan kal ang,"a ti ve hmak hmak mai a. Msi chuan Sangtea thinrim hlauhawm zia chu a hre chiang tawh si,"Sangte,khawngaihin in inbengdai hram hram teh,"tiin zawi te in a va hrilh a. Sangtea lah chuan,"Ka inbengdai lovang,heng ho hmaah hian inbengdaih ka tum lo,"a ti tlat a. Pu Chhuana chuan,"A ṭha e i duh danin che la,keini pawh kan duh danin kan che ang,"tih pahin dawr bungrua vel chu a hai darh nghal vak vak a.

Sangtea chuan Pu Chhuana chu kut thlak a chak tak zet a ni. Mahse,a pa rual a ni a,kut a thlak anihchuan miin an dem nasa dawn lutuk tih chu a hre tlang vek bawk si. Ngawi rengin thinrim tawkin khawtlang hruaitu te ho chetdan chu a thlir tlawk tlawk ringawt mai a.

Rei fe an dap hnuah pawh chuan engmah hmuh an nei silo. Pu Siama chuan,"Kan duhtawk mai dawn mi niang? Hei kan duh thalin an in chu kan dap chhuak vek tawh a;mahse,engmah kan hmu silova. Kan thil tih hi i duhtawk phawt teh ang u,"tiin dam thlap hian a rawn ti a. Pu Chhuana lah chuan,"Fimkhur ang che u aw kan en thla reng che u nia,"a ti leh a,a nui huah huah a. Sangtea chu a ngawi thei tawh bik lo,Pu Chhuana hmaah tak chuan a va ding a,"Man tur i duh a mi? Man tur i duh anihchuan i fapa te 2 ruih avanga buaina siam ching hi man ta che,"a ti ve sak sak mai a. Pu Chhuana chu a tawlh hnuk hrat a,"I va zak lo e aw,ka fa te chungchangah rawn inrawlh suh,"a ti leh a,a ṭawngka chhuakah chuan a zam deuh tawh tih a hriat theih mai a. Sangtea lah chuan a hlau lo nasa mai sia,"I fa te chungchangah ka inrawlh i duh loh chuan maw,Nu Ruati te chhungkaw chungchangah hian rawn inrawlh tawh bik suh ang che aw. A nihloh chuan i fate chanchin hi i duh aia tam i hre mai ang,"a ti ve salh salh mai a. Pi Ruati chuan,"Khaih khaih a tawk e,in bengdai rawh le,"tiin Sangtea darah chuan a lo vuan a. Pu Chhuana pawh chu a ngawi duk mai a. Pu Siama chuan,"Pawi kan ti  khawp mai,min hrethiam hram hram dawn nia aw. Tun bak hi chu a thleng nawn tawh lovang,"tiin thupha a rawn chawi leh nghal mawlh mawlh a. Pi Ruati chuan,"Nia kan hrethiam lutuk che u lawm. Hei chu kan tawn ve tur reng a lawm,in thiam lo duh suh u,"tiin a lo chhang thung a.

"Zomuanpuia te chhungkua hi chu ka haw ngawt mai,"tiin Sangtea chu a phun leh bul bul a. Pi Ruati chuan,"A tawk tawh e,sawi zui tawhlo ang u aw,"tiin a lo khap a. Sangtea pawh chu a ngawi ve leh mai a.

"Aw hello,engnge chanchin?,"

"Ka hrechhuak tawh e,Msi chungchanga post siam a thehdarh tu chu,"

"Maw? Tunge ni a?,"

"In veng chhung ami ngei a ni e,"

"Tunge ka tih chu?,"

"Zonunkima,a pa Pu Lalchhuana,"

"Zomuanpuia nau a ni maw? Hmela chu(h) a va chak dawnlo tak,"

"In bengdai rih phawt teh aw,khawngaihin,"

"Engtia hma lak nge i tum a? Fiahna engkim a awm chuan police lam kan hriattir mai dawnlo mi?,"

"Fiahna chu engkim ka kawl vek tawh e. Naktuk chawhnu dar 2.00pm ah inah lo awm la,ka rawn ka nau te 2 nen kan rawn kal dawn nia,"

"Awle pawisa engzatnge ngai ang?,"

"Kha lam kha chu naktuk lamah kan sawi ho dawn nia,nih phawt aw,"

"Awle ka lawm lutuk e."

Sangtea chuan meizial ṭan kai pah chuan,"Hmel ho in chaklo ang chu aw,"tiin amah chuan a phun a phun a. ,"Msi te hi ka hrilh dawn nge dawnlo aw?....Aaa hrilh rihlo phawt ang. Naktukah engkim kan tihfel hunah ka hrilh zawk mai ang,"tiin mutthilh tumin a khumah chuan a mu nghal a.

"Nang hian min ti zak hnem tawh khawp mai. Vawi 2 lai Msi te in kan dap tawh a;mahse,engmah hmuh kan nei ngai lo. Chuta karah i ṭhianpa in min la ánkhum hrep zui lehnghal,lak tlak loh lutuk mai,"tiin Pu Chhuana chuan Zomuanpuia zu rui chu a lo hau bawrh bawrh a. Zomuanpuia chuan,"Laktlak loh min ti maw? Ka laktlak leh laktlak loh chu i la hre mai ang. Tun in thlannaah hian i ding ve dawn tiraw? Tlin i duh chuan i fapa hi laktlak loh tiin min chhuahchhal tawh suh ang che,"a lo ti ve hmak hmak a. Zomuanpuia nu pawh chuan,"Ni e i fapa hi a laktlak lohna ka hrelo. In thlan a hnai tawh a,i tan hian sum leh tha a seng be nasa a sin. Local Council Chairman nih i duh chuan i fapa hi ti lunghnur suh ang che,"a lo ti ve bawk a. Pu Chhuana,"Hmmm a lo nih tak chu a,"a ti hmuk a. Zomuanpuia chuan,"Ka pa,thil hi i man lo thei ṭhin e mai. Miin Msi te In in dap tih kha an hre ve vek;mahse,khawtlang hruatu lu ber chu Pa Siama a ni. Vawi 2 in dap tawh a;mahse,engmah man in nei lo tiraw? Ka pa,lungngai suh i tling anihchuan anni nufa lek khu chu kan veng aṭang pawn i pet chhuak thei ang. Mahse,chumi atan chuan min rin ve a ngai thung ang,"a ti ve mawlh mawlh a. Pu Chhuana chu a ngawi deuh vang vang a,"Ni i sawidik chiah lawm. Mahse,tih tur 1 kan la nei,"a ti leh a. Zomuanpuia chuan,"Engchu?,"a lo ti vat a. Pu Chhuana chuan,"Khawtlang leh mipui lakah ka mark a ṭhat nan i nau nen ka man ang che u,"a ti ta a. Zomuanpuia chuan,"A ṭha khawp ang chu,"a lo ti nghal vat a.