MIZORAM-AH DODALNA KARAH REPUBLIC DAY HMAN A NI

Aizawl | January 26, 2019: Joint NGO hmalaknaa Citizenship (Amendment) Bil 2016 (CAB'16) duh lohna lantirnana dodalna karah Mizoram hmun hrang hrangah vawiin khan Republic Day hman a ni.

Guv in India Flag a pawtpharh lai; Pic - DIPR

A lawmna pui ber Aizawl Lammuala neih-ah chuan Joint NGO a dodal vangin mipui nawlpui tel lovin R Day hi hman a ni a. Minister, MLA leh Secretary chin bak luh phal a ni lova, lammual a ruak hle.

He huna khuallian Governor Kummanam Rajasekharan chuan Hnam Puanzar a pawt pharh a. Parade contingent-te a endik hnuah parade contingent 9 ten hnam puanzar chibai an bûk a chháng lêt a; Dodalna karah Lammual ruak tak chhungah Republic Day thuchah a sawi chhunzawm nghal a ni.

Kumin Republic Day Ceremonial Parade-ah hian Contingent 9 an awm a. Ceremonial Parade hi Parade Commander DSP Pu C. Lalsawta leh 2nd Parade Commander DSP Pu Lalpianthanga ten an kaihruai a. Armed contingent 6 leh Band Parties 3 te an tel a ni. 5th IR Bn, 3rd BN MAP leh 1st BN MAP te chuan Parade thiam lawmman pakhatna, pahnihna leh pathumna an la a ni. Republic Day lawmnaah hian Governor chuan Governor’s Gold Medal - Pu F. Lalhmingliana, Inspector, 1st BN MAP leh Pu K. Lalrohlua, Hav, 1st BN MAP te hnenah a hlan a. Governor's Silver Medal chu Pu KT Beikhai, Inspector, 5th IR BN, Pu R. Lalrumliana, Inspector, 2 BN MAP leh Pu Zoramsanga Sailo, Sub- Inspector, SI(UB), CID Crime te hnenah a hlan bawk a. Fireman PC Remruatdika chuan India President hnen atangin hnathawh that lawmman a dawng dawn tih puan a ni a. Lammuala lawmna inkhawm zawhah hian Raj Bhavan-ah sawm bikte tan ‘At Home’ programme-in a chhunzawm a ni.

Jt NGO chuan lok sabha ah CAB'16 pass a ni ta leh Rajya Sabha -ah Jnauary thla tawp leh February thla tira putluh tumna awm duh loh zia lantirnan Republic Day hi an boycott a ni.

Hetihlai hian district dangah pawh dodalna a nasa hle a, Kolasib ah chuan hmanna tura ruahman lawkna Kolasib Stadium ah chuan hman theih a ni lo niin Kolasib Aw chuan 'Kolasib Republic Day 2019 hmanna tur hmun buatsaih fel vek, mahse NGO ten lungawilohna an lantir vangin a hmunhma a ruak thung.' tiin a tarlang.

Thlalak dang: Credit - H Zate