INHMU LIAN SUH

                               - Vidpuia Hrahsel

Kum 2018 Vawkhniakzawn thla zet kha chu ka hringnun a ka thil tawn zinga hrehawm ka tih ber leh phurna leh chona ka tawn zinga thil chhinchhiah tlak ber a ni hial ang! A ruh lang rawta sawi chuan mahni kan inti mualpho nasa dawn em a, heti hian kan thai kawi ange..He ka thil tawn hian thil tam tak min hriatchhuah tir a, keima nun ngei pawh hi a hma aiin puitlin lam min zirtir zawk a lo ni si..Mahni inhmuh ṭhat leh midang aia mahni inhmuh len hian ka nunah nghawng a nei lian hle a, Pathianin ka nun min in enfiah tir chiang hle!

Zirna lamah hlawhchham miah lovin Pathian zarah ka zirna zinkawng ka zawh chho ve zel a, hmelhriat leh ṭhianṭha pawh ka tawng hnem ve ta khawp mai. Ka duhthlanna pawh ka zawh dik loh chang a tam, ka ngaihdan mawl te te, aia u zawk ten dik zawk tura min fuih ṭhinna te, heti lo zawk hian aw an tih chang a, ka rilru lian lutuk leh ka lung lian lutuk vanga tawhsual ka tawh chang te kha kohlet theih nise an thu zawmin ka nun hi ka hmang nawm zawk ka ring.

Ka sawi duh zawk tak chu, hei hi a ni tunlaia keimahni ṭhalai, ka ṭhalai puite mahni tawk a kei ka ni inti chinte hian mahni aia upa zawk, an thu zah loh kan ching hle. Kei aia nau ve leh chhawng ah te pawh hian aia u te thu zawm lo leh pawisa vak lo, engpawh sawi se hnialkhan hre reng hi kan awm nual, keimahni ṭhatna tur ringawt hi kan ngaihtuah ṭhin a, a chang chuan tihfuh chang kan nei ṭhin ngei ang. Mahse, a lo dik ber lo ṭhin a ni tih hi ka hrechhuak ve ta! Midangin engtin nge min ngaih ang tih pawisa miah lo a, mahni tawk a inla lian ve tak, mahni inhmu ṭha ve tawk hi kan tam. Pawl anga inhmuhkhawm chang hian a hriat khawp mai.
He'ng mite hian anmahni an inhmu lian em em a, midang hi anmahni aia hniamin zuk en vek a! Tunlai ṭhangthar zingah kan tam em em, khawsak harsa lo tawk chauha awmthei, chhungte thawhchhuah ring a awm ṭheuh ṭheuhah hian mahni tawk a indah sang hi kan va tam tak em!

" Mahni inhmu lian suh, chapo lo la, indahhniam rawh"

Mahni thu duh tak te hi kawm nuam ber an ni lo fo, i chetzia leh i nungchang atang khan miin an teh dawn che tih hria la, engpawh ti dawn la, mi thiam zawk te emaw nang aia upa zawk te rawn nachang hria ang che. Kei ngei pawh hi ka nunah hian keimah hian lalna ka chang ngun em a, mi thusawi emaw mi min fakderna te a tak emaw ka intia ka inhmu lian ṭhin! A pawi ṭhin teh e! Tun hmaa ka awmdan ka chhuilet hian ka zak ngawih ngawih ṭhin!

Mahni indah len hian nghawng a lo nei vak lo.A hnuah mahni insitnain kan khat a nih ber hi! Kan nun awmdan miin hre vek lo mahse, Pathianin a hre si, keimahni ah kan rilru ah hrehawm tiin kan vui a, kan inchhir leh chawk!
Engpawh i la hmachhawn dawn, i thil tihna apiangah Pathian rawn zel rawh, ka testimony a ni ka rawn sawi ber hi, a saptawng takin 'in la value' viau suh, miin i in ngaihdan kha engatan mah an ti bik lo.

Heti hian kan sawi leh daih ange.. I nun hman dan kha hrehawm tih chang i nei ṭhin tiraw? Mihring zawng zawng  Pathian min siam dan a ni tlat, kan hringnun ah hlim ni, leh lungngaih ni te, an in en chhawk ṭhin. Hla thu pawhin:- _'Hlimni, lawm ni, ṭah leh lungngaih ni ten i hringnunah an rawn in enchhawk ṭhin"_
a tih kha..In dawmkun mai lo la, he khawvel hi kan khualzinna khawvel ani miau a, i hringnun khan harsatna a tawh mek avangin lungngai mai lo la, dinchhuah hun a la nei dawn tih hre reng la, i awmna ngaiah awm tum reng suh, thil kal tawh ngaihtuah ngaihtuah hian awmzia a nei lo.

He thu ka rawn ziah chhan hi ka rilru a ka vei ka sawichhuah thiam siloh ka thiam ang tawka ka rawn ziah a ni a, mi famkim kan awm lo, tumah inthlei thei bik kan awm lo. Kan nungchang erawh kan siam ṭha thei, he ka thuziah vanga hlawkna hmu an lo awm tak mial chuan tiin ka rawn ziak e.

Engpawh nise, heti hian tlang kan kawm ange;

Lungngaihna leh beidawnna a lo thlen changin indawmkun reng hian hlawkna  a nei lo, kan na ting mai ani!

I hringnun hman mek ah khan mahni in hmu lian lo la, midang te thurawn ngaichang in i thu duh lutuk duh suh, miin an ngainep ang che!