TLEITIR CHHINGMITDEL

Kan kawmchhak pa hausa, Pu Lianzuala chuan RCCbuilding tha zet mai a sa a. Keini ang kut hnathawh bak thiam nei lo chu, kawla ni chhuak chhiarin ka inhlawh thin a. Thenawmte nih manah min duhsak ve viau a, chhunah pawh chhangthawp leh chana ringawt lo deuh kan hmeh a, hmun danga inhlawh aichuan nuam pawh ka ti hle a ni.Kan veng atang mai bakah, veng dang atang pawhinmi 3 lai an rawn inhlawh ve a. Chung zinga pakhat chu pa te lam pang, hmel chawhnu ve deuh hlek, keiaia u deuh hlek tur hi a ni a. A hmel en aiin a fel a, a tawng tam lo nain mi a kawm hlim thiam a, a taimain mi a duhsak thiam hle mai a, mi dang zawng ai chuan ka nel thuai a.

( Fakna lo lang hi i click hian website enkawlnaah tlem talin tha i thawh tihna a ni)

Nitin kan thawk dun thin a. A uikawm lo bawk, kuhva, meizial ni se, a nei lo zawk zawk kan inban tawn a. Hnathawh-ho chi, lei laih, cement chawh tih velah phei chuan kan inkawp chawt a ni ber. Chutianga thla li vel lai kan thawh dun hnu chuan kan inkawmngeih ta hle a, thian tha tak kan ni ta a ni.

 Hna hautak zual chu kan zo ta a. Pahnih khat lekin an thawh bek bek tur chi chauh a awm tak avangin hlawhfa inban then chu a lo ngai ta. Tlai khat chu kapu chuan min ko a, “Hna a tam tawh si lo va, nang chu ban theih i ni lo va, i thawhpui duh pakhat sawi la, a dang zawng chu naktuk atang chuan an chawlhmai a ngai tawh dawn a ni,” a ti a. Thianpa Vena chu ka thlang a.


Ni khat chu septic tank tur kan lai dun a. Hnathawh pah chuan mahni chhungkua leh, kan nun hlui te kansawi dun mai mai a. Vena chuan tiang hian a chanchin lungkuai chungchuang tak chu min hrilh taa ni.

“Kan chhungkua hi pathum, ka nu leh ka pa nen chauh kan ni a. Ka pa chu sipai a ni a, a pension hnuin Aizawlah in hmun chhe te leiin Assam type-in kan sa ve a. Taxi kan lei bawk a, chu chu ka khalh thin a. Mite ang pui puiin sum la lut lo mah ila, kan chhungkaw kham khawp chu ka thawk chhuak a, tumah awt bik lutuk lo chuan kan awm a. “Amaherawhchu vanduaithlak takin ka pa chu a cancer hlauh mai a, theihtawp chhuahin kan enkawl a, phai lamah pawh vawi hnih lai kan hruai a. A pension-a a hlawh khawl ve zawng zawngte chu amah enkawl nan kan hmang ral vek a, chuti chung chuan kan inchhan thei ta chuang lo a ni. Kum 21 ka nihin min boral san a. “Ka nu nen chauh kan awm ta a, taxi chu ka la khal reng a, phang lutuk lovin kan khawsa ve zel a.

Chutih lai chuan ka nu mai bakah, kan chhungte chuan kan in chhung khur chu ngaihtuah a, nupui nei tawh mai turin min nawr chhen hlawm a. Nupui neihchu ka hreh lutuk pawh a ni chuang lo va, mahse ka duh ang hmeichhia, ka hmangaih leh kan nufa-a min hmangaihtu chu ka la tawng mai bik lo a ni. Kan rethei a, ka nu tar chak lo a ni tawh bawk nen, hmeichhe sual neih palh chu ka hlau ve em em si a.

Hun te a kal zel a, ka hmel duh ang hmeichhia pakhat chu ka tawng ve ta. Mak i ti mai thei a, mi dang paw’n mak min ti a, tun thleng hian mawl lutuk, a tawpkhawk min la tih phah a ni. Chu hmeichhia chu mitdel a ni tlat si a. Ka hmuh hmasak ber chuan canteen kual, mihring ke-a kalna tur an siam sirah khian kutdawh chungin a lo zai a. A zawna ka tlan lai takin traffic jam vangin ka ding a, hmeichhe tuaitir, tingtang thar lutuk lo perh chunga mawi taka zai al al chu ka va en phei a. A hmel ka hmu chiah chu ka tek chhawk a, ka tana khuanu ruat ngei niin ka pawm nghal thlap a ni. Mi dangte mitah chuan hmeichhe mitdel pakhat a ni ve mai ang a, ka tan erawh khawvela hmeichhe duhawm leh hmeltha ber a ni.

 Tleirawl mai a la ni a, a ngo ang reng viau a. A hmai chu bial lam deuh ani a, tarmit dum a vuah avangin ka hmu chiang lutuk thei lo va. A sam ngil sang chu a tukhumah a tawn lah a. Second hand T-Shirt var a ha a, pawnfen par deuh hi a feng a. A lan dan mai atang pawh chuan chhungkaw changkang leh neinung atanga rawn chawr chhuak a ni lo tih a hriat hliah hliah a. Chung te tak chuan min khawngaih-tir a, khawngaihna hi hmangaihnaa a inleh fuh tawh vek vek chuan, eng thil mah hian a phelh thei tawh lo a ni. Chuta tang chuan ka vei em em a, ka hmangaih a ni ber mai.


 Nitina ka pawisa hlawh chhuah hmasak ber chuan pangpar ka lei a, ka pe ziah thin a. A tir chuan a ngaihna a hre lo hle mai a, kei lahin engmah ka sawi ngai hek lo. Ka hming bak tu nge ka nih ka inhriattir lo va, tu nge a nih a, khawi venga khawsa nge a ni tih ka zawt hek lo. A kutdawhna hmun ka tlan pelh changa ka hmuh te, pangpar ka pek changa a nui mawi tak ka hmuh te chu ka hlimpui tawk ve em em a ni. Dik tak chuan hriat chian chu ka chak takzet a. Amaherawhchu a dinhmun leh ka dinhmun ka ngaihtuah kawp a, innei thei dinhmunah kan ding ngang lo niin ka hria a. Mite angin neinungin, ka nu enkawltu tur nupui neih kher ngai lo se; a nih loh paw’n amah enkawl tawp theitu tur awmpui lakna tur pawisa te chu nei ila, nupuia neih pawh ka iai reng reng lo a ni.“Ka hriat chian emaw, ka ngaihven viau chuan ka intat lut thuk telh telh ang a, lungngaihna leh lunglenna min thlentu mai mai a nih ka hlau a. Hmangaihna lipuia ka pil hmain, inthiar fihlim hram hram chu ka tum a ni. Chuti chung chuan hlim taka siam erawh ka duh tlat a, pangpar ka pek paha a nuihmel mawi tak chu hmuh ka thlakhleh vang pawh a ni ang, nitin pangpar pek chu ka thulh ngai chuang lo.


Dan pangngaiin ni khat chu ka taxi ka hung tha a, pangpar pek ka tum chuan ka phu zawk mai. Tum dangah chuan a lehkhakhawng bawm dawhah chuan cheng 10 te, cheng 5 te, cheng 2 te a lo awm nual thin a. Chumi tum erawh chuan cheng 1 thir pakhat chauh hi a lo let ngat a. Ani erawh chuan a bawmah chuan engzat nge awm a hre lo va, chumi ni chuan mi dangte khawngaihna thilpek engzat ngea dawn a hre hek lo. A tih theih tawk tiin, hlim takin mi dangte tan a zai char char mai a ni. A dinhmun chu ka chanah ka indah chhin a, ka lainat lutuk chuan ka pawisa ah zawng zawng chu ka pe ta vek a. Ani chuan a hre lo va, a hriat a tul ka ti hek lo. Chuta tang chuan ka neih remchan ang ang pawisa ka pe tel ta ziah a ni. Theihtawpin ka hel a, hlat ka tum a, inzawmpui loh hram hram ka tum ngar ngar a, harsa erawh ka ti hle. Khawchhiat ni emaw, eng emaw changa a hmelhmuh tur awm loh te hian khua a har a, Aizawl khawpui chu a ruak huai hian ka hre thin. Hmu dawnlo tih inhre reng mah ila, kawng sir tluan chuan amah zawngin ka hawi vel ruai thin. A tuka a hmel ka hmuh leh hi chuan, ka hlim leh sawng sawng thina ni. Chutiang chuan kum 2 dawn lai chu duh lo chungin ka ngaizawng a ni ber mai.


Inrinni tuk khat chu, Dawrpui biak in bulah khian pangpar nalh deuh an lo zuar a. A nalh leh nalh lo a hmu thei dawn lo tih hre reng mah ila, hlim takin ka lei a. A thar laia pek ngei tumin, phur tak chuan ka inkhalh phei ta a. Passenger tur te paw’n min lo phar a, mahse tumah ka la lo. A kutdawhna hmun ka va thlen chuan a hmel hmuh tur reng reng a lo awm ta lo va, beidawng zetin ka inkhalh liam ta a. Thawhtan tuk chuan beisei takin a hmel chu hmuh ngei ka tum a, mahse a thutna lai chu a ruak hiau si. Thawhlehah pawh a la rawn kal chuang lo. Nilaini a liam a, Ningani-in a zui a, Zirtawpah meuh pawh a reh ta vang vang si. Ka beidawng a, a chungah thil tha lo tak a thleng ta em ni? tiin ka inngaihtuah nasa mai a. Zawng chhuak turin a hming emaw, an awmna veng emaw engmah ka hre si lo. A hmain ka lo zawt ta lo kha ka inchhir hnuhnawh kher mai.

Ni thei ngangin ka hre ta lo va, Inrinni chuan a thutna thin piah deuh hleka chemte leh fu tui vel zuar thin, nu pakhat chu ka zawt ta tawp mai a. Vanneihthlak takin a ni chuan a hming te, an awmna veng te chu min hrilh a. Lawmthu ka hrilh luam nghe nghe a.

Pathianni tlaiah chuan tlawh chhuah ka tum ta a ni.Mi zawt pah zelin ka zawng hmu thei ta hram a. An in awmna chu a penhleh ve hle mai a, veng mawngah, motor te, ke pahnih nei chi lo phei chu a luh theih lohna-ah hian an lo awm a. Kawr kam tak takah hian, Assam type deuh reuh hian an lo sa a. A chung rangva chu a tui ek uar tawh a, a far lai laiah chuan silpolin hian an lo khuh a, brick bungin an delh a. A bang thenkhat chu tile, a chhak lam erawh dap, thumbawh kaih sawih a ni a. A chhuat erawh thingphel a ni thung.

Kawngkapui hlui zet tawh chu ka kik koh koh a, tuma’n min rawn chhang lo. Ka kik leh a, min la rawn chhang chuang lo. An awm lo a nih chu ka ring deuh a, mahse a inkalh mang bawk si lo va. An thenawmte chu zawh ka tum a. Kal tuma ka inher chiah chuan, chhung lamah thawm ri rak rak hi ka hria, a hnu deuhah chuan khawvela aw mawi ka tih ber mai, sang thing lera favang ni lawma zoawi leltekiu veng veng ai pawha ka beng fah zawk tu aw ngei mai chuan, “Lo lut rawh,” a ti a.“Inthlahrung angreng takin in chhungah chuan ka pen lut ta a. An in chu a zau lo hle mai a, choka leh thutkhawmna chu a inzawm a, pindan erawh plywood tha vak lo hian a inping dang ve a. Choka lamah chuan aluminium a siam silhmun bulah chuan gas thuk a awm a. A chungah chuan chhuar pathum a indawh a, bungbel leh thleng vel a inrem ve that a. Bel leh dekchi chu a tle hlawm kher mai.“Chaw ei dawhkan a in hung mawp a, a hnuaiah stool pali nga vel a awm bawk a. Bang chhak lam nghengin bel bawm, mistiri tuaitir deuh siam tih hriat tak mai, thar lutuk tawh lo hi a inhung ngat bawk a. Thutkhawmna lamah chuan thinga siam thutthleng pangngai tak pathum hi a inhung a, cushion dup fahran lo hi a inphah ve thliam a. Thlang lamah chuan Sony T.V, tawng tawh lam hi a awm a, a bulah chuang pangpar vuai tawh tak hi a lo inkhawi a, ka leisak kha a ni tih ka hre mai. Chu’ng zawng zawng ka sawi kher nachhan chu, an in chhung dinhmun i hriat thiam theih nan a ni.“Pindan atangin Mami (a hming tak tak a ni lo va, koh duatna mai a ni) chu a rawn tho chhuak mek a. A hak thin a T-Shirt var leh pawnfen tial bawk khan a inthuam a. Ka hrilh kher nachhan che pawh, Mizo nula dangte angin, thuamhnaw a ngah lulai lo tih a chian em vang a ni. A hmel chu a thophang viau a, asam te chu a hnawk niai a. Tarmit a vuah lo va, mahse a hmelthatna chu thupin a awm chuang lo.“Tu nge aw? Eng nge i duh a?” a rawn ti a.“Mami, ka aw atang hian min hre thei em?”“Aaa…U Vena i ni chiang mai. Ka ring dik em?” a ti a,a tawngkam chu a hma ngawt ai chuan a zang ta deuh a.“Aw dik e, min theihnghilh tawh ang chu ka tia, i va nula ve,” ka tia, ka nui lui hak a.Thutnaa thut pah chuan, “I duh duhnaah khan lo thu rawh. I va fel em em ve, engti tiha kan inah te rawn chuangkai nge maw i nih le? Kan awmna lah a mawng ropui si,” a ti a.“I hmel ka hmu khat tawh si a, ka ngai tawh lutuk che a, ka rawn kal tawp mai a ni. Pawi em?” ka ti a, kan nui dun har har a.“I va’n dawheh tak. Min ngaih vang chu a nih ka ring hlawl lo, kan vengah nula i rawn rim a ni maw?” a ti a. A nui hak hak a. Tak takah, i hmel ka hmu ngai ta lo va, pasalte hi ilo nei ta daih mai emaw ka ti a, ka ngaihthalo ka rawn pawngtawng chhuah thuai mai ani,” fiamthu ti tak hian ka ti a.“U Vena thin hi a. Keini’n khawia pasal nge maw kanhmuh zawh ang le. Sawrkar sem hunah a ni mai,” a ti ve luam a.“Chuan…”“E…aw...kar hmasa atang khan ka dam tha lo a, khua a nuam lo thin bawk nen, office ka rawn kal peih ngang thin lo a ni,” a ti a. Hmeichhe hlim thei tak, fiamthu duhtak tih a hriat hliah hliah a.“A nih tak chu, eng nge tunah i an? I mu tui lai ka rawn thawng tho che a ni lo maw? A zia lo hle mai a,” ka ti luam a.“Teuh lo mai, tih tur a awm lo em a, ka mu mai mai alawm. Ka tha tawh lutuk, naktuk atang chuan hna ka rawn zawm leh thei tawh ang,” tiin a hlim ber berah chuan a tang a.“A tho hluai a. “E, thingpui lum nachang che pawh kahre lo. Kei hi chu ka mawl lutuk a, hrilh chawp pawha kawm tlak loh an tih ang hi ka nia, ka’n lum ang e,” a ti a.“Mitdel thingpui han lumtir chu ka inthlahrung viau a, ka tihbuai phah hrep ka hlau a ni. Mahse a tum miau mai si a. “Han lum tak teh. Nula hmeltha thingpui lum in pawh a khat em hi. Kha a hmeh tur tlem chu ka rawn keng a,” tiin cake, wai wai, lays tih vel chu ka pe a.“A che vel chu ngun takin ka en a, an in chhungah chuan mitvar ang maiin a khawsa tlat hian ka hria a.Engkim chu a hmu thei emaw tih mai turin a bah lo a ni. Thingpui no hnih rawn chawi pah chuan, “Tunlaichu vari a rawn haw lo va, kan in chhungah chuan a sen bak in tur kan nei lo. Tui lum mai mai ang mah ni se, i tlawmngaih in a niang chu,” tiin a rawn nui seih a. A va han duhawm reuh tak em!“Nanga lum a nih te chuan, thihna tur pawh ni se, i he lovin kan tlak pawp mai ang chu,” ka lo ti a.“Awi...U Vena hi i zei reuh e, hmeichhia i chhai thlu tha thei viau ang a?”“Mai mai a che. Keini belval vala val ve ringawt te chu, hmeichhia tumah hian min saisik ve tak tak duh lo.”“Thu tak zawk hian, “A ho em mai khawvelte chu ti raw. Kei ang hian hmu zo lo ve char char la, kan inkawm reng thei ang a, a nuam dawn em asin.”“Min kawm duh phawt te chuan, i nin thleng thlengin ka lo kawm ziah ang che.”“Ti daih ila, ka hmu thei si lo che a, i chanchin ka hriat awm tawk te min hrilh phal em?”“Ka chanchin tlangpui chu ka hrilh zawr zawr a.“Nang ve thung le?” ka ti a.


“Kei te chu i hmuh ang hi a ni mai a, sawi tlak engmah a awm lo. Mahse i lung ka tih-hnur loh nan reng, ka’n sawi ve hrim hrim ang e. Pa leh nau mipa ka la nei a. Ka pian tirhin ka mit hi a del nghal a, dawktawr-te chuan tun thleng hian mitvar leh theihna chance ka nei an tia, mahse pawisa kan neih loh avangin engtin mah kan ti thei hrih lo a ni.“Ka nu hian mitdela ka awm hi min khawngaih em em mai a. Pawisa khawl a, phai lama kan inentir ve theih nan tiin, a sumdawng a, a thawkrim em em a. Mahse, tumna leh duhna hi mihring chan mai a ni a, a hlawhtlinna erawh van lam chhanna a ni tih ka chiang ta. Sumdawnga a zinna lamah, motor accident-in min boralsan ta hlauh a ni. (A mitah mittui a hnam a, a biangah a luang ngiai ngiai a) Chutih lai chuan kei chu kum 11 ka ni a, ka nau mipachu kum 9 a ni.“Tichuan ka pa-hoin kan khawsa ta a. Ka pa hi a lo vahnaah a kawng a herh a, chuta tang chuan hna rum a thawk thei lo va. Ka nu a boral tak hnuah chuan, min chawm nan hna a thawh ngei ngei a ngai ta si; hna hahdam deuh tiin lehkhabu leh magazine vel hi a zuar kual ta thin a ni. Ka nua hi sikul a kal tawh lo va, kum 17 vel a nih atangin a inhlawh ve thei ta a. Amaherawhchu tlangval a ni a, zuk leh hmuam a tih bakah, zu in zeuh zeuh te a lo ching ve a, a hlawh hi ama’n a pumbilh a ni ber mai. Amah a intum theih chuan lawmawmah kan ngai mai a.“A hma chuan mitdel sikul Gilead-ah te ka kal ve laulau thin a, a buaithlak em avangin ka chawl ta a. In chhung sekrek khawi hi ka hna chu a ni ta mai a, mahse ka pa upa lam chak lo tak, min chawm nana hah taka a thawk char char bik chu ka khawngaih a. Ka tih ang a, bazaar-ah kutdawh zai thin an awm thu hi miin min hrilh a, tlem tala ka pa ka lo chhawk zangkhai ve theih nan ka zai ve ta tawp mai a ni. Tunah phei chuan nuam ka ti tawh lutuk,” a ti a.“A chanchin ka hriat chuan ka khawngaih hle a. “A nih engtin nge tingtang perh te hi i thiam a?” ka ti a.“Nia, kan thenawmte in hnuaiah hian, thingtlang lammi, unau lehkhazir an awm a. Tingtang an nei a, an lehkhazir loh lai hian an perh a, an zai vak vak thin a. Kan in hi an rawn chuan kai ve-na ber a ni a. Kan inkawmngeih hnuah chuan tingtang perh chu min zirtir ve turin ka ti a, an lo chak sakhai a. An felin an dawhthei bawk a, kum 2 vel kan zir hnu chuan ka thiam ve ta a ni.“Zai nuam ka tih zia te, tingtang ka lawm ziate chu YMA lamin an lo hria a. Hman deuh tawh khan, Krismas present atan min rawn leisak ta a ni. YMA chungah pawh hian ka lawm takzet a. Tichuan tianghian ka rawn zai chho ve ta a ni,” a ti a. A tumruhna leh inpekna chu ka ngaisang kher mai.“Thil dang daih. In in hi a zuk hla angreng si a, engtinnge nitin i rawn chhuah chhoh a, i haw thin le? A buaithlak viau lo maw?” ka ti a. Ka inthlahrung viau naa, hriat ngei ngei ka duh si.“Ani chuan, “A ni khawp mai tiraw, buaithlak chang chu a awm zeuh zeuh. Tukthuan ei khamah ka pa lehkhabu zuar tur nen hian kan chhuak rual a, a changin kan haw rual leh mai a. A nih loh chuan kan veng mi bazaar vel-a thil zuar, hnathawk-ho rual hian ka kal mai thin. Mi hi an felin an tlawmngai a, tute pawh hian min ngaihsak em em a, min tanpui hi an chak vek mai a ni.“Tin, mitdel ka nih vang hian che sawn tha thei lo turah min ngai ngawt ang e. Ka tiang nen phei chuan ka kal thanna deuh, kan veng angah te chuan duh duhin ka vak ve thei asin. Motor a awm hian a buaithlak deuh hlek tih mai a ni,” a ti a.

Ka hman chang apiangin tlai lamah chuan thlah haw ka tiam ta a, a lawm kher mai.“Ka lu hi a na leh deuh a, thutthlengah hian ka mu mai dawn aw. I leng ve reng ang a, zanriahte pawh i ei ve nghal ang chu,” a ti a. “Chaw ka heh lutuk, in kham lo ang,” ka ti a. Chutah nui har har pahin, “Ka mal hi i lukham duh em?” ka ti leh a. Ani chuan, “A chakawm viau naa, ka pa a rawn haw thut chuan i zak lutuk palh ang,” a ti a, kan nui dun hawk hawk a.

 A sawi lai mek chuan a pa chu a rawn haw ta tak tak a.“Mami, kha thian inleng i nei a ni maw? Nang lah chuan i mutsan daih a,” a rawn ti lut a. “Nia, ka lu a na deuh a, ani te chu mi hrang inleng pawh a ni lo va, ka inthlahrung duh lo mai a nih hi. E, ka pa, hei hiU Vena, pangpar nalh deuh deuh min pe thintu kha anih hi,” tiin min inhmelhriattir nghal a.“A pa chu a lang upat thawkhat viau a, a thawhrim vang pawh a ni mai thei. Mizo pa satliah, fingvar lutuk bik lo hmel hi a pu a. “I nawmsam mang loh chuan ei rawng ka’n bawl ang e. Damdawite kha i ei leh lo em ni?” a ti zui a. “Zingah khan ka ei zo chiah a, vawiin Pathianni a nia, damdawi dawr a inhawng bawk si lo va, ka ei ta lo mai alawm,” a ti a.“A sawi zo deuh chiah chu a khawsik a rawn zual a, a tlun ta vak a. A pa nen chuan theih ang angin kan buaipui a. Kan thawmah thenawmte’n an hria a, a then an rawn tlan khawm a.



Chutia awmpui ringawt chu tha an ti lo va, an thenawmnu leh a pa nen, a rang a rangin civil hospital-ah ka taxi chuan kan hruai ta a ni. Damdawi inah chuan kar khat lai a awm a, nitin ka kan a, a eitur leh damdawi zawng zawng ka leisak bawk a.“Sum khawlsa an nei bik lo va, ka neih ang ang chuan ka tuamhlawm a. Kar khar hnuah chuan dam takin a chhuak ve ta a.


 Chuta tang chuan kan inpawhin kan inzawmna pawh a ngheh phah a, tunlai tawngkam takin kan inngaizawng ta a ni. Tlai tin ka thlah haw thin a, a chang leh chaw te ka ei ve nghal a, zanah ka leng tlang nghal a.

 Tiang chuan inpawh tlang takin kan awm-ho ta a.“Mitdel a ni a, nunphung pangngai angin a khawsa thei dawn lo tih ka hria. Ka hma lam hunah engtiangfakaua buaipui la ngai tur nge tih te, eng harsatna hrang hrang nge min thlen ang tih te pawh ka ngaihtuah ve bawk a. Mahse, chung zawng zawng huam chuan, ka thinlung takin ka hmangaih takzet ani.“Sawi tak ang khan mitdel a ni a, tarmit dum a vuah chuan engmah a hriat loh a. A vuah loh pawhin a mitmeng atang chuan a hriat chuang lo va. Mi dangte anga mit vun insi te, mitmu rang leh pual ang chi a ni lo va, pangngai takin a meng ve vek a, a hmu thei lo tih mai a ni.

 Amaherawhchu ngun taka en erawh chuan, a mitmu paw leh rang-in a tuam ang deuh chu a hmuh hmaih theih bik chuang loh.“A tawi zawngin sawi ta mai ila, tiang chuan hlim takin kum 1 chu kan hmang liam ve ta a. Ngaihzawng mitdel nei mah ila, khawvelah kei aia hlim leh nuam ti an awm bik kher chuang lovang. Mami chu ka hmangaih a, ani paw’n min hmangaih a, ka chantawkah chuan ka lungawi hliah hliah a ni ber mai.

“Vawi khat chu German doctor, mit lam specialist hiDurtlang Synod Hospital-ah a rawn kal hlauh mai a, phai lama doctor thiam takin a rawn tawiawm bawka. Sum tuak nana rawn kal an ni lo va, Pathian rawngbawl nan liau liau a nih avangin a thlawnin a inentir theih a, a theih theih an zai sakin, an enkawlsak a, mi tam takin damna an chang a ni.“Mami pawh inentir ve turin ka hruai a. Dawktawr chuan ngun takin a lo en a, beiseina thar, beidawnthlak si chu a lo hrilh ta a. Mami mit naute chu a chia a, chutiang donate (pe theitu) an awm chuan an thlak ang a, mitvar pangngai angin a awm leh thei dawn a ni. Chu chu thu lawmawm tawp a ni a.

Thu lungchhiatthlaklam erawh chu, Mizoramah chuan hmanrua leh thil dang a that tawk loh avangin phai lamah zai a ngai ang a, cheng nuai hnih vel sen a ngai dawn a nih chu!! “German pa chu kar khat hnuah a haw leh mai dawnavangin, vai dawktawr (a hming ka hre tawh lo) chuan a address leh damdawi in thawhna te chu a pe thlap a. Nula la naupang te, hmeltha tak mai mitdela awm chu a khawngaih thlu ve ngang a niang, lo buaipui a intiam a ni. Rilru buai takin kan haw leh ta a.


“Zanah chuan ka inngaihtuah ta a. Mami te lam atang chuan beisei tur a awm lo. A pa thawhchhuahleh a kutdawh atanga a hlawh chhuah chu an ei khawp ngawr ngawr a ni a. A nau lah rin chi a ni a mang si lo. An in te han hrilh ngawt dawn se, a risk thil ve em em a. Mi in hnuai luah man, thla tina pek ngai ringawt tur pawh a huphurhawm ve a ni. A nau mipa lah damtea a awm chuan nupui chhia tha nei tur te a la ni bawk si. Chhung leh khat pur turin an zik a bulh mai bakah, retheihna leh harsatna chuan lenrualte a hnawt tiau an tih zawng zawng an nei zoa. An lam atang chuan bei a dawng.


Thil dang zawng zawng ka dap a, ka beidawn hnuah ka taxi hralh mai chu kawng awmchhun niin ka hre ta. Ka taxi chu keima enkawl liau liau a nih avangin ka uluk bawk a, a la thar tha hle a. Document fel vek a ni bawk a, a permit nen cheng nuai khat sing sarih vel chuan a hralh theih mai ka beisei a, a bak cheng singthum vel chu harsa lutuk lovin a ngaihtuha theih mai ka ring a ni.“Kan chhungkaw ei bel ber, kan innghahna neihchhun a nih avangin ka nu han hrilh chu ka hreh takzet a, zan hnih tlaivar deuhthawa ka inngaihtuah hnuin, zanriah ei laiin ka sawipui ta a. A ngawi reng a, a mit a khap fak fak a, a kham nghal hmak a. Rei fe hnuah chuan, “Mama, kum tak tak i pa thawhchhuah kan khawl ve rek rek, kan chhungkaw eizawn nan liau liau-a kan lei a ni a. He taxi leh kan chhungkaw inzawm thukzia chu i hria alawm. Tin, hei hi hralh ta ila, eizawnna tur dang engmah kan nei lo va, taxi dang neih leh lah vana lawn tum ang maia harsa a ni. Amaherawhchu a neitupa i ni a, a hmanna tur lah thil tha tih nan a ni a. Engkim i kut a ni e,” a ti a.“Chanchinbuah ka chhuah a, ka chhuah atanga ni hnih hnuah ka zawrhna zat chuan ka hralh ta a. Ka nu vawk hralhna ka puksak a, bank-a ka lo khawlsa nen cheng nuai hnih chu kan tlin thei ta a.


Chutih chhung zawng chuan phai lama dawktawr nen khan kan inbe pawp reng a, sum chu kan neih thu leh mit donate tur an awm veleh kan pan theih tur kan hrilh a.“Thla khat hnuah chuan a mamawh ang mit donate tur chu kan hmu ta a. Kan pahnihin kan zuk kal ta a ni. Ka pa hi sipai a nih avangin vai ramah ka awm venual a, a bo lo tawkin hindi hi ka thiam ve a, mi danghruai ngai lova ka zuk kal chuan sum kan sen tlem phah a ni.“A tawi zawngin Mami mit kan zai tir hnuah chuan, mi pangngai angin a mit a lo var ve ta. A tirah chuanfiah kak lo mah se, dawktawr chuan ‘zawi zawiin a tha chho zel ang,’ a ti a. Chutia kum tam tak khaw hmu thei tawh lo, a han hmu ve thei ta chu thenawm khawveng paw’n an lawmpui takzet zet a ni. A bik takin kan pahnih chuan kan va han lawm dun tak em! Ka hlimna chuan van a tawng hial a ni.


Mami pawh a mit a var takah chuan mi dawr vela inhlawhin hna pangngai a thawk ve ta a. Khawtlang leh kohhran-ah phak an tawk tawkin a in hmang a, an chhungkua pawhin hma an sawn phah viau a ni. Kei chuan mi taxi ka khalh hlawh ta a, mahni taxi khalh ang chuan a hlawk ta lo kher mai. Kan nufa ei khawp chu ka thawk chhuak tawk tawk a, khawl tur emaw, nuamsa zawka ka nu enkawlna tur erawh ka nei ta ngai lo. Mahse, canteen kual, Mami kutdawhna hmun ka tlan pelh chang apianga, a thutna thin lo ruak ta hiai chuan sawi sen rual loh lawmna min pe thung si a ni.

“A hmelin a zir a, a lo zaithiam bawk a, YMA leh kohhran thalai programme-ah pawh a zai fo va, mi hriat pawh a hlawh ve tan ta viau a.

 Vanneihthlak nge vanduaithlak kan ti zawk dawn, an venga officerlian tak, pathlawi upa lam tawh pakhat chuan an office-ah IV grade angin a thun ve hlauh mai a. A hmaa kutdawh kha, tunah chuan nitin sawrkar pisa kai thin nula a lo ni ta. Chumi hnu phei chuan nasa zawkin zai lamah a inhmang chho a, a lar ber ber te zinga mi ni lo mah se, TV lamah te pawh a zai ve fo va, music video pawh pahnih thum chu a siam a ni awm e.

Ka’n sawi puat puat tawh mai ang e. Chuta tang chuan kan inkarah hian sawi fak theih si loh, khi hi a awm ta tlat a. Kei chuan a mitdel lai paw’n ka hmangaih a, a mitvar hnuah pawh ka hmangaihna chu a la pangngai reng a. Ani erawh a ni ta lo!“

A mitdel lai kha chuan nula rualbanlo, tuma duh loh, ui chuang ang mai kha a ni a, kan inphu tawk chiah a. A dam hnuah erawh nula hmeltha em em, zaithiam, sawrkar hnathawk a ni ta bawk si a, a tan chuan ka hniam ta rawih rawih mai a ni. Ka hmel leh pian chu heti ve mai hi a ni a, chhuan tur ka neih lohzia i hria ang a. Kan chhungkaw dinhmun lah a hniam ta em em a; kei, mi taxi khalha inhlawhfa leh ka nu tar mai kan ni a, belhtlak leh chhenfakawm a awm lo em bawk a ni.“Sum leh pai, eizawnna hian mihringte hi min lo tidanglam thei em a lo ni.

 Mami chu a khawsak a sang tial tial a, a hmaa nula zaidam leh inngaitlawmtak, nu hnap mai kha a paih tial tial a, hmeichhe induh tawk tak leh inring tawk, khawsak sang leh thian ngah tak, mite kawm chak leh Aizawl khawpuiah pawh zahpuiawm loh a lo ni ta.

“Sawi fawk lo mah ila, kan inbe khat tial tial a, kan inkar chu a zau zel a. Mi zingah min zahpui ru tih ka hria, min thlim a, min mamawh lo tial tial a. Leng turin min sawm ngai tawh lova, a chanchin chhia a tha engmah min hrilh tawh ngai lo va, ka biak hmasak loh chuan phone pawhin min be hmasa ngai hek lo. Min mamawh tawh lo a ni berin ka hria. An inte an chei tha sauh sauh a, ka chuankai chang pawhin kei aiin mi dangin lawm an hlawh ta zawk a. Motor ka nei tawh lova, ani erawh motor a lawm tialtial a. Officer motor leh bike hnunga a chuang lah kaphawk ngun tulh tulh a.

“A tawpa tawpah chuan thu ni lovin, thiltihin min then ta. Vantlang hriatin nau a pai a, mahse ka fa a ni tlat si lo. A rai tih ka hriat chuan ka thinrim a, ka rilru a na takzet zet a ni. Ka va phone a, inhmuh ka duh thu leh, min la hmangaih phawt chuan ka ngaihdam theih thu te, naute pawh chu lo piang se, ka fa ang chiahin ka pawm ang tih thlengin ka hrilh a.“A chhanna erawh a beidawnthlak kher mai, “Kei chu i tan ka rem tawh lo, kei aia tha zawk tawng turin duhsakna ka hlan a che,” min ti a nih chu. Ka puakkeh chiang kher mai. Tawngkam ka thiam lo va, mipa thenkhat anga ti deuh hluam hluam chi ka ni hek lo; ngawi rengin ka tuar tlawk tlawk mai a ni.

“A hnu thla hnih khatah, a hna petu, officer nen chuan an innei ta nge nge a. Mahse ka dem lo, hmeichhe danglam bik emaw ka tih kha, hmeichhe pangngai ve tho a lo ni si. Kei aiin neih tlak a, a chhenfakawm a, a hausa a, a thlamuanpuiawm a, a siam nuamsa thei zawk a, pasalaah a thlang ta a ni mai.


Ka neih zawng zawng ka hlan zo tawh a, pek leh chuang tur ka nei tawh si lo. Mittui nen lawmpuina hlan a, ‘mangtha’ mai chu ka chantawk alo ni ta a ni.

An inneih dawn zan chuan ka rilru na lutuk leh beidawng lutuk chu ka keh chhe vek a ni ber mai. Eng dang mah ka ngaihtuah thei lo. Zan reiah ka thoa, ka nu hnamhrui ka la a, in hnuaiah inawhhlum ka tum a. Kha, a mak khawp mai, hnamhrui kha a la mawih lo viau a nia, ka inkhai chiah khan zu han chat hmawk a mawle!!“Leiah chuan ka thu hnawk a. Chutah chuan thil mak deuh mai ka tawng a. Ka mitthla ka tih dawn chuan a chiang viau a, thlarau inlar tih vel hi ka awihloh avangin a tak takah chuan ka puh hreh deuh si. Ka piah thla eng deuh ruai hnuaiah chuan ka pa boral ta kha ka hmu ta tlat mai a ni.“Ani chuan lungngaih hmel deuh hian min rawn en a, chiang em emin ka thinlungah hian thu a rawn sawi a. “Ka fapa, hmangaihna avanga nun pek chu aropui a, beidawn leh rilru nat vanga nun hlan erawh a tlawm thlak i ti ve lo maw? Mi va hmangaih hi chak lohna a ni lo va, kan hmangaihna an chhan let loh vang hian kan tlawm ta tihna a ni hek lo. Tawrhna hi hmangaihnain a ken tel a ni a, inpekna hi a par chhuak chu a ni. Mi dangte’n malsawmna an chan theih nana thih hi a hlu a, malsawmna an chan theih nana nun phei chu a hlu lehzual. I thih chuan nangmah hmangaihtu te chauh an tap ang a, i nun erawh chuan i hmangaihte zawng zawng ila tihlim thei dawn asin,” ti hian ka hria a.“Ka harh chhuak chiang ngei mai. “Min ngaidam rawh ka pa, min ngaidam rawh. I fapa hi mipa ka lo tling lo em a ni,” ka ti mial mial a.


In chhung ka luh leh chuan light ka on a, ka nu mutna puanzar chu ka va keu a. Ani chu a lo mu kawm chel a, a biangah mittui luanna a huh thla ser ser a, ka thlalak hi a awmah a lo kuah chial bawk a. Chu thil ka hmu zet chu, mahni intih hlum hi ka tum leh ngai ta lo a ni.“Tuar viau mah ila, indawm kun rengin awmzia a awm lo tih ka hria; ka nu enkawl a ngai bawk nen, nunphung pangngai ka zawh leh ta a ni.


Taxi erawh ka khalh ngam ta lo va, ka bang hmak a ni. A chhan chu nitinin canteen kual vel khi tlan pelh ziah a ngai dawn si a. Khi lai ka tlan apiang khian Mami nena kan intawn dan te, hmangaihna par kan tlan dun ve lai leh a hnua min phatsan dan zawng zawngte kha, thinlungah hian a rawn thar leh ziah a.

Nitina rilru naa awm ai chuan tiin inhlawhfak hi ka thlang ta zawk a ni.“Hetiang hi chu khuarei hian a hnem an ti thin ngai a, mahse duh ber te’n mi fa pahnih pathum an pawm hnuah pawh min la hnem zo tak tak lo chu a ni ber e.




 Amaherawhchu ka thiltih takah khan pakhatmahin ka inchhir lo va, mawl ka inti lo va, tuhrah seng ka inti hek lo. Vawi thum pawh piang nawn ila, Mami mitvarna tur a nih phawt chuan, ka tinawn duh zel ang tih hi ka chiang a ni. Ani ka neih theih tak si lohah chuan, val to lo na na na chu ti hian ka la leng ta reng a nih hi,” tiin min hrilh ta a.




A hmangaih em em a, a neih theih tak loh, a neih zawng zawng chhuhsaktu Mami a tih chu ka hre chak ve angreng viau a, han zawh tawp lah ka hreh ve bawk si. Kei lah bengvar chi ka ni mang si lo. A tuka inhlawhna tur ka hriat chuan lungawi tawk mai thin kha ka ni a. Zai thiam hming ai chuan tu quarry lung nge chang tha tih te hi ka hre thei mah a, music video tih vel ai chuan eng company siam nge bawngtuthlawh leh suahdur hi hman nuam, tih te hi ka ngaihtuah lam a ni pek a.Amaherawhchu Mizoram zim te, ar hmai tiat lek, mihring lah ui hum zat lekah hi chuan, nula mitdel zai thiam, a mitvar hnuaa office hna thawk a, ama pa rual deuhthaw pasala nei ta chu zawng chhuak duh ila, a harsat vak ka ring lo. Chu erawh ka tan a tangkai loh avangin ka tum buai duh ta lo va.

Thianpa Vena chu ngun takin a lei lai lai chu ka en leh thin a, ka rin ang a ni ta tawp lo mai. Chutiang khawpa hmangaihna ngah, mi dangte tana inpe zo, mi dangte dem ngai lo, ka ngaihsan mihring chu an awm leh zen zen tawh lovang. ‘A va pawi em em ve,’ tih a, zo zial bung fawh ban bak kei mi rethei, nitina inhlawhfa ve mai chuan tihsak theih ka nei der si lo.Kan hnathawhna pa, Pu Lianzuala fanu mal, hmeltha leh duhawm em em mai, ngo var va, pian nalh si, no itawm chek mai chuan ngaizawng hlauh se, innei thut mai se, tih chu ka duhthusam a ni ta reng a nih hi......


A TAWP TA!