ZU ZUAR FANU 7

CHAPTER--7

*R'z Thangluah

Pi Ruati chuan dam thlapin,"An exam lai ania,an exam lai hi chuan thil dangin tibuai lo se ka duh vang a nia. An exam zawhah chuan i hmu thei dawn tho a lawm,"a lo ti a. Zomuanpuia chuan,"I fanu hi i chhuang ve a mi a? Engnge a nih bik vak a?,"a ti leh pung pung a. Pi Ruati chuan a âwki a san miah lo,"Ka fanu a ni a,ka chhuan bik vak na pawh ka hre lo. Mahse,ka tan chuan khawvela ka rohlu neih chhun a ni,"a ti leh a. Zomuanpuia chuan thinrim takin,"Ummmh a ṭha nihchu,zu zuar fanu hi engatanmah ka ti bik hleinem,"a ti ta phiar phiar mai a. Chutah zet zawng Pi Ruati pawn zaidam taka àwki chhuah chu harsa a ti ve khawp mai,"Zomuanpui,i ti mah mah a ni. Kan chhungkaw dinhmun chu engpawh nise,i rawn sawi phak a awm love. Khawngaihin min chhuahsan rih phawt mai teh,"a ti ta ringawt a. Zomuanpuia chuan a chhuah pahin,"Nang ni ang zu zuar fanu hi ka rawn rim duh anihchuan,lawm viau zawk tur i ni. I fanu khan min phû hlawl lo,"tiin pawnah chuan a rak ta chiam chiam mai a. Pi Ruati chuan a ngaihven zui tawh lo;mahse,a rilru chu a na a ni. Kawngka chu a khar a,chhung lamah a kalh nghal a. Msi pawh room aṭangin a rawn chhuak nghal bawk a,"Nu,i ṭha em?,"tih pahin a nu chu a rawn kuah nghal a. Pi Ruati chuan,"Aww Bawihte,ka ṭha lawm engmah nilo,"a lo ti nghal vat a. Msi chuan,"Nu,keimah vang hian i tuar nasa tawh mah mah a ni,"a ti sep sep a. Pi Ruati chuan,"Bawihte,engmah nilo ka tih chu ka ṭha lawm. Thingpui kan lum a nge aw,"tih pahin choka lamah chuan a phei a. Mahse,Msi chuan a lo zui nghal vat a,"Nu,zanin chu ka thingpui lum i in ve tawh dawn nia. Lo va ṭhu hahdam la,keiman tui deuhin ka lo lum ang aw,"tiin a nu chu a nuih sen sen a. Pi Ruati chuan,"Awle Bawihte,ka hmangaih che,"tih pahin a fanu sama chul heuh heuh pah chuan a chalah a fawh sak zauh a.

Sangtea chuan,"Lawk Mawii,"a rawn ti thut a. Mawii chu a phu zuk nghe nghe a,"Awii min ti phu nasa lutuk,engnge a?,"a lo ti vat a. Sangtea chuan,"Msi ten engtiknge exam an zawh dawn?,"a rawn ti a. Mawii chuan,"Vawiinah an zo dawn,ngatinge?,"tih pah chuan a lo nui har har a. Sangtea chuan,"Nihchuan khawmaw a status ka lo en chhin,"tih pahin Mawii phone ken lai chu a phih thlak sak a. Mawii chuan,"Huiham vawiinah a la online lo,"a lo ti vat a. Sangtea chuan,"A nih hi a last seen pawh yesterday a nih hi,"a ti sup a. Mawii chuan,"An exam zawh chuan i bem ngam tawh em ang chu maw?,"tih pah chuan a nui leh vur vur a. Sangtea chuan,"Ngam e le,"a lo ti sam et a. Mawii lah chu a nui hawk hawk a,Sangtea chuan,"Nge i nuih vak vak a?,"a lo ti vat a. Sangtea chuan,"I ngam leh pawh ka ring chiahlo e a,"a lo ti a. Sangtea chuan,"Zaninah ka zu leng a nga,ka bem nghal ang. I awih loh chuan amah i zawt dawn nia,"tih pahin a meizial chu a ṭan a,roomah a lut nghal a. Mawii lah chu za lutukin a nui hawk hawk thung a.

Tlaiah chuan Msi chuan eirawng a bawl malh malh a,a khat tawkin a phone chu a bih leh zauh ṭhin a. An class ho bik in group an siam a chumi groupah chuan a lang ve leh zauh ṭhin a. Group message ho a en kual dan hnuah chuan number 1 a hriat ngai miah loh hian a lo message tlat mai. Msi chuan a message dawn chu a hawng nghal a;

"Zanah rawn len i phal em? I nu phalna ka la vek tawh a,nangma thu tlukna chiah ka nghak tawh,"

Msi chuan message a reply hma in,a rawn message tu dp chu a check nghal a. Sangtea a lo ni reng a,nui var var chungin a reply ve nghal a.

"A nu bulah i dil vek tawh tih engtinnge ka hriat theih nga?,"

"I nu kha zawt la i awih loh chuan."

"Tunah chuan ka bulah a nu a awm lova."

"Nihchuan kan inbiakna ss ka rawn send ang che aw."

"Umm."

Sangtea chuan Msi nu nen an inbiakna ss chu a rawn thawn tak tak a. Msi chu amah chauhin a nui vur vur mai;

"Umm a nu in a phal chuan i lo leng dawn nia."

"Huiham,,i nu phalna chu ka la tawh ka tihkha. I phalna lawm ka duh."

"Hehe awle i lo leng dawn nia. Mahse,zu rim nam lovin aw."

"Awle."

Msi chuan a reply tawh lova,thil dang a tihsan rih a.

Sangtea chuan,"A van ham strick ve,tiang chuan bem pawh ka bem ngam dawn mawn le?,"tih pahin a chek tlak tlak a,"Ummh,pawi love mipa ka ni lawm. Ka ngam awm e mai,"ti nang nang chungin,inbual turin bathroom ah a lut a a zai nghal rut rut a.

Msi chuan eirawng a bawl zawh hnu chuan dawr lama a nu puih pahin a ṭhu chho ve a. Tumah dawrtu an lo awm lo bawk a,a nu bulah chuan,"Nu,Sangtea kha ka number i pe mi a?,"a ti hlawl mai a. Pi Ruati chuan,"Pe love ngatinge a?,"a lo ti vat a. Msi chuan,"Min lo text a,"tih pahin a nui suk a. Pi Ruati chuan,"Nia keipawh min lo text a,engtinnge rawn sawi a?,"tih pah chuan a fanu chu a melh zawk a. Msi chuan a phone chu a nu pe a,"En la,"tih pahin kuhva chehna chu a la a,kuhva chu a kheh nghal a.

Pi Ruati chuan,"Bawihte,hei i nula chho ve tawh dawn a. Mipa tam takin an la rawn hel dawn che a,engpawh ti dawn la Pathian rawn hmasa zel ang che aw,"tiin a fanu chu a hrilh leh malh malh a. Msi chuan,"Nhaa Nu,keini ang te chu tuman min duh ve awmlo e mai,"a lo ti vat a. Pi Ruati chuan,"I kum rualpui ka nih lai chuan khatiang ngaihdan kha keipawh ka ngaihdan a ni ṭhin a lawm. Mahse,khawilai kilah emaw hi chuan min duhtu leh min hmangaihtu te hi Pathian hian a lo dah reng tawh a ni. Mahse,chung mite chu kan hre bik silova,"a ti leh a. Msi chuan,"Nu,nih rawn leng ta se engtinnge ka biak ang a?,"a ti heu mai. Pi Ruati chu a nui hawk hawk a,"Bawihte,ṭawngkam ṭha taka lo biak kha a ni mai. Ṭawngkam ṭha hi a uiawm lova;mahse,hmanna hun leh hmun erawh hriat a ṭha thung. Mipa chu i ṭawngkam in nel la,i chetzia leh i taksa erawh chuan i nel tur a ni lo,"tiin a fanu chu a hrilh leh mawlh mawlh a. Msi chuan,"Awle Nu,ka hria e khawvelah nu zawng zawngahbi ṭha ber,"tih pahin a nu chu a kuah a. Pi Ruati pawh chuan,"Ka fanu,khawvela fanu ṭha ber i ni tih hi theihnghilh ngai suh ang che aw,"a lo ti ve bawk a.

Zan dar 7.45pm velah chuan Sangtea pawh a insiam peih at tawh mai a. Darthlalang hmaah chuan a ding vang mai a,"Aaa... Englo ania,Ms...iiihhh..Nhaaa tinge ka dang a awk zel le?,"tih pah chuan a tukhum chu a han hiat leh nauh nauh a. Darthlang hmaa rei tawk fang a din hnu chuan,"Umm engpawh thleng dawn se,mipa ka nih angin ka ti tlang tur a ni,"tiin a room aṭang chuan a chhuak ta a.

Sitting roomah chuan Pi Zuali te nupa chuan Tv an lo en a. Pu Thanga chuan,"Kha khawnge i len leh dawn a?,"a lo ti vat a. Sangtea chuan,"Vengthlangah,"a lo ti ringawt a. Pi Zuali chuan,"Vengthlangah a? Veng mawng lam hi nel viau lo teh u,a hrisello a nia,"a lo ti nghal hluk a. Sangtea chuan,"Hmm a hrisel chin chiah chiahah lawm ka len dawn,"a lo ti nghal vat a. Choka aṭangin Ely chuan,"Vengthlang zu zuar fanu kha i rim leh dawn mi a?,"a rawn ti zui awr awr a. Sangtea chuan a u thusawi chu hria awm pawn a awm lo,a bike chabi a la a a chhuak nghal daih a.

Msi te in chhak deuh ah chuan a ding vang vang a,an dawr chu a lo la eng kung a. A sana a bih zauh a dar 8.05pm a lo ni tawh a,"Umm chhuk thla phawt ang,ka kal tawh laklawh ka let tawh lo ang,"tih sup pahin Msi te in lam pan chuan muang changin a tlan thla zal zal a.

Msi te kawt a thlen chuan a bike chu a hung rem te te phawt a,dawrah chuan a lut nghal a. Pi Ruati chiah a lo awm a,"Ee Nu Ruat,i va buai awm ve a?,"a ti lut nghal vat a. Pi Ruati chuan,"Buai lutuk love,lo ṭhu rawh,"a lo ti nghal a. Sangtea pawh chu Pi Ruati bula ṭhutna awlah chuan a ṭhu ve nghal a,"Tunlai in in hralh ṭha em?,"tiin a ṭan phawt a. Pi Ruati chuan,"Aww pangngai ni mai,thla hmasa aichuan a zia tawh e,"a lo ti a.

Sangtea chu a ngawi vang vang a,a phone chu a phawrh a a hmet leh niap niap ṭhin a. A chang leh a kut ṭangte chu a elh ri leh kauh kauh a,zam hmel takin,"Nu Ruat,Msi a awm em?,"a rawn ti chhuak hak a. Pi Ruati chuan,"Aw awm e Tv en pahin kuhva a thel a,"a lo ti vat a. Sangtea chuan,"Nihchuan ka va lut phei ve dawn aw,"a lo ti vat a. Pi Ruati chuan,"Aw va lut phei rawh,"tih pah chuan a lo nui suk a. Sangtea pawh chu in chhung lamah chuan a lut phei ve nghal a.

Msi chuan kuhva a lo thel malh malh a,Sangtea a hmuh chuan,"Ee nang a law? Lo leng ṭhu rawh,"a lo ti vat a. Sangtea chuan,"Ka rawn leng dawn a,"an ti leh hram a. Msi chuan nui sun sun chungin,"Aww lo leng la,lo ṭhu rawh,"a lo ti leh a. Sangtea chu Msi ṭhutna bulah chuan inthlahrun hmel takin a rawn ṭhu a,engmah lah chu a sawi zawm tawh bawk silova. Msi chuan tih ngaihna vak a hre lo hle mai.

A mipa zawk a ngawih reng takah chuan Msi chu a rawn ṭawng leh ta nge nge a,"Tinge zanin hi i va ngawichawi ve a? I rawn kal dawnin i chhungten an hau che mi a?,"tih pahin a lo nui var var a. Sangtea chuan,"Aa hau love,engmah nilo khawi kuhva kha ka lo thel chhawk ang che. I hah lutul palh ang,"tih pahin Msi kuta kuhva chehna chu a lak sak a,kuhva chu ngawi rengin a thel nghal malh malh a. Msi chuan Sangtea awmdan chu a hrethiam lo hle mai,"Thil diklo a awm mi a? I mizia hi a mak lutuk a nia,"a ti leh a. Sangtea chuan,"Engmah nilo ka tih chu,"tih pahin kuhva chu a thel chhunzawm leh malh malh a.

A kuhva thel chu a rilruah a awm lo bawk a,3 vel a thel naah chuan a kut zungchal chu a chep kak hlawk mai a. A thi duh kher lehnghal a,"Awii a na em? Kha a thi nghal zawih zawih mai,"tih pahin Msi chuan Sangtea kut kak lai chu a rawn hmet nghal a,thisen chhuak pawh chu tlem in a zia deuh a,"Kha i kut kak lai hi tihian lo hmet la,i kut hi i lu chungah phar chho rawh aw. Damdawi vel ka va la a nge,"tih pahin room lamah chuan a tlan phei nghal a.

Msi chuan First Aid Box tereuhte hi a rawn keng phei a,lapua a la a Sangtea kut thisen kai hnuang chu a hruk sak nghal zung zung a,dettol a laa lapuaah dettol chu tlem a far tir a. Sangtea kut kak laiah chuan a hnawih nghal a,Sangtea thip ti lutuk chu a ṭhen nghal tlawk tlawk mai a. Msi chuan,"A thip reilo ang,kan tuam nghal daih dawn nia aw,"tih pahin,bandage a rawn phawrh a a tuam nghal zung zung a.

Msi hmel chu hmuhnawm ti takin Sangtea chuan a lo en vang vang a,Msi'n,"Lee ka tuam zo e,a la thip em?,"tih paha Sangtea a rawn melh chuan,an mit leh mit chu a in tawng siah mai le. Mahse,rei an in en lo Msi zawk chuan a mit chu a la sawn nghal vat a,"Kuhva kha chu thel ve tawh lo mai rawh,"a lo ti zawi sap a. Sangtea chuan engmah a sawi lo,ngawi rengin Msi bulah chuan a ṭhu ringawt a.

Msi chuan damdawi vel chu a khung fel sawk sawk a. Room lamah chuan a dah phei leh nghal a,"I kut chu a la thip em?,"tih pahin nui sang chungin Sangtea chu a rawn zawt leh a. Sangtea chuan,"Aih thip tawh love,i kut a dam hle mai,"a lo ti ve bawk a. Msi chuan,"Hehe chutia mi? A va lawmawm ve,heng ho hi ka thel zo law law a nga thingpui kan lum dawn nia aw,"tih pahin kuhva chu a thel leh nghal vat vat a.

Dar 8.30pm velah chuan Msi pawh chuan a kuhva thel tur chu a thel zo ve ta a. A dah fel sawk sawk a,"Thingpui chu ka va lum a nge aw,"tih pahin choka lamah chuan a phei nghal a.

Sangtea chuan Msi nen an awmdan kha a ngaihtuah zui nghal a,"Ka mitah tak min en a,min en danah kha chuan min duh ve hmel khawp mai,"ti rilru nuah nuah chungin a mah chuan a nui vur vur a.

Msi pawn a thingpui lum lai chuan Sangtea nen an awmdan chu a ngaihtuah zui ve tho,"Tinge tiang khan ka awm le? Tiang khan mipa hmaah ka la awm ngailo a sin maw le,"tiin a ma hriat tawk lek chuan a phun sep sep a. Thingpui chu no 3 a siam a,a siam zawh chuan sitting room lamah a chawi phei leh nghal a.

"Hei aww thingpui,"tih pahin side table ah chuan a hung nghal a. Sangtea chuan nui chungin,"Awle i van lum zo hma ve a,"a lo ti vat a. Msi chuan,"Nia ka lum tam lova,hei anu ka va pe ve lawk nge aw,"tih pahin no 1 chu a chawi a,dawr lamah chuan a phei pui nghal a.

"I thingpui lum chu a tui hle mai,tiang chuan i thingpui lum in tur ringawt pawn ka rawn leng ziah ang,"Sangtea chu a nui zui hak hak a. Msi chuan,"Hmmm ka awihlo e a,min bawl a nihkha,"a lo ti vat a. Sangtea pawh a hma ang em em chuan a tîm tawh bik lova,"Bawl rual pawh i nih tawh loh hi,i nula ve uaih tawh lawm,"tih pahin a thingpui ken lai chu a dawt ri hrup a. Msi chuan,"I zak em? Ka la nula lo e aw,naupang ka la nih hi,"a rawn ti hlak hlak a. Sangtea chuan nui hawk hawk chungin,"Nia ni dawn tak naute i la ni tak e,ka theihnghilh leh ṭhin a,"a lo ti ve leh a,an pahnih chuan an nui dun bawk bawk a.