Aizawl | November 15, 2018: Ni 14th November 2018 khan Seling leh Thingsulthliah khua ah BJP Campaign Office hawnna Prof JV Hluna State BJP President in a nei a, Prof JV Hluna hi Tawi Constituency BJP Official Candidate niin, inkhawmna hun hman a ni.
He huna thusawitu Tawi Constituency BJP Official Candidate Prof JV Hluna chuan Pathian leh kan hotute zara helai tlangdung, ka seilenna hmuna ka ding thei leh Tawi bial hmasawnna tura tha ka thawh thei tur hi ka lawm hle a ni.
Ram pum ah BJP hi Kristiante dodaltu tiin Party then ten an sawi thin a, kum tam tak History ka zirtir a, India ram dan leh Party chanchin tamtak ka zirtir thin nimahsela he thu hi a dikna Ka hmu lo a ni. Hindu tena sakhaw dang an ngaimawhna leh an chetlakna hi tute Sorkarna ah pawh a thleng thin a, Party malkhai a puhna awm thin hi Politics tenawm tak, mahni tanghma chiah haitute tih awm tawk niin ka hria, Congress hunlaiin Kristian te tihduhdahna atheng nasa thin hle a nimahsela, Congress Sorkar tih kan ti ngai lo, chuvangin tun Modi Sorkar hnuaiah phei chuan India ram dan hnuai a Sakhaw zalenna hi a ngaipawimawh em em a, Kristian ten harsatna lian tham kan tawh ka hrelo hle a ni.Tin, harsatna lo tawk awm se Mizoram Kristian BJP te chuan kan unau te nun chhan nan Party chhuahsan hial khawp pawhin kan bei ngei ang. Kei, Mizo Kristian pa hi President Ka nih tlat chhung chuan Mizo Kristian te hian Kan tuarlo anga. Chutiang thawm a awm dawn a nih chuan a bang hmasa ber ka ni ang a ti1a.
Seling tlangdung a sipai ram luahman dawnglo te beidawng tak tak pawh kan awm tawh mai thei a ni. Sorkar hmasa ten tihngaihna an hre tawh lo nge anngaihsak duh lo zawk tih ka ngaihtuah a, Pathian zarah kan Sorkar veleh ngaihtuah hmasak ah kan nei dawn a ni. Tin, Ram hmasawnna tur atan a kan kalkawng 4-lane a siamtur siamloh te, kan lui dung Power siam tawh Turial Hydro Power chatuan atana kan ramin chan (share) tlemte chauh nei tura thu an lo siam te chu Central Sorkar in siam that sak min tiamin, min duhsak em em a, he hun tha hi kan bawhpelh tur a nilo. Chuvangin BJP Sorkar hi a pawimawh em em a, vairamah kan tui a luangral mai mai a, keinin Kan khamkhawp pawh Kan la hmulo te hi a manganthlak em em a, MLA ka nih lai pawh a, tui khuap tura hma kan lakna te tihpuitlin theih a nilo te hian ka rilru a luah reng thin a ni. Hetianga Kan ram mamawh pawh titheilo Sorkar Kan neih reng chuan kan hmabak hi a thim hle dawn a ni.
Mi thenkhat hi chuan Delhi lamah hian BJP an hlau lo hle mai a thawhpui te pawh an duh viau a ni awm e, nimahsela Mizoram ah chuan hlau leh tlat te pawh an awm mai thin. Politics hi mahni tan khel tawh lo ila, kan ram leh hnam dam nan chauh ke pen zawk turin ka Candidate pui te pawh ka sawm che u a ni.
Mizoramah chuan hmasawnna duh, ram hruaitu intelkhawm Kan mamawh sawichhuak thei tur ten sorkarna kan siam dawn a ni. MLA leikhawm tum ah te minlo ngai ange, Kan lei dawnlo. Kan ram hmasawnna duhtute erawh kan thawhpui dawn a ni. Politics ah ka tello ti a bang thei tumah kan awmlo a. Mizo Kristian te hi hmasawn tur kan ni, ngai renga awm ve ringawt tur kan ni lo a ni. Kohhranin hma a sawn nante , kan chanchintha hrilhte pawhin awmzia a neih theihna turin Ramin hma a sawn a ngai a a, Chuvangin, Vote thlak hi Kan bat a ni a, Mizoram hmalam hun, nang leh kei, kan tu leh fa te hmalam hun hi ka kutah a awm a ni tih hria in, Mizoram leh Hnam dam nan leh hmasawnna dik tak a lo thlen theih ngei na tur in BJP Vote theuh turin bial mipui te leh mizo mipui te ka sawm che u a ni a ti bawk.
Post a Comment
He post chungchanga i ngaihdan lo sawi ve rawh: