#JUSTICEFORZOTHANSANGA MOVEMENT KAL ZEL, THALAI RUAL TAM TAMIN KAWNG ZAWH

Kawng zawh ve thei lote pawhin an dawr atangin..... 

Aizawl | November 24, 2018: Zothansanga chunga thil thlenga avanga a thlavang hauhna ‘#JusticeForZothansanga movement chuan reh lam aiin a alh sang zel a. Vawiin khan Zofate Insuihkhawm Pawl huaihawtin Aizawl khawpuiah kawngzawh a ni a, he hunah hian dikna duh thalai tam tak an fuankhawm. Nizan khan Zarklawt Thalaiten kawng kawng an lo zawh tawh bawk a ni.

  

Kawng zawh tan a nih hmain Zofate Insuihkhawm Pawl te hian Khatla YMA Run-ah Federal Emergency Meeting an nei a. September ni 7 zana Zarkawt tlangval Zothansanga chunga thil thleng chungchang an ngaihtuah a, meeting neih zawh hian Khatla atangin kawng an zawh a, placard te kengin Zothansanga dikna humhim tur leh thil tisualtua puhte hremna pe turin an au rual. Aizawl PS kawtah kawng zawhtute hi an aurual hnuah Zarkawtah Zothansanga te in bul thleng mipui pungkhawmte hian kawng an zawh. 

 

Vawiina Zothansanga thlavang hauhna kawngzawhah hian mi an tam hle a, a tir chuan mi 200 pawh tling lovin kawng an zawh a, an zawh thui telh telh a an pung zel a, Treasury Square an thlen chuan an tam tawh hle a. Aizawl Thana an thlen meuh phei chuan an tam tawh hle a ni.

 

Zarkawt thalaite chuan nizan khan Zothansanga dikna leh chanvo humhalh a nih theih nan hnatlang an lo nei tawh bawk a. Dikna an duh tih lantirnan Posters te kengin Stickers te an sem a, Zarkawt thalai te hian an veng tlangval tawrhna hi an tuarpuiin, rapthlak an ti a. An veng mi mai pawh ni lo, Mizo mipuite he ramah hian kan him a, kan lo zalen a, Dikna a lal zel theih nan he hnatlang hi an huaihawt tih an sawi.

 

Nizana kawngzawhtute hian kan ramah dikna tundin a nih theih nan theihtawp an chhuah zel tur thu an sawi a, an thil duh leh phutte ziakin an tarlang.

.

Vawiin a kawngzawhte hian an thalaipui tawrhna avanga FIR thehluh bawhzui a nih danah thil felhlel a awm niin an hria a. Vawiin thlengin thil tisualtu nia puh hi charsheet a la ni lo chu hriatthiam har an tih thu an sawi a, he thil thleng hian Mizoram hmun hrang hrang leh Mizoram pawn thlengin Social Media lamah nghawng a nei lian hle a. He thil thlawptu hi an tam hle niin an sawi. 

 

Thalaite hian mahni sum sengin hma an la a, Mizoramah dikna a lal ber theih nan hetiang hnatlang hi an huaihawt tih an sawi. An thalaipui tawrhna avanga an thiltih hi tlawmsan mai an tum loh thu sawiin, a tawp thlenga kal an tum tih an sawi.

-With inputs from MSR

Thu hmalam hre duh tan - hetah - 

Online Petition sign duh tan - hetah -