CEO LEH A HMALAKNA DUH LOHNA KAL ZELAH KOLASIB DISTRICT-AH MOTOR DANG

Aizawl | November 5, 2018: Mizoram Chief Electoral Officer SB Shashank in Mizoram inthlan chungchanga a hmalakna chu duh lovin Joint NGO – Co-ordination committee chuan a dodal a, Vawiin tlai dar 5 thleng Mizoram a awm hun an pe a, Mizoram a chhuahsan loh chuan hma lak an tum.

Hemi nena inrualin, CEO in Mizoram inthlanpuia duty tura State pawn atanga Sipai a chah luhte rawn luhna tur motor ten Assam an pan tur chu dan tuma hma lak a ni a. Kolasib district leh khawpui hrang hrangah dang turin mipui an inhawrkhawm a, an dang mek nia thu dawn a ni.

Kolasib ah NGO hmalaknain motor hi dan a ni a. Mipui an pungkhawm hnem hle nia hriat a ni bawk. 

Motor engzat nge an dan tawh tih hriat a la ni lova. Kawng lakah chambang an la awm nual nia hriat a ni bawk.

Rengtekawn, Bilkhawthlir leh Vairengte-ah pawh Sipai lakluhna tur motor dang tur hian mipui an pungkhawm mek niin Social Media hrang hrangah hmuh a ni a. Kolasib lam chanchin an ngaichang mek nia hriat a ni.

Mizoram inthlanpuia duty tur Sipai hi CAPF niin, Company nga (5) an ni a, Mi 500 an ni. Tuna an dan mek hi heng Sipaite phur tur Aizawl City Bus te an ni.