GOVT. T. ROMANA COLLEGE AH CULTURAL DAY ROPUI

- Zonunsanga Khiangte

Govt. T Romana College ten ‘Aia Upa Zah’ tih thupuia hmanga anmahni college hmun, Republic Vengthlanga Cultural Day an hman ni hnihna, nimin (18.10.2018) khan khuallian atan min sawm teh tlat a, hnar phal bik lovin kan (MJA) General Secretary Pu C. Lalhmachhuana leh kan Secretary 3 te nen a then Pu Mama motor-in kan kal a. Gate luh dawn atanga kawngsir lehlam lehlama min karcheha Khuallama min lo hmuak mai chuh....an ruala muang tea kal a ngai si a, mi zawng zawng chu kan lam an lo hawi thup mai bawk si, ka awmdan ka sawi thiam chiah lo, engtin emaw hian ka awm chem chem a ni ber awm e.

Thutna tur hmun kan thleng fel chu, Tlangau a rawn au ta lauh lauh a, Hlado chham leh silai kahin a zui, chutah ‘kan intawng leh ang tih tal min tiam rawh’ tia Lalhriatpuia leh Lalliankimi te an han duet mai chu an thiam ngei mai. GTRC Principal Dr. Lalrintluanga’n inlawmthu thlum tak, zahawm tak siin a sawi a. An day thupui sawi kaiin, Mizote chu kan pipute atangin midangte aia thawk tam zawk, ei tlem zawk nih tum thin kan ni a, chutiang chu thangtharte pawhin kan neih chhoh zel a pawimawh a. Aia upa zah hi Mizo nun zemawi a ni a, tunah pawh ala mawi rengin a Kristian em em a ni, tih te a sawi a. 'Aia upa zah' tih thupui hmanga GTRC faculty senior ber Pu K. Biakthianghlima thusawi ngaihnawm tak kan ngaithla bawk.

GTRC hian lam leh zai entir tham Mara, Lai leh Chakma zirlai an lo nei a, culture a hausa tak mai an lo ni hrim hrim mai a. Heng Mara, Lai leh Chakma zirlaite zai leh lam, mit leh beng titlai tak mai han thlir te chu a manhla viau mai. Cheraw, Inkawibah, etc hmuhnawm tak tak kan sawi seng lo vang. Cultural Day puala Exhibition an buatsaih lamah han peng ila: GTRC zirlai nula hmeltha tak tak ten Mizo lasai, lachawn, la hlum dan etc ‘live’ ngei maia an lo entir te, live ngei maia buh an lo thlei te chu hmuh manhla tak a ni a. GTRC tena an lakkhawm ve Mizo thil hlui chi hrang hrang leh Mizoram State Museum ten item thahnem tak an entir te chu en manhla tak vek an ni.

Mizo Muffler min pek awrha Khumbeu min pek khum chung ngatin, hun min pekah thu ka sawi ve teuh mai a: Mizorama college engemawzat awm zingah hetianga Cultural Day hmang thei hi tam an awm lo nia ka hriat thu leh, Cultural Day hmang ni mai lova 'Aia Upa Zah' tih thupuia an hmang lehzel chu ropui ka tih thu te; Mizote nunah aia upa zahna a tlahniam tial tial nia lang chu pawi ka tih thu leh, Aia Upa Zah chu thupuiah hmang ringawt lovin, GTRC zirlaite chuan a takin nunpui se, GTRC zirlai sang rualin a taka an hmana midangte tana entawn tur an siam chuan awmze thui tak a neih ngei ka rin thu te, Govt. TRC zirlaite chu Zonun zemawi chhi engtu, ‘danglam bik’ ni se, Govt T Romana College chu Mizoram college te zinga Mizo Culture Main Centre ber anga hriat an la nih a beiseiawm thute ka sawi a.

(Website a fakna awm hi lo click ve ta che.)

Govt. TRC awmna veng, Republic Vengthlang chu tunhnaia AMC-in Aizawl veng fai a thlanah pakhatna an ni a, veng fai ber an nihnaah hian Govt TRC pawhin tha an thawh ve ngei ka rin thu te leh, Hriselna lama hmalaknaah Anti Tobacco Club te an din theih phei chuan GTRC chu hetiang lama hmahruaitu pawimawh tak an nih theih thute bakah, GTRC chu hnam hrang hrang lawi khawmna a ni a, MJA chuan chi leh chi inngeihtlanna (communal harmony) a ngai pawimawh em em a ni tih te ka’n sawi tel hram bawk.

Mizo thlengpuiah changel hnah phahin kan kil kual a, an chawchhun min buatsaihsak tui tak mai kan han ei mai chu tum aia ei puar a awl hle mai. Anni chuan chhun thingpuiah Mizo chhangban, kurtai leh thingpui sen an kilho a, tlaia ruai ropui tak theh tur a ni a. Chawhnu lama chhawnghnawh leh item dang tam tak an la neih turte chu hmanpui zel chak hle mah ila, programme dangin min hmuah si avangin chawchhun eikhamah keini chuan kan hawsan ta a ni. Cultural Day Organising Committee Chairman Pu C. Laldinsanga leh a hoten an tlin cher cher hle mai.

Govt. T Romana College hi kum 1992-a din a ni a, Arts college niin subject hrang hrang 8 (pariat) zir theih a ni a. Kum 2018-2019 session ah hian zirlai 1073 leh thawktu 58 an awm mek. National Assesment & Accreditation Council (NAAC) accredited college niin 'B' grade accreditation an nei a; an college hmun leh a boruak hi a nuam hle a ni.//