GOVT. ARMED VENG M/S CHUAN SCIENCE FAIR AN BUATSAIH

Aizawl | October 19, 2018: Aizawl DC Dr. A. Mathumma, SSA Aizawl District leh Pratham Science Foundation, Mumbai hmalakna "RAHBI" Pilot Project kal zelah nimin ni 18.10.2018 (Ningani) khan Science zirna lam tih hmasawnna tur atan Govt. Armed Veng Middle School chuan zirlaite tan Science Fair an buatsaih a. Pu H. Vanlalhruaia, BRCC, Aizawl East, Mizoram SSA chu Khuallian niin, he Science Fair hawnna hi a nei nghal a ni. Khuallian Pu H. Vanlalhruaia chuan thusawiin, science fair hi Govt. Middle School level-ah neih chhoh zel tum a nih thu a sawi a. Naupangte’n an thil zir ataka an khawih leh hrilhfiah tluka hlu leh hlawhtlinna a awm loh thu a sawi bawk. Science-ah chauh ni lo Subject dangah pawh tih theih vek anih thu leh tih zel tum anih thu a sawi lang bawk a ni. Pi Lalneihkimi, Resource Person, Chhinga Veng BRC chuan Science Fair briefing leh thusawinna hun a hmang bawk a ni.

(Website a fakna awm hi lo click ve ta che.)

Govt. Armed Veng Middle School chuan he Science Fair-ah hian model 38 lai an entir thei a. Science model atan hian hmanraw ho leh awlsam té tê, man tlawm tak tak an la khawm a. Naupangte hian an model-te chu hrilhfiahin, thlirtute zawhna neihte an chhang bawk a ni. School tamtak leh vengchhung mipuiten an hlut sak hle a, Science Fair chhimtu hi mi 700 chuang an awm a ni. Sawrkar School zirlaite Science lamah an thangharh mek zel a. Hmasawnna tamtak an chhar chhuah belhin, Science subject chu an tuina ber subject a ni chho mek zel a ni.

He "RAHBI" Pilot Project hi Mizoram Rural Bank-ten an finance a ni.

- MSR