MPCC Treasurer-in vote tihchinpenna thleng chungchang, SIR leh CEC chungchang sawi

Aizawl | Nov 17, 2026: MPCC Treasurer Dr Lalmalsawma Nghaka chuan vawiin khan Aizawl Press Club-ah thuthar thehdarhtute kawmin, India rama vote tihchinpenna thleng chungchang, SIR leh Chief Election Commissioner chungchang a sawi. 


Eng nge Vote Chori
Tun hnaia India rama zawhna pawimawh ber mai chu mitinin Danpuiin vote thlak theihna a pek hi an hmang thei em, tihleh inthlanna institution hi zalen takin a kalpui em tih hi a ni. 

Election Commission chuan Special Intensive Revision (SIR) hmangin Vote Chori a kalpui a, hei hi thil kalphung a ni. Mahse, tunlaia SIR kalpui danah thil fello aawma ngaiin Congress chuan electoral roll-a belh leh paih, hming inang vawihnih ziahluh, election data lang tlang lo, EVM leh VVPAT hnathawh dan, leh Election Commission hnathawh dan inthlan hrang hrangah zawhna a siam tawh a. 

Rahul Gandhi leh Congress hruaitute chuan bial tinah data leh inthlan khaikhinna hmangin vote inruksakna a awm ngei tia rinhlelhna an tarlang fo. A pawimawh zual te chu - 7 February 2025 khan Maharashtra-ah press conference ko tawhin Mahadevapura constitutency a thil inmil lo te mai bakah November 2025 khan Haryana chungchang, leh September 2026 khan Election Commission chhunga inngeih lohna chungchang an puang bawk a. Heng hi SIR atanga intan chauh ni lovin, data, mipui thlirna leh insitution mawhphurhna thila zawhna chhunzawm zelna a ni. 

Maharashtra leh Voter pun thut chungchang 
7 February 2025 khan press conference-ah Rahul Gandhi chuan NCP hruaitu Supriya Sule leh Sanjay Raut te nen, Lok Sabha 2024 leh Maharashtra Assembly inkarah voter nuai 39 vel belh a nih thu a sawi a, kum 5 chhunga voter nuai 32 belh nen khaikhinin heng voter belh te hi tu te nge an nih, engtik laiin nge an inziahluh, engvanga hun tlem te chhunga pung thut nge tih sawifiahna a phut a ni. Hetianga voter pun thutna hian data langtlang leh machine-readable pek chhuah leh hman tel a ngai tih a tilang.

Mahadevapura a vote chori 
7 August 2025 ah Rahul Gandhi chuan Bengaluru Central hnuaia Mahadevapura Assembly bial zirchianna a tarlang a, vote 1,00,250 chu thil chhan hrang hrang 5 avanga a fellohna hmuhchhuah a ni - hming inang vawihnih ziahluh, thlalak dik lo, Form 6 hman sual leh entry rinhlelhawm dang te. Heng hi zau zawk zawka zirchian a ngaih thu a sawi. 

Indian Express Zirchianna, ECI chhung atanga Dodona
Thil pawimawh tak chu 25 September 2026 a The Indian Express zirchianna tihchhuah kha a ni. Election Commissioner pahnih Sukhbir Singh Sandhu leh Vivek Joshi te chuan thla 10 chhung in vawi 14 lai CEC Gyanesh Kumar thutlukna an dodal thu phochhuah a ni a, chung zingah chuan Form 6 chungchang pawh a tel a. An dodona te chu - an hriat loha thutlukna siam, voter hming belh leh paih, electoral roll database chhawr theihna, voter data centralisation leh software rintlak loh chungchang te a ni. 

SIR
Zirchianna chuan SIR hmangin State leh UT 30 ah draft electoral roll atangin hming vaibelchhe 13 chuang paih a nih thu a tarlang. West Bengal bikah Supreme Court in voter nuai 60 vel logical discrepancy tia sawiin a inrawlh a; report in nuai 27 vel paih tawh a, tribunal-a appeal nuai 38 vel tling tawh a. Draft roll atanga paih leh atawpa paih tak tak leh appeal pending te hi thil hrang a ni tih hriat hran tur a ni.  

Commissioner-te dodalna chungchanga ECI chhanna
Indian Express thupuan hian Commission chhunga langtlang leh thutlukna siam dan chungchangah zawhna a siam. ECI erawh chuan an chhungah inngeih lohna a awm tih chu a hnial a, ngaihdan inang lo leh thil hmuh dan inang lo chu thil pangngai a ni a, SIR chungchanga thutlukna chu lungrual taka pawm a niin a insawi thiam thung. Chuvangin, Congress chuan record leh dodalna, chhanna leh thutlukna dik tak te tlangzarh turin a phut a ni.

Gyanesh Kumar mawhphurhna zawhna 
He buaina hi Chief Election Commissioner Gyanesh Kumar kutah a thuktakin a innghat a, Congress chuan Election Commission chu a zalenna leh mipui rinna chhe zawngin a thawk niin a puh. September 2026 zirchianna hnuah Rahul Gandhi chuan RSS-BJP leh ECI chungchangah puhna a thar thawh leh a, Congress hruaitute chuan Gyanesh Kumar banna leh chhui chianna rintlak neih an phut. Mipui zawhna ber chu - zalen leh fair taka inthlan kalpui tura mawhphurtu constitutional authority hian langtlang takin thil a kalpui em? Electoral roll enkawlna chungchanga zawhna lian tak te an chhang thei em?  

CEC appointment dan thlak danglam 
Kum 2023 khan parliament in CEC leh Election Commissioner appointment dan a siam danglam a. Tun hma chuan Prime Minister, Leader of Opposion leh Chief Justice of India te chu member niin an tel a; kum 2023 Act hnuaiah Chief Justice aiah Prime Minister in a ruat Union Cabinet Minister a tel ta a ni. Congress chuan he dan siam danglam hian sawrkar thuneihna sangtak pek niin anduh apiang appointment an pe thei tiin a duh lo hle a ni.

2023 Dan leh Election Commissioner te humhimna 
He dan thar 'Chief Election Commissioner and Other Election Commissioners (Appointment, Conditions of Service and Term of Office) Act, 2023' bawk hian Section 16 a rawn keng tel a, CEC emaw Election Commissioner ni tawh emaw ni lai emaw chu an hna an thawh avanga civil emaw criminal emaw thubuai laka humhimna a pe. Congress chuan he 'lifelong immunity' hi mawhphurhna tihhniamna a ni a ti a. A dik tak chuan official duty a nih avanga humhimna a ni a, thil sual zawng zawng huapna anga sawi tur a ni lo a ti a ni.








| EXPLORE MIZORAM |
• Mizoram's Most Trusted Website | Mizoram's Online Encyclopedia •


[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]

Post a Comment

He post chungchanga i ngaihdan lo sawi ve rawh:

Previous Post Next Post