Tuihawk leh chirh tam avangin rel tlan a khaihlak, tangkhang thahnem tak Bus in hruai mek!

Aizawl | Oct 1, 2026: Tuihawk leh chirh tam avangin rel tlan a khaihlak, tangkhang mi thahnem tak Bus in hruai mek!

Ruah sur nasa avangain nimin khan Bairabi bulah leimin avangin chirh leh tuihawk tawlhin Rel kawng a ti buai a. Phai lam atanga Sairang rawn pan Rel te chu nizan khan Hailakandi thleng bak an tlan ngam lo. Mizoram rawn pan passenger tangkhangte phur turin nizan la la khan Railway company leh car tental neitute tangkawp chuan hma la nghalin nizan khan Bus 20 vel Bairabi lamah an thawn thla nghal a. Heng bus te hi Bairabi thleng thlain Passenger te Aizawl lam an rawn panpui mek niin hriat a ni.

Tukin dar 10:30 thleng khan, Rel passenger tangkhangte hi an tam tham ve deuh a, Bairabi atanga bus in Aizawl lam a rawn panpui te hi thenkhat chuan Bualpui an rawn thleng tawh a, thenkhat erawh la hnufual deuhte pawh an la awm niin thu dawn a ni.

Hetihlai hian, Hailakandi (Assam)-a passenger tangkhangte chu Railway lamin Bairabi thlenga an kalna tur an ngaihtuah niin hriat a ni a. Khualzin te leh an chhungte chiai lo turin Railway lamin an ngen bawk.

Nimin tlai atanga ruah bawhawk surah Rel kawng hrula tui luankawr / drain chu lei minin a hnawh chiam mai a, hei hian tui leh chirh tam tak rel kawng lamah a rawn ti liam ta a ni. Rail Construction Deptt. lamin vawiinah tuikawng hnawhtu hi an thianfai dawn a. Rel kawng hrula phum Optical Fiber Cable (OFC) te an endikin siamthat ngai a awm chuan an siamtha nghal ang. A tul anga hma lak zawh a nih hnuah Rel a tlan theih leh theih thuai beisei a ni.

Optical Fiber Cable hi Rail kawng bul zelah phum a ni a. Hei hi Rail tlan dan Signal inthawna pawimawh tak a ni a, hemi a nih avang hian a tlanna kawng (track) hi tha mahse, signal a that loh chuan an service ngam lo thin a, lei min leh chhiatna dang thleng thinah Optical Fiber Cable hi en kawp zel a ngai thin a ni.

~ Vanneihthanga Vanchhawng

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]