State Senior Citizens Home-ah International Day of Older Persons hmang

Aizawl | Oct 13, 2026: National Programme for Health Care of the Elderly (NPHCE) leh NP-NCD programme, National Health Mission buatsaihin vawiin khan State Senior Citizens Home, Aizawn-ah International Day of Older Persons hman a ni.

He programme hi PL Lianmawia, Home Welfare Officer, SSCH in kaihhruaiin, Pathian hnena hlanna hun a hmang a. Kalkhawm kum upate tana programme buatsaih a ni chu Health Department te chungah lawmthu a sawi. State Senior Citizens Home chu March 1, 1989 a din tan a nih thu sawiin tunah hian kum 60 chin chunglam mi 10 enkawl mek an awm thu a sawi a. A din tirh atangin vawiin thlengin Kum up ate mi 84 enkawl tawh an nih thu a sawi bawk. Thawktu mi 9 awm mek in tunah hian sawrkar in mi 25 awm theihna tur a buatsaih mek a, chak taka hmalak mek a nih thu a sawi bawk.

He home hi Mizoram Sawrkar, Social Welfare Department hmalakna a din a nih thu sawiin Kum 60 chunglam, mipa leh hmechhia chawmtu leh enkawltu tur, chhungkhat laina nei mumal lo leh vanduaina hrang hrang avanga baihvai taka awm ten hlim leh thlamuang tak leh zalen taka an nun an hmana an belh atan Sawrkar in a din a nih thu a sawi bawk.

Dr Catherine Lalmuanawmi, Deputy Director, DHME leh State Nodal Officer, NPHCE & NP-NCD chuan Day hman a nih chhan leh Kum upate enkawlna hmuna hman a nih chhan sawiin Home Welfare hotute chungah lawmthu sawina a nei a. International Day of Older Persons chu kum tin October 1 a hman thin a nih thu leh rokhawlhna engemaw a awm avanga remchan zawkna avanga vawiin a hman a nih thu a sawifiah.

Dr Catherine chuan Kalkhawm kum upate chu an hlutna leh an zahawm thu sawiin hriselna tha zawk nei a nun nuam leh tha zawk an hman a duhsak thu a sawi a, rei tak dam a hriselna tha tak nei zel turin duhsakna a hlan a. Mizote hrisel taka awma nunphung tha tak nei a pianpun kan mamawh thu a sawi bawk. National Health Mission hnathawh hrang hrang sawifiahin NHM chu State sawrkar tichaktu tura din a nih thu a sawi a. Chumi hnuaiah chuan Day hmangtu leh buatsaihtu NPHCE programme hmalakna hrang hrang a tarlang bawk. Kum upate chu regular taka an hriselna endik a incheckup uar turin a chah a, eitur tha leh tha lo te, nunphung tha zawk an neih theihna tura tul hrang hrang te a zirtir bawk.

Dr. Martin Chawngsailova, Consultant, NP-NCD in Free clinic neih dan tur chungchang te hlawk taka an hman theihna turin hriattur pawimawh hrang hrang te a sawi a. Pu K. Laldawngliana, Secretary MUP Ainawn in kum upa te ngaipawimawh a programme tha tak an buatsaih sak avangin NPHCE Nodal Officer leh Staff te chungah lawm thu a sawi a. MUP member kum upa ten an ngaihhlut thu leh lawmawm an tih thu a sawi bawk.

Programme hman zawhah hian Free Clinic (A thlawna inentirna) neih a ni a, Home-a awm te bakah MUP member mi 84 te hriselna endik an ni a, an mamawh damdawi hrang hrang te a thlawn a sem a ni bawk. Free clinic-ah hian Medicine, Mit, Beng, TB, Tha, Dietician mithiam ten an hriselna endik hna an thawk a ni.