PATHIANIN RINNA A ṬHANTIR DAN

_Keimahni Kan Ni E_ 

* By Rick Warren  

* October 26, 2026 

“Amahah chuan zung kaiin, amahah chuan in nunna chu rem chhohin awm rawh se. Tichuan an zirtir che u thutakah chuan in rinna a ṭhang lian ang a, lawmna hlirin in luangliam ang."(Kolossa 2:7, NLT) 

Pathianin rinna satliah nei turin a duh lo che. Hun harsa a lo thlena rinhlelhna lo lang leh mai tur ni lo vin, rinna chak zawk nei turin a duh che a ni. 

Bible-in Kolossa 2:7, “Amahah chuan zung kaiin, amahah chuan in nunna chu rem chhohin awm rawh se. Tichuan an zirtir che u thutakah chuan in rinna a ṭhang lian ang a, lawmna hlirin in luangliam ang.” (NLT). 

Engtinnge chutiang rinna chu Pathianin a ṭhanlen tir? 

Pakhatnaah chuan Pathian Thu hmangin a ṭhanlen tir. Bible Thu chu— chhiar turin, ngaithla turin, zirchiang turin, vawng turin leh sawi turin a duh che a ni. Engvang nge? Pathian thu chuan, “Rinna chu hriatna avângin a lo awm ṭhîn a; tin, hriatna chu Krista thu avângin a lo awm." Rom 10:17 

I rinna a chaklo anih chuan, Bible i chhiar ngai lo hle tihna a ni. Bible i chhiar tam poh leh i thlarau chu a chawm ang. Pathian Thu chu thlarau chaw a ni a, a Thu kan chhiar chuan rinnaah kan ṭhanglian thei ang. 

Rinnaa ṭhanlen dan dang lehah chuan - a harsa lam deuh a ni a - kan nuna thil thleng hmangin kan rinna chu fiahin a awm ṭhin. Bible chu nitin hun reilote i chhiar mai thei a. Nimahsela nitin darkar 24 chhungin thil hrang hrang a thleng thung si a ni. I nuna thil lo thleng te chu Pathianin i rinna ṭhantir nan leh i nun siamṭhat nan a hmang fo ṭhin. 

Rinna chu tihrawl ang deuh hi a ni. Engmah thawk lo vin tihrawl a ṭhantir theih loh. Ritphurh te, hnathawh te, zuan vel te hian tihrawl chu a lo chak ṭhin. Chutiang chiah chu rinna pawh a ni. Engmah ti lo leh ṭhu mai mai chungin, "Rinna chak zawk ka duh"  a tih theih loh. Rinna chu fiah a ngai ṭhin a. Pathianin in chunga thil lo thlengte hmangin in rinna chu fiah a phal ṭhin a ni.  

A chhan chu Pathianin i rinna hi a ngaihtuah em em a ni. Hetianga i ṭawngṭai a chhang fo vang che: “Kan rinna tipung ang che” (Luka 17:5). Pathianin a Thu leh thil thlengte hmangin i rinna a ṭhantir zêl lai hian, chu chu i ṭawngṭainaah telh bawk rawh. 

Ngaihtuah zui atan 

* Pathianin a Thu hmanga i rinna a tihchak dan entirna pakhat pe rawh? 

* Engtinnge thil thlengte hmangin Pathianin i rinna a fiah? Jeremia 29:11 chuan, "Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin." He chang hian i nunah engtinnge thlamuanna a pek che? 

* Mumal taka taksa i sawizawi hian engnge a rahchhuah ṭhin le? Pathian Thua hun i hman tam hian thlarau lamah engnge danglamna i beisei le? 

*[Lettu: Sangpuia]*