Commonwealth Cue Sports Championships-ah India aiawhin Mizo tlangval Lalrina Renthlei

Aizawl | Oct 7, 2026: Commonwealth Cue Sports Championships-ah India aiawhin Mizo tlangval Lalrina Renthlei inlan dawn. The Commonwealth Cue Sports Championships 2026 chu Veer Savarkar Sports Complex, Ahmedabad ah vawiin khan Opening Ceremony neih a ni a, naktuk aṭangin inelna ṭan a ni ang.

He Commonwealth Cue Sports Championships ah hian ram 40 chuang aṭangin Mipa leh Hmeichhia player 144 inlan tura beisei an ni a, game discipline 5: Snooker, Billiards, Blackball, Heyball leh 10 Ball Pool ah te inelna neih a ni ang. Hetah hian 10 Ball Pool event ah Mizo player ṭha Lalrina Renthlei pawh India aiawha khel tura thlan a ni a, vawiin khan Ahmedabad a thleng.

India ram aiawha khel tura thlan a ni leh ta hi Mizoram Snooker & Billiards Association chuan kan chhuangin kan lawmpui hle mai a, result ṭha tak nei turin Lalrina leh India team te duhsakna sang ber kan hlan a ni. Tin, Lalrina bakah hian BSFI Vice President (MSBA Sr. Vice President ni mek) Vanlalnghaka pawh he Cue Sport inkhawmpuiah hian a tel ve bawk a ni.

He Championship hi October 8 - 10, 2026 chhunga khelh tur a ni a, Billiards & Snooker Federation of India in a thleng a, Apex Sports Promotion in an organize ve thung a, Commonwealth Sport leh World Confederation of Billiards Sports (WCBS) hriatpuina leh pawmpuina hnuaia khelh a ni bawk.