Chin state-a Myanmar sipai sorkar dotu hel pawl lian pahnihten inremna thuthlung an ziak

Aizawl | Oct 19, 2026: Chin state-a Myanmar sipai sorkar dotu hel pawl lian pahnihte chuan Zirtawpni (oct 17) khan Aizawlah inremna thuthlung an ziak.

Thu lakna tarlan danin, Chin pawl lian pahnih Chinland Council (CC) leh Interim Chin National Consultative Council (ICNCC) aiawhte hi vawiin khan Aijal Club-ah an inbia a, inremna siamin, pawl pakhata inchhun luh an remti a, an insuihkhawmna pawl hming atan hian Chin National Council (CNC) vuah an remti bawk.

Chin ralthuam keng pawlte inbiakna hi Chief Minister Pu Lalduhoma din 'Advocacy Group for Peace (AGP)' te buatsaih a ni a. Advocacy Group for Peace in CNC dinna tur rawtna an siam a, chu CC leh ICNCC te hian pawmin he insuihkhawmna pawl thar hi Chin pawl hrang hrangte inkara inremna a awm theihna atan leh Chin mipuite duhdan tipuitling tura lungrual taka thawhna tur pawl a nih thu an sawi.

He pawl din tipuitling tur hian Advocacy Group for Peace ai-awhte leh CC leh ICNCC aiawhte chuan Steering Committee din an remti a. CNC a taka din a nih hma chuan Steering Committee hian a thuikhawm rih dawn a ni.

Hei bakah hian inkaihhaina viltu tur ‘joint ceasefire monitoring committee’ din a ni a, he committee-ah hian Advocacy Group leh CC leh ICNCC aiawhte an tel a. Chin pawl pahnih inkara tharum thawhna emaw ralthuam nen emaw leh chutiang tel lo pawha innghirnghona awm thei reng reng chu tihtawp nghal an remti a. An inhmuhkhawmna a an thutlukna lian tak chu CNC Constitution duangtu tur Committee din a ni a. CNC din tak tak hma a lo kengkawhtu tur transitional committee din an remti bawka. Hetah hian CC leh ICNCC aiawhte telin Advocacy Group chu a viltu-ah an tang ang. Constitution-ah hian Chin mipuite duhdan bilh lutin hun lo awm zel tura Chin mipuite politics hmakhua tihpuitlinna atan a ni ang.

CC palai 9-te zingah hian hruaitu lawk Salai Men Nyo, Jacob V. Zawma leh Thang Ning Kee te an tel a. ICNCC palai 15 zingah hian Thang Chawn Pe, Salai Lian Luai leh Steven Pa Bia te an tel bawk.

- Zawlbuk Today