YMA Sakawrtuichhun Branch leh 191 Bn BSF tawngkawpin thalaite fuihna hun buatsaih

Aizawl | Sept 8, 2026: Young Mizo Association (YMA) Sakawrtuichhun Branch leh 191 Bn BSF, SHQ Aizawl chuan nizan September ni 7 khan Army lak tur atana inbuatsaihna Pre-Recruitment Training an kalpui mekah training mekte fuihna programme an buatsaih.

He programme hi YMA Sakawrtuichhun Branch Secretary Dr Ricky Lalhmangaihzuala in a kaihruai a, Vice President Er Lallawmzuala Pautu-in inlawmna thuchah bakah inhmelhriattirna hun a hmang a, Chumi hnuah 191 Bn BSF Commandant Ashutosh Kr Chouhan chuan thusawiin thalai-te hmasawnna tur leh khawtlang tana an thawhpuinaah YMA-in hma a lak thin chu lawmawm a tih thu a sawi a. Training kal mek thalai-te pawh an rilru put hmang, discipline neih leh an career-a an tum thlen tura an inpekna avangin a fak bawk.

Commandant chuan thalaite hnenah an training leh an inbuatsaihna tihchak zawkna turin 191 Bn BSF-in a theih ang angin tanpuina leh kaihhruaina a pek dawn thu a hrilh. YMA Sakawrtuichhun-in khawtlang tana rawngbawlna tha tak a neih leh BSF-te nena thawhhona leh tanpuina a pek thin avangin lawmthu pawh a hrilh bawk.

Civic Action Programme kalpui mek zelah, khawtlang tana inpekna leh thawhhona entir nan, Commandant chuan YMA Sakawrtuichhun hennah Dekchi lian tak pathum a hlan a. BSF leh Sakawrtuichhun Branch YMA te hian khawtlang tan lungrual taka thawhho zel an tum a ni.

He hunah hian, thalai hna zawng lai 33, Mipa 18 leh hmeichhia 15 an tel a ni.