USA Zofate Unity conference hmang

Aizawl | Sept 28, 2026: USA Zofate Inpumkhatna Inkhawmpui vawi khatna atan Zirtawp zan leh Inrinni chawhma khan Mizo Christian Church, Indianapolis, USA ah ropui taka hman a ni. He Zofate inpumkhatna Inkhawmpui hi Zoram Thar headquarter Mizoram leh Zoram Thar USA Branch te ṭangkawpa buatsaih a ni.

Inkhawmpui hi Mafeli Hlawndo leh Rebecca Mawii ten hneh takin an kaihruai a. Zo hnahthlak ṭawng hrang hrangin Pathian fakhona nung tak neih a ni. PRAISE & WORSHIP a musician te chu Guitarist: Vanza & Elliot, Bassist : Amos, Drummer Vanlian leh Pianist Peter te an ni.

Inlawmna hla Indiana Mizo Upa Pawl USA leh Indiana Mizo Society of America ten an sa a. Rev. Dr. Zaichhawna Hlawndo lehkhabu ziah thar 70 Reflections on Christianity, Nationality and Politics tih bu chu Rev. Dr. Thlaawr Bawihrin, Founder Zophei Baptist Church USA in a tlangzarh.

Zo hnahthlak zaithiam hrang hrang Laldinthara, Rachel Hniang, Cing Sian Lun, San Cing, Nango Khithie ten ṭawng hrang hrang Mizo, Zomi, Mara leh Falam ten thiam leh nung takin an zai a. Zaipawl leh Group zai Zomi Choir, Echoes of Grace lehZophei Trio te mawi takin an zai. Pathian fak lam Bethel Chin Baptist Church Nuho leh Chin Evangelical Baptist Church ṭhalai ten thiam takin an nei bawk.

Inkhawpui chhan ber USA Zofate inpumkhatna thu Zirtawp zanah Rev. Dr. Pau Khan Khai, Zomi Baptist Churches of America President, Mr. Elaisa Vahnie, MPA, Burmese American Community Institute CEO, Naw Eh Phaw, Counselor, Chin Theological College leh Dr. Rena Gainey, Arise to Lead founder ten an sawi. Inrinni ah Rev. Dr. Hre Mang, Senior Pastor Falam Christian Church of Indiana, Rev. Vanlaldinga (Ret.), Senior Pastor, Mizo Christian Church, Rev. Dr. Thang Za Pau, Founder, Myanmar Samaritan Mission leh Rev Dr Hrang Hlei, General Secretary, Chin Baptist Churches USA ten an sawi thung. Rev B Thangzauva’n (Indiana Mizo Presbyterian Church) ṭawngṭaina in inkhawmpui a ṭin a ni. An thusawi a ṭhain a ngaihnawm a, inpumkhatna pawh an ngaipawimawh hle a ni tih a hriat theih. Heng thusawitute hi USA kohhran leh khawtlang hruaitu pawimawh tak takte an ni.

Resource Person Zoram Thar President Rev Dr Zaichhawna Hlawndo chuan Zofate hi thlahtu bul thuhmun vek kan ni a. Kum tam tak kan bo tawh avangin unau hmelhai te pawh a lo awm ta hial a. Pathianin hun hnuhnungah hian Zofate min tih pumkhat a, khawvel tana eng ni turin min buatsaih mek a ni a ti. USA Zofate inpumkhatna pawimawh thu sawi a. Kan inpumkhat rihlohna chhan bul ber chu kan hnam nihna (national identity) ah kan chian loh vang a ni a. Kan hnam nihna (national identity) ni a kan lo hriat Chin, Kuki, Lushai tihte hi Kawlho, Sapho leh Bengali ten min koh dan mai a nih thute a sawi a. Tuna chibing nihna kan sawi Mizo, Lai, Mara, Hmar, Kuki, Zomi, Hakha, Falam, Hualngo leh a dang tam tak hi kan hnam pum huapzo a ni lo. Kan za vai hian kan pu Zova thlah kal zelte kan nih avangin Zofate vek kan ni. Chuvangin kan hnam nihna dik tak chu Zofate (Descendants of Zo) ani tih hi khawvelah kan puan a, kan din chhuahpui a ngai a ni a ti. Pathianin hnam min din chhuah a tum tawh avangin chibing politics ban sana hnam pum politics kan bualpui tawh a ngai a ni a ti bawk.