SIR final Roll-ah voter 8,35,869 awm, Mipa aiin 29,690 in hmeichhe voter an tam zawk!

Aizawl | September 7, 2026: Special Intensive Revision (SIR) 2026 chu zawh fel a ni ta a. Vawiin khan Final Electoral Roll chu Mizoram pumah tlangzarh a ni a. Mizoram Chief Electoral Officer Garima Gupta chuan vawiin khan Aijal Club-ah press mite a kawm a, SIR 2026 final a tlangzarh a, puanzar tulte a sawi bawk.

SIR final Roll-ah voter 8,35,869 awmin, mipa 4,03,179 leh hmeichhhia 4,32,689 bakah third gender voter 1 a awm a. Mipa aia hmeichhe tamna hi 29,690 a ni.

Election Commission of India thupek No. 23/2025-ERS (Vol. II) dated 14th May, 2026 angin Mizorama District zawng zawngah Electoral Rolls, 2026 Special Intensive Revision (SIR) chu 20th May, 2026 atangin kalpui tan a ni a, Mizoram hi Special Intensive Revision Third Phase-a tel State 16 leh UT 2 zinga pakhat a ni.

SIR tan hma hian elector 8,75,068 an awm a, elector zawng zawng hi Enumeration Form pek vek an ni. Enumeration Form sem chhuah atang hian Form 8,28,906 lak khawm leh niin, Form 46,162 dawn let a ni lo.

SIR hnuaia Enumeration phase zawh hnuah 4th July, 2026 khan draft roll tih chhuah a ni a, an vaiin Electors 8,28,906 an awm. Electoral Registration Officer leh Asst. Electoral Registration Officer-te chuan 4th July atanga 2nd September thleng khan claim leh objection (Form 6, 7 leh 8) an dawngin an disposed a, hemi bakah hian Enumeration form dawn te chinfel a ni bawk a. Draft Roll-a elector 8,28,906 atangin elector 39,243 (4.73%) dah belh niin elector 32,280 (3.89%) paih an ni a, Final Roll- ah hian elector 6,963 (0.84%)-in an pun belh a ni.

Final Electoral Roll tih chhuah hun atan hian Election Commission of India chuan September 6, 2026 a ruahman zet a, mahse, Pathianni a nih avangin Chief Electoral Officer, Mizoram ngenna angin 7th September, 2026 (Monday)-ah Final Electoral Roll hi tih chhuah a ni ta a ni.

Vawiin 7th September, 2026-a Final Roll tih chhuahah hian voter 8,35,869 an awm a, chung zinga 4,03,179 chu mipa niin, 4,32,689 chu hmeichhia an ni a, third gender voter 1 a awm bawk a ni.

District hrang hranga elector dinhmun chu a hnuaia mi ang hi a ni –

District No. of Electors (Male, Female, TG) Total no. of electors SIR 2026 (Final published on 07.09.2026)

MAMIT 32,775 32,501 0 65,276

KOLASIB 28,804 31,139 0 59,943

AIZAWL 1,28,539 1,49,575 0 2,78,114

CHAMPHAI 27,578 28,920 0 56,498

SERCHHIP 26,496 28,420 0 54,916

LUNGLEI 48,206 48,966 0 97,172

LAWNGTLAI 45,440 45,275 0 90,715

SIAHA 21,881 23,293 1 45,175

SAITUAL 27,148 27,863 0 55,011

KHAWZAWL 8,688 8,839 0 17,527

HNAHTHIAL 7,624 7,898 0 15,522

State Total 4,03,179 4,32,689 1 8,35,869

Mizoram pumah Service Voter 4,103 awmin, mipa 4,010 leh hmeichhia 93 an awm.

Final Electoral Roll atanga chhinchhiah tlak thenkhat chu:

Voter tamna leh tlemna ber:

Assembly Constituency-a Elector tamna ber - 36 Tuichawng AC (ST),

Lawngtlai District-ah Elector 37,236 an awm.

Assembly Constituency-a Elector tlemna ber - 35-West Tuipui AC (ST),

Lunglei District-ah elector 14,667 an awm.

Elector punna/kiamna

Elector pun tamna ber chu 10-Aizawl North-I AC (ST) niin Draft Roll-a elector 25,472 awm chu Final Roll-ah elector 26,866 an ni a, elector 1,394-a pun belhin Draft Roll aia a tamna hi 5.47 % a ni.

Elector paih tamna ber 35-West Tuipui AC (ST) chu Draft Roll-ah elector 16,477 awmin Final Roll-ah 14,677 an awm a, elector 1,800-in an kiam a. Draft Roll aṭangin 10.9 % paih an ni.

Sex Ratio

12-Aizawl North-III AC (ST) chu sex ratio sanna ber niin mipa 1,000-ah hmeichhia 1,221 an awm a, Lunglei District-a 35-West Tuipui AC (ST) chu sex ratio hniamna ber niin mipa 1,000-ah hmeichhia 848 an awm.

Registration of the Electors Rules, 1960 Rule 27 leh Representation of the People Act, 1950 section 24(a) hnuaiah Electoral Registration Officer thutluknaa lungawi lo chuan Final Roll tih chhuah atanga ni 15 ral hmain District Magistrate hnenah an appeal thei ang.

Elector-te chu Electoral Roll-a an hming finfiah tur leh, a tul chuan online emaw offline mode hmangin luh thar (Form-6), siam that (Form-8), emaw paih (Form-7) dilna theh lut tura ngen an ni a. Inthlan kaihhnawih thil chiang zawka hre duh tan Office of the Joint Chief Electoral Officer, Phone number - 18003341950 (Toll Free)- ah biak theih a ni.

Office of the Chief Electoral Officer, Mizoram chuan mipui, political party, NGO leh media-te chungah thawhhona tha tak kan neih avangin lawmthu kan sawi tak meuh meuh a. Tin, election-a thawkte - District Election Officer leh an hnuaia thawk te, ERO, AERO, BLO leh eletoral roll buatsaihnaa inhnamhnawih zawng zawngte chu SIR, 2026 hlawhtlinna tura an thawhrimna leh inpeknaah fakawm kan tiin kan chhuang tak zet a ni.