RIPANS-ah ‘Bengngawngte Ni hmang’

Aizawl | Sept 28, 2026: ‘Bengngawng te Ni’ vawi 12na vawiin September 28, 2025 khan National Programme for Prevention & Control of Deafness (NPPCD), National Health Mission (NHM) leh RIPANS Hospital nen tangkawpin RIPANS Hospital, Zemabawk ah hman ni a, NHM Mission Director Dr R Lalchhuanawma chuan khuallian niin a hmanpui.

He programme hi Dr Robert L Khawlhring, Deputy Director (Prog.), DHME leh State Nodal Officer, NPPCD ni bawkin kaihhruai in Dr. H. Lalrinmawia, Medical Superintendent, RIPANS chu Khuallian zahawm a ni bawk.

Khuallian Dr. R. Lalchhuanawma chuan World Day of the Deaf hi kum 1958 September thla atang khan hman a lo ni tawh thin a. He Ni hian a tum ber chu Bengngawng te harsatna hriatthiam pui tur leh bengngawnna ti tlem tura mipui te hnena zirtirna zau zawk a theh darh hi a ni. Hei bakah hian Zaizir a inbiakna tun aia hman uar te, bengngawng te tan inkiltawihna ti zia awm tur a hmalak te hi a tum ber a nih thu a sawi.

WHO in a zir chianna ah chuan Bengngawnna hi kan thil hriatna 5 (sensory organs) zinga piansualna ah a tam ber a. Tunah hian khawvel pum pui ah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430 te chu an beng a ngawng a, tun ang zela kan kal chho anih chuan kum 2050 ah chuan mihring 10 zel ah 1 hi an beng a ngawng dawn a chhut a ni. Hetiang anih avang hian kan beng hi kan enkawl uluk a ngaiin bengngawnna thlentu hrang hrang lakah kan in ven fimkhur a ngai hle a. Beng natna chi hrang hrang bakah damdawi beng ri hriatna ti chaklo thei lakah te leh Ri bengchheng nasa lakah te kan inthiar fihlim a pawimawh hle a ni a ti.

He mi kawnga hma la tur hian National Programme for Prevention and Control of Deafness (NPPCD) chu kum 2014, August thla atang khan Mizoramah pawh National Health Mission hnuaiah din tan a ni a. Kumin April atanga July 2026 thlenga record in a tarlan danin NPPCD hnuaiah hian Damlo mi 11,435 en niin Bengngawng mi 428 enkawl an ni a, Beng harsatna nei mi 128 lai zai an ni bawk. Hei mai bakah hian Bengdar hi mi 22 hnenah pek a vuahsak nghal niin mi 777 chu bengdar dawng turin refer an ni bawk a ni. Hemi kawngah hian RBSK (Rashtriya Bal Swasthya Karyakram), NILD - NERC ALIMCO te nen bengdar sem kawngah hian an thawk ho mek bawk a ni.

Dr. H. Lalrinmawia, khual zahawm chuan Ripans nen day hman a ni chu lawmawm a tiin NPPCD lama thawktu te hmalakna ropui a tih thu a sawi a, nasa zawka thawhdun zel a duh thu a sawi. Thawktu te chu Bengdar vuah ngailo a mihringte kan awm theihnana hmalatu pawimawh tak an nih thu sawiin Pianphunga rualbanlo hrang hrang te hmusit lo a zah tur an nih thu a sawi a. Hmangaih taka enkawl tur an nih thu school naupangte hnenah a chah bawk.

Dr. Lalthanmawii Khalthang, Consultant chuan NPPCD hnathawh hrang hrang sawifiahna a nei a. NPPCD hnathawh te zing a pawimawh em em pakhat chu Awarerness Campaign leh Screening Camp neih hi a ni a, District 9 a NPPCD Staff te an District huamchhuangah a remchan dan apiangin he hun hi an hmang thin a ni. Hei hi a pawimawh na em em chu damdawiin kal remchang lo leh sum leh pai a harsatna nei te tan a thlawn vekin khawl hmangin beng an test sak thin a ni. April 2026 atanga July 2026 thlenga Free Clinic neih zat -56, Damlo en zat – 1455 leh Beng ri hriatna chaklo leh harsatna nei hmuhchhuah zat – 298 lai an nih thu a sawi bawk.

Dr. Lalramnghaki, MS ENT, RIPANS Hospital in thupui sawifiahna leh naupangte hnena zirtirna a nei a. Ms. Lalrinchhani, Audiologist,NPPCD, Civil Hospital, Aizawl leh Mrs. Jenny Lalbiaktlingi, Secretary, Ephatha Society ten thusawina an nei bawk.

Dr. Laura VL. Biakthangi, Dy. Medical Superintendent, RIPANS Hospital in kalkhawmte chungah lawmthu sawina a nei a. He Programme-ah hian Home Mission School, Ferrando High School, Lungbial Middle School leh Gov’t. Primary School-II naupang thahnem tak an tel a, Naupangte hriattur pawimawh tak tak zirtirna an pe a ni.