Pro Fight | Ngaihven hlawh 'Zo Awle' a inlan leh dawn; Oct 2-ah Quarter Final lut an inbuk dawn

Aizawl | Sept 21, 2026: Mizoram Labour Link LPS Pro Fight quarterfinal-a lutte October 3, inrinni zingah an inbuk tha leh vek dawn a, title chuh tur zawnna final October 13 zanah exhibition bout vawi hnih a awm tel ang.

Vawiinah LPS Office, Zarkawtah Chairman Lalsawmliana Pachuau kaihhruaiin Organising Committee thu khawmin Pro Fight vawi 12 tluang taka neih mek a nih avangin lawmawm an ti hle a, October 2, zirtawpniah weight hrang pangaah round of 16 khelh zawh a ni dawn a, ruahmanna an lo siam tawh angin a tuk inrinni zing dar 8-ah quarterfinal lut zawng zawng LPS Office, Zarkawtah an inbuk tha leh vek dawn a ni.

Champion lai panga zinga pathum - Lalrinngheta (flyweight), Lalkhawngaiha (lightweight) leh F Lalthanliana Junior (middleweight) te chu champion kawnghren humhim turin title fight-ah an inlan dawn avangin, weight pathumah hian title chuh tur zawnna final buatsaih a ni dawn ang. Bantam leh welter-ah champion lai Laldinsanga leh Lallawmawma'n champion kawnghren an humhim dawn lo ve thung a, weight pahnihah hian title chuh tur zawnna final a awm ve dawn loh avangin semifinal-a chakte title fight-ah an inlan nghal ang.

October 13, thawhlehni zanah title chuh tur zawnna final buatsaih a ni dawn a, hetah hian exhibition bout pahnih zeh tel a ni dawn a, hmeichhe boxing tihlar nan hmeichhe inhnek pakhat bakah mipui lawm hlawh 'Zo Awle' Lalremthanga Hmar inlan tura ruahman a ni.

Flyweight-ah kum 30 mi Sakawrdai boxer a tel a, September 8, thawhlehni Pro Fight tan zanah Khamsuana (Khawkawn) a hneh a; September 14, thawhtanni zanah a tum hnih nan inlanin Ratu rawlthar Malsawmtluanga lakah a chak zo ta lo a ni.

October 16, zirtawpni zanah Title Fight buatsaihin championship hmawrbawk a ni dawn a, heta inlan tur boxer tha 10 hi October 15, ningani zing dar 8-ah LPS Office-ah an inbuk dawn a ni.

PRO FIGHT : OCTOBER 2, INRINNIAH QUARTERFINAL LUTTE AN INBUK DAWN