"Mizo incheia incheiin Hindiin a zai theih, Hindiin a ṭawng theih. Hindi ṭawng kan thiam avanga kan mawng tihsawih vak vak kha a ṭulin ka hre lem lo! Kan culture nen Hindi hi i thiam ang u," ~ CM Lalduhoma

Aizawl | Sept 14, 2026: Mizoram Hindi Prachar Sabha buatsaiha Hindi Diwas (Hindi Ni) hmannaah vawiin khan CM Lalduhoma chuan, "Mizo incheia incheiin Hindiin a zai theih, Hindiin a ṭawng theih, ṭawng thiam kha kan duh a ni mai. Hindi kan thiam avanga kan mawng tihsawih vak vak kha a ṭulin ka hre lem lo!" a ti.

CM chuan, "Kan culture hi chu kan humhim tur a ni. Masihi Sanghati te pawh Biak inah an zai ṭhin a, vai incheiin an rawn inchei kher kher hi kei chuan ka hrethiam lo a ni. An ṭawng thiam kha a ṭul kan ti a ni," a ti a.

"Vawiinah pawh kan item tam ber hi hnam dang culture kan show a ni, mizo culture a leng tawh lo. Hetiang a nih chuan, hindi kan thiam rualin assimilation ah kan lut ang a, kan sakhuana thleng hian a la hliau phak mai ang tih hi ka hlau rum rum a ni. Chuvangin, tawng thiam kha a tawk, kan culture nen Hindi hi i thiam ang u," tiin kal khawmte a chah.

Hindi Diwas hi Dawrpui Multipurpose Centre-ah hman a ni a, Zirlai zirlai hrang hrang bakah sikul ṭhahnem tak an tel a. School education minister Dr Vanlalthlana chu khualzahawm niin thu a sawi a, MHPS president RB Lalmalsawma pawhin thu a sawi a ni.