World Photography Day pualin Mizo Photographers’ Society chuan ni 3 awh Photography Exhibition an buatsaih

Aizawl | August 19, 2026: Mizo Photographers’ Society-ten World Photography Day 2026 puala Photography Exhibition an buatsaih chu Information & Public Relations Director K Vanlalsangi'n vawiin chawhma khan a hawng.

August ni 19 atanga ni 21 thleng awh tur Photography Exhibition hawnna ah hian I&PR Director K Vanlalsangi chuan Mizoram chhunga thla la thiam, thla lak lama tui leh eizawn nana hmangte luan khawmna pawl lian ber Mizo Photographers’ Society chu Sawrkar hmalakna hrang hrangah pawl tangkai tak a nih thu a sawi a. Mizoram Sawrkar Calendar kaltlanga Mizoram leilung mawina leh pipute sulhnu pawimawh tak tak phochhuahna kawnga hmanraw tangkai tak an nih thu a tarlang. I&PR Director chuan Mizo Photographers’ Society dinna tura hruaitu hmasa, sulsutute thahnemngaihna chhawm nung reng chunga MPS member-ten pawl an la inkaihruai chhunzawm zel chu fakawm a tih thu a sawi a. ‘Photographic Documentation on Mizo Cultural Dances’, mizo hnam lam leh thuam hrang hrang vawnthat tura lakkhawm hna hlawhtling taka an kalpui chu hnam ziarang humhimna leh chawisanna kawngah thil tangkai tak a nih tur thu a sawi a. Exhibition hlawhtling tak kalpui a nih theih nan duhsakna a hlan nghal bawk a ni.

World Photography Day 2026 puala Photography Exhibition hawnna hun hi MPS Finance Secretary Lalnuntluanga chuan kaihruaiin General Secretary Zothankhuma'n report tawi a pe a. President H Lalchhanhima chuan member thar lawm luhna hun hmangin MPS buatsaih, ‘National Open Photography Competition’ lawmman semna hun hman a ni bawk.

MPS General Secretary Zothankhuma tarlan danin MPS hi December ni 4, 2012 khan din a ni a. Kum 2013 atang khan World Photography Day puala hun hman hi kalpui tan a ni a, tunah hian member 92 an awm mek a ni. National Open Photography Competition an buatsaihah hian mi 224 atangin thlalak 567 a lut a. 1st Prize - Zarzoliana, Mizoram, 2nd Prize – Shibasish Saha, West Bengal, 3rd Prize – Litan Das, West Bengal-te an ni a. Mi pathum hnenah Consolation prize pek an ni bawk.